کراچی: (ویب ڈیسک) میئر اور ڈپٹی میئر کراچی کے لئے انتخاب آج ہوگا، پاکستان پیپلز پارٹی ( پی پی پی ) کی جانب سے مرتضیٰ وہاب جبکہ جماعت اسلامی ( جے آئی ) کی طرف سے حافظ نعیم الرحمان مدمقابل ہوں گے۔
کراچی میں متوقع بارشوں کے پیش نظر الیکشن کمیشن سندھ نے کے ایم سی بلڈنگ کے بجائے آرٹس کونسل کے آڈیٹوریم کو پولنگ سٹیشن کا درجہ دیا ہے جہاں شو آف ہینڈ کے ذریعے پولنگ صبح 11 بجے شروع ہوگی جبکہ حتمی نتائج کا اعلان کل کیا جائے گا۔
صوبائی الیکشن کمشنر اعجاز انور چوہان کا کہنا ہے کہ پولیس کی بھاری نفری پولنگ سٹیشن کے اندر اور باہر موجود ہوگی جبکہ ریٹرننگ آفیسر ( آر او ) اور ڈپٹی ریٹرننگ آفیسر ( ڈی آر ) کو فرسٹ کلاس مجسٹریٹ اختیارات دیئے گئے ہیں۔
میئر کا عہدہ حاصل کرنے کیلئے 184 نشستیں درکار ہوں گی، اس وقت سٹی کونسل میں پیپلز پارٹی کے ارکان کی تعداد 155، جماعت اسلامی 130، پاکستان تحریک انصاف ( پی ٹی آئی ) 62، مسلم لیگ (ن) 14، جمعیت علماء اسلام ( جے یو آئی ) 4 اور تحریک لبیک پاکستان ( ٹی ایل پی ) کی 1 نشست ہے۔
366 کے ایوان میں میئر کے انتخاب کیلئے انہی ممبران کی اکثریت درکار ہے جو اس وقت ہال میں موجود ہونگے، پیپلز پارٹی کو نون لیگ اور جے یو آئی کی حمایت حاصل ہے اس طرح ان کے ووٹرز کی کل تعداد 173 ہے۔
جماعت اسلامی اور پاکستان تحریک انصاف ( پی ٹی آئی ) کے مشترکہ ممبران 192 ہیں جو میئر کی کرسی حاصل کرنے کیلئے کافی تھے مگر پی ٹی آئی کے کچھ امیدواروں نے ووٹ نہ دینے کا اعلان کیا ہے جس کی وجہ سے صورتحال تبدیل ہو سکتی ہے۔
وزارت داخلہ نے الیکشن کیلئے رینجرز کی تعیناتی کی منظوری دے دی ہے اور وزارت داخلہ کی جانب سے جاری اعلامیے میں کہا گیا ہے کہ سندھ رینجرز کو بطور کوئیک رسپانس فورس میئر اور ڈپٹی میئر کے الیکشن کیلئے تعینات کیا جائے گا۔

کراچی : (ویب ڈیسک) امیر جماعت اسلامی کراچی حافظ نعیم الرحمان نے کہا ہے کہ کراچی کے مینڈیٹ پر ڈاکا پیپلز پارٹی کے لیے اچھا نہیں ہوگا، میئر کا الیکشن ایک رسمی الیکشن ہونا چاہیے، جماعت اسلامی سب کو ساتھ لے کر چلتی ہے۔
کراچی میں پریس کانفرنس کرتے ہوئے حافظ نعیم الرحمان کا کہنا تھا کہ 15 جنوری سے ہی کراچی کے مینڈیٹ پر ڈاکا ڈالنے کا آغاز ہوگیا تھا، میئر کراچی کے انتخاب سے پہلے بلدیاتی نمائندوں کو اغوا کیا گیا ہے، اقلیتی نشست پر منتخب پی ٹی آئی کے اقلیتی نمائندے کے گھر پر بھی چھاپا مارا گیا۔
انہوں نے کہا کہ عوام نے بلدیاتی انتخابات میں سب سے زیادہ ہمیں ووٹ دیئے ہیں، منتخب نمائندوں کو محفوظ طریقے سے ایوان میں پہنچانے کا انتظام کرلیا ہے، کراچی کے لوگ پیپلز پارٹی سے نفرت کرتے ہیں، ہم 9 ٹاؤن بدترین دھاندلی کے باوجود جیت چکے ہیں، کیا وجہ ہے کہ پیپلز پارٹی کہتی ہے ہمارا میئر آئے گا۔
ان کا مزید کہنا تھا کہ منتخب نمائندوں کو گرفتار اور اغوا ہی کرنا ہے تو مجھے ہی گرفتار کرلیں، الیکشن کمیشن کا کام شفاف انتخابات کرانا ہے، تاہم الیکشن کمیشن کو پتا نہیں چلتا کہ یہ کیا ظلم ہورہا ہے۔

کراچی : (ویب ڈیسک) بحیرہ عرب کے سمندری طوفان ’ بپر جوائے ‘ کا رخ تبدیل ہو گیا، کراچی کے ساحل سے دور ہونے لگا تاہم آج دن 11 بجے پاکستانی حدود میں داخل ہوگا اور کیٹی بندر سے ٹکرائے گا۔
محکمہ موسمیات کے مطابق طوفان اب کراچی سےتقریباً 275 کلومیٹر دور، ٹھٹھہ سے 300، کیٹی بندر سے 240 کلومیٹر کے فاصلے پر ہے، اس وقت طوفان کے مرکز کے گرد ہواؤں کی رفتار تقریباً 150 کلومیٹر فی گھنٹہ جبکہ لہروں کی اونچائی 30 فٹ ہے، اس وقت “بپرجوائے” شمال، شمال مشرق کی سمت بڑھ رہا ہے۔
محکمہ موسمیات کی پیش گوئی کے مطابق آج شام کو طوفان کیٹی بندر اور بھارتی گجرات کے درمیان کسی مقام پر ٹکرائے گا، طوفان ساحل سے ٹکرانے کے وقت ہواؤں کی رفتار 100 سے 120 کلو میٹر فی گھنٹہ ہوسکتی ہے جبکہ 140 کلو میٹر فی گھنٹہ کی رفتار سے جھکڑ بھی چل سکتے ہیں۔
سمندری طوفان کے باعث منوڑہ جانے والا زمینی راستہ بھی منقطع ہوچکا ہے جبکہ ہاکس بے کے سمندر میں طغیانی بڑھ گئی ہے۔
ٹھٹھہ ،بدین اور دیگر اضلاع میں تیز ہواؤں کے جھکڑ، ایمر جنسی نافذ، شہر قائد میں بوندا باندی، کیٹی بندر کو خالی کرالیا گیا، گڈانی میں بھی لہریں انتہائی بلند، مزید موسلا دھار بارشوں کا خطرہ ہے۔
این ڈی ایم اے
نیشنل ڈیزاسٹر مینجمنٹ اتھارٹی (این ڈی ایم اے ) کی جانب سے متعلقہ اداروں کو مقامی زبان میں سمندری طوفان سے متعلق آگاہی مہم کی ہدایت کی گئی ہے۔
این ڈی ایم اے کا کہنا ہے کہ عوام موسمیاتی حالات سے آگاہ رہیں اور ساحل پر جانے سے گریز کریں، ماہی گیر کھلے سمندر میں کشتی رانی سے بھی گریز کریں، ہنگامی صورتحال میں مقامی انتظامیہ کی ہدایات پر عمل اور ان سے تعاون کریں۔
کمشنر کراچی نے شہریوں کے ساحل سمندر پر جانے، ماہی گیری، کشتی رانی، تیراکی اور نہانے پر طوفان کے خاتمے تک کسی بھی ممکنہ خطرے کے پیش نظر پابندی عائد کر رکھی ہے۔
انخلا کا عمل جاری
انتظامیہ، پاکستان نیوی اور آرمی کی جانب سے ساحلی علاقوں میں امدادی کارروائیاں جاری ہیں، نیوی کے غوطہ خوروں نے سمندر میں پھنسے درجنوں ماہی گیروں کو بحفاظت ریسکیو کرلیا۔
ساحلی علاقوں سے 73 ہزار سے زیادہ افراد کو محفوظ مقامات پر منتقل کردیا گیا ہے، ہدایات کے باوجود بعض افراد اب بھی ساحلی علاقوں میں موجود گھر بار چھوڑنے سے انکار کر رہے ہیں۔
بلوچستان کی ساحلی پٹی پر بھی ہائی الرٹ
دوسری جانب سمندری طوفان کے خدشے کے پیش نظر بلوچستان کی ساحلی پٹی پر بھی ہائی الرٹ جاری کر دیا گیا۔
بپر جوائے کے ممکنہ خدشے کے باعث دفعہ 144 نافذ کر دی گئی، متعلقہ محکموں کے ملازمین کی چھٹیاں منسوخ کر دی گئیں، جبکہ ہسپتالوں میں بھی ہائی الرٹ جاری کر دیا گیا ہے۔
وزیراعلیٰ بلوچستان کا کہنا ہے کہ کمشنر مکران اور قلات طوفان سے نمٹنے کے اقدامات کی نگرانی کریں، ماہی گیر سمندر کو سب سے بہتر سمجھتے ہیں ان سے صورتحال پر مشاورت کی جائے۔
وزیراعلیٰ کو ڈی جی پی ڈی ایم اے کی جانب سے متوقع صورتحال کے مطابق امدادی سرگرمیوں کی تیاری پر بریفنگ دی گئی، ڈی جی پی ڈی ایم اے اپنی ٹیم، مشنری اور امدادی سامان کے ساتھ گوادر میں موجود ہیں۔
وزیراعلیٰ نے ہدایت کی کہ صورتحال کی مسلسل نگرانی کرتے ہوئے اس کے مطابق لائحہ عمل مرتب کیا جائے، سمندری طوفان میں ہر قسم کی ہنگامی صورتحال سے موثر طور پر نمٹنے کی تیاری مکمل رکھی جائے۔

`پشاور (ویب ڈیسک) روس سے آنے والے ایل پی جی کنٹینرز پاک افغان بارڈر پر پھنس گئے، ایل پی جی کے کنٹینرز 14روز بعد بھی کلیئرنس نہ مل سکی، کنٹینرز تاحال افغان سرزمین پر موجود ہیں۔ روس سے آنے والے ایل پی جی سے بھرے کنٹینرز 14روز سے کلیئرنس نہ ہونے کی وجہ سے پاک افغان بارڈر پر پھنسے ہوئے ہیں، کنٹینرز تاحال افغان سرزمین پر موجود ہیں۔
دستاویزات مکمل نہ ہونے کے باعث ایل پی جی کنٹینرز کو کلیئرنس ملنے میں مشکلات کا سامنا ہے، ایل پی جی کے 21کنٹینرز ہیں، جو 14روز پہلے افغانستان میں پاک افغان بارڈر پر پہنچے ہیں،ان کنٹینرز کو ٹرین کے ذریعے یہاں تک پہنچایا جارہا تھا،بتایا گیا ہے کہ بارڈر کا نظام نیا ہے جس کی وجہ سے کلیئرنس مشکلات کا سامنا ہے، چینی کرنسی میں ادائیگی کی وجہ سے بھی کلیئرنس میں مسئلہ بن رہا ہے۔
کسٹمز حکام کا کہنا ہے کہ آج 10کنٹینرز پاکستان میں داخل ہوجائیں گے۔ یاد رہے گزشتہ روز کی نیوزایجنسی کی ایک خبر کے مطابق روسی خام تیل کے بعد ایل پی جی گیس کے 10 کنٹینرز پاکستان پہنچ چکے ہیں۔ گیس ازبکستان تک ریل کے ذریعے پہنچائی جاتی ہے، جسے ایران اور افغانستان سپلائی کیا جاتا ہے تاہم اب لسٹ میں پاکستان بھی شامل ہوگیا۔ تفصیلات کے مطابق خیال رہے کہ چند روز قبل روس سے خام تیل کا پہلا جہاز کراچی پہنچ گیا ہے، 183 میٹر لمبے جہاز میں 45 ہزار میٹرک ٹن تیل لایا گیا تھا۔
جبکہ وزیر مملکت برائے پٹرولیم مصدق ملک نےنجی ٹی وی سے خصوصی گفتگو کرتے ہوئے بتایا تھا کہ تسلسل سے روسی تیل آنا شروع ہوجائے تو قیمتوں میں بڑا فرق آئے گا، روس سے تیل خریدنے کا معاہدہ عوام کو سستا تیل فراہم کرنا ہے، اگلے ہفتے دوسرا جہاز بھی پہنچ جائے گا۔ واضح رہے کہ روس سے تیل، گیس اور توانائی کے دیگر ذرائع برآمد کرنے کے لیے رواں سال جنوری میں معاہدے ہوئے تھے۔