جینیوا: (ویب ڈیسک) اقوام متحدہ کے ادارہ برائے مہاجرین نے کہا ہے کہ دنیا بھر سے 11 کروڑ افراد زبردستی اپنے آبائی گھر چھوڑ کر نقل مکانی پر مجبور ہوئے۔
خبر رساں ادارے کے مطابق اقوام متحدہ کے ادارہ برائے مہاجرین (یو این ایچ سی آر) نے کہا ہے کہ یوکرین جنگ، افغانستان سے آنے والے مہاجرین اور سوڈان میں جاری جنگ کی وجہ سے مہاجرین کی تعداد میں اضافہ ہوا ہے جبکہ اپنے ہی ملکوں میں بے گھر ہونے والے افراد کی تعداد میں بھی غیرمعمولی اضافہ ہواہے ۔
اقوام متحدہ کے ادارہ برائے مہاجرین نے اپنی سالانہ رپورٹ میں کہا ہے کہ گزشتہ سال کے اواخر میں بے گھر ہونے والے افراد کی تعداد دس کروڑ 84 لاکھ تھی، جبکہ سال 2021 کے بعد اس تعداد میں ایک کروڑ 91 لاکھ کا اضافہ ہوا جو، اب تک ہونیوالا سب سے بڑا اضافہ ہے۔
سوڈان میں جاری تنازعات سے بھی بے گھر افراد کی تعداد میں مزید اضافہ ہوا ہے جس کے بعد رواں سال مئی تک یہ تعداد 11 کروڑ تک پہنچ گئی ہے۔
یو این ایچ سی آر کے سربراہ فلیپو گرانڈی نے جنیوا میں پریس بریفنگ سے خطاب کرتے ہوئے کہا کہ 11کروڑ افراد لڑائی، ظلم، امتیازی سلوک، تشدد اور دیگر وجوہات بالخصوص ماحولیاتی تبدیلیوں کے باعث نقل مکانی پر مجبور ہوئے۔
انہوں نے تارکین وطن کے ساتھ ہونیوالے سلوک پر تبصرہ کرتے ہوئے کہا کہ ان ممالک کی قیادت کو مہاجرین کے حق میں عوامی رائے قائم کرنی چاہیے اور بتانا چاہیے کہ لوگ بین الاقوامی تحفظ کا حق رکھتے ہیں۔
انہوں نے کہا کہ پناہ گزینوں کے لیے یورپی یونین، امریکہ اور برطانیہ کے دروازیں کھلے رہنے چاہیے ، لوگوں کو وہاں پناہ لینے کا اختیار حاصل ہونا چاہیے جہاں وہ محفوظ محسوس کرتے ہیں۔

نئی دہلی: (ویب ڈیسک) بھارتی محکمۂ موسمیات نے طوفان بپرجوائے کے ممکنہ خطرات کے پیش نظر ریاست گجرات کے ضلع کچھ اور سورا شٹرا میں ریڈ الرٹ جاری کر دیا۔
بھارتی میڈیا رپورٹس کے مطابق بھارتی محکمۂ موسمیات کا کہنا ہے کہ طوفان بپرجوائے کل شام گجرات کی جاکھوا پورٹ کو عبور کرے گا ، طوفان کے زیرِ اثر کچھ کے منڈوی ساحل پر آج بھی تندو تیز ہوائیں اور اونچی لہریں بن رہی ہیں۔
بھارتی میڈیا کاکہنا ہے کہ ممبئی کے ساحل پر بھی طوفان کے زیر اثر طغیانی ہے اور اونچی لہریں پیدا ہو رہی ہیں۔
بھارتی شہر پور بندر میں شدید بارش اور تیز ہواؤں کے باعث درخت اکھڑ گئے ، گجرات کے ساحلی علاقوں سے 37 ہزار سے زائد افراد کا انخلاء کرا لیا گیا ہے۔
بھارتی میڈیا کے مطابق طوفان کے باعث گجرات میں ٹرینوں کی آمدورفت بھی متاثر ہوئی ہے اور کئی ٹرینیں معطل کردی گئی ہیں۔
دوسری جانب ممبئی میں طوفان کے زیر اثر ہواؤں کی وجہ سے متعدد پروازیں منسوخ کر کے رن ویز بند کر دیئے گئے ہیں اور شہر میں یلو الرٹ جاری کیا گیا ہے۔

باکو: (ویب ڈیسک) افریقی ملک مالی میں دوبسوں اور ٹرک کے مابین تصادم میں 15 افراد ہلاک او ر 32زخمی ہوگئے۔
غیر ملکی میڈیا کے مطابق مالی کی وزارت ٹرانسپورٹ اور انفراسٹرکچر نے اس حوالے سے بتایا ہے کہ حادثہ صبح چار بجے پیش آیا جہاں سیگو شہر میں دو بسیں مویشی لے جانے والے 10 ٹن وزنی ٹرک سے ٹکرا گئیں جس کے نتیجے میں 15افراد ہلاک اور 32زخمی ہوگئے۔
انہوں نے کہا کہ زخمی افراد کو ہسپتال منتقل کردیا گیا جن میں سے کچھ کی حالت تشویش ناک ہے۔
حکام کاکہنا ہے کہ ابتدائی معلومات کے مطابق حادثہ ڈرائیور کی تیزرفتاری اور غفلت کے باعث پیش آیا ۔
واضح رہے کہ مالی میں اکثر وبیشتر ٹریفک حادثات پیش آتے رہتے ہیں ،رواں برس 25 فروری کو ایک منی بس الٹنے سے 21 طلباء جان کی بازی ہار گئے تھے ۔

بیجنگ: (ویب ڈیسک) بین الاقوامی انسانی حقوق فورم گلوبل ہیومن رائٹس گورننس کا2روزہ اجلاس آج (بدھ) سے چین کے دارالحکومت بیجنگ میں شروع ہو گا۔
چینی خبر رساں ادارے کے مطابق تو قع ہے کہ اجلاس میں تقریباً 100 ممالک اور اقوام متحدہ کی ایجنسیوں سمیت بین الاقوامی تنظیموں کے 300 سے زیادہ نمائندے شرکت کریں گے۔
فورم کا موضوع ’’مساوات، تعاون اور ترقی: ویانا اعلامیہ اور پروگرام آف ایکشن اینڈ گلوبل ہیومن رائٹس گورننس کی 30 ویں سالگرہ‘‘ ہے۔
افتتاحی اور مکمل اجلاسوں کے علاوہ 5 متوازی سیشن منعقد کیے جائیں گے جن میں بین الاقوامی تعاون اور عالمی انسانی حقوق کی حکمرانی، عالمی سلامتی اور انسانی حقوق کا تحفظ، اقوام متحدہ کے انسانی حقوق کا طریقہ کار اور ڈیجیٹل دور میں عالمی انسانی حقوق کے تحفظ پر توجہ مرکوز کی جائے گی۔
فورم کی مشترکہ میزبانی ریاستی کونسل کے انفارمیشن آفس، وزارت خارجہ اور چائنا انٹرنیشنل ڈویلپمنٹ کوآپریشن نے مشترکہ طور پر کیا ہے۔