اسلام آباد: (ویب ڈیسک) وزیراعظم میاں شہباز شریف کی زیر صدارت مسلم لیگ ن کے اعلیٰ سطح اجلاس کی اندرونی کہانی سامنے آگئی۔
ذرائع کے مطابق نواز شریف کی وطن واپسی کے لیے متفقہ فیصلہ کر لیا گیا، قائد مسلم لیگ ن کی وطن واپسی کی تاریخ کا اعلان لندن سے ہو گا۔
شہباز شریف کی زیر صدارت اجلاس میں فیصلہ کیا گیا ہے کہ نواز شریف کی سزا کالعدم کرانے کے لئےاسلام آباد ہائیکورٹ میں فیصلہ فوری چیلنج کیا جائے گا۔
نواز شریف کے کیس کو مریم نواز اور کیپٹن (ر) صفدر کے اسلام آباد ہائیکورٹ سے حق میں فیصلے کو بنیاد بنایا جائے گا، نواز شریف کی سزا کے فیصلے کو کالعدم کرانے کی آپشن پر قانونی ماہرین نے اپنی رائے بھی دے دی۔
ذرائع نے مزید بتایا ہے کہ ن لیگ کی جانب سے رابطہ عوام مہم کے سلسلے میں پنجاب کے 9 ڈویژن میں جلسے رکھے جائیں گے، مریم نواز کی وطن واپسی کا بھی قوی امکان ہے۔
ن لیگ کا رواں ماہ پارٹی انتخابات کرانے کا بھی فیصلہ کیا گیا جبکہ پارٹی قیادت کے حوالے سے بھی اہم فیصلے لیے جانے کا امکان ہے۔

اسلام آباد: (ویب ڈیسک) وزیر اعظم نے معاون خصوصی طارق فاطمی کو معاون خصوصی کوآرڈنیشن تعینات کر دیا۔
وزیر اعظم شہباز شریف کی منظوری کے بعد کابینہ ڈویژن نے نوٹیفکیشن جاری کر دیا، معاون خصوصی طارق فاطمی کا عہدہ وزیر مملکت کے برابر ہوگا۔
قبل ازیں وزیر اعظم نے اپریل میں طارق فاطمی کو معاون خصوصی خارجہ امور تعینات کیا تھا، طارق فاطمی سے چند گھنٹے بعد ہی خارجہ امور کا قلمدان واپس لے لیا گیا تھا۔ تقریبا 8 ماہ سے طارق فاطمی بغیر کسی قلمدان کے معاون خصوصی تھے۔

کراچی: (ویب ڈیسک) سندھ ہائیکورٹ نے مزید مقدمات میں پی ٹی آئی سینیٹر اعظم سواتی کو گرفتار کرنے سے روک دیا۔
اعظم سواتی کے بیٹے عثمان سواتی نے والد کی سندھ میں گرفتاری کے خلاف نئی درخواست دائر کی تھی جس کی فوری سماعت کی استدعا کی گئی تھی۔
سندھ ہائیکورٹ نے عثمان سواتی کی درخواست کو فوری سماعت کے لئے منظور کیا جس پر جسٹس کے کے آغا کی سربراہی میں 2 رکنی بینچ نے سماعت کی، عدالت نے درخواست پر مختصر سماعت کے بعد مزید مقدمات میں اعظم سواتی کو گرفتار کرنے سے روک دیا۔
سندھ ہائی کورٹ نے عثمان سواتی کی دونوں درخواستوں کو یکجا کرنے کی ہدایت کرتے ہوئے آئی جی سندھ اور پراسیکیوٹر جنرل سندھ کو نوٹسز جاری کردیئے۔
عدالت نے پراسیکیوٹر جنرل سندھ سے 14 دسمبر تک جواب طلب کرتے ہوئے سماعت بدھ تک ملتوی کردی۔
واضح رہے کہ پی ٹی آئی رہنما اعظم سواتی متنازع ٹوئٹ کے کیس میں گرفتار ہیں جنہیں گزشتہ ہفتے سندھ پولیس نے گرفتار کیا اور انہیں بلوچستان سے سکھر منتقل کیا گیا۔

پشاور: (ویب ڈیسک) وزیر اعلیٰ خیبرپختونخوا محمود خان نے کہا ہے کہ خیبرپختونخوا کا جو حصہ ہے وہ ہمیں دیا جائے ورنہ ہماری حکومت ڈیفالٹ کر جائے گی۔
وزیر اعلیٰ محمود خان نے کہا کہ ہم تنخواہیں نہیں دے پا رہے، جب سے وفاقی حکومت آئی ہے ہم اس وقت سے مشکل سے گزر رہے ہیں، ہمیں فاٹا کے صحت کارڈ کے پیسے نہیں مل رہے، کے پی کا جو حصہ ہے اور جو وفاق پر ہمارے بقایا جات ہیں وہ ہمیں دیئے جائیں۔
انہوں نے کہا کہ وفاقی حکومت ہمیں دیوار سے لگانے کی کوشش کر رہی ہے، خیبرپختونخوا کا جو حصہ ہے وہ ہمیں دیا جائے ورنہ ہماری حکومت ڈیفالٹ کر جائے گی۔ سیلاب میں ہمارے صوبے کے لئے 10 ارب کا اعلان ہوا جس میں سے ایک پائی بھی ہمیں نہیں دی گئی، کیا خیبرپختونخوا پاکستان کا حصہ نہیں ہے۔
ان کا مزید کہنا تھا کہ ہم نے مالی مسائل کے بارے میں وفاقی حکومت کے ساتھ بات کرنے کی کوشش کی لیکن وفاقی حکومت مالی اعتبار سے ہماری کوئی مدد نہیں کر رہی۔ ہمارے پاس تمام آپشنز موجود ہیں، کچھ پتے ہم نے دکھا دیئے ہیں کچھ پاس موجود ہیں جو بعد میں دکھائیں گے۔

اسلام آباد: (ویب ڈیسک) تحریک انصاف کے رہنما اسد عمر کا کہنا ہے کہ اس امپورٹڈ حکومت نے ملک کی جڑیں ہلادی ہیں۔
سماجی رابطے کی ویب سائٹ ٹوئٹر پر پیغام میں رہنما تحریک انصاف اسد عمر نے کہا کہ تاریخ میں پہلی بار 4اکائیوں کا وفاق کے خلاف احتجاج ہوا۔
انہوں نے حکومت پر تنقید کرتے ہوئے لکھا کہ خیبر پختونخوا ،گلگت بلتستان،پنجاب اور آزاد کشمیر سب حق تلفی کے خلاف احتجاج کررہے ہیں۔

اسلام آباد: (ویب ڈیسک) قائداعظم یونیورسٹی کی زمین پر بہارہ کہو بائی پاس کی تعمیر کے خلاف درخواست خارج کر دی گئی۔
اسلام آباد ہائیکورٹ نے قائداعظم یونیورسٹی کے پروفیسرز کی درخواست خارج کر دی، یونیورسٹی کی زمین پر پراجیکٹ کی تعمیر کے خلاف حکم امتناع بھی خارج کر دیا گیا ہے۔
اسلام آباد ہائیکورٹ کے جسٹس میاں گل حسن اورنگزیب نے فیصلہ سنایا، واضح رہے عدالت نے فریقین کے دلائل سننے کے بعد فیصلہ محفوظ کیا تھا۔