امریکا: (ویب ڈیسک) چاند کا چکر لگا کر ناسا کے اورائن خلائی جہاز کی 26 دن بعد زمین پر واپسی ہو گئی ہے۔
امریکی خلائی ایجنسی کا اورین خلائی کیپسول چاند کے گرد 26 دن کا سفر مکمل کرکے کامیابی سے واپس زمین پر اتار لیا گیا ہے، مشن کو 3 پیرا شوٹ کی مدد سے بحرالکاہل میں اتارا گیا۔ کیپسول کی ٹیسٹ پرواز میں کوئی شخص سوار نہیں تھا تاہم آئندہ 2 سے 3 برس میں مشن کے ذریعے زمین سے شہریوں کو چاند کی سطح پر لانے لے جانے کے لیے استعمال کیا جائے گا۔
یہ ایک آزمائشی پرواز تھی اس لیے اس میں کوئی لوگ موجود نہیں تھے مگر ڈیٹا اکٹھا کرنے کے لیے سینسرز کے حامل کچھ پتلے رکھے گئے تھے۔
ناسا اپنے اس مشن کے ذریعے انسانوں کو تقریباً نصف صدی کے بعد دوبارہ چاند کی سطح پر اتارنے کی پلاننگ کر رہا ہے، اورائن کی بیرونی تہہ گذشتہ خلائی جہازوں کے مقابلے میں ایک نیا ڈیزائن ہے اور اس آزمائشی پرواز سے ناسا کا ایک مقصد اسے ٹیسٹ کرنا بھی تھا تاکہ جب خلاباز اس میں سفر کریں تو وہ محفوظ رہیں۔
بی بی سی اردو کی رپورٹ کے مطابق چاند پر اترنے کا نیا لینڈنگ سسٹم ایلون مسک کی کمپنی سپیس ایکس ناسا کے لیے بنا رہی ہے۔ وہ سٹارشپ کہلانے والا ایک بڑا راکٹ بنا رہے ہیں جو آنے والے چند مہینوں میں زمین کے اوپر اپنی پہلی پرواز کرے گا۔
ارادہ یہ ہے کہ آرٹیمس تھری مشن میں اورائن خلائی جہاز چاند کے قریب سٹارشپ سے ملے گا جہاں سے ایلون مسک کا خلائی جہاز خلابازوں کو چاند کی سطح پر اتارے گا۔
ناسا کے خلائی جہاز کی زمین پر واپسی
