لاہور: (ویب ڈیسک) سپیکر قومی اسمبلی اور سابق وزیر اعظم راجہ پرویز اشرف نے کہا ہے کہ سیاست میں ٹھہراؤ آنا چاہیے، ملک کو درپیش تمام چیلنجز سے نمٹنے کا واحد فورم صرف پارلیمنٹ ہے۔
سپیکر قومی اسمبلی راجہ پرویز اشرف نے جنرل سیکرٹری پیپلز پارٹی وسطی پنجاب سید حسن مرتضیٰ کی جانب سے ان کے اعزاز میں دیئے گئے ناشتے کے بعد میڈیا سے گفتگو کرتے ہو ئے کہا کہ ملک کو درپیش مسائل کے حل کے لئے تمام سیاسی جماعتوں کو ایک پلیٹ فارم پر اکٹھا ہونے کی ضرورت ہے، ہم سب کو متحد ہو کر پاکستان کو آگے لے کر جانا ہے۔
انہوں نے کہا کہ ملکی مشکلات کا حل صرف پارلیمان کے پاس ہے، پارلیمان کو نظرانداز کرنے سے ملک میں غیر یقینی کی صورت حال پیدا ہوتی ہے، تمام ممبران پارلیمنٹ میں آ کر اپنے حلقوں کی نمائندگی کریں، ماضی کی حکومتوں کی طرح موجودہ حکومت کو بھی اپنی آئینی مدت پوری کرنی چاہیے۔ تمام سیاسی جماعتوں کو مل کر معیشت کو سہارا دینے کے لئے اپنا کردار ادا کرنا ہو گا، ہمیں قانون سازی کے ساتھ ساتھ قانون کی عملداری کو بھی یقینی بنانا ہے۔
ایک سوال کے جواب میں انہوں نے کہا کہ پاکستانی سیاست میں ٹھہراؤ آنا چاہیے، استعفے منظور کرنے کے قواعد و ضوابط موجود ہیں، قانون کہتا ہے کہ اگر کوئی ممبر اسمبلی دباؤ میں آ کر استعفیٰ دے تو اسے قبول نہ کیا جائے، حکومت کی طرح اپوزیشن بھی بہت ضروری ہے، اگر عمران خان چاہتے ہیں کہ الیکشن صاف اور شفاف ہوں تو وہ قانون سازی میں حصہ لیں۔
اس موقع پر جنرل سیکرٹری پیپلز پارٹی وسطی پنجاب حسن مرتضیٰ نے گفتگو کرتے ہوئے کہا کہ پی ٹی آ ئی حکومت کے پونے 4 سالہ دور کی کرپشن کی داستانیں زبان زد عام ہیں، تحریک انصاف کے دور میں ریکارڈ کرپشن ہوئی، لاہور میں نیا شہر بسانے کے چکر میں کسانوں کی فصلیں تباہ کر دی گئیں۔ وزیر اعلیٰ پنجاب پرویز الٰہی کا فوکس صرف اپنے اضلاع پر ہے جبکہ عمران خان پارلیمانی نظام ختم کر کے صدارتی نظام نافذ کرانا چاہتے ہیں۔

لاہور: (ویب ڈیسک) پنجاب فوڈ اتھارٹی کی ٹیموں نے جعلی دودھ تیار کرنے والے مافیا کے خلاف کارروائی کرتے ہوئے 5 ہزار 80 کلو ایکسپائر ملک پاؤڈر برآمد کر لیا۔
پنجاب فوڈ اتھارٹی نے جھنگ کے علاقے کچا کوٹ، تصویر محل اور جینوٹ روڈ پر واقع دودھ کی دکانوں پر چھاپے مارے جہاں سے 5 ہزار 80 کلو ایکسپائر ملک پاؤڈر بر آمد کیا گیا، برآمد شدہ ایکسپائر پاؤڈر میں کیمیکلز اور پانی ڈال کر جعلی دودھ تیار کیا جا رہا تھا۔ فوڈ اتھارٹی نے ملزمان کیخلاف مقدمہ درج کر لیا۔
فوڈ اتھارٹی مدثر ریاض ملک کے مطابق چھپ کر جعلی دودھ تیار کرنے کے لیے زائد المیعاد پاؤڈر گھر کے بیڈ روم میں رکھے پایا گیا۔ ناجائز اور زیادہ منافع کمانے کےلالچ میں جعل ساز مافیا جعلی دودھ سپلائی کرنے کا مکروہ دھندہ کرتا ہے۔ جعلی دودھ کا استعمال انسانی صحت کے انتہائی مضر اور متعدد بیماریوں کا باعث بنتا ہے۔
ان کا مزید کہنا تھا کہ جعلی دودھ تیار کرنے والے سپلائرز کے خلاف مقدمہ درج کروا دیا گیا ہے۔ قوانین کے مطابق مضر صحت اجزاء سے جعلی دودھ تیار کرنا سنگین جرم ہے۔ عوام تک معیاری اور خالص دودھ پہنچانے کے لیے چیکنگ کا عمل مسلسل جاری ہے۔

سکردو: (ویب ڈیسک) پہاڑوں کے عالمی دن کے موقع اور مناسبت سے سکردو کے گاؤں سدپارہ میں ابھرتے ہوئے کوہ پیماؤں کو تربیت فراہم کرنے کے لیے انسٹی ٹیوٹ کا افتتاح کر دیا گیا۔
رپورٹ کے مطابق کمانڈر فورس کمانڈ ناردرن ایریاز میجر جنرل کاشف خلیل نے سدپارہ ماؤنٹینیئرنگ اینڈ ایڈونچر انسٹی ٹیوٹ کا سنگ بنیاد رکھا جسے مشہور کوہ پیما علی سدپارہ کے نام سے منسوب کیا گیا ہے۔
افتتاحی تقریب میں گلگت بلتستان کے وزیر سیاحت راجا ناصر علی خان، کمشنر بلتستان، ڈی آئی جی بلتستان، مقامی کوہ پیماؤں، طلبہ اور عالمی سیاحوں کی بڑی تعداد نے شرکت کی۔
وزیر سیاحت نے راجا ناصر علی خان کہا کہ یہ پاکستان کا بہترین کوہ پیمائی اور ایڈونچر سکول ہوگا، انہوں نے کہا کہ عالمی شہرت یافتہ کوہ پیما انسٹی ٹیوٹ میں مقامی لوگوں کو رضاکارانہ طور پر تربیت فراہم کریں گے جب کہ اس خطے میں کوہ پیمائی کے مزید بھی 3 سکول قائم کیے جا رہے ہیں۔
تقریب کا اہتمام گلگت بلتستان حکومت اور پاک فوج کی حمایت میں کیا گیا تھا، منتظمین کا کہنا تھا کہ اس تقریب کا مقصد خطے میں ایڈونچر ٹورازم کے امکانات کو تلاش کرنا اور ان کو فروغ دینا ہے۔
ساجد سدپارہ نے کہا کہ سدپارہ گاؤں ”دنیا کے پہاڑی ہیروز“ کے طور پر جانا جاتا ہے، اس گاؤں نے عالمی سطح پر تسلیم کئے گئے کوہ پیما پیدا کیے جن میں ان کے والد مرحوم علی سدپارہ سمیت حسن سدپارہ، نثار سدپارہ اور دیگر شامل ہیں۔
پاکستان سمیت دنیا بھر آج پہاڑوں کا عالمی دن منایا جا رہا ہے، زمین کے طول و عرض میں پھیلی ہوئی یہ بلند و بالا چوٹیاں نا صرف اس کی خوبصورتی میں اضافہ کرتی ہیں بلکہ وہ انسانی ارتقا میں معاون ثابت ہونے کے ساتھ ساتھ صدیوں سے انسانوں کو پینے کے لئے صاف پانی فراہم کرنے کا واحد ذریعہ بھی ہیں۔
واضح رہے کہ رواں سال دنیا بھر سے 14 سو کوہ پیما مختلف چوٹیوں کو سر کرنے کے لیے پاکستان آئے۔

لاہور : (ویب ڈیسک) پاکستان مسلم لیگ (ن) کے صدر و وزیرِاعظم محمد شہباز شریف سے گورنر پنجاب بلیغ الرحمن نے ملاقات کی۔
تفصیلات کے مطابق گورنر پنجاب بلیغ الرحمان نے وفاقی وزیر اسحاق ڈار سے ملاقات کے بعد وزیر اعظم شہباز شریف سے ملاقات کی۔
ملاقات کے دوران ملکی سیاسی صورتحال پر تفصیلی گفتگو کی گئی۔

لاہور: (ویب ڈیسک) وفاقی وزیر خزانہ اسحاق ڈار نے کہا ہے کہ پچھلی حکومت کے دور میں ریکارڈ خسارہ اور بھاری قرضوں کی وجہ سے ملک میں معاشی بحران پیدا ہوا۔
وفاقی وزیر خزانہ و سابق سینیٹر اسحاق ڈار نے گورنر پنجاب محمد بلیغ الرحمان سے گورنر ہاؤس میں ملاقات کی، ملاقات میں ملک کی سیاسی اور معاشی صورتحال پر تبادلہ خیال کیا گیا۔
دوران ملاقات گورنر پنجاب بلیغ الرحمان نے کہا کہ وزیر اعظم ،پارٹی اور پوری قوم کی نگاہیں آپ پر ہیں، انشاء اللہ آپ اور آپ کی تجربہ کار ٹیم جلد ملک کو معاشی مشکلات سے نکالے گی، الحمد للہ ملک معاشی استحکام کی طرف گامزن ہے۔
اسحاق ڈار کا کہنا تھا کہ مسلم لیگ ن نے پہلے بھی ملک کو مشکلات اور بحران سے نکالا، ایٹمی دھماکے کئے، معاشی پابندیوں کے باوجود لوڈ شیڈنگ کے اندھیرے ختم کر کے ملک کو معاشی ترقی کی راہ پر گامزن کیا تھا، اب بھی وہی تجربہ کار ٹیم ملک میں معاشی بحران ختم کرنے اور معاشی استحکام لانے کے لیے پرعزم ہے۔

لاہور: (ویب ڈیسک) مرکزی رہنما تحریک انصاف اور سابق وفاقی وزیر اطلاعات و نشریات فواد چودھری نے کہا ہے کہ امپورٹڈ حکومت کے اکابرین الیکشن نہیں چاہتے، لیکن ملک کیسے چلانا ہے کوئی پتہ نہیں۔
رہنما پی ٹی آئی فواد چودھری نے اپنے بیان میں کہا کہ صرف وزیر بنانا اور بیرونی دورے کرنے سے ملک نہیں چلتے، یہ ایک پیچیدہ اور مشکل کام ہے، جس کی اہلیت ان حکمرانوں میں نہیں، پاکستان کو سیاسی استحکام کی ضرورت ہے، یہ مستحکم حکومت کے بغیر ممکن نہیں۔
سابق وزیر کا مزید کہنا تھا کہ اگر پی ڈی ایم بیس دسمبر تک ملک بھر میں عام انتخابات کا کوئی حتمی فارمولا سامنے نہیں لاتی تو پنجاب اور خیبر پختونخوا اسمبلیاں تحلیل کر دی جائیں گی، پنجاب اور خیبر پختونخوا میں بیس مارچ سے پہلے عام انتخابات کا عمل مکمل ہوگا۔

لاہور: (ویب ڈیسک) وزیراعلیٰ پنجاب چودھری پرویر الٰہی نے لاہور، راولپنڈی سمیت بڑے شہروں میں گندم کا کوٹہ بڑھانے کا فیصلہ کر لیا۔
وزیراعلیٰ پنجاب چودھری پرویز الٰہی کی زیر صدارت کابینہ سٹینڈنگ کمیٹی برائے گندم کا دوسرا اجلاس ہوا جس میں گندم کی ریلیز پالیسی اور کوٹے کے اجراء کا ازسرنو جائزہ لیا گیا، گندم کے موجود ذخائر اورضروریات کا بھی جائزہ لیا گیا۔
اجلاس کے دوران لاہور، راولپنڈی سمیت بڑے شہروں میں گندم کا کوٹہ بڑھانے کافیصلہ کیا گیا، اس موقع پر چودھری پرویز الٰہی کا کہنا تھا کہ پنجاب کو زرعی صوبہ ہونے کے ناطے گندم کی پیداوار میں خود کفیل ہونے کی پالیسی پر عمل پیرا ہیں، حکومت پنجاب نے ایک ماہ کے دوران موثر حکمت عملی سے گندم کی مد میں 55 ارب روپے بچائے ہیں، مالیاتی نظم وضبط کے نفاذ سے مزید 2 ارب روپے کی بچت بھی کی گئی۔
وزیراعلیٰ پنجاب نے ہدایت کی کہ کاشتکاروں کو گندم کی زیادہ پیداوار دینے والے بیج کے استعمال کی آگاہی دی جائے، عوام کو آٹے کی فراہمی میں تعطل نہیں آنا چاہیے، سیکرٹری خوراک اور ڈائریکٹر فوڈ نے گندم کے ذخائرکی موجودہ پوزیشن اور ضروریات سے آگاہ کیا ہے۔
اجلاس میں صوبائی وزراء راجہ محمد بشارت، محمد محسن لغاری، سردار حسنین بہادر دریشک، سید حسین جہانیاں گردیزی، چیف سیکرٹری عبداللہ خان سنبل،پرنسپل سیکرٹری وزیراعلیٰ محمد خان بھٹی، سیکرٹریز خوراک، زراعت، خزانہ، سابق صدر بینک آف پنجاب ہمیش خان، ڈائریکٹر فوڈ اور متعلقہ حکام بھی شریک تھے۔