مظفرآباد: (ویب ڈیسک) وزیراعظم آزاد کشمیر سردار تنویرالیاس نے کہا ہے کہ عمران خان کو فوج سے ہمارے اپنےاندر کے لوگوں نے لڑوایا ہے۔
ایک انٹرویو میں ان کا کہنا تھا کہ جنرل باجوہ عمران خان کے بہت بڑے محسن تھے۔ الیکشن سے پہلے اور بعد میں جنرل باجوہ نے عمران خان کو سپورٹ کیا۔
انہوں نے انکشاف کیا کہ،ہماری پارٹی پر سب کی نظریں لگی ہوئی ہیں۔ ان کا کہنا تھا کہ ہمارے لوگوں نے باجوہ کیخلاف زبان استعمال کر کے زیادتی کی ہے۔

لاہور: (ویب ڈیسک) مسلم لیگ ن کی سینئر قیادت کا کہنا کہ 4 سال میں لائی جانیوالی معاشی تباہی 6 ماہ ختم نہیں ہوسکتی۔
وزیراعظم شہباز شریف کی زیر صدارت مسلم لیگ ن کی سینئر قیادت کا اعلی سطحی اجلاس منعقد ہوا، اجلاس میں سیلاب اور بحالی کے کاموں سمیت ملک کی مجموعی صورتحال کا جائزہ لیا گیا۔
اجلاس میں مہنگائی، بے روزگاری،معاشی سرگرمیوں کے حوالے سے بھی حکومتی کوششوں پر غور کیا۔ ڈیلی میل کے معافی مانگنے پر قائد نوازشریف، وزیراعظم شہبازشریف اور شریف خاندان کو مبارک دی۔
پاکستان مسلم لیگ ن کا وزیر اعظم شہباز شریف کی حکومتی پالیسیوں پر اعتماد کا اظہار واضح ہوگیا کہ’ عمران خان اینڈ کمپنی‘ نے جھوٹ بول کر عوام کو گمراہ کرنے کی کوشش کی، پتہ چل گیا، کون ایمان دار، کون بے ایمان اور جھوٹا ہے،لیگی قیادت نے رانا ثناء اللہ خاں کے خلاف کیس میں بریت کا خیرمقدم کیا۔

اسلام آباد: (ویب ڈیسک) کیپیٹل ڈویلپمنٹ اتھارٹی (سی ڈی اے) نے چک شہزاد میں سینیٹر اعظم سواتی کے فارم ہاؤس پر قائم تجاوزات کےخلاف آپریشن کیا ہے۔
سی ڈی اے نے فارم ہاؤس میں قائم غیرقانونی کار شیڈگرادیا، اعظم سواتی کے فارم پر مین گیٹ پر قائم کمرہ بھی گرادیاگیا ہے۔
اس کے علاوہ بیسمنٹ اورگراؤنڈ فلور غیرقانونی تجاوزات پرمکمل سیل کردیاگیا۔
سی ڈی اے نے گزشتہ ماہ اعظم سواتی کی اہلیہ کو نوٹس بھیجا تھا اور کہا تھاکہ فارم ہاؤس میں 2 بیسمنٹ، گراؤنڈ فلور اور گارڈز روم غیر قانونی طور پر بنائے گئے ہیں۔

لاہور: (ویب ڈیسک) چیئرمین پاکستان تحریک انصاف (پی ٹی آئی) عمران خان کا کہنا ہےکہ جنرل (ر) قمر جاوید باجوہ کہتے تھے اگلی باری ن لیگ کی آرہی ہے، ان کو این آر او ون مشرف نے دیا تھا اور این آر او ٹو جنرل باجوہ نے دیا۔
نجی ٹی وی کو انٹرویو دیتے ہوئے عمران خان کا کہنا تھا کہ رانا ثنااللہ کی باتوں کوکبھی سنجیدہ نہیں لیا، دسمبرمیں اسمبلیاں تحلیل کردیں گے، معیشت اوپر اٹھانی ہے تو سیاسی استحکام ہونا چاہیے جس کے لیے انتخابات ضروری ہیں، یہ دس ماہ بعد الیکشن کرائیں یا ایک سال بعد کرائیں، یہ ہار جائیں گے۔
عمران خان کا کہنا تھا کہ پرویزالہٰی کا خیال ہےکہ حکومت تھوڑی اور چلنی چاہیے، پرویز الہٰی نے کہا ہے حکومت ختم کرنے کے حوالے سے جیسا میں کہوں گا ویسا وہ کریں گے، پرویز الہٰی نے دوبارہ وزیراعلیٰ بنانےکا کوئی مطالبہ نہیں رکھا۔
چیئرمین پی ٹی آئی کا کہنا تھا کہ ہمارے ساتھ جویہ 7 ماہ میں ہوا اس میں جنرل (ر) باجوہ کی پالیسیاں رہیں، جنرل (ر) باجوہ نے کہا تھا کہ عثمان بزدارکو ہٹائیں، وہ علیم خان کو وزیراعلیٰ پنجاب بنانےکا کہتے تھے، ان کا بزدار کو ہٹانےکا مطالبہ عجیب تھا، علیم خان کا نام لیا گیا توپرویز الہٰی نےکہا کہ وہ اسے سپورٹ نہیں کریں گے، میں نےکہاعلیم خان پر بڑے الزامات ہیں اسے وزیراعلیٰ نہیں بناسکتا۔
ان کا کہنا تھا کہ جو لوگ حکومت تبدیل کرنے میں ملوث تھے وہ سب میر جعفر اور میرصادق ہیں، ہماری جب حکومت گئی توسب نے سوچا اب لوگ مٹھائیاں بانٹیں گے، انہوں نے سوچا کہ حکومت ختم ہونے کے بعد میری سیاست ختم ہوگئی، جنرل (ر) باجوہ کہتے تھے پی ٹی آئی سے کوئی ٹکٹ نہیں لےگا اور اگلی باری ن لیگ کی آرہی ہے۔
سابق وزیراعظم کا کہنا تھا کہ ان کی سب سے بڑی کوشش ہےکہ مجھے نااہل کرایا جائے، نواز شریف کی کوشش ہےکہ ان پرکیسز ختم ہوجائیں اور مجھے نااہل کیا جائے، ان کو این آر او ون مشرف نے دیا اور این آر او ٹو جنرل باجوہ نے دیا، جب تک کیسز ختم نہیں ہوں گے نواز شریف واپس نہیں آئیں گے، اگر نواز شریف پنجاب میں آئے تو انہیں گرفتار کیا جائےگا۔
عمران خان کا کہنا تھا کہ جو لوگ لوٹے ہوئے،جنہوں نے غداری کی عوام نے ان کو الیکشن میں سزا دی، جنرل (ر) باجوہ شہبازشریف کو جینیئس سمجھتے تھے، نیب جنرل (ر) باجوہ کے نیچےتھی اور ان کے کنٹرول میں تھی اس لیے وہ فیصلہ کرتے تھےکس کو اندر جانا ہے کس کو باہر، نیب کے ذریعے کسی کو اندر کرنا یا باہر نکالنا ہمارے ہاتھ میں نہیں تھا، ہمارے پاس اختیار نہیں تھا جن کو اختیار تھا انہوں نے ان کو ریلیف دیا، ہمیں کہا جاتا تھا آپ معیشت دیکھیں احتساب کو چھوڑ دیں۔

راولپنڈی: (ویب ڈیسک) آرمی چیف جنرل سید عاصم منیر نے کہا ہے کہ بلوچستان کے عوام کی سلامتی اور تحفظ کیلئے ہر ممکن کوشش کی جائے گی۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر اپنے دو روزہ دورے پر بلوچستان پہنچے جہاں انہیں آئی جی ایف سی جنوبی بلوچستان نے سکیورٹی کی موجودہ صورتحال پر بریفنگ دی۔
آئی ایس پی آر کے مطابق پہلے روز آرمی چیف نے کور ہیڈ کوارٹرز کا دورہ کیا جہاں انہیں آپریشنل، ٹریننگ اور فارمیشن کے دیگر امور پر بریفنگ دی گئی۔ آرمی چیف نے یادگار شہدا پر پھولوں کی چادر چڑھائی اور فاتحہ خوانی کی۔
آئی ایس پی آر کی جانب سے جاری تفصیل کے مطابق آرمی چیف جنرل عاصم منیر نے تربت کا بھی دورہ کیا، جہاں آرمی چیف نے نوجوان افسران اور انسٹرکٹرز سے بات چیت کی۔ اس کی علاوہ آرمی چیف کمانڈ اینڈ سٹاف کالج کوئٹہ اور سکول آف انفنٹری اینڈ ٹیکٹکس بھی گئے۔