اسلام آباد : (ویب ڈیسک) اسلام آباد ہائی کورٹ کے جسٹس عامر فاروق نے چیف جسٹس کا حلف اٹھا لیا۔
ایوانِ صدر میں ہونے والی تقریبِ حلف برداری میں صدرِ مملکت عارف علوی نے جسٹس عامرفاروق سے چیف جسٹس اسلام آباد ہائی کورٹ کے عہدے کا حلف لیا۔
جسٹس عامر فاروق نے اسلام آباد ہائی کورٹ کے چھٹے چیف جسٹس کی حیثیت سے حلف اٹھایا ہے، وہ اسلام آباد ہائی کورٹ کے سینئر ترین جج ہیں۔

اسلام آباد : (ویب ڈیسک) سپریم کورٹ کے 3 نئے ججز نے حلف اٹھا لیا، چیف جسٹس عمر عطا بندیال نے تینوں ججز سے حلف لیا۔
حلف اٹھانے والوں میں جسٹس اطہر من اللّٰہ، جسٹس حسن اظہر رضوی اور جسٹس شاہد وحید شامل ہیں، جسٹس اطہر من اللّٰہ اس سے قبل اسلام آباد ہائی کورٹ کے چیف جسٹس رہ چکے ہیں۔
حلف برادری تقریب میں سپریم کورٹ کے ججز، بار کونسل کے نمائندے اور وکلاء کی بڑی تعداد موجود تھی، تین نئے ججز آنے کے بعد سپریم کورٹ میں ججز کی کل تعداد 15 ہوگئی ہے، سپریم کورٹ میں تاحال مزید دو ججز کی نشستیں خالی ہیں۔

لاہور: (ویب ڈیسک) پاکستان تحریک انصاف کے چیئر مین اور سابق وزیراعظم عمران خان نے کہا ہے کہ 60 فیصد حکومتی اراکین ضمانت پر ہیں، یہی وجہ ہے میرے پاس قبل از وقت انتخابات کے مطالبے کے علاوہ کوئی چارہ نہیں تھا۔ لانگ مارچ سے جمہوریت کو کوئی خطرہ نہیں ہے
ڈی ڈبلیو کو دیے گئے ایک انٹرویو میں انہوں نے کہا کہ مجھے گولی لگی ہے اور صحتیابی میں 4 ہفتے لگ سکتے ہیں۔ پی ٹی آئی کی بے مثال مقبولیت کی وجہ سے موجودہ حکومت نے انہیں سب سے زیادہ دھمکیاں دیں۔ میری حکومت جانے کے بعد ضمنی انتخابات میں بھاری اکثریت سے جیتے۔
اپنی بات کو جاری رکھتے ہوئے سابق پی ٹی آئی چیئر مین کا کہنا تھا کہ میرے خلاف دہشت گردی کے مقدمات بنائے گئے اور ان صحافیوں کو نشانہ بنایا گیا جنہوں نے سچ بولنے کی کوشش کی یا حکومت میں موجود موجودہ جماعتوں کے خلاف تھے۔
سابق وزیراعظم نے مزید کہا کہ مجھے مذہب کا سہارا لیکر قتل کرنے کی کوشش کی گئی، ستمبر میں اس بارے میں پہلے ہی خبردار کر چکا ہوں۔
میزبان خاتون صحافی نے سوال کیا کہ آپ حفاظتی اقدامات کیوں نہیں کر رہے اس پر جواب دیتے ہوئے عمران خان نے کہا کہ حکومت سے نکالے جانے کے بعد میرے پاس دو ہی راستے تھے یا تو وہ گھر بیٹھیں یا پھر اپنی جان کو خطرے میں ڈال کر عوام کے سامنے چلے جائیں۔ میں نے دوسرا آپشن منتخب کیا، وہ گزشتہ چھ ماہ سے عوام میں ہیں۔ مجھے یقین ہے آئندہ الیکشن میری جماعت جیتے گی، حکمران خوف کے باعث الیکشن میں تاخیر کر رہے ہیں، ملک دیوالیہ ہونے کے دہانے پر ہے، معیشت عدم استحکام کا شکار ہے۔ غیر ملکی سرمایہ کاری صرف سیاسی استحکام کے باعث آتی ہے، اس کے بعد معیشت مضبوط ہوتی ہے، کوئی بھی ایسے ملک میں بیرون ملک سے سرمایہ کاری نہیں کرے گا جو پہلے ہی معاشی مسائل کا شکار ہے۔
اگلے انتخابات تک انتظار کرنے سے متعلق ایک سوال کا جواب میں انہوں نے کہا کہ اسلام آباد مارچ سے جمہوریت کو کوئی خطرہ نہیں ہے۔ میری حکومت کے دوران پارٹی کے اراکین قومی اسمبلی کو لاکھوں ڈالر دے کر غیر آئینی طور پر خریدا گیا۔ اور حکومت گرائی گئی۔
انہوں نے یہ بھی کہا کہ 60 فیصد امپورٹد حکومتی ارکان ضمانت پر ہیں اور یہی وجہ ہے کہ میرے پاس قبل از وقت انتخابات کے مطالبے کے علاوہ کوئی چارہ نہیں تھا۔
اینکر نے سوال کیا کہ وہ اپنے دور میں احتساب کے حوالے سے ڈیلیور کیوں نہیں کر سکے۔ اس پر جواب دیتے ہوئے انہوں نے کہا کہ مجھے اس پر افسوس ہے، میں اپنی حکومت میں قانون کی حکمرانی کا نفاذ نہ کر سکا، میرے دور حکومت میں طاقتور اور کرپٹ کو قانون کے کٹہرے میں لانے کا اختیار نہیں تھا۔

لندن: (ویب ڈیسک) وزیر دفاع خواجہ آصف نے کہا ہے کہ شہباز شریف، نواز شریف سے آرمی چیف کی تعیناتی پر رہنمائی لینے آئے ہیں، ملاقات میں آرمی چیف کی تعیناتی پر بات چیت ہوئی ہے۔
پاکستان مسلم لیگ (ن) کے مرکزی رہنما خواجہ آصف نے نجی ٹی وی سے بات چیت کرتے ہوئے کہا کہ آج کی ملاقات میں آرمی چیف کی تعیناتی پر کوئی حتمی فیصلہ نہیں ہوا، ملاقا ت میں ملکی صورتحال پر بھی تبادلہ خیال ہوا۔
انہوں ںے کہا کہ آئی ایس پی آر کا آج کا بیان بھی ایک اشارہ ہے، میرا خیال ہے ایک دو روز میں کچھ نہ کچھ سامنے آ جائے گا، ہم نے تعیناتی پر مختلف حلقوں کی جانب سے دباؤ پر ہتھیار نہیں ڈالے۔
وزیر دفاع نے کہا کہ 2013 اور2018 کی تعیناتیوں کی سمری بھی 18 تاریخ کے بعد بھجوائی گئی تھی، اگر سمری 18 نومبر کے بعد آتی ہے تو پرانی روایت برقراررہے گی، آرمی چیف کی الوداعی ملاقاتوں کا سلسلہ 5/6 روز سے شروع ہے۔
خواجہ آصف نے کہا کہ عمران خان پرحملہ قابل مذمت ہے لیکن وہ اسے سیاسی مقاصد کیلئے استعمال کر رہے ہیں،
عمران خان کو گولیاں نہیں لگیں، صرف گولیوں کے ذرے لگے ہیں، عمران خان نے حملے کے بعد جو تنازع بنایا اس سے ان کی ہمدردیاں دم توڑ رہی ہیں۔
ن لیگ کے مرکزی رہنما نے الزام عائد کیا کہ عمران خان کے دور میں توشہ خانہ کی قیمتی گھڑیوں کی جگہ جعلی گھڑیاں رکھ دی جاتی تھیں، عمران خان نے ساری زندگی اپنے محسنوں کا احسان یاد نہیں رکھا، عمران خان اب سعودی ولی عہد کے دورے کو سبوتاژ کرنا چاہتے ہیں، اپنا اقتدارچھن جانے کا اتنا دکھ ہے کہ ملک کو نقصان پہنچایا جا رہا ہے۔
خواجہ آصف نے کہا کہ ارشد شریف کا قتل ہوا ہے، ثابت ہو گیا کہ انہیں کس نے باہر بھیجا ؟ نواز شریف سے بات ہوئی ہے، وہ جلد واپس آئیں گے، ہم چاہتے ہیں کہ نوازشریف اس وقت واپس آئیں جب حالات کی سمت متعین ہو جائے۔