اسلام آباد:(ویب ڈیسک) انگلینڈ کی ٹیسٹ ٹیم کے کپتان بین اسٹوکس نے پاکستان میں سیلاب متاثرین کی مدد کیلئے بڑا اعلان کیا ہے۔
انگلش کپتان بین اسٹوکس نے سیلاب متاثرین کی مدد کیلئے پاکستان کیخلاف ٹیسٹ سیریز کی اپنی مکمل میچ فیس کی رقم عطیہ کرنے کا اعلان کیا ہے۔
بین اسٹوکس نے کہا کہ اس سال کے شروع میں پاکستان میں تباہ کن سیلاب کو دیکھ کر بہت دکھ ہوا۔
اب بین اسٹوکس کے اس اقدام پر وزیراعظم پاکستان میاں محمد شہباز شریف کا ردعمل سامنے آیا ہے۔
اپنی ٹوئٹ میں وزیراعظم نے کہا کہ ’ہم انگلینڈ کے کپتان بیناپنی ٹوئٹ میں وزیراعظم نے کہا کہ ’ہم انگلینڈ کے کپتان بین اسٹوکس کی جانب سے ٹیسٹ سیریز کی اپنی تمام میچ فیس سیلاب متاثرین کیلئے وقف کرنے کے اس اقدام کو سراہتے ہیں، دکھی انسانیت کے ساتھ ہمدردی سب سے افضل ہے۔‘
وزیراعظم نے مزید کہا کہ بین اسٹوکس کا یہ جذبہ برطانیہ کی عظیم انسان دوستی کی روایت کا مظہر ہے۔
خیال رہے کہ انگلش کرکٹ ٹیم پاکستانی سرزمین پر 17 سال بعد ٹیسٹ سیریز کھیلنے کیلئے اسلام آباد پہنچ گئی ہے۔
انگلینڈ اور پاکستان کے درمیان تین میچز کی سیریز یکم دسمبر سے شروع ہوگی۔

لاہور: (ویب ڈیسک) انگلینڈ کرکٹ ٹیم کے مایہ ناز فاسٹ باؤلر مارک ووڈ آسٹریلیا میں حال ہی میں ختم ہونے والے آئی سی سی مینز ٹی 20 ورلڈ کپ کے دوران کولہے کی انجری کے باعث پاکستان کے خلاف تین میچوں کی سیریز کے راولپنڈی میں شیڈول ابتدائی ٹیسٹ سے باہر ہو گئے ہیں۔
انگلینڈ کرکٹ ٹیم کے ہیڈ کوچ برینڈن میک کولم نے تصدیق کی ہے کہ مارک ووڈ پاکستان کے خلاف پہلے ٹیسٹ میچ میں ٹیم کا حصہ نہیں ہوں گے، وہ بحالی صحت کے عمل سے گزر رہے ہیں۔
خیال رہے کہ تین ٹیسٹ میچوں کی سیریز کا پہلا میچ یکم دسمبر سے راولپنڈی میں شروع ہوگا، 32 سالہ مارک ووڈ کو 26 ٹیسٹ، 57 ایک روزہ اور 27 ٹی 20 میچز میں انگلینڈ کی نمائندگی کا اعزاز حاصل ہے، مارک ووڈ نے 26 ٹیسٹ میچز میں 31.91 کی اوسط سے 82 وکٹیں حاصل کر رکھی ہیں اور وہ انگلینڈ کے لیے تمام فارمیٹس میں کرکٹ کھیل رہے ہیں۔
انگلش فاسٹ باؤلر نے تین میچوں کی ٹیسٹ سیریز سے قبل تیاریوں کے لیے ٹیم کے ساتھ متحدہ عرب امارات کا سفر نہیں کیا تھا، لیکن اس ہفتے کے آخر میں سکواڈ میں شامل ہونے کی امید تھی، 32 سالہ کھلاڑی بحالی صحت کے عمل سے گزر رہے ہیں اور توقع ہے کہ وہ بالترتیب ملتان اور کراچی میں کھیلے جانے والے دوسرے اور تیسرے ٹیسٹ کے لیے دستیاب ہوں گے۔
مایہ ناز آل راؤنڈر بین سٹوکس کی قیادت میں انگلینڈ 2005 کے بعد پاکستان میں اپنی پہلی ٹیسٹ سیریز کھیلنے کے لیے تیار ہے۔
واضح رہے کہ پاکستان اور انگلینڈ کے درمیان پہلا ٹیسٹ میچ یکم سے پانچ دسمبر تک راولپنڈی میں کھیلا جائے گا، دونوں ٹیموں کے درمیان ٹیسٹ سیریز ورلڈ ٹیسٹ چیمپئن شپ کا حصہ ہے۔

لاہور: (ویب ڈیسک) انگلش ٹیم کے ہیڈ کوچ برینڈن میک کلم نے کہا ہے کہ پاکستان سے ٹیسٹ سیریز چیلنجنگ ہو گی، دونوں ٹیموں کے درمیان اچھے مقابلے کی توقع ہے، مارک ووڈ فٹنس مسائل کی وجہ سے پہلے ٹیسٹ کے لئے دستیاب نہیں ہوں گے، شاہین شاہ آفریدی کی عدم دستیابی پاکستان کے لئے بہت بڑا نقصان ہے، پہلی بار پاکستان آکر بہت اچھا لگ رہا ہے۔
راولپنڈی میں پریس کانفرنس کرتے ہوئے انہوں نے کہا کہ پاکستان میں پہلی بار آکر خوشی محسوس کر رہا ہوں، بہترین مہمان نوازی کی جا رہی ہے اور سکیورٹی کے انتظامات تسلی بخش ہیں۔ پاکستانی شائقین کئی سالوں تک انٹرنیشنل کرکٹ سے محروم رہے، ایک جنریشن نے پاکستانی کھلاڑیوں کو اپنے سامنے کھیلتے نہیں دیکھا۔ راولپنڈی سٹیڈیم میں فل ہاؤس کے سامنے کھیلنے کے لئے پرجوش ہیں، کھلاڑی چاہتے ہیں شائقین کرکٹ سٹیڈیم میں پہنچیں۔ پاکستان میں شائقین کرکٹ بہت جذباتی ہیں، ہم بہترین کرکٹ کھیلنے کی کوشش کریں گے۔
انگلش کوچ نے مزید کہا کہ یو اے ای میں بہترین کیمپ میں حصہ لیا، دونوں ٹیموں نے پنڈی سٹیڈیم میں اچھی پریکٹس کی ہے۔ آسٹریلیا میں آئی سی سی مینز ٹی 20 ورلڈ کپ جیتنے سے کھلاڑیوں کے اعتماد میں اضافہ ہوا ہے۔ مارک ووڈ فٹنس مسائل کی وجہ سے پہلے ٹیسٹ کے لئے دستیاب نہیں ہوں گے، امید ہے کہ وہ دوسرے ٹیسٹ سے قبل مکمل طور پر صحتیاب ہو جائیں گے۔ سینیئرز اور جونیئرز کھلاڑیوں پر مبنی پاکستان کا ٹیسٹ سکواڈ بہت اچھا ہے۔ پاکستان کے خلاف جارحانہ کرکٹ کھیلنے کی کوشش کریں گے۔
ایک سوال کے جواب میں نیوزی لینڈ کے سابق ٹیسٹ کرکٹر نے کہا کہ شاہین شاہ آفریدی بہترین فاسٹ بائولر ہیں، ان کی عدم دستیابی پاکستان کے لئے بہت بڑا نقصان ہے۔ مختلف کنڈیشنر میں خود کو ٹیسٹ کرنا چاہتے ہیں، پاکستان کو شکست دینے کے لئے انگلینڈ کو اچھا کھیل پیش کرنا ہوگا۔
واضح رہے کہ انگلینڈ کی ٹیم 17 برس بعد ٹیسٹ سیریز کھیلنے پاکستان آئی ہے، دونوں ٹیموں کے مابین سیریز کا پہلا ٹیسٹ یکم دسمبر سے پنڈی کرکٹ سٹیڈیم میں شروع ہو گا۔