راولپنڈی: (ویب ڈیسک) آرمی چیف جنرل قمر جاوید باجوہ سے ہنگری کے سفیر نے ملاقات کی جس میں دونوں ممالک کے درمیان دوطرفہ دفاعی تعاون بڑھانے کے حوالے سے تبادلہ خیال کیا گیا۔
پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل قمر جاوید باجوہ سے ہنگری کے سفیر بیلا فازیکاس نے جنرل ہیڈ کوارٹرز (جی ایچ کیو) میں ملاقات کی، اس ملاقات میں باہمی دلچسپی کے امور، خطے کی مجموعی صورتحال پر بات چیت ہوئی، دونوں ممالک کے درمیان دوطرفہ دفاعی تعاون بڑھانے کے اقدامات پر بھی تبادلہ خیال کیا گیا۔
آئی ایس پی آر کے مطابق آرمی چیف نے کہا کہ پاکستان ہنگری کے ساتھ اپنے تعلقات کو قدر کی نگاہ سے دیکھتا ہے ۔
ہنگری کے سفیر نے علاقائی امن و استحکام کے لئے پاکستان کے مثبت کردار کو سراہا اور دونوں ممالک کے درمیان بہتر تعلقات کے لیے کام جاری رکھنے کا عہد کیا۔

راولپنڈی: (ویب ڈیسک) شمالی وزیرستان کے ضلع ایشام میں فورسز اور دہشت گردوں میں فائرنگ کے تبادلے میں سپاہی عصمت اللہ خان شہید ہوگئے۔
پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کےضلع ایشام میں فورسز اور دہشت گردوں میں فائرنگ کا تبادلہ ہوا، اس فائرنگ کے تبادلے میں سپاہی عصمت اللہ خان شہید ہوئے، علاقےمیں دہشت گردوں کو ختم کرنے کیلئے کلیئرنس آپریشن جاری ہے۔
آئی ایس پی آر کے مطابق فائرنگ کا واقعہ 13 اپریل کو پیش آیا، پاک فوج دہشت گردی کی لعنت کو ختم کرنے کے لیے پرعزم ہے، ہمارے بہادر جوانوں کی قربانیاں ہمارے عزم کو مضبوط کرتی ہیں۔

اسلام آباد: (ویب ڈیسک) وزیرِاعظم شہباز شریف سے شریک چیئرمین پاکستان پیپلز پارٹی آصف علی زرداری اور چیئرمین پیپلز پارٹی بلاول بھٹو زرداری نے ملاقات کی ہے۔
وزیر اعظم میڈیا آفس سے جاری بیان کے مطابق ملاقات میں آصف علی زرداری اور بلاول بھٹو زرداری نے وزیرِ اعظم کو وزراتِ عظمی کا منصب سنبھالنے پر مبارکباد پیش کی۔
وزیرِ اعظم نے آصف علی زرداری اور بلاول بھٹو زرداری کا حکومت کی تشکیل میں تعاون کا شکریہ ادا کیا۔
انہوں نے کہا کہ پاکستان کو درپیش مسائل کے حل کیلئے خدا سے دعا گو ہیں۔مشاورت اور باہمی تعاون سے پاکستان کی بہتری کیلئے کام کرنا ہماری اولین ترجیح ہے۔

مظفر آباد: (ویب ڈیسک) سردار عبدالقیوم نیازی نے وزیراعظم آزاد کشمیر کے عہدے سے استعفیٰ دے دیا ہے۔
تحریک انصاف کے 25 اراکین اسمبلی کی جانب سے اپنی ہی جماعت کے وزیراعظم کے خلاف قانون ساز اسمبلی میں جمع کرائی گئی عدم اعتماد کی قرار داد پر رائے شماری سے قبل استعفیٰ دیکر وزارت عظمیٰ کے امید وارسردار تنویرالیاس کی راہ میں رکاوٹیں کھڑی کر دی ہیں۔
خیال رہے کہ سردار عبدالقیوم نیازی نے آج صبح ہی اپنے چند وزرا کو وزارت سے نکال دیا تھا۔
ذرائع کے مطابق وزرا کے وزارت سے نکالنے کے بعد اب وزیراعظم آزاد کشمیر سردار عبدالقیوم نیازی نے اپنا استعفیٰ صدر مملکت کو منظوری کے لئے ارسال کردیا ہے۔
وزیراعظم آزاد کشمیر سردارعبدالقیوم نیازی نے کہا کہ باوقار طریقے سے مستعفی ہونے کا فیصلہ کیا، میرٹ کی پامالی اور گڈ گورننس کا الزام لگایا گیا، پانچ لوگوں سے عمران خان کا جھوٹا لیٹر دکھا کر عدم اعتماد کی تحریک پردستخط کرائے گئے۔
اسلام آباد میں پریس کانفرنس کرتے ہوئے وزیراعظم آزاد کشمیر سردار عبدالقیوم نیازی نے کہا کہ ریاست کی ایک پائی بھی کرپشن کی نذز نہیں ہونے دی، کشمیر کونسل کے انتخابات میں پیسہ استعمال کیا گیا، کشمیر کونسل کے ٹکٹوں میں رشوت پر لڑائی شروع ہوئی، پانچ لوگوں سے عمران خان کا جھوٹا لیٹر دکھا کرعدم اعتماد کی پردستخط کرائے گئے، جن لوگوں نے قرارداد پیش کی انکو کابینہ سے نکالا۔
انہوں نے مزید کہا کہ من گھڑت الزامات کیخلاف جنگ لڑی، عمران خان کو بتایا چھپ کر الزام عائد کیا، مجھے پہلے بتاتے تو میں پارٹی کی امانت عمران خان کے حوالے کرتا۔
سردار عبدالقیوم نیازی نے کہا کہ بیس سال بعد آزاد کشمیرمیں بلدیاتی انتخابات کا اعلان کیا، محکمانہ اصلاحات لائی گئیں، چلتی حکومت کیخلاف عدم اعتماد کیوں لائی گئی، مجھ پرچارج شیٹ میں الزام تک نہ ملا، منشور کے مطابق اداروں میں اصلاحات کیں، لبریل سیل سے کرپشن کا خاتمہ کیا۔