All posts by Khabrain News

کھیل

عبدالرزاق نے پاکستان کرکٹ بورڈ سے راہیں جدا کرلیں

لاہور: (ویب ڈیسک) قومی کرکٹ ٹیم کے سابق آل راؤنڈر عبدالرزاق نے پاکستان کرکٹ بورڈ (پی سی بی) سے راہیں جدا کرلیں۔
پاکستان کرکٹ بورڈ (پی سی بی) نے گزشتہ سیزن میں عبدالرزاق کو سینٹرل پنجاب کا ہیڈ کوچ تعینات کردیا گیا تھا، حالیہ سیزن میں سینٹرل پنجاب کی ٹیموں کی سلیکشن کے معاملے پر آل راؤنڈر تنقید کی زد میں آئے تھے اور پاکستان جونئیر لیگ کی سلیکشن کے معاملے پر بھی عبدالرزاق پر کئی اعتراضات سامنے آئے تھے۔
پاکستان جونئیر لیگ میں حیدر آباد ٹیم کے ساتھ ذمہ داریاں نبھاننے کے بعد عبدالرزاق سینٹرل پنجاب ٹیم کو جوائن نہیں کیا، سابق کرکٹر نے پاکستان جونئیر لیگ کی ٹیم حیدر آباد کے ہیڈ کوچ کے فرائض سرانجام دیئے تھے۔
مصباح الحق اور وقار یونس کے کوچنگ سے مستعفی ہونے کے بعد عبدالرزاق کو ایک سیریز کے لئے عبوری باولنگ کوچ بھی مقرر کیا گیا تھا۔
پی سی بی ذرائع نے عبدالرزاق کے مستعفی ہونے کی تصدیق کرتے ہوئے کہا کہ سابق آل راؤنڈر نے مختلف نجی چینلز کے ساتھ مصروفیات کے باعث استعفی دیا، پی سی بی میڈیا پالیسی کے تحت بورڈ کا کوئی ملازم میڈیا پر کام نہیں کرسکتا۔
ذرائع نے کہا کہ عبد الرزاق میڈیا پر کام کرنے کے خواہشمند تھے اسی بنا پر وہ مستعفی ہوئے۔
واضح رہے کہ سابق کرکٹر کو 46 ٹیسٹ، 265 ون ڈے انٹرنیشنل اور 32 ٹی20 انٹرنیشنل میں پاکستان کی نمائندگی کا اعزاز حاصل ہے۔ عبدالرزاق ڈھائی سال سے پی سی بی کوچنگ اسٹاف کا حصہ تھے۔

کھیل

ایرون فنچ نے بابر اعظم کو موجودہ دور کا سب سے بڑا کھلاڑی قرار دیدیا

سڈںی: (ویب ڈیسک) آسٹریلیا کی ٹی 20 ٹیم کے کپتان ایرون فنچ نے بابراعظم کو موجودہ دورکا سب سے بڑا کھلاڑی قرار دے دیا۔
آسٹریلوی کرکٹر ایرون فنچ نے کہا کہ تینوں فارمیٹس میں بابراعظم کا کوئی جوڑ نہیں، کبھی کبھی آپ کچھ بھی کرلیں بابر اعظم کو آؤٹ کرنا مشکل ہوجاتا ہے کیونکہ بابر کے پاس آپ کے تمام حربوں کا توڑ ہوتا ہے۔
آسٹریلوی کرکٹر لبوشین نے کہا کہ بابراعظم کرکٹ کے تمام فارمیٹس کا بڑا کھلاڑی ہے جبکہ میکسویل نے کہا کہ بابراعظم تسلسل کے ساتھ پرفارم کرتے آئے ہیں۔
دوسری جانب سٹیو سمتھ اور نیتھن لائن نے جوروٹ کو بڑا پلیئر قراردیا جبکہ مارنس لبوشین اور سمتھ بھارتی کرکٹرکوہلی کی پرفارمنس سے بھی متاثر ہوئے۔
سٹیو اسمتھ کا کہنا تھا کہ ویرات کوہلی نے بے شمار رنز بنائے وہ ایک لاجواب کھلاڑی ہے۔

بزنس

نیلم جہلم پن بجلی گھر 5 ماہ بعد بھی فعال نہ ہوسکا

جہلم: (ویب ڈیسک) نیلم جہلم پن بجلی گھر 5 ماہ بعد بھی فعال نہ ہوسکا، بجلی گھر کی بندش سے قومی خزانے کو 36 کروڑ روپے یومیہ نقصان ہو رہا ہے اور نیشنل گرڈ کو بجلی بھی نہیں مل رہی۔
نیلم جہلم پن بجلی گھر کی بندش پر وزیراعظم شہباز شریف نے انکوائری کا حکم دیا تھا۔
ذرائع کے مطابق انکوائری رپورٹ میں کہا گیا ہے کہ ٹیل ریس ٹنل کے ڈھانچے میں دراڑیں پڑیں اور ٹنل سے کنکریٹ اور سٹیل کی موٹی تہہ سرنگ میں جا گری، سرنگ بند ہونے سے پانی پاور ہاؤس میں داخل ہوا اور نقصان کا باعث بنا۔
نیلم جہلم منصوبے کی انتظامیہ نے سرنگ میں ٹوٹ پھوٹ کا نوٹس نہ لیا، انکوائری رپورٹ میں تعمیراتی کمپنی کو بھی ذمہ دار ٹھہرایا گیا ہے۔

اہم خبریں, پاکستان

صرف اور صرف شفاف انتخابات چاہتے، آزادی کی منزل دور نہیں: عمران خان

لاہور: (ویب ڈیسک) پاکستان تحریک انصاف کے چیئر مین اور سابق وزیراعظم عمران خان نے کہا ہے کہ صرف اور صرف صاف شفاف انتخابات چاہتے ہیں، آزادی کی منزل زیادہ دور نہیں۔
زمان پارک میں سابق وزیراعظم کی زیر صدارت غیر رسمی مشاورتی اجلاس ہوا، اجلاس میں صوبائی وزیر پارلیمانی امور راجہ بشارت اور مشیر داخلہ پنجاب عمر سرفراز چیمہ سمیت دیگر رہنماؤں نے شرکت کی۔
اجلاس کے دوران پی ٹی آئی کے حقیقی آزادی مارچ کے جلسوں کے حوالے سے تفصیلی بریفنگ دی گئی اور وزیر آباد میں ہونے والے حملے سے متعلق پی ٹی آئی چیئر مین سے رہنماؤں نے جوائنٹ انویسٹی گیشن ٹیم (جے آئی ٹی) کے حوالے سے مشاورت کی۔
اس موقع پر خطاب کرتے ہوئے عمران خان نے کہا کہ تحریک انصاف صرف اور صرف صاف شفاف انتخابات چاہتی ہے، حقیقی آزادی کی منزل اب زیادہ دور نہیں۔

اہم خبریں, پاکستان

مریم اورنگزیب کو وفاقی وزیر بنانےکیخلاف درخواست ناقابل سماعت قرار

اسلام آباد: (ویب ڈیسک) اسلام آباد ہائیکورٹ نے مریم اورنگزیب کو وفاقی وزیر بنائے جانے کے خلاف درخواست ناقابل قرار دے کر خارج کردی۔
اسلام آباد ہائیکورٹ نے مخصوص نشست پر مریم اورنگزیب کو وفاقی وزیربنانے کے خلاف درخواست پر فیصلہ سنایا۔چیف جسٹس اسلام آباد ہائیکورٹ جسٹس عامرفاروق نے شہری طالب حسین کی درخواست پر فیصلہ سنایا جس میں کہا گیاہےکہ قانون واضح ہے ممبر قومی اسمبلی یا سینیٹر وفاقی وزیر بن سکتا ہے، قانون میں ایسا کچھ نہیں کہ مخصوص نشست پر منتخب ممبر وفاقی وزیر نہیں بن سکتا، ممبر اسمبلی کو وفاقی وزیر یا وزیر مملکت تعینات کرنا وزیراعظم کا اختیار ہے۔

اہم خبریں, پاکستان

حلیم عادل کی اہلیہ دعا بھٹو نے خلع کا دعویٰ واپس لے لیا

کراچی : (ویب ڈیسک) پی ٹی آئی رہنما حلیم عادل شیخ کی اہلیہ دعا بھٹو نے شوہر کے خلاف خلع کا دعویٰ واپس لے لیا۔ دعا بھٹو نے فیملی کورٹ ملیر میں خلع کا دعویٰ دائر کیا تھا جسے اب انہوں نے رہائشی بنیاد پر واپس لیا ہے۔
دعا بھٹو نے مؤقف اپنایا کہ میں نے رہائش ضلع ملیر سے اولڈ کراچی منتقل کردی ہے جس وجہ سے ضلع ملیر کی کورٹ سے کیس واپس لے رہی ہوں، درخواست واپس لینے کی اجازت دی جائے۔
عدالت نے خلع کا دعویٰ واپس لینے پر کیس خارج کردیا۔
رکن سندھ اسمبلی دعا بھٹو نے 25 اکتوبرکو فیملی کورٹ میں خلع کا دعویٰ دائر کیا تھا۔

اہم خبریں, شوبز

فلم جوائے لینڈ کیخلاف شکایا ت پر غور کیلئے کمیٹی تشکیل

لاہور: (ویب ڈیسک) وزیراعظم شہباز شریف نے فلم جوائے لینڈ کے خلاف شکایات پر غور کے لیے کمیٹی تشکیل دے دی۔
وزیراعظم شہبازشریف نے فلم جوائے لینڈ کے خلاف شکایات پر غور کرنے کے لیے وزیرقانون کی سربراہی میں 8 رکنی کمیٹی تشکیل دی جس میں اطلاعات، مواصلات، سرمایہ کاری اور آئی ٹی کے وزرا شامل ہیں۔مشیر برائے گلگت بلتستان، چیئرمین پی ٹی اے اور چیئرمین پیمرا بھی کمیٹی کا حصہ ہیں جب کہ کمیٹی فلم کی سماجی اور اخلاقی اقدار کے خلاف شکایات پر غور کرے گی۔
وزیراعظم شہباز شریف نے کمیٹی کو آج رپورٹ پیش کرنے کی ہدایت کررکھی ہے۔
خیال رہے کہ فلم جوائے لینڈ کی کہانی ایک خواجہ سرا کی زندگی پر بنائی گئی ہے جس کو سرمد کھوسٹ اوراپوروا چرن نے پروڈیوس کیا ہے، فلم کا میوزک عبداللہ صدیقی کی جانب سے پیش کیا گیا ہے۔

اہم خبریں, سائنس و ٹیکنالوجی

آئی فون اور اسمارٹ واچ کے بعد ایپل کی نئی ڈیوائس متعارف ہونے کے قریب

لاہور: (ویب ڈیسک) ایپل کمپنی کو توقع ہے کہ آئی فون اور اسمارٹ واچ کے بعداس کی نئی ڈیوائس ڈیجیٹل دنیا کو بدل کر رکھ دے گی۔
ایپل کی جانب سے مکسڈ رئیلٹی ہیڈسیٹ پر کافی عرصے سے کام کیا جارہا ہے جو 2023 میں کسی وقت متعارف کرایا جاسکتا ہے۔
بلومبرگ کی ایک رپورٹ کے مطابق ایپل ہیڈ سیٹ کی قیمت 2 سے 3 ہزار ڈالرز کے درمیان ہوسکتی ہے جس میں ایم 2 چپ کا استعمال کیا جائے گا۔اس چپ کا استعمال کمپنی کی جانب سے میک بک ائیر اور میک بک پرو میں کیا گیا ہے۔
رپورٹ میں مزید بتایا گیا کہ اس ہیڈسیٹ کے اندر اور باہر 10 کیمرے نصب ہوں گے اور ڈسپلے کا ریزولوشن بہت زبردست ہوگا۔
اس ڈیوائس کے آپریٹنگ سسٹم کو رئیلٹی او ایس کا نام دیے جانے کا امکان ہے جس میں ایپل کی معروف ایپس جیسے میسجز، فیس ٹائم اور میپس موجود ہوں گی۔
ایپل کی جانب سے اے آر/ وی آر ٹیکنالوجیز کے لیے لوگوں کو بھرتی بھی کیا جارہا ہے۔
اس حوالے سے کمپنی کی جانب سے ایسے افراد کی خدمات حاصل کرنے کی کوشش کی جارہی ہے جو 3 ڈی مکسڈ رئیلٹی ورلڈ کے تجربے کو ان ایبل کرسکیں۔
آنے والے برسوں میں اس کو آئی فون کا متبادل بنانے کی کوشش کی جائے گی۔
تجزیہ کاروں کے مطابق ایپل کا مقصد 10 برسوں اے آر کو آئی فون کی جگہ دینا ہے۔

اہم خبریں, پاکستان

بلوچستان: غذائیت کی کمی کے شکار بچوں کی تعداد میں تشویشناک حد تک اضافہ

لاہور: (ویب ڈیسک) بلوچستان میں غذائیت کی کمی کا شکار بچوں کی تعداد تشویشناک حد تک بڑھ چکی ہے۔
سرکاری سروے کے مطابق صوبے میں 18.9 فیصد بچے غذائی کمی میں مبتلا ہیں، حکومت بلوچستان نے صورتحال پر قابو پانے کےلیے صوبے میں نیوٹریشن ایمرجنسی تو لگائی لیکن 4 سال گزرنے کے باوجود فنڈز ریلیز نہیں کیے گئے۔
بلوچستان میں غذاکی کمی کے شکاربچوں کی تعداد میں ہر سال اضافہ رپورٹ ہو رہا ہے، سرکاری اعدادوشمار کے مطابق 10 سال قبل یہ شرح 15 فیصد تھی جو اب بڑھ کر 18.9 فیصد ہو چکی ہے، اس تعداد میں مزید اضافے کا خدشہ ہے ۔
عالمی معیار کے مطابق اگر یہ شرح 15فیصد سے زائد ہو توصورتحال الارمنگ ہو جاتی ہے، اس تناظر میں اس وقت بلوچستان میں غذائیت کی صورتحال تشویشناک ہے۔
طبی ماہرین کا کہنا ہے کہ غذائی کمی سے متاثر ہونے والے بچے جسمانی مسائل کا شکار ہوجاتے ہیں۔

اہم خبریں, کھیل

پیٹ کمنز کا آئی پی ایل کا آئندہ ایڈیشن نہ کھیلنے کا فیصلہ

آسٹریلیا : (ویب ڈیسک) آسٹریلوی کپتان پیٹ کمنز نے آسٹریلیا ٹیم کی بھرپور مصروفیات کے باعث لاکھوں ڈالرز کا معاہدہ چھوڑ دیا۔
ٹوئٹر پر جاری بیان میں پیٹ کمنز نے اگلے برس آئی پی ایل نہ کھیلنے سے متعلق اعلان کرتے ہوئے لکھا کہ’ میں نے اگلے برس آئی پی ایل نہ کھیلنے کا مشکل فیصلہ کیا ہے، اگلا برس غیر ملکی ٹیسٹ اور ون ڈے سیریز سے بھرا ہوا ہے لہٰذا میں ایشز اور ورلڈکپ کیلئے کچھ عرصہ آرام کروں گا‘۔
پیٹ کمنز نے اپنے بیان میں آئی پی ایل کی ٹیم کولکتہ نائٹ رائڈرز کا شکریہ ادا کرتے ہوئے لکھا کہ اس بات کو سمجھنے کیلئے کولکتہ نائٹ رائڈرز کاشکریہ۔
آسٹریلوی کپتان نے اپنی ٹوئٹ میں ٹیم مینجمنٹ کا شکریہ اداکرتے ہوئے جلد واپسی کی امید کا اظہار بھی کیا۔
پیٹ کمنز کا کولکتہ نائٹ رائیڈرز کے ساتھ تین ملین آسٹریلوی ڈالرز کا معاہدہ تھا، پیٹ کمنز نے گزشتہ سیزن میں 1.34 ملین ڈالرز کا معاہدہ چھوڑا تھا۔
واضح رہے کہ ایشز کا آغاز ون ڈے ورلڈکپ سے قبل جون 2023 میں ہوگا جب کہ بھارت میں ون ڈے ورلڈکپ اکتوبر 2023 میں کھیلا جائے گا۔
فاسٹ بولر میچل اسٹارک نے بھی انٹرنیشنل کرکٹ کی وجہ سے آئی پی ایل چھوڑی ہے۔