لاہور: (ویب ڈیسک) ہائیکورٹ گلوکارہ میشا شفیع سمیت دیگر کی درخواستوں پر فیصلہ کل سنائے گی۔
جسٹس طارق سلیم شیخ درخواستوں پر محفوظ کیا گیا فیصلہ سنائیں گئے۔ میشا شفیع سمیت دیگر نے اپنے خلاف درج ایف آئی اے کے مقدمے کو چیلنج کررکھا ہے۔
درخواست میں موقف اختیار کیا گیا تھا کہ ایف آئی اے نے علی ظفر کی درخواست پر حقائق کے برعکس مقدمہ درج کیا، ایف آئی اے نے ملزمان کا موقف لیے بغیر مقدمہ درج کیا۔ درخواست میں استدعا کی گئی تھی کہ عدالت ایف آئی اے کی جانب سے درج مقدمہ خارج کرنے کا حکم دے۔
واضح رہے کہ عدالت نے وکلاء کے دلائل مکمل ہونے کے بعد فیصلہ محفوظ کیا تھا۔

ممبئی: (ویب ڈیسک) بھارتی سوشل میڈیا پر صارفین کامیڈین کپل شرما شو کے بائیکاٹ کا مطالبہ کررہے ہیں۔
لوگوں کو ہنسانے والے کامیڈین کپل شرما اکثر مختلف تنازعات کی وجہ سے خبروں کی زینت بن جاتے ہیں۔ حال ہی میں کپل شرما ایک اور تنازع کا شکار ہوگئے جس کے بعد لوگ ان کے شو کے بائیکاٹ کا مطالبہ کررہے ہیں۔
بھارتی میڈیا کے مطابق ہدایت کار ویویک اگنی ہوتری نے ایک ٹوئٹ کے ذریعے بتایا ہے کہ کپل شرما شو کی انتظامیہ نے اپنے شو پر ان کی ٹیم کو بلانے سے انکار کردیا ہے کیونکہ ان کی فلم میں بڑے کمرشل اداکار شامل نہیں ہیں۔
فلمساز کے ان دعووں نے سوشل میڈیا صارفین کومشتعل کردیا جس کے بعد لوگ کپل شرما شو کے بائیکاٹ کا مطالبہ کررہے ہیں۔ یہاں تک کہ ’’بائیکاٹ کپل شرما شو‘‘ بھارتی ٹوئٹر پر ٹرینڈ کررہا ہے۔
ایک صارف نے کپل شرما کو بولی ووڈ کا سرکس ماسٹر قرار دیتے ہوئے کہا کہ وہ اپنے شو میں پیسے بنانے کے لیے غریب لوگوں کی بےعزتی اور توہین کرتے ہیں۔ کوئی مہذب معاشرہ اس دوہرے معیار کی اجازت نہیں دے گا۔
لتا نامی صارف نے ’’بائیکاٹ کپل شرماشو‘‘ کا مطالبہ کرتے ہوئے کہا میں نے پہلے بھی کہا تھا کہ اس شو میں دیکھنے لائق کچھ بھی نہیں۔ مزید صارفین نے بھی کپل شرما شو کے بارے میں کہا کہ ان کے شو میں لوگوں کے بارے میں صرف توہین آمیز تبصرے کیے جاتے ہیں۔
واضح رہے یہ پہلی بار نہیں ہے جب کپل شرما اور ان کے شو پر اتنی زیادہ تنقید ہوئی ہو بلکہ اس سے قبل کامیڈین سنیل گروور کے ساتھ بھی کپل شرما کا تنازع بہت زیادہ مشہور ہوا تھا۔

ممبئی: (ویب ڈیسک) بالی ووڈ اداکارہ سوناکشی سنہا نے اپنے ناقابل ضمانت وارنٹ گرفتاری جاری ہونے پر ردعمل دیا ہے۔
دو روز قبل اداکارہ سوناکشی سنہا کے مبینہ طور پر دھوکا دہی کے ایک کیس میں ناقابل ضمانت وارنٹ گرفتاری جاری ہوئے تھے۔ اداکارہ نے اس وقت تو اپنے وارنٹ جاری ہونے کے حوالے سے کوئی بیان جاری نہیں کیا تھا لیکن اب انہوں نے اس معاملے پر خاموشی توڑدی ہے۔
اداکارہ سوناکشی سنہا نے انسٹاگرام اسٹوری پر ایک طویل پوسٹ میں اپنے ناقابل ضمانت وارنٹ گرفتاری جاری ہونے کی تردید کرتے ہوئے ان تمام رپورٹس کو ’’جعلی‘‘ قرار دیا ہے اور کہا ہے کہ شکایت کنندہ میرے نام کا غلط استعمال کرکے اور میری ساکھ کو نقصان پہنچا کر سستی شہرت حاصل کرنا چاہتا ہے۔
سوناکشی سنہا نے اپنی پوسٹ میں لکھا گزشتہ چند دنوں سے بغیر کسی تصدیق کے میڈیا میں میرے خلاف ناقابل ضمانت وارنٹ گرفتاری جاری ہونے کی خبریں گردش کررہی ہیں۔ تاہم یہ تمام خبریں بے بنیاد ہیں اور ایک بدمعاش شخص کا کام ہے جو مجھے ہراساں کرنے کی کوشش کررہا ہے۔
انہوں نے کہا میں تمام میڈیا ہاؤسز، صحافیوں اور نیوز رپورٹرز سے درخواست کرتی ہوں کہ ان تمام جعلی خبروں کو نہ پھیلائیں کیونکہ میرے خلاف اس خبر کو پھیلانے والے شخص کا ایجنڈا صرف اور صرف پبلسٹی حاصل کرنا ہے اور اس کا مقصد میری ساکھ کو نقصان پہنچا کر مجھ سے پیسے بٹورنا ہے۔
اداکارہ نے کہا کہ وہ اس معاملے پر مزید بات کرنا نہیں چاہتیں۔ یہ کیس مراد آباد کی عدالت میں زیر سماعت ہے اور الہ آباد ہائی کورٹ نے اس پر روک لگادی ہے۔ میری قانونی ٹیم توہین عدالت کے لیے اس کے خلاف تمام ضروری کارروائی کرے گی۔ جب تک کہ مراد آباد کورٹ اس معاملے پر کوئی فیصلہ جاری نہیں کردیتی اس وقت تک اس معاملے پر میرا یہ واحد تبصرہ ہوگا۔
سوناکشی نے کہا وہ اس وقت گھر پر ہیں اور یقین دلاتی ہیں کہ ان کے خلاف کوئی وارنٹ جاری نہیں ہوئے۔ اس کے ساتھ ہی انہوں نے اپنی چائے پیتے ہوئے تصویر بھی شیئر کی اور کہا ’’گھر میں نظر بندی‘‘۔
واضح رہے کہ اتوار کے روز بھارتی میڈیا میں خبر آئی تھی کہ سوناکشی سنہا کے ناقابل ضمانت وارنٹ گرفتاری جاری ہوئے ہیں۔ اداکارہ پر دہلی میں منعقد ہونے والی ایک تقریب میں شرکت نہ کرنے کا الزام ہے جس کے لیے انہوں نے 37 لاکھ روپے وصول کیے تھے۔