لاہور: ترین گروپ کے اہم رہنماؤں نے جہانگیر ترین سے ملاقات کے لیے لندن جانے کا فیصلہ کیاہے۔

ذرائع کے مطابق ترین گروپ کے رہنماؤں نے موجودہ سیاسی صورتحال پر جہانگیر ترین سے مشاورت کا فیصلہ  کیا ہے جس  کے لیے علیم  خان سمیت دیگر رہنما ان سے ملاقات کے لیے لندن جائیں گے۔

ذرائع کا بتانا ہےکہ ترین گروپ کے رہنما اسحاق خاکوانی اور عون چوہدری  بھی آئندہ دو روز میں لندن جائیں گے اور وہاں  جہانگیر ترین سے مشاورت کریں گے۔

ترین گروپ کے رہنما عون چوہدری کا کہنا ہےکہ جہانگیرترین کے آئندہ طبی معائنے کے بعد علیم خان ان سے ملاقات کریں گے اور اس  ملاقات کو جلد حتمی  شکل دی جائے گی جب کہ ملاقات میں خاکوانی اور ترین گروپ کے دیگر ارکان اسمبلی کی بھی شرکت متوقع ہے۔

عون چوہدری نے کہا کہ ملاقات میں علیم خان اور جہانگیر ترین مشترکاحکمت عملی کو حتمی شکل دیں گے۔

لاہور: (ویب ڈیسک) وزیراعلیٰ عثمان بزدار نے قیادت کو پیغام دیا ہے کہ علیم خان بطور وزیراعلیٰ کسی صورت قبول نہیں۔
علیم خان کے خلاف وزیراعلیٰ پنجاب عثمان بزدار کھل کر میدان میں آگئے۔ انہوں نے کہا کہ پرویزالہٰی کو منصب دیا جائے یا میرے پاس رہنے دیا جائے، ارکان اسمبلی کے بھی علیم خان مخالف جذبات ہیں۔
قبل ازیں وزیراعلی عثمان بزدار نے موجودہ سیاسی صورتحال پر اپنے اہم بیان میں کہا کہ اپوزیشن عدم اعتماد کا شوق پورا کرلے، ڈٹ کر مقابلہ کریں گے، اس وقت احتجاجی سیاست ملکی سلامتی اور یکجہتی کیلئے نقصان دہ ہے۔ انہوں نے کہا کہ نفاق کے بیج بونے والوں کو اپنے دانتوں سے گرہیں کھولنا پڑیں گی، سیاست کیلئے آگے بہت وقت ہے، اس وقت احتجاجی سیاست کرنا ملک کی یکجہتی کو نقصان پہنچانے کی کوشش ہے، دن میں خواب دیکھنے والے اور رات میں سازشیں کرنے والے ہمیشہ ناکام رہتے ہیں۔
عثمان بزدار کا کہنا تھا کہ پاکستان کو وزیراعظم عمران خان جیسا ویژنری اور بے باک لیڈر ہی آگے لیکر جاسکتا ہے، ایک طرف کرپٹ سیاست دان ہے اوردوسری طرف وزیراعظم عمران خان کی صورت میں ایماندارقیادت، کرپٹ مافیا کا پہلے بھی مقابلہ کیا اور آئندہ بھی کریں گے۔

پشاور: (ویب ڈیسک) پیپلز پارٹی کے لانگ مارچ میں شرکت کے لیے پشاور سے اے این پی اور پیپلز پارٹی کے قافلے روانہ ہو گئے، پیپلز پارٹی کے صوبائی صدر نجم الدین اور اے این پی خیبر پختونخوا کے صدر ایمل ولی نے قیادت کی ۔
پیپلز پارٹی کے لانگ میں شرکت کے لیے پیپلز پارٹی خیبر پختونخوا اور عوامی نیشنل پارٹی کے کارکن پشاور موٹر وئے ٹول پلازہ پر جمع ہوئے، پیپلز پارٹی کے کارکنوں کی قیادت پارٹی کے صوبائی صدر نجم الدین خان جبکہ اے این پی کے کارکنوں کی قیادت پارٹی کے صوبائی صدر ایمل ولی نے کی۔
میڈیا سے گفتگو میں نجم الدین کا کہنا تھا کہ اسلام آباد میں دھرنے کا فیصلہ چیئرمین بلاول بھٹو زرداری کرینگے، پنجاب میں علیم خان گروپ کو 50 ارکان کی حمایت حاصل ہے،حکومت ختم ہونے سے پہلے ہی عدم اعتماد ہوچکا ہے،اپوزیشن کو 200 سے زائد ارکان کی حمایت حاصل ہے۔
ایمل ولی خان کا کہنا تھا کہ آج صرف جلسہ میں شرکت کرکے واپس آئیں گے، دھرنا دینا ہمارا فیصلہ نہیں، اس لئے اے این پی دھرنے میں شرکت نہیں کرے گی، مولانا فضل الرحمان کے مارچ میں اندھے بہرے بن کرگئے تھے۔

لاہور : مسلم لیگ(ق) کے دونوں سینئر رہنماؤں نے علیم خان کا نام بطور وزیراعلیٰ مسترد کردیا اور کہا علیم خان سے بہتر ہے، عثمان بزدار وزیراعلیٰ رہیں۔

تفصیلات کے مطابق وزیراعظم عمران خان پنجاب میں وزیراعلیٰ تبدیل کرنے کیلئے تیار ہوگئے، تین سینئر وزراء نے مسلم لیگ ق کے رہنما مونس الٰہی اور طارق بشیر چیمہ سے ملاقات کی۔

ذرائع کا کہنا ہے کہ وزرا کی جانب سے وزیراعلیٰ پنجاب کے لئے علیم خان کا نام تجویز کیا گیا تاہم مسلم لیگ(ق) کے دونوں سینئر رہنماؤں نے علیم خان کا نام بطور وزیراعلیٰ مسترد کردیا۔

ذرائع کے مطابق ق لیگ کے دونوں رہنماؤں نے جواب دیا علیم خان سے بہتر ہے عثمان بزدار وزیراعلیٰ رہیں۔

دوسری جانب موجودہ سیاسی صورتحال کے پیش نظر چوہدری برادران بھی آج اسلام آباد پہنچ رہے ہیں۔

یاد رہے وزیراعظم عمران خان نے موجودہ صورتحال میں سینئر قیادت سے آج پھر مشاورت کا فیصلہ کرلیا اور پی ٹی آئی کے مرکزی رہنماؤں کو وزیراعظم ہاؤس بلالیا ہے۔

جس میں پنجاب میں ناراض ارکان اسمبلی کی سرگرمیوں کے تناظر میں مشاورت ہوگی جبکہ اپوزیشن کی ممکنہ تحریک عدم اعتماد ناکام بنانےکی حکمت عملی پرغور ہوگا۔

گذشتہ روز گورنر سندھ عمران اسماعیل نے پنجاب میں تبدیلی کا عندیہ دیتے ہوئے کہا تھا کہ علیم خان اور ترین گروپ نے پنجاب حکومت پر تحفظات کا اظہار کیا امیدکرتا ہوں علیم خان کے تحفظات وزیراعظم دور کریں گے۔

اسلام آباد: (ویب ڈیسک) وفاقی وزیراطلاعات فواد چودھری اور گورنر سندھ عمران اسماعیل نے سابق سینئر صوبائی وزیر علیم خان سے ملاقات کی جس کے دوران انہیں وزیراعظم کا خصوصی پیغام پہنچایا۔
ذرائع کے مطابق علیم خان نے وزیراعظم کے پیغام کے حوالے سے فواد چودھری اور عمران اسماعیل سے جہانگیر ترین کے ساتھ مشاورت تک کا وقت مانگ لیا ہے۔ واضح رہے کہ وزیراعظم عمران خان سے ملاقات کے بعد فوادچودھری اور عمران اسماعیل، علیم خان کی رہائش گاہ پہنچے تھے۔
سابق صوبائی وزیر علیم خان آج لندن روانہ ہوں گے جہاں وہ جہانگیرترین سے ملاقات کریں گے، ملاقات میں اہم سیاسی امور پر تبادلہ خیال ہوگا۔
قبل ازیں ترین گروپ کے رہنماؤں نے حالیہ سیاسی صورتحال پر جہانگیر ترین سے مشاو رت کا فیصلہ کیا۔ ترین گروپ کے رہنما اسحاق خاکوانی اور عون چودھری آئندہ 2روز میں لندن جائیں گے۔ اسحاق خاکوانی اور عون چودھری لندن میں جہانگیر ترین کی خیریت دریافت کریں گے۔

لاہور: (ویب ڈیسک) پتنگ بازی کو پہلے صرف تفریح سمجھا جاتا تھا، اب یہ موت کا کھیل بن چکی ہے۔ گذشتہ ایک سال کے دوران 6 افراد جاں بحق اور 15سے زائدزخمی ہوچکے ہیں۔
تمام تر کوششوں کے باوجود پتنگ بازی نہ رکنے کی ایک بڑی وجہ پتنگ بازوں کے لیے سزاؤں کا بہت کم ہونا بھی قرار دیا جاتا ہے۔ اِسی تناظر میں پولیس کی طرف سے حکومت کو سزائیں بڑھانے کی تجویز دی گئی ہے۔ پتنگ بازوں کے لیے 3 ماہ سے 1 سال تک قید ، 50 ہزار سے 1 لاکھ روپے تک جرمانے یا دونوں سزائیں تجویز کی گئی ہیں۔ دھاتی ڈور اور پتنگوں کی تیاری پر بھی سزائیں بڑھانے کی تجویز ہے۔
تجاویز کی منظوری کےبعد سوشل میڈیا پر پتنگ بازی کی تشہیر کرنے والے بھی قانون کی گرفت میں ہونگے ۔