کراچی : (ویب ڈیسک) عدالت نے سندھ پولیس اورجے آئی ٹی کی پیشرفت رپورٹ مسترد کردی، چیف جسٹس نے ایس ایس سائوتھ کراچی کی سرزنش کی کہا کہآج کے دور میں کسی کوڈھونڈنا کون سا مشکل کام ہے، صرف عقلمندی سے تفتیش کی ضرورت ہے۔
سپریم کورٹ نے والد سے 2 بچیوں کی بازیابی کے کیس میں سندھ پولیس اور جے آئی ٹی کی پیشرفت رپورٹ مسترد کردی۔عدالت نے آئی جی سندھ کےخلاف کارروائی کا عندیہ بھی دے دیا۔ چیف جسٹس نے ایس ایس پی سائوتھ کراچی کی سرزنش کرتے ہوئے کہا کہ پولیس کی دلچسپی ہوتی تو ماں پانچ سال تک دھکے نہ کھارہی ہوتی۔
آج کے دور میں کسی کوتلاش کرنا کون سا مشکل کام ہے، صرف عقلمندی سے تقتیش کی ضرورت ہے۔ بچیاں بازیاب نہ ہوئیں توآئی جی سندھ کے خلاف کارروائی ہوگی۔ دوران سماعت عدالت کا کہنا تھا کہ عدالتی حکم پر جمع کرائی گئی نئی رپورٹ پرانی رپورٹ میں الفاظ کا ہیر پھیر کرکے دوبارہ جمع کرائی گئی۔
پیشرفت رپورٹ میں تحقیقات کے حوالے سے کوئی ٹھوس مواد نہیں۔آئندہ سماعت تک بچیاں ٹریس نا ہوئیں تو آئی جی سندھ کیخلاف کارروائی ہوگی چیف جسٹس عمرعطا بندیال نے ریمارکس دیئے کہ 5 سال سے ایک شخص قانون سے بھاگا ہوا ہے۔ کیا ملزم آصف بلوچ کو اس کے موبائل اور بنک ٹرانزیکشنز کے ذریعے ٹریس کیا؟
عدالت نے پراسیکیوٹر جنرل سندھ کی عدالت سے دو ہفتے کا وقت دینے کی استدعا منظورکرتے ہوئے آئی جی سندھ۔۔جے آئی ٹی سربراہ اور ممبران کوآئندہ سماعت پر بذریعہ ویڈیو لنک پیش ہونے کا حکم دے دیا۔مزید سماعت 2 ہفتے بعد ہوگی۔
ڈاکٹر مہرین بلوچ نے سابق شوہر سے بچیوں کی بازیابی کیلئے عدالت سے رجوع کر رکھا ہے۔

اسلام آباد: اپوزیشن نے حکومت  کے خلاف تحریک عدم اعتماد کا مسودہ تیار کرلیا۔

ذرائع کے مطابق تحریک عدم اعتماد پر 80 سے زائد اپوزیشن اراکین کے دستخط ہیں جس   میں پیپلزپارٹی، ن لیگ، جے  یو آئی، اے این پی، بی این پی مینگل اور دیگر جماعتوں کے ارکان  نے دستخط  کیے ہیں۔

ذرائع نے بتایا کہ اپوزیشن نے اسمبلی اجلاس بلانے کی ریکوزیشن بھی تیارکر رکھی ہے،  تحریک عدم اعتماد اور اجلاس کے لیے ریکوزیشن کسی بھی وقت جمع کروائی جا سکتی ہے جس کے لیے اپوزیشن لیڈر شہبازشریف کے چیمبر کو الرٹ کردیا گیا ہے۔

ذرائع کے مطابق مجوزہ مسودے میں کہا گیاہے کہ ملک میں سیاسی عدم استحکام اورغیریقینی صورتحال ہے، خارجہ پالیسی مکمل طور پر ناکام ہوچکی ہے  جب کہ قائد ایوان اس ایوان کی اکثریت کا اعتماد کھوچکے ہیں، اس صورتحال کے تناظر میں قائد ایوان کے خلاف عدم اعتماد کی تحریک پیش کی جاتی ہے۔

واضح رہےکہ اپوزیشن جماعتیں حکومت کے خلاف تحریک عدم اعتماد کے لیے سرگرم ہیں اور اس سلسلے میں سیاست کے بڑے کھلاڑیوں کی بیٹھکیں جاری ہیں جب کہ (ن) لیگ کے رہنما رانا ثنااللہ نے تحریک عدم اعتماد کامیابی کا دعویٰ کیا ہے۔

لاہور: (ویب ڈیسک) مسلم لیگ ن کی ترجمان مریم اورنگزیب نے وزیر اعظم کے اعلانات کو نئی شعبدہ بازی قرار دے دیا۔
مسلم لیگ ن کی مرکزی ترجمان مریم اورنگزیب نے میڈیا سے گفتگو کرتے ہوئے کہا کہ وزیر اعظم عمران خان کا ہر اعلان اقتدار کی ڈوبتی کشتی بچانے کے لیے ہے اور عوام جانتی ہے کہ غیر ملکی فنڈنگ میں اربوں کی منی لانڈرنگ کس نے کی۔
انہوں نے کہا کہ لوگ اب عمران خان کی شعبدہ بازیوں میں نہیں آئیں گے کیونکہ ‎خزانہ خالی، معیشت تباہ اور مہنگائی آسمان پر ہے لیکن ریلیف کے نئے دھوکے دیئے جا رہے ہیں۔
مریم اورنگزیب نے کہا کہ ‎تحریک عدم اعتماد گرتی ہوئی دیواروں کے لیے آخری دھکا ثابت ہو گی لیکن اگر ‎عمران خان عوام کو ریلیف دینا چاہتے ہیں تو استعفیٰ دیں اور گھر جائیں۔

لاہور: (ویب ڈیسک) شہباز شریف نے کہا ہے کہ آٹے، چینی، بجلی کی قیمتوں میں 100 فیصد اضافہ کیا گیا، تاریخ میں کبھی اتنا اضافہ نہیں ہوا، تحریک عدم اعتماد مہنگائی کے ستائے عوام کے لئے اصل ریلیف ثابت ہوگی۔
پاکستان مسلم لیگ (ن) کے صدر اور قائد حزب اختلاف شہباز شریف نے اپنے بیان میں کہا ہے کہ گھی اور خوردنی تیل کی قیمت میں اضافے کے بعد 10 روپے پٹرول کی کمی عملاً واپس ہوچکی ہے، ایل پی جی اور گیس کی قیمت میں اضافے کے بعد نام نہاد ریلیف ہوا میں تحلیل ہوچکا ہے، عوام کو ریلیف دینا ہے تو بجلی کی قیمتوں میں ماہانہ 4 روپے سے زائد اضافہ واپس لینے کا اعلان کیا جائے، خدشہ ہے کہ 10 روپے کا سیاسی ریلیف آنے والے دنوں میں ہر شہری کو سینکڑوں روپے مہنگائی کی صورت ادا نہ کرنا پڑ جائے۔
شہباز شریف کا کہنا تھا کہ جھوٹے حکومتی پیکجز کا بوجھ بھی عوام کو اٹھانا پڑے گا، ایک طرف مہنگائی کے ستائے عوام اور دوسری طرف لٹیرے حکمران ہیں، گندم، چینی اور ایل این جی کی طرح حکومت پٹرولیم بحران پر آنکھیں بند کئے ہوئے ہے، ملکی تجارتی خسارہ سالانہ بنیادوں پر بڑھ کر 82 فیصد ہوگیا، گردشی قرض میں 114 فیصد سے زائد اضافہ ہوچکا ہے، تجارتی خسارہ 32 ارب ڈالر معیشت کی تباہ حالی کا بیان ہے، اس خسارے کی قیمت کو ن ادا کرے گا ؟۔