امریکا : (ویب ڈیسک) روسی حملے کے بعد امریکا نے یوکرین سے متعلق اپنے خدشات کا اظہار کیا ہے۔
غیر ملکی خبر رساں ادارے کے مطابق امریکی حکام نے خدشہ ظاہر کیا ہے کہ روس اتوار تک یوکرینی دارالحکومت پر مکمل قبضہ کرکےحکومت ختم کر دے گا۔ میڈیا رپورٹس کے مطابق مختلف شہروں پر بمباری کے بعد روس کے ہزاروں فوجیوں نے کیف کا زمینی محاصرہ کرلیا ہے اور یوکرین چرنوبل ایٹمی پاور پلانٹ پر بھی قبضہ کیا ہے۔
دوسری جانب یوکرین نے روسی حملوں میں 137شہری ہلاک اور 150 افراد کے زخمی ہونے کی تصدیق کی ہے۔
مزید برآں یوکرین نے روس کے 5 ہیلی کاپٹرتباہ کرنے، 50 فوجی ہلاک اور 80گرفتارکرنے کادعویٰ کیا ہے، اطلاعات ہیں کہ روس کافوجی کارگو طیارہ گرکرتباہ ہوگیا جب کہ طیارے میں موجود عملہ بھی ہلاک ہوگیا ہے ۔
یوکرینی صدر ولادیمیر زیلنسکی کا کہنا ہے کہ عالمی برادری نےانہیں روس سے لڑنےکے لیےتنہا چھوڑدیا ہے۔

خیبرپختونخوا: (ویب ڈیسک) خیبرپختونخواکے وزیر اعلیٰ محمود خان نے کارکردگی میں پنجاب اور سندھ کے وزرائے اعلیٰ کو پیچھے چھوڑ دیا ہے۔
گیلپ پاکستان نے 5 ہزار سے زائد افراد کی رائے پر مبنی نیا سروے جاری کردیا جس کے مطابق محمود خان کی کارکردگی سے خیبرپختونخوا کے 53 شہری مطمئن تو 41 فیصد نے غیر مطمئن ہونے کا کہا۔ اس کے برعکس پنجاب کے وزیراعلیٰ عثمان بزدار کی کارکردگی سےصوبے کے 55 فیصد شہری غیر مطمئن تو 41فیصد مطمئن نظرآئے جب کہ سندھ کے وزیراعلی مراد علی شاہ کے صوبے کے 54 فیصد شہری غیر مطمئن تو 41 فیصد نے مطمئن ہونے کاکہا۔
وزرائے اعلی ٰ کے علاوہ قومی اسمبلی، میڈیا اور سرکاری ملازمین کی کارکردگی پربھی عوامی رائے سامنے آئی جس میں 35 فیصد پاکستانیو ں نے سرکاری ملازمین اور 26 فیصد نے قومی اسمبلی کی کارکردگی پر اطمینان کا اظہار کیا جب کہ میڈیا کی کارکردگی سے سروے میں 43 فیصد پاکستانیوں نے خوش ہونے کاکہا۔

لاہور: (ویب ڈیسک) رائے ونڈ میں 5 افراد نے نوکری کا جھانسہ دے کر خاتون کو مبینہ طور پر زیادتی کا نشانہ بنادیا۔
نجی نیوز کے مطابق واقعے کی ایف آئی آر تھانہ رائے ونڈ میں درج کی گئی ہے جس میں مدعیہ فرزانہ بی بی کا کہنا ہے کہ ملزمان نے اس کی رشتے دار خاتون کو ایک فیکٹری میں نوکری دلوانے کی یقین دہانی کرائی جب اس نے اپنی رشتے دار خاتون کو نوکری کے لیے بھیجا تو ملزمان اسے نامعلوم مقام پرلے گئے جہاں ملزمان نے زیادتی کی اور ویڈیو بنائی۔
پولیس نے واقعے کی اطلاع ملنے پر تین ملزمان ابرار، وقاص، رفیق اور دو نامعلوم ملزمان کے خلاف مقدمہ درج کرلیا۔

لاہور: (ویب ڈیسک) مسلم لیگ (ن) کے رکن پنجاب اسمبلی بلال یاسین پر حملے کا سہولت کار پکڑا گیا۔
ایس پی سی آئی اے عاصم افتخار کےمطابق گرفتار ملزم محسن مرکزی ملزم حسیب عرف وکی کا دست راست ہے، ملزم نے بلال یاسین پر حملے کے لیے شوٹرز کو اسلحہ اور موٹر سائیکل فراہم کی تھی۔ خیال رہے کہ ملزمان نے 31 دسمبر کی رات بلال یاسین کو فائرنگ کرکے شدید زخمی کردیا تھا،ملزمان کے خلاف اقدام قتل اوردہشت گردی کی دفعات کےتحت مقدمہ درج ہے۔
بلال یاسین پر فائرنگ کرنے والے شوٹرز قاصد اور ماجد پہلے ہی گرفتار ہیں۔

لاہور: (ویب ڈیسک) چودھری شجاعت حسین نے کہا ہے کہ معاشی حالات درست نہ کیے تو سب کی سیاست ختم ہو جائے گی، جو لوگ ہماری خدمت کرتے ہیں ان کے مسائل کو بھی سننا چاہیئے، معاشی حالات کو سب سے زیادہ اہمیت دینی چاہیئے۔
پاکستان مسلم لیگ ق کے سربراہ چودھری شجاعت حسین نے اپنے بیان میں کہا کہ ملک کے اندر خاص طور پر لاہور میں سیاسی ماحول بنا ہوا ہے، ہر جماعت کے لیڈر مختلف باتیں کر رہے ہیں، ہر لیڈر اپنی اپنی جماعت کے مؤقف کو بیان کر رہا ہے، فضل الرحمان، آصف زرداری، شہباز شریف ملاقات کیلئے آئے، ملاقات میں ہر قسم کے معاملات پر بات چیت ہوئی۔
چودھری شجاعت حسین کا کہنا تھا کہ پرانے واقعات یہاں تک کہ نواز شریف کے متعلق بھی گفتگو ہوئی، ملاقاتوں میں بعض تجاویز بھی زیر غور آئیں، ملاقاتوں میں مصروف رہے تو عوام سیاستدانوں پر اعتبار کرنا چھوڑ دیں گے۔