اسلام آباد: (ویب ڈیسک) وزیراعظم شہبازشریف نے کہا ہے کہ دہشتگرد سزا سے بچ نہیں سکتے، ناحق خون بہانے والوں کو عبرت کی مثال بنائیں گے۔
وزیراعظم نے بارکھان کے علاقے رکھنی بازار میں دھماکے کی مذمت کرتے ہوئے قیمتی جانوں کے نقصان پر دکھ اور افسوس جبکہ اہل خانہ سے ہمدردی کا اظہار کیا ہے۔
اس موقع پر شہباز شریف کا کہنا تھا کہ دہشت گرد سزا سے بچ نہیں سکیں گے، ناحق خون بہانے والوں کو عبرت کی مثال بنائیں گے، انہوں نے وزیراعلیٰ اور آئی جی پولیس بلوچستان سے رپورٹ طلب کر لی اور زخمیوں کو بہترین طبی سہولیات فراہم کرنے کی ہدایت بھی کی ہے۔
وزیراعظم شہباز شریف نے دھماکے میں جاں بحق افراد کی مغفرت، اہل خانہ کے لئے صبر اور زخمیوں کی جلد صحت یابی کی دعا کی ہے۔

کراچی: (ویب ڈیسک) دہشت گردی کے بڑھتے واقعات کے باوجود کراچی کینٹ سٹیشن پر لگائے گئے کئی واک تھرو گیٹ ناکارہ ہوگئے۔
کراچی کینٹ سٹیشن پر ایک طرف دھماکا خیز مواد کا کھوج لگانے والے آلات اور ریل گاڑیوں کے اندر معائنہ کرنے والا سسٹم ناپید ہے تو دوسری جانب مسافروں کا سامان چیک کرنے کا کوئی انتظام ہی نہیں۔
سٹیشن کی سکیورٹی پر مامور اہلکار بھی مسافروں کا سامان چیک کرنے کے بجائے اپنی ہی باتوں میں مصروف نظر آتے ہیں۔
شہریوں نے کینٹ سٹیشن کی سکیورٹی کو ناکارہ قرار دیتے ہوئے کہا ہے کہ سٹیشن کے داخلی اور خارجی راستوں پر واک تھرو گیٹ سمیت نفری بڑھائی جائے۔

کراچی: (ویب ڈیسک) تھرکول بلاک ون میں چوریوں کی بڑھتی وارداتوں پر چینی کمپنی نے حکومت سندھ کو خط لکھ دیا۔
چینی کمپنی کے چیئرمین مینگ ڈھونگ آئی نے چیف سیکرٹری سندھ کے نام خط میں لکھا کہ چوری کی وارداتوں میں مقامی نوجوان ملوث ہیں جب کہ قیمتی اسٹیل، الیکٹرک کیبل اور دیگر آلات چوری کرنے والوں کو پولیس سے چھڑوا لیا جاتا ہے۔
چینی کمپنی کے چیئرمین نے اپنے خط میں مزید لکھا کہ کچھ روز قبل بھی بجلی سپلائی کی ٹرانسمیشن لائن کو نقصان پہنچایا گیا۔
خط میں چیئرمین کی جانب سے چیف سیکرٹری سندھ سے تھر کول بلاک ون کی باڑ سے 2 کلو میٹر تک غیر متعلقہ افراد کی آمدورفت پر پابندی عائد کرنے کی بھی گزارش کی گئی۔
چینی کمپنی کے چیئرمین کا مزید کہنا تھا کہ اگر چوریاں نہ رکیں تو مطلوبہ نتائج حاصل نہیں ہوں گے۔

لاہور: (ویب ڈیسک) سینئر رہنما تحریک انصاف اور سابق وفاقی وزیر اطلاعات و نشریات فواد چودھری نے کہا ہے کہ جام پور میں بربریت عروج پر ہے لیکن پھر بھی الیکشن پی ٹی آئی نے جیتنا ہے۔
سماجی رابطے کی ویب سائٹ ٹوئٹر پر فواد چودھری نے کہا کہ جام پور ضمنی انتخابات میں پولیس اور جتھوں کا استعمال کر کے تحریک انصاف کے حمایتی بااثر لوگوں کی فصلوں پرٹریکٹر چلا دیئے گئے۔
رہنما پی ٹی آئی کا کہنا تھا کہ درجنوں لوگ جعلی پرچوں میں اندر ہیں، پورے پنجاب کی پولیس جام پور میں لگا دی گئی ہے۔

کراچی: (ویب ڈیسک) کراچی پولیس نے شہر کے مختلف علاقوں میں کارروائی کرتے ہوئے سٹریٹ کرائمز ، منشیات فروشی میں ملوث 9 ملزم گرفتار کرلیے ۔
کراچی پولیس کے مطابق گارڈن، کلری، کلاکوٹ، کھارادر اور عیدگاہ کے علاقوں میں کارروائی کے دوران گرفتار ملزمان سٹریٹ کرائمز، موٹر سائیکل لفٹرز، منشیات فروش اور شراب کی سپلائی میں ملوث ہیں ۔
ملزمان کے قبضے سے 2 پستول، 3 چوری شدہ موٹر سائیکلز، 1 کلو گرام چرس اور 8 شراب کی بوتلیں برآمد کرلی گئیں ۔
پولیس کے مطابق ملزمان میں مبشر، عدنان ، عبدالرحمن، ضیاءالرحمن، گل زادہ ، عبدالوہاب عرف کوڈو، عمران، عمران ماشی اور نثار احمد شامل ہیں، ملزمان اس سے قبل بھی کئی مقدمات میں گرفتار ہوکر جیل جا چکے ہیں۔
پولیس کے مطابق ملزم عبدالوہاب عرف کوڈو اس سے قبل پولیس مقابلے قتل، اقدام قتل ، غیر قانونی اسلحہ اور ڈکیتی کے 5 مقدمات جبکہ ملزم عمران ماشی شراب سپلائی کے مقدمہ میں گرفتار ہوکر جیل کی سزا کاٹ چکا ہے ۔

بنگلور : (ویب ڈیسک) دنیا کی بڑی معیشتوں کا جی20 اجلاس روس-یوکرین جنگ کے معاملے پر بغیر کسی اتفاق رائے کے ختم ہو گیا۔
بھارت کے شہر بنگلور میں ہونیوالے جی 20 وزرائے خزانہ کے اجلاس میں روس اور چین کی جانب سے یوکرین پر روسی حملے کی مذمت کی مخالفت کی گئی جبکہ بھارت نے بھی روس کی مذمت سے گریز کیا۔
جی 20کی صدارت کرنیوالے ملک بھارت کی جانب سے یوکرین معاملہ اٹھانے سے گریز کے باوجود مغربی ممالک کی جانب سے زور دیا گیا کہ اجلاس کے ایسے نتائج کی بالکل حمایت نہیں کی جائے گی جس میں یوکرین جنگ کی مذمت شامل نہیں ہوگی ۔
کانفرنس میں بیشتر نمائندوں نے روس کی یوکرین کے خلاف جنگ کی شدید الفاظ میں مذمت کی لیکن چین اور روس نے مشترکہ اعلامیے پر دستخط نہیں کیے ، اجلاس میں اس معاملے پر اتفاق رائے نہ ہونے پر اجلاس کا اعلامیہ جاری نہ ہو سکا ، بھارتی وزیر خزانہ کی جانب سے اجلاس کی آؤٹ کم اسٹیٹمنٹ جاری کی گئی جس میں دور روز تک ہونے والی گفتگو اور اجلاس کے اختلاف کا ذکر کیا گیا۔
گزشتہ نومبر سے چین اس کوشش میں ہے کہ بیان میں استعمال زبان کو تبدیل کیا جائے اور متن سے لفظ ’’جنگ‘‘ کو خارج کیا جائے ، چین اس تنازع میں غیرجانبدار رہنے کے ساتھ ہی روس کے ساتھ سٹر یٹجک تعلقات بھی بر قرار رکھنا چاہتا ہے۔
واضح رہے کہ روس جی 20 کا رکن ہے لیکن وہ جی 7 میں شامل نہیں، وہ یوکرین کے خلاف جنگ کو حملہ یا جنگ کہنے کی بجائے ’خصوصی فوجی آپریشن‘ قرار دیتا ہے۔