ریاض : (ویب ڈیسک) سعودی عرب میں اپنی نوعیت کی پہلی فوجی پریڈ “فدا” میں وزارت داخلہ کے 16 سیکورٹی شعبوں سے تعلق رکھنے والے 2ہزار 800 سے زائد مرد و خواتین شریک ہوئے ۔
عرب میڈیا کے مطابق پہلی مرتبہ فوجی پریڈ میں خواتین نے بھی شرکت کی ہے جبکہ پریڈ میں پہلی مرتبہ ’’ آرکسٹرا‘‘ میوزک بھی متعارف کرایا گیا ہے۔
سعودی فوجی پریڈ میں شرکاء نے فوجی نظم و ضبط اور ربط میں انفرادی مہارتیں پیش کیں جبکہ فوجی میوزیکل پرفارمنس کا بھی انعقاد کیا گیا، جس میں سعودی ریاست کا قیام، سلامتی اور تحفظ کی بحالی کے عزم کا اعادہ کیا گیا۔
یہ پریڈ سعودی ریاست کے قیام کے بعد سے سلامتی کے پیغام کی عکاسی کرتی چلی آرہی ہے ، اس فوجی پریڈ کا عنوان ’’ فدا ‘‘ رکھا گیا ہے جو یہ ظاہر کرتا ہے کہ فوج کے یہ سپوت وطن کے لیے اپنی جان فدا کرنے کے لیے بھی تیار ہیں۔
دریں اثنا وزارت ثقافت نے “فاؤنڈیشن مارچ” کی سرگرمی کا اہتمام کیا جو ریاض کے شہزادہ ترکی بن عبدالعزیز اول روڈ پر منعقد کی گئی ، اس مارچ میں 4800 سے زیادہ فنکاروں نے شرکت کی ہے ، مارچ میں وزارت داخلہ کی فوجی پریڈ اور دیگر مشہور فنکاروں کی پرفارمنس بھی شامل تھی جبکہ پرفارمنگ آرٹس اور ثقافتی اقدار کی نمائندگی کرنے والی فنکارانہ شخصیات نے بھی اپنے فن کامظاہر ہ کیا ۔

انقرہ : (ویب ڈیسک) ترکیہ نے رواں ماہ کے تباہ کن زلزلے کے بعدگھروں کی تعمیر نو کا کام شروع کردیا ہے جس پر15 ارب ڈالر لاگت آئیگی ۔
ترک خبررساں ادارے کے مطابق ترکیہ میں 6 فروری کو آنے والے زلزلے سے ایک لاکھ 60 ہزار عمارتیں بری طرح متاثر ہوئیں جن میں پانچ لاکھ 20 ہزار اپارٹمنٹس کے رہائشی اب عارضی پناہ گاہوں میں ہیں۔
ترکیہ میں ڈیزاسٹر اینڈ ایمرجنسی مینجمنٹ اتھارٹی نے اعلان کیا کہ گزشتہ رات تک ہلاکتوں کی تعداد بڑھ کر 44 ہزار 218 ہو گئی جبکہ شام کے تازہ ترین اعلان کردہ اعداد وشمار کے مطابق ہلاکتوں کی تعداد پانچ ہزار 914 ہے۔
صدر رجب طیب اردگان نے ایک سال کے اندر متاثرین کے لیے گھروں کی تعمیر نو کا وعدہ کیا ہے جبکہ ماہرین کا کہنا ہے کہ حکام کو تعمیرات میں حفاظتی معیار کو رفتار سے پہلے رکھنا چاہیے۔
ترکیہ حکومت کے ایک عہدیدار نے نام ظاہر نہ کرنے کی شرط پر بتایا کہ ،کئی پراجیکٹس کے لیے ٹینڈرز اور کنٹریکٹ کیے گئے ہیں ، یہ عمل بہت تیزی سے آگے بڑھ رہا ہے اور حفاظتی معیار پر کوئی سمجھوتہ نہیں کیا جائے گا۔
امریکا کے جے پی مورگن بینک کے تخمینے کے مطابق ترکیہ میں زلزلہ متاثرین کی رہائش گاہوں اور انفراسٹرکچر کی تعمیرِ نو کے لیے 25 ارب ڈالر درکار ہوں گے۔
یاد رہے کہ ترکیہ اور شام میں آنے والے زلزلے کے نتیجے میں ہلاکتوں کی تعداد 50 ہزار سے تجاوز کرچکی ہیں ،میڈیا رپورٹس کے مطابق 6 فروری کو آنے والے تباہ کن زلزلے کی شدت 7.7 تھی جس کے بعد 7.6 شدت کا ایک اور زلزلہ آیا جبکہ زلزلے کے بعد تقریباً 9 ہزار آفٹر شاکس ریکارڈ کیے جا چکے ہیں۔

بیجنگ : (ویب ڈیسک) چین میں کورونا کے وار تاحال جاری ہیں ، عالمی وبا سے ایک ہفتے کے دوران 7 افراد جان کی بازی ہار گئے ۔
میڈیا رپورٹس کے مطابق چینی طبی حکام کا بتانا ہے کہ چین میں 17 سے 23 فروری کے دوران ہسپتالوں میں کورونا سے7 اموات رپورٹ ہوئی ہیں۔
چین میں دسمبر سے رپورٹ ہونے والے تمام کورونا کیسز اومی کرون ویریئنٹ کے ہیں جبکہ کورونا کیسز میں 60 فیصد BA.5.2.48 اور 29 فیصد BF.7.14 قسم کے رپورٹ ہوئے ہیں۔
حکام کی جانب سے مزید بتایا گیا کہ چین میں شناخت کورونا کے XBB.1 اورXBB.1.5 سمیت 22 ویریئنٹ تشویش کاباعث ہیں۔
خبر ایجنسی کی رپورٹ کے مطابق چین میں کورونا پابندیوں کے خاتمے کے بعد سے ہسپتالوں میں کورونا مریضوں کا رش دیکھا جارہا ہے۔
خیال رہے کہ 8جنوری کو لگ بھگ 3 سال بعد چین نے کورونا وائرس کی وبا سے متعلق سفری پابندیوں کو ختم کریا تھا ، چین میں نئے قمری سال کی 40 روزہ چھٹیوں کا آغاز ہوا جس کے بعد کورونا کے کیسز بڑی تعداد میں سامنے آئے تھے ۔