اسلام آباد: (ویب ڈیسک) امریکی سفیر ڈونلڈ بلوم نے وفاقی وزیر خزانہ اسحاق ڈار سے ملاقات کی ہے۔
ملاقات کے دوران گفتگو کرتے ہوئے اسحاق ڈار نے کہا کہ حکومت پاکستان معاشی استحکام کے لیے بھرپور کوششیں کر رہی ہے، مالی نظم و ضبط کے لیے سخت اقدامات کیے جا رہے ہیں، امریکا کے ساتھ معاشی تعلقات کے مزید فروغ کے خواہشمند ہیں۔
امریکی سفیر ڈونلڈ بلوم نے کہا کہ امریکا پاکستان کے ساتھ معیشت اور تجارت کو فروغ دینا چاہتا ہے، دونوں ممالک کے درمیان موجودہ دوطرفہ تعلقات کو مزید فروغ دینے پر اتفاق کیا گیا، وزیر خزانہ نے امریکی سفیر کو مشکل معاشی صورتحال میں حکومتی پالیسیوں سے آگاہ کیا۔
اسحاق ڈار نے کہا کہ موجودہ حکومت عوام کی فلاح و بہبود کے لیے فکر مند ہے، اسحاق ڈار نے امریکی سفیر کو پاکستان کی قومی اور بین الاقوامی مالیاتی ذمہ داریوں پر بھی بریفنگ دی۔
ملاقات میں اقتصادی تعلقات کو مزید مضبوط کرنے کے مواقعوں پر بھی تبادلہ خیال کیا گیا، امریکی سفیر نے کہا کہ پاکستان اور امریکہ کے درمیان مضبوط تعلقات ہیں، ڈونلڈ بلوم نے معاشی استحکام اور اقتصادی ترقی لیے حکومتی پالیسیوں پر اظہار اطمینان کا اظہار کیا۔

اسلام آباد: (ویب ڈیسک) اٹارنی جنرل آف پاکستان نے صدر مملکت کی جانب سے صوبوں میں الیکشن تاریخ دینے پر اعتراض اٹھا دیا۔
ذرائع کے مطابق اٹارنی جنرل نے صدر کی جانب سے پنجاب اور خیبرپختونخوا میں انتخابات کی تاریخ دینے کا معاملے پر الیکشن کمیشن کو اپنے موقف سے آگاہ کرتے ہوئے کہا ہے کہ آئین میں صدر مملکت کو صوبوں میں انتخابات کی تاریخ دینے کا کوئی اختیار نہیں، یہ اختیار صرف گورنرز کو حاصل ہے۔
اٹارنی جنرل آفس نے پنجاب اور خیبرپختونخوا میں عام انتخابات سے متعلق الیکشن کمیشن کو آئینی رائے دیتے ہوئے کہا ہے کہ صدر مملکت کی جانب سے جاری تاریخ پر 90 روز میں الیکشن کرانا ناقابل قبول عمل ہے، اگر الیکشن کمیشن انتخابات کا شیڈول جاری کرے تو 27 اپریل سے پہلے الیکشن ہونا ممکن نہیں۔
اٹارنی جنرل نے مزید کہا کہ عوامی نمائندگی کے قانون 1976 میں الیکشن تاریخ دینے کا اختیار صدر پاکستان کے پاس نہیں تھا، جنرل ضیاء نے 1985 میں آٹھویں ترمیم کے ذریعے انتخابات کی تاریخ دینے کا اختیار صدر مملکت کو دیا جبکہ 18 ویں ترمیم سے صوبوں میں الیکشن کی تاریخ دینے کا اختیار گورنرز کو دیا گیا۔
اٹارنی جنرل نے الیکشن کمیشن کو تحریری رائے دینے سے معذرت کرتے ہوئے کہا کہ میں ریاست کی نہیں حکومت کی نمائندگی کر رہا ہوں، تحریری طور پر اپنی رائے نہیں دے سکتا، اٹارنی جنرل کی معذرت کے بعد الیکشن کمیشن نے دو آئینی ماہرین شاہ خاور اور سجیل سواتی سے آج شام تک تحریری رائے مانگ لی۔

لاہور: (ویب ڈیسک) نگران پنجاب حکومت کی جانب سے کہا گیا ہے کہ لاہور میں دفعہ 144 کی خلاف ورزی پر متعدد افراد کے خلاف قانونی کارروائی کا حکم دیا گیا۔
ترجمان پنجاب حکومت نے اپنے بیان میں کہا ہے کہ ایس ایل کے میچوں کی وجہ سے شہر کے مختلف حصوں میں دفعہ 144کا نفاذ کیا گیا تھا، کرکٹ ٹیموں کی آمد کی وجہ سے آج حکومت نے مال روڈ پر خصوصی اقدامات کئے تھے۔
ترجمان نے مزید کہا کہ ایک سیاسی جماعت کے کارکنوں نے دفعہ 144 کی خلاف ورزی کرتے ہوئے مال روڈ پر مظاہرہ کیا، مظاہرین زبردستی پولیس وین میں سوار ہو گئے، صوبہ بھر میں امن اور امان کو ہر قیمت پر یقینی بنایا جائے گا۔

پشاور: (ویب ڈیسک) سابق سپیکر و سینئر رہنما پاکستان تحریک انصاف اسد قیصر نے کل پشاور میں جیل بھرو کے حوالے سے خصوصی پیغام جاری کر دیا۔
اسد قیصر کا اپنے پیغام میں کہنا تھا کہ آج لاہور سے تحریک انصاف کی جیل بھرو تحریک کا آغاز ہو چکا ہے، جس طرح قائدین اور کارکنان نے خود کو گرفتاری کے لیے پیش کیا ان کو خراجِ تحسین پیش کرتا ہوں۔
سابق سپیکر نے کہا کہ کل پشاور میں جیل بھرو تحریک کا دوسرا دن ہو گا، میں اور دیگر قائدین وہاں موجود ہوں گے، ہم کل خود اپنی گرفتاریاں پیش کریں گے۔
اسد قیصر نے کہا کہ جیل بھرو تحریک پاکستان کو قانون کی حکمرانی کی طرف گامزن کرنے کی ضمانت ہے، امید کرتے ہیں کہ قوم ہماری جیل بھرو تحریک میں ہمارا بھرپور ساتھ دے گی۔

اسلام آباد: (ویب ڈیسک) مسلم لیگ ن نے سپریم کورٹ کے دو ججز کے سامنے حکومت یا پارٹی کے کیسز نہ لگانے کی استدعا کردی۔
ن لیگی رہنماؤں نے سپریم کورٹ سے استدعا کی کہ 2 ججز کے سامنے حکومت کے کیس نہ لگائے جائیں۔ وزیراعظم کے معاون خصوصی عطا تارڑ نے پریس کانفرنس میں کہاکہ یہ دونوں ججز ن لیگ کے خلاف ذہن رکھتےہیں اور چیف جسٹس سےاپیل کرتےہیں ہمارا کوئی کیس ان دو ججز کے پاس نہ لگایا جائے۔
وفاقی وزیرداخلہ راناثنا اللہ کاکہنا تھاکہ سپریم کورٹ میں نوازشریف کےکیس میں ایک جج نگراں جج رہے، ان سے انصاف کی توقع نہیں، دوسرے جج کی آڈیولیک کا ناقابلِ تردید ثبوت سامنے آچکا ہے، ان کی غیرجانبداری پر سوال اٹھ چکا ہے۔
انہوں نے کہا کہ دونوں جج نواز اور شہباز شریف سے متعلق درجنوں مقدمات میں مخالفانہ فیصلے دے چکے ہیں، قانون اورعدالتی روایت ہے متنازعہ جج متعلقہ مقدمے کی سماعت سے خود کو الگ کرلیتے ہیں۔

لاہور: (ویب ڈیسک) لاہور پولیس کی جانب سے مال روڈ پر پی ٹی آئی کارکنوں کو قیدیوں کی گاڑی میں بیٹھنے کی آفر کر دی گئی۔
پولیس اہلکار نے اعلان کیا ہے کہ پی ٹی آئی کے جو کارکنان گرفتاریاں دینا چاہتے ہیں وہ قیدیوں کی گاڑیوں میں بیٹھ سکتے ہیں۔
انہوں نے کہا ہے کہ قیدیوں کی گاڑیوں موجود ہیں جس نے گرفتاری دینی ہے دے دے۔
خیال رہے کہ پی ٹی آئی رہنما شاہ محمود قریشی، اسد عمر، اعظم سواتی سمیت کئی پی ٹی آئی رہنماوں نے آج گرفتاری دی ہے۔