لاہور: (ویب ڈیسک) سابق وزیراعلیٰ پنجاب چودھری پرویز الہیٰ نے کہا ہے کہ عمران خان ہی ملک کو مسائل سے نکال کر سیاسی و معاشی استحکام پیدا کرسکتا ہے۔
اپنے ایک بیان میں سابق وزیراعلیٰ پنجاب چودھری پرویزالہٰی نے کہا کہ اس وقت پاکستان نااہل حکمرانوں کی وجہ سے مشکل صورتحال سے دوچار ہے، نام نہاد تجربہ کاروں کے ہاتھوں پاکستان کی معیشت بری طرح تباہ ہوچکی ہے۔
انہوں نے کہا کہ شہباز شریف کا سارا نام نہاد تجربہ صرف دوروں تک محدود ہے، حکمران عوام کو ریلیف دینے میں بھی ناکام ہیں اور اووسیز پاکستانیوں کے مسائل سے بھی انہیں دلچسپی نہیں، اوورسیز پاکستانی عام انتخابات میں فیصلہ کن کردار ادا کریں گے۔

اسلام آباد: (ویب ڈیسک) سپریم کورٹ آف پاکستان نے سابق سی سی پی او لاہور غلام محمود ڈوگر کے ٹرانسفر پر حکمِ امتناع میں 16 فروری تک توسیع کر دی۔
سپریم کورٹ میں سابق سی سی پی او لاہور غلام محمود ڈوگر کی ٹرانسفر کے خلاف درخواست پر سماعت ہوئی۔
جسٹس اعجازالاحسن نے استفسار کیا کہ سپریم کورٹ نے تو غلام محمود ڈوگر کا تبادلہ روک دیا تھا۔
سابق سی سی پی او لاہور کے وکیل نے دلائل دیتے ہوئے کہا کہ عدالتی حکم کے باوجود غلام محمود ڈوگر کو دوبارہ ٹرانسفر کر دیا گیا ہے۔
جسٹس اعجازالاحسن نے ایڈیشنل اٹارنی جنرل سے سوال کیا کہ مسٹر عامر رحمٰن، عدالتی حکم کے باوجود دوبارہ ٹرانسفر کیسے کر دیا گیا؟ جس پر ایڈیشنل اٹارنی جنرل نے جواب دیا کہ مجھے معلومات نہیں ہے، جواب کے لیے مہلت دی جائے۔
سپریم کورٹ نے غلام محمود ڈوگر کے ٹرانسفر پر وفاقی حکومت سے رپورٹ طلب کر لی۔
واضح رہے کہ غلام محمود ڈوگر کو سروس ٹریبونل کے ایک بنچ نے بحال جبکہ دوسرے نے معطل کیا تھا، غلام محمود ڈوگر نے سروس ٹریبونل کا فیصلہ سپریم کورٹ میں چیلنج کر رکھا ہے۔

اسلام آباد: (ویب ڈیسک) پاکستان مسلم لیگ (ن) کے کارکنان نے الیکشن کمیشن آف پاکستان کے دفتر کے باہر احتجاج کیا ہے۔
مسلم لیگ (ن) کے کارکنان نے الیکشن کمیشن سے عمران خان کو سزا دینے کا مطالبہ کرتے ہوئے شدید نعرے بازی کی، لیگی ورکرز نے ہاتھوں میں پلے کارڈز اٹھا رکھے تھے۔
لیگی کارکنان نے چیف الیکشن کمشنر اور الیکشن کمیشن کے حق میں نعرے بھی لگائے، کارکنان نے الیکشن کمیشن، اداروں پر دباؤ نامنظور، چیف تیری جرات کو سلام کے نعرے لگائے۔

لاہور: (ویب ڈیسک) لاہور ہائیکورٹ کے 5 رکنی فل بنچ کے 4 ججز نے ایڈووکیٹ جنرل پنجاب احمد اویس اور پاکستان تحریک انصاف کے 97 لاء افسران کی برطرفیوں کو درست قرار دے دیا۔
فل بنچ کے 4 ججز نے درخواستوں کو جزوی منظور کر لیا، جسٹس عاصم حفیظ نے 4 ججز کے فیصلے سے اختلاف کیا۔
عدالت نے حمزہ شہباز کے دور حکومت کے 19 لاء افسران کی تقرریاں بھی غیر قانونی قرار دے دیں، عدالت نے فریقین کے دلائل سننے کے بعد فیصلہ محفوظ کیا تھا۔
جسٹس علی باقر نجفی کی سربراہی میں لاہور ہائیکورٹ کے 5 رکنی فل بنچ نے احمد اویس اور دیگر کی درخواستوں پر سماعت کی۔

لاہور: (ویب ڈیسک) پاکستان مسلم لیگ (ن) کی چیف آرگنائزر مریم نواز نے کہا ہے کہ عمران خان نے جھوٹ کا نام بیانیہ رکھا ہے، چیئرمین پی ٹی آئی کے پاس کوئی معاشی پلان نہیں تھا، جنرل باجوہ سپر کنگ تھے تو کیا آپ ان کے ملازم تھے۔
لاہور میں مسلم لیگ (ن) کے کارکنوں سے خطاب کے دوران مریم نواز نے کہا کہ ن لیگ نے ای کامرس اور آئی ٹی سیکٹر میں اقدامات کیے، سستا قرض سکیم بھی ہمارے دور میں شروع ہوئے، عمران خان نے جیل بھرو تحریک کی بات کی، انہوں نے کیا کبھی طلباء کو کوئی سکیم دی؟
عمران خان کو تنقد کا نشانہ بناتے ہوئے مریم نواز نے کہا کہ عمران خان نے جھوٹ کا نام بیانیہ رکھا ہے اور اس کے لئے انہوں نے سوشل میڈیا کی مدد لی، عمران خان کا بیانیہ تو بےبنیاد الزامات پر مبنی ہے، عمران خان لوگوں کے بچوں کو کہتے ہیں جیلیں بھرو، عمران خان جیبیں بھریں اور لوگوں کے بچے جیل جائیں، لوگوں کے بچے کیوں جیلیں بھریں؟
چیف آرگنائزر ن لیگ کا کہنا تھا کہ پاکستان کو اس وقت بیانیے نہیں ترقی کی ضرورت ہے، عمران خان ایک کروڑ نوکریوں کا جھانسہ دیکر فرار ہو گیا، عمران خان نےلوگوں کویوتھ کےنام پر بیوقوف بنایا، ذہنی مریضوں کی سیاست شروع کردی گئی ہے، عمران خان خود تو ذہنی مریض تھے قوم کو بھی بنارہے ہیں۔
مریم نواز نے کہا کہ عمران خان نے پاکستان کے دوسرے ممالک سے تعلقات کو خراب کردیا، سائفر کے بیانیےکی تدفین زمان پارک میں ہو چکی ہے، آپ نے بیرون ممالک میں انٹرویو دئیےکہ کوئی سازش نہیں ہوئی، ایبسلوٹلی ناٹ کے سٹیکر کیوں لگوائےتھے؟
ان کا کہنا تھا کہ میں نے پہلے بھی کہا تھا کہ سائفر فراڈ کے سوا کچھ نہیں، جھوٹا بندہ کبھی سچ بول ہی نہیں سکتا، بہت سنا ہم کوئی غلام ہیں، امپورٹڈ حکومت، حقیقی آزادی، ایبسلوٹلی ناٹ، آج پوچھ سکتی ہوں حقیقی آزادی کا کیا ہوا؟ غلامی نامنظور کے نعرے کا کیا ہوا؟ جس یوتھ کو گمراہ کرنے کی کوشش کی، اردو میں بتائیں آپ نے جھوٹ بولا، دھوکا دیا تھا۔
مسلم لیگ ن کی چیف آرگنائزر نے کہا ہے کہ آج سوال کرنا چاہیے، ہمیں کیوں بے وقوف بنایا، گاڑیوں پر غلامی نامنظور کے سٹیکر لگوائے اس کا کیا کریں؟ جھوٹے بیانیے کے لیے لوگوں کو غدار اور ایجنٹ کہا، کوئی ندامت ہے اپنے جھوٹ پر،کوئی شرمندگی !، قوم آپ کی طرح ذہنی طور پر معذور نہیں ہے۔

لاہور: (ویب ڈیسک) پنجاب میں الیکشن کی تاریخ کا فیصلہ نہ ہوسکا، گورنر پنجاب کی سربراہی میں اجلاس بے نتیجہ ختم ہوگیا۔
گورنر پنجاب بلیغ الرحمان کی زیر صدارت مشاورتی اجلاس ہوا، اجلاس میں سیکرٹری الیکشن کمیشن، چیف سیکرٹری اور آئی جی پنجاب شریک ہوئے، ایڈیشنل ڈائریکٹر جنرل اور سپیشل سیکرٹری الیکشن کمیشن بھی اجلاس میں شریک تھے۔
پنجاب انتخابات کی تاریخ کے حوالے سے ہونے والے مشاورتی اجلاس میں صوبے میں الیکشن کی تاریخ کا تعین نہ ہو سکا، اجلاس میں ہائیکورٹ کے فیصلے کی تشریح کے لیے لاہور ہائیکورٹ سے دوبارہ رجوع کرنے کا فیصلہ کیا گیا ہے۔
سیکرٹری الیکشن کمیشن نے دنیا نیوز سے خصوصی گفتگو میں بتایا کہ پنجاب میں انتخابات کی تاریخ کی حوالے سے فی الحال کوئی فیصلہ نہیں ہوا۔
واضح رہے کہ گزشتہ روز چیف الیکشن کمشنر سکندر سلطان راجہ کی زیر صدارت ہونے والے اجلاس میں گورنر بلیغ الرحمان سے پنجاب میں انتخابات کی تاریخ کے حوالے سے مشاورت کا فیصلہ کیا گیا تھا۔

اسلام آباد: (ویب ڈیسک) وفاقی حکومت نے آئی ایم ایف کی ایک اور شرط پوری کردی، وفاقی کابینہ نے بجلی صارفین سے فیول چارجز وصول کرنے کی منظوری دیدی۔
ذرائع کے مطابق بجلی صارفین سے 55 ارب روپے ریکور کئے جائیں گے، جون، جولائی 2022 کی ماہانہ فیول ایڈجسٹمنٹس کی ریکوری کی جائے گی اس سلسلے میں وفاقی کابینہ سے سرکولیشن کے ذریعے سمری کی منظوری لے لی گئی ہے۔
ذرائع کا مزید کہنا ہے کہ بجلی صارفین سے فیول چارجز کی وصولیاں اقساط میں کی جائیں گی، جون 2022 کی فیول ایڈجسٹمنٹ کے 9.90 روپے فی یونٹ وصول کیے جائیں گے جبکہ جولائی 2022 کی فیول ایڈجسٹمنٹ کے 4.34 روپے فی یونٹ وصول کیے جائیں گے۔

لاہور: (ویب ڈیسک) اپوزیشن لیڈر راجہ ریاض کی تعیناتی کیخلاف درخواست پر سپیکر قومی اسمبلی راجہ پرویز اشرف نے عدالت میں جواب جمع کرادیا۔
لاہور ہائیکورٹ میں قومی اسمبلی میں اپوزیشن لیڈر کے عہدے پر راجہ ریاض کی تعیناتی کیخلاف درخواست پر سماعت ہوئی، ہائیکورٹ نے وفاقی حکومت کو جواب داخل کرانے کیلئے مہلت دے دی۔
سپیکر قومی اسمبلی راجہ پرویز اشرف نے اپنا جواب جمع کراتے ہوئے کہا کہ اسمبلی کی کارروائی کو عدالت کے فورم پر چیلنج نہیں کیا جاسکتا۔
وفاقی حکومت اور دیگر فریقین نے جواب کیلئے وقت دینے کی استدعا کی، عدالت نے حکومت کو آخری موقع دیتے ہوئے کارروائی 28 فروری تک ملتوی کر دی۔
واضح رہے کہ درخواست میں قومی اسمبلی میں اپوزیشن لیڈر کے عہدے پر راجہ ریاض کی تعیناتی کو چیلنج کیا گیا ہے۔