سیئول : (ویب ڈیسک) امریکا اور جنوبی کوریا کے ساتھ مشترکہ فوجی مشقوں پر شمالی کوریا کے رہنما کم جونگ اُن کی بہن کم یوجونگ نے امریکا کے لیے انتباہ جاری کر دیا۔
ورکر پارٹی کوریا سنٹرل کمیٹی کی ڈائریکٹر کم یو جونگ نے امریکا اور جنوبی کوریا کی مشقوں کے بعد بالواسطہ یا بلاواسطہ ردعمل کا امکان ظاہر کردیا ، شمالی کوریا نے 2 روز قبل ایک اور بین البراعظمی بیلسٹک میزائل کا تجربہ کیا ہے۔
شمالی کوریا کے میزائل تجربات کے بعد شمالی کوریا کےخلاف جنوبی کوریا نے نئی پابندیاں عائد کر دی ہیں ، جبکہ جنوبی کوریا کے جوائنٹ چیفس آف اسٹاف نے پڑوسی ملک شمالی کوریا کے میزائل تجربات کی مذمت کی ہے۔
خیال رہے کہ امریکا اور جنوبی کوریا کی یہ مشق شمالی کوریا کی جانب سے جاپان کے مغربی ساحل کے قریب سمندر میں طویل فاصلے تک مار کرنے والے بین البراعظمی بیلسٹک میزائل Hwasong-15 کے تجربے کے ایک دن بعد ہوئی۔
اس حوالے سے امریکی انڈو پیسیفک کمانڈ کی جانب سے کہا گیا ہے کہ شمالی کوریا کے تازہ ترین میزائل لانچ سے کوئی فوری خطرہ نہیں ہے ۔
دوسری جانب شمالی کوریا کے تجربات پر جاپان کے وزیراعظم نے سلامتی کونسل سے ہنگامی اجلاس بلانے کے لیے کہا ہے۔

نیویارک : (ویب ڈیسک) امریکا کے 98 سالہ سابق صدر جمی کارٹر نے ہسپتال کے بجائے گھر پر ہی ہاسپیس کیئر حاصل کرنے اور اپنا باقی وقت گھر میں اپنے خاندان کے ساتھ گزارنے کا فیصلہ کیا ہے، 98 سال کی عمر میں کارٹر سب سے طویل عرصے تک زندہ رہنے والے امریکی صدر ہیں۔
غیر ملکی خبر رساں ادارے کے مطابق کارٹر سنٹر ( سابق صدر کی فاؤنڈیشن ) نے اپنے ایک بیان میں بتایا کہ کارٹر نے ہسپتال میں مختصر قیام کے سلسلے کے بعد اپنا باقی وقت گھر پر اپنے خاندان کے ساتھ گزارنے اور اضافی طبی مداخلت کے بجائے ہسپتال کی دیکھ بھال حاصل کرنے کا فیصلہ کیا۔
کارٹر سنٹر کا کہنا تھا کہ سابق صدر کو اس فیصلے میں اپنے خاندان اور اپنی طبی ٹیم کی مکمل حمایت حاصل ہے جبکہ ان کا خاندان اس وقت کے دوران پرائیویسی کا مطالبہ کرتا ہے اور اپنے مداحوں کی طرف سے ظاہر کی گئی تشویش کے لیے شکر گزار ہے۔
جمی کارٹر ایک ڈیموکریٹ سیاستدان تھے جنہوں نے جنوری 1977 سے جنوری 1981 تک صدر کے طور پر خدمات انجام دیں، کارٹر کو حالیہ برسوں میں صحت کے کئی مسائل کا سامنا کرنا پڑا ہے بشمول میلانوما نامی بیماری جو ان کے جگر اور دماغ تک پھیل گئی ہے۔
مونگ پھلی کے سابق کاشتکار نے اس وقت کے صدر جیرالڈ آر فورڈ کو صدارتی انتخابات میں شکست دی تھی، اپنی صدارت کے دوران کارٹر نے اسرائیل اور مصر کے درمیان امن معاہدے کی ثالثی کی تھی، وہ ایک مدت کیلئے ہی صدر منتخب ہوئے تھے ، دوسری مدت کیلئے انہوں نے صدارتی انتخاب میں حصہ تو لیا تھا تاہم ریپبلکن حریف رونلڈ ریگن کے ہاتھوں ہار گئے تھے۔
کارٹر کو 2002 میں بین الاقوامی تنازعات کے پرامن حل تلاش کرنے، جمہوریت اور انسانی حقوق کو آگے بڑھانے، اقتصادی اور سماجی ترقی کو فروغ دینے کے لیے انتھک کوششوں کے اعتراف میں نوبل امن انعام سے بھی نوازا گیا تھا۔

ماسکو : (ویب ڈیسک) روس نے ایک بار پھر سے الزام عائد کیا ہے کہ یوکرین اقوام متحدہ کے اہم اجلاس سے قبل ماسکو پر الزام لگانے کے لیے اپنی سرزمین پر جوہری واقعے کا منصوبہ بنا رہا ہے تاہم روس کی جانب سے اس الزام کے ثبوت فراہم نہیں کے گئے۔
غیر ملکی خبر رساں ادارے کے مطابق روس کی وزارت دفاع نے اپنے ایک بیان میں کہا کہ کیف بڑے پیمانے پر اشتعال انگیزی کی تیاری کر رہا ہے جس کے لئے تابکار مادے کو ایک نامعلوم یورپی ملک سے یوکرین پہنچایا گیا ہے جبکہ اس اشتعال انگیزی کا مقصد روس کی فوج پر مبینہ طور پر یوکرین میں خطرناک تابکار تنصیبات پر اندھا دھند حملے کرنے کا الزام لگانا ہے۔
دوسری جانب یوکرین اور اس کے اتحادیوں نے ان الزامات کو غلط معلومات پھیلانے کی مذموم کوشش قرار دیتے ہوئے مسترد کر دیا ہے اور روس پر الزام لگایا ہے کہ وہ یوکرین کو مورد الزام ٹھہرانے کے لیے خود ہی ایسے ہی واقعات کی منصوبہ بندی کر رہا ہے۔
ماسکو کے الزامات ایسے وقت میں سامنے آئے ہیں جب یوکرینی حکام نے امریکی حکام پر زور دیا کہ وہ امریکی صدر جو بائیڈن کی انتظامیہ پر F-16 لڑاکا طیارے بھیجنے کے لیے دباؤ ڈالیں کیونکہ یہ طیارے یوکرین کی روسی میزائل یونٹوں کو نشانہ بنانے کی صلاحیت کو بڑھا دیں گے۔
بائیڈن نے پچھلے مہینے یوکرین کی F-16 طیاروں کے حوالے سے کی گئی درخواست کو منظور کرنے سے انکار کیا تھا اور بائیڈن انتظامیہ کے عہدیداروں نے بھی یہی کہا ہے کہ امریکا کو ایسے ہتھیاروں کی فراہمی پر توجہ دینی چاہیے جو میدان جنگ میں فوری طور پر استعمال ہو سکیں بجائے ایسے لڑاکا طیاروں کے جنہیں استعمال کرنے کے لئے وسیع تربیت کی ضرورت ہو، لیکن انہوں نے واضح طور پر F-16 کی فراہمی کو مسترد نہیں کیا۔
اقوام متحدہ میں امریکی سفیر لنڈا تھامس گرین فیلڈ نے اپنے حالیہ انٹرویو میں کہا ہے کہ آئندہ چند ہفتوں اور مہینوں کے دوران طیاروں کی فراہمی کے حوالے سے بات چیت جاری رہے گی، اگرچہ F-16 کی تمام صلاحیتوں میں مہارت حاصل کرنے کے لیے کم از کم ایک سال کی تربیت درکار ہے لیکن یوکرین کے پائلٹوں کو کچھ مہینوں میں محدود تعداد میں کچھ چیزوں بارے تربیت دی جا سکتی ہے۔

انقرہ : (ویب ڈیسک) ترکیہ میں آنے والے تباہ کن زلزلے کے دو ہفتوں کے بعد ملک کے دو صوبوں کے علاوہ باقی تمام علاقوں میں امدادی سرگرمیاں ختم کر دی گئی ہیں، کہرامنماراس اور ہاتائے میں ریسکیو آپریشن جاری رہے گا۔
غیر ملکی خبر رساں ادارے کے مطابق 6 فروری کو آنے والے 7.8 شدت کے زلزلے کا مرکز کہرامنماراس میں تھا، جنوب مشرقی ترکیہ اور شمالی شام میں 44,000 سے زیادہ افراد کی ہلاکتوں کی تصدیق کی گئی ہے، ہلاکتوں کی تعداد میں اضافے کا خدشہ ہے، ترکیہ میں تقریباً 345,000 اپارٹمنٹس تباہ ہو چکے ہیں اور بہت سے لوگ ابھی تک لاپتہ ہیں۔
ڈیزاسٹر ایجنسی کے سربراہ یونس سیزر نے انقرہ میں صحافیوں کو بتایا کہ ہمارے بہت سے صوبوں میں تباہ شدہ عمارتوں کے ملبے تلے دبے افراد کی تلاش اور بچاؤ کی کوششیں مکمل ہو چکی ہیں تاہم دو صوبوں میں تقریباً 40 عمارتوں میں تلاش اور بچاؤ کی کوششیں جاری ہیں۔
دریں اثناء امریکی وزیر خارجہ انٹونی بلنکن ترکیہ پہنچ گئے ہیں اور انہوں نے انسانی امداد کی مد میں 100 ملین ڈالر کا اعلان کیا ہے، دو سال قبل عہدہ سنبھالنے کے بعد یہ ان کا ترکیہ کا پہلا دورہ ہے، انہوں نے صحافیوں کو بتایا کہ زلزلہ متاثرین کیلئے نئی امداد جلد ہی منتقل ہو جائے گی، شام میں امداد فراہم کرنا بہت، بہت مشکل تھا۔
انٹونی بلنکن آج ترکیہ کے صدر رجب طیب اردوان کے ساتھ ملاقات سے قبل ریسکیو آپریشنز کا جائزہ لینے کے لیے ترکیہ کے صوبے ہاتائے کا بھی دورہ کریں گے۔