اسلام آباد: (ویب ڈیسک) سابق وفاقی وزیر اطلاعات اور پاکستان تحریک انصاف (پی ٹی آئی) کے رہنما فواد چودھری نے کہا ہے کہ الیکشن کمیشن تینوں جماعتوں کو فنڈنگ کا فیصلہ اکٹھا جاری کرے۔
پی ٹی آئی کے رہنما فواد چودھری نے اپنے ایک بیان میں کہا کہ حکومتی اتحاد کی اوورسیز پاکستانیوں سے نفرت سمجھ سے بالاتر ہے کیونکہ بیرون ملک مقیم پاکستانیوں کے ووٹنگ کا حق ختم کیا گیا۔
انہوں نے کہا کہ اب ان پاکستانیوں کے خلاف مہم چلائی جا رہی ہے جو پی ٹی آئی کو فنڈ دیتے ہیں اور بیرون ملک مقیم پاکستانی ہماری معیشت کے لیے ریڑھ کی ہڈی کی حیثیت رکھتے ہیں۔
فواد چودھری نے کہا کہ حکمران اتحاد خود ایک مافیا ہے اور پی ٹی آئی فنڈنگ کے لیے کسی مافیا پر انحصار نہیں کرتی۔ اوور سیز اور عام پاکستانی پی ٹی آئی کو فنڈ دیتے ہیں۔ ہم فنڈنگ کا یہ ہی طریقہ جاری رکھیں گے۔
انہوں نے کہا کہ الیکشن کمیشن تینوں جماعتوں کو فنڈنگ کا فیصلہ اکٹھا جاری کرے تا کہ لوگ موازنہ کر سکیں۔

لسبیلہ : (ویب ڈیسک) پاکستان میں مون سون بارشوں اور سیلاب نے تباہی مچادی۔ سیلاب کے باعث سب سے زیادہ صوبہ بلوچستان متاثر ہوا۔
لسبیلہ اور نوشکی سمیت بلوچستان کے مختلف علاقوں میں بارشوں اور سیلاب نے تباہی مچادی۔ کوئٹہ، بولان ، ژوب، دکی، خضدار، کوہلو، کیچ، مستونگ، ہرنائی اور قلعہ سیف اللہ میں سیلاب موت کا پیغام بن گیا۔ بارشوں کے دوران مختلف حادثات میں 120 افراد جاں بحق ہوگئے۔
بلوچستان میں نقصانات سے متعلق پی ڈی ایم اے نے رپورٹ جاری کردی۔ بلوچستان میں بارشوں کے دوران 70 افراد مختلف حادثات میں زخمی ہوئے۔بلوچستان میں بارشوں کے دوران 12 ہزار 320 مکانات منہدم ہوئے۔
خیبر پختونخوا میں بھی بارشیں اور سیلاب تباہی ساتھ لے آئے۔ مہمند، ٹانک اور ڈی آئی خان سمیت خیبرپختونخوا کے مختلف علاقے شدید متاثر ہوئے ہیں۔
مہمند میں سیلابی ریلے گھروں میں داخل ہوگئے۔ کچے کمرے اور چاردیواریاں گرگئیں۔ ریسکیو اہلکاروں نے لوگوں کو محفوظ مقام پر منتقل کرنا شروع کردیا۔
ٹانک کے سرکل کنڈیاں میں سیلابی ریلے سے شہری گھروں میں محصور ہو کر رہ گٸے۔ زمینی رابطہ منقطع ہونے سے اشیا خوردونوش کی قلت ہوگئی ہے۔
مضرصحت پانی پینے سے ہیضے کی وبا پھوٹ پڑی۔ ڈیرہ اسماعیل خان کی تحصیل پہاڑپور کے مختلف علاقوں میں سیلاب تیزی سے داخل ہورہا ہے۔لوگ نقل مکانی پر مجبور ہوگئے ہیں۔
تخت بھائی میں آج چوتھے روز بھی وقفے وقفے سے موسلادھار بارش ہورہی ہے۔ بارش کے پانی نے لوگوں کی مشکلات بڑھا دیں۔
پنجاب بھی سیلاب سے بری طرح متاثر ہوا ہے۔ ڈی جی خان، اوچ شریف، صادق آباد اور راجن پور میں بھی سیلاب سے تباہی مچ گئی۔
ڈیرہ غازی خان اور تونسہ شریف میں سیلاب نے بستیاں اُجاڑ دیں۔ سیکڑوں دیہات زیر آب آگئے۔ ایک لاکھ سے زائد افراد بے یارومدگار ہوگئے ہیں۔ دس افراد سیلابی ریلے میں بہہ گئے۔ مکانات تباہ ہونے سے سیکڑوں افراد زخمی ہوئے۔
ڈیرہ غازی خان میں سیلاب سے ایک لاکھ پچھتر ہزار ایکڑ رقبے کو نقصان پہنچا ، ضلعی انتظامیہ نے ابتدائی رپورٹ جاری کر دی ۔ سیلاب سے آٹھ اموات رپورٹ ہوئیں،متاثرہ علاقوں میں 21 رابطہ سڑکیں مکمل اور جزوی تباہ ہوگئیں۔
صوبہ سندھ میں بھی مون سون بارشوں میں ریکارڈ اضافہ دیکھنے میں آیا۔ تحصیل سندھڑی میں بارشوں سے فصلیں تباہ ہو گئیں۔ لوگ بے گھر ہو گئے۔ آبادگاروں کی فصلیں اور انکے گھر پانی میں بہہ گئے۔مال مویشی مر گئے
ملک کے سب سے بڑے شہر کراچی میں مون سون کے تیسرے اسپیل نے نظام زندگی کو مفلوج کیےرکھا۔ مرکزی شاہراہیں تالاب کا منظر پیش کرتی رہیں۔ پانی گھروں میں داخل ہو گیا۔ طوفانی بارشوں کے باعث انتظامیہ کو ایک دن کے لیے تمام دفاتر اور اسکول بند کرنے پڑے۔
تاہم بارشیں برسانے والا مون سون کا حالیہ سسٹم کمزور پڑنے سے کراچی میں بارشوں کا سلسلہ رک گیا ہے۔
محکمہ موسمیات کے مطابق رواں ماہ کی 26 تاریخ تک پاکستان میں مجموعی طور پر اوسط سے 192 فیصد زیادہ بارشیں ہوئی ہیں۔ پاکستان میں جولائی میں اوسط بارشیں 51.5 ملی میٹر ہوتی ہیں تاہم اس سال یہ 150.1 ملی میٹر رہی ہیں۔

لاہور : (ویب ڈیسک) لاہور ہائیکورٹ نے وکلا دفاتر کے بجلی کے بلوں میں سیلز ٹیکس کی وصولی کالعدم قرار دے دی۔
لاہور ہائیکورٹ کے جسٹس طارق سلیم نے لاہور بار ایسوسی ایشن کی درخواست پر 3 صفحات کا فیصلہ دیا جس میں عدالت نے کہا کہ وکلا دفاتر سے سیلز ٹیکس وصول نہیں کیا جاسکتا، وکلا ’ریٹیلر‘ کی تعریف میں نہیں آتے لہٰذا وکلا دفاترکے جولائی کے بجلی بلوں سے سیلز ٹیکس ختم کیا جائے۔عدالت نے کہا کہ ریٹیلر ایسا فرد ہوتا ہے جو اشیا عوام کو فروخت کرتا ہے مگر وکلا کلائنٹس کو قانونی خدمات دیتے ہیں اور اس میں اشیا کی فراہمی ملوث نہیں۔
عدالت نے اپنے فیصلے میں مزید کہا کہ سیلز ٹیکس ختم کروانے کے لیے وکلا مخصوص معلومات کمشنر ان لینڈ ریونیو کو دیں، کمشنر ان لینڈ ریونیو وکلا کی معلومات کی موقع پر جا کر تصدیق کرنے کا مجاز ہوگا۔
عدالت نے حکم دیا کہ وکلا دفاتر کے بجلی کے بلوں سے وصول سیلز ٹیکس قانون کے مطابق واپس کیا جائے۔

راولپنڈی: (ویب ڈیسک) سابق وزیر داخلہ شیخ رشید کا کہنا ہے کہ اگر آئی ایم ایف کا بیل آؤٹ پیکج جلد نہ آیا تو پاکستان کے دیوالیہ ہونے کا خطرہ ہے۔
شیخ رشید نے کہا ہے کہ تاریخ کے بدترین معاشی اور سیاسی بحران سے گزر رہے ہیں۔ زرمبادلہ کے ذخائر خطرناک حد تک کم ہو گئے ہیں۔ اگر آئی ایم ایف کا بیل آؤٹ پیکج جلد نہ آیا تو پاکستان کے دیوالیہ ہونے کا خطرہ ہے۔
ان کا کہنا ہے کہ غریب کا نہ چولہا جل رہا ہے، بجلی کا بل اورنہ ہی بچوں کی فیس ادا ہوسکتی ہے۔غریب وینٹی لیٹر پر ہے،سیکڑوں فیکٹریاں بند ہو رہی ہیں۔مہنگائی کی شرح38فیصد بڑھ گئی اور غریب آٹا بھی نہیں لے سکتا۔
انہوں نے کہا ہے کہ سیاسی انتشار،خلفشار اور عدم استحکام پاکستان کو تباہی کی طرف لے جا رہا ہے۔ مداخلت نرم ہو،گرم ہو یا سخت،سب کو مل کر ملک بچانا ہے۔ایک ایک دن قیمتی ہے،سب کو مل کر بیٹھنا ہے ورنہ لوگ فیصلے خود لے لیں گے۔

کراچی: (ویب ڈیسک) اسٹیٹ بینک نے روشن ڈیجیٹل اکاؤنٹس سے متعلق اعدادو شمار جاری کردیے۔
اسٹیٹ بینک اعلامیے کے مطابق جون 2022 تک 4 لاکھ 29 ہزار 364 روشن ڈیجیٹل اکاؤنٹس کھولے گئے جب کہ روشن ڈیجیٹل اکاؤنٹس میں 4 ارب 60 کروڑ ڈالر جمع کرائے گئے۔
اسٹیٹ بینک کے مطابق روشن ڈیجیٹل ڈیپازٹس سے نیا پاکستان سرٹیفکیٹس میں 2 ارب 90 کروڑ ڈالر کی سرمایہ کاری کی گئی جب کہ روشن اپنی کار کے ذریعے 1550 گاڑیاں فراہم کی گئیں۔
اسٹیٹ بینک کا کہنا ہےکہ تارکین وطن کی آراء پر اکاؤنٹس ہولڈرزکی شکایات کے لیے ’سنوائی‘ سروس پر کام کررہے ہیں۔
اس کے علاوہ تارکین وطن پاکستانیوں کے لیے انشورنس، پینشن پلان اور روشن بزنس اکاؤنٹس جلد متعارف کرائیں گے۔

لاہور: (ویب ڈیسک) حریت رہنما یاسین ملک کی تہاڑ جیل میں بھوک ہڑتال کے باعث صحت تیزی سے بگڑنے لگی۔
یاسمین ملک کے معاملے پر پاکستان نے بھارتی ناظم الامور کو دفتر خارجہ طلب کیا جس میں پاکستان نے پرزور احتجاج کیا اور یاسین ملک کی فوری رہائی کا مطالبہ کیا۔اس موقع پر پاکستان نے مؤقف اختیار کیا کہ درخواستوں کے باوجود یاسین ملک کو ٹرائل میں پیشی اور جرح کے حق سے محروم کیا گیا، قانونی چارہ جوئی نہ ہونے کے باعث حریت رہنما یاسین ملک 22 جولائی سے بھوک ہڑتال پر ہیں، انہیں فوری طور پر طبی امداد دی جائے ۔
پاکستان نے حریت رہنما کی اہلیہ مشعال ملک کا بھارتی وزیراعظم کے نام خط بھی بھارتی ناظم الامور کے حوالے کیا۔