اسلام آباد: (ویب ڈیسک) پیپلز پارٹی نے خیبر پختونخوا میں 4 جلسے کرنے کا اعلان کر دیا۔
چیئرمین پیپلز پارٹی بلاول بھٹو زرداری خیبر پختونخوا کے اضلاع چترال، اپر دیر، مالاکنڈ اور کرم ایجنسی میں جلسوں سے خطاب کریں گے۔
چیئرمین پیپلز پارٹی بلاول بھٹو چترال میں اتوار کو جلسہ عام سے خطاب کریں گے جبکہ 21 مارچ کو اپر دیر میں پیپلز پارٹی کا جلسہ ہو گا۔
یہ بھی پڑھیں: الیکشن کمیشن کا جلسے کرنے پر نوٹس، وزیراعظم کا اسلام آبادہائیکورٹ سے رجوع
بلاول بھٹو زرداری 22 مارچ بروز منگل کو مالاکنڈ اور 25 مارچ بروز جمعہ کو کرم ایجنسی میں جلسے سے خطاب کریں گے۔

لاہور: (ویب ڈیسک) وزیراعظم عمران خان نے آسٹریلیا کےخلاف دوسرا ٹیسٹ میچ ڈرا کرانے پر قومی کرکٹ ٹیم کو مبارکباد دی ہے۔
وزیراعظم نے قومی کرکٹ ٹیم کے کپتان بابراعظم کومبارکباد دیتے ہوئے کہا کہ بابراعظم نے بہترین کھیل پیش کیا اور بہترین فائٹ بیک کیا۔ رضوان اورشفیق کو بھی مبارکباد دیتا ہوں جس طرح انہوں نے مقابلہ کیا۔
اپنے ٹویٹ میں وزیراعظم کا کہنا تھا کہ بدقسمتی سے یہ میچ دیکھ نہیں سکا۔ میں میچ فکسنگ کے خلاف ایک اورمحاذ پرلڑرہا ہوں۔ جہاں میرے کھلاڑیوں کوبھاری رقم کے ذریعے لالچ دی جارہی ہے۔

لاہور: (ویب ڈیسک) پیپلزپارٹی نے حکومت پر سندھ ہاؤس پر حملے کی تیاری کا الزام لگا دیا، پیپلزپارٹی ارکان اسمبلی نے کہا کسی رکن کونقصان پہنچا تو ذمہ دارحکومت ہو گی۔
اسلام آباد کے سندھ ہاؤس میں ارکان پارلیمنٹ کی خریدو فروخت اور ہارس ٹریڈنگ کی بازگشت جاری ہے، سندھ ہاؤس میں رہائش پذیر پیپلز پارٹی کے ارکان اسمبلی نے سندھ پولیس کی سکیورٹی مانگ لی ہے۔ عبدالقادر پٹیل، آغا رفیع اللہ، مہرین بھٹو اور دیگر ارکان اسمبلی نے مشترکہ بیان جاری کرتے ہوئے کہا کہ وفاقی حکومت سندھ ہاوس پر حملے کی تیاری کر رہی ہے، سندھ ہاؤس کی تنصیبات یا کسی رُکن کو نقصان پہنچا تو ذمہ دار وفاقی حکومت ہوگی ۔
وزیر خارجہ شاہ محمود قریشی نے اپنے بیان میں کہا ہے کہ ضمیر کے سودے ہو رہے ہیں، لوگوں کی بولیاں لگ رہی ہیں، حکومت سندھ ہاؤس پر کیوں حملہ کرےگی۔ وفاقی وزیر علی زیدی نے سندھ ہاؤس سے متعلق ٹویٹ کیا کہ سندھ حکومت نے کس ضابطے کے تحت دارالحکومت میں مسلح دستے جمع کئے، وزیراعلیٰ سندھ بتائیںاسلام آباد میں سندھ پولیس کے دستوں کا کیا جواز ہے۔
قومی اسمبلی میں ترین گروپ کے پارلیمانی لیڈر راجہ ریاض کا کہنا ہے ہمارے ارکان کہیں غائب نہیں ہوئے، اسلام آباد میں ہی موجود ہیں، ووٹ کا حق استعمال کریں گے۔ پی ٹی آئی کو نااہل مشیروں کے باعث آج کی صورتحال کا سامنا ہے۔

اسلام آباد: (ویب ڈیسک) وزیراعظم عمران خان کی زیر صدارت اجلاس میں ارکان اسمبلی کی خرید و فروخت کی تفصیلات پیش کی گئیں اور سندھ ہاؤس میں سندھ پولیس کے اہلکاروں کی موجودگی پر بھی بریفنگ دی گئی۔
اسلام آباد میں منعقدہ اہم حکومتی اجلاس کی سربراہی وزیراعظم عمران خان نے کی، اجلاس میں فیصلہ کیا گیا کہ سندھ ہاؤس کو ہارس ٹریڈنگ کی آماجگاہ نہیں بننے دیں گے نہ ہی اس غیر قانونی اقدام کی کسی صورت اجازت دی جائے گی، متعلقہ اداروں کو کارروائی کیلئے قانونی پہلوؤں کا جائزہ لینے کی ہدایت جاری کی گئی۔ وزیراعظم نے وفاقی ایجنسیوں کو سندھ ہاؤس کی سرگرمیوں پر نظر رکھنے کی ہدایت بھی کی جبکہ حکومت کی جانب سے جوابی ایکشن کا فیصلہ کیا گیا۔
قانونی ٹیم نے قومی اسمبلی اجلاس بلانے سے متعلق شرکا کو بریفنگ دی، قومی اسمبلی کا اجلاس 21 مارچ کو بلانے پر اتفاق کیا گیا۔ اجلاس کے شرکا کا کہنا تھا کہ عوام ساتھ ہیں، عدم اعتماد کو ناکام بنائیں گے۔

اسلام آباد: (ویب ڈیسک) وزیر داخلہ شیخ رشید نے سیاسی مخالفین کو خبردار کرتے ہوئے کہا ہے کہ تصادم کی طرف نہ جائیں ورنہ جھاڑو پھر جائے گا، پھر ہاتھ ملتے رہ جائیں گے۔
اسلام آباد میں پریس کانفرنس سے خطاب کرتے ہوئے وفاقی وزیر داخلہ شیخ رشید نے کہا کہ عمران خان تحریک عدم اعتماد میں سرخرو ہوں گے، اصلی اور نسلی لوگ مشکل وقت میں ساتھ کھڑے ہوتے ہیں، اتحادی عمران خان کے ساتھ کھڑے ہوں گے، سندھ ہاوس میں خرید و فروخت کی منڈی لگی ہوئی ہے، 25 مارچ کو اپوزیشن کا جلسہ ہے، سکیورٹی دیں گے۔ سندھ ہاوس میں 300 سے 400 سندھ پولیس کے اہلکار بلائے گئے ہیں، کوئی بات نہیں ، امن و امان کی صورتحال برقرار رکھنا حکومت کی ذمہ داری ہے۔
انہوں نے کہا کہ شہباز شریف بے نقاب ہو گئے، ان کی بلی بھی تھیلے سے باہر آ گئی، وہ کہتے ہیں قومی حکومت بنے گی، چند روز بعد کہیں گے ٹیکنوکریٹس کی حکومت بنے گی۔

اسلام آباد: (ویب ڈیسک) اسلام آباد ہائی کورٹ کے جسٹس میاں گل حسن اورنگزیب کی عدالت نے وزیر اعظم کو بیرون ممالک سے ملنے والے تحائف کی تفصیل بتانے سے متعلق عمل درآمد کیس آئندہ ماہ سماعت کیلئے مقرر کرنے کا حکم دے دیا۔
مقامی صحافی رانا ابرار خالد کی درخواست پر سماعت کے دوران درخواست گزار کے وکیل نے کہا کہ انفارمیشن کمیشن نے حکومت کو تحائف تفصیل بتانے کی ہدایت کی، عمل نہیں کیا جارہا۔ عدالت نے کہاکہ آپ وزیر اعظم کے تحائف کی تفصیل مانگ رہے ہیں، کیا آپ نے انہیں فریق بنایا ؟ جس پر وکیل نے کہا کہ وزیر اعظم کو فریق نہیں بنایا، توشہ خانہ کے ذمہ دار کابینہ ڈویژن کو فریق بنایا، کابینہ ڈویژن نے توشہ خانہ تفصیل بتانے سے انکار کرتے ہوئے رٹ پٹیشن دائر کی۔
عدالت نے وزیراعظم توشہ خانہ تحائف کیس ایک ماہ میں سماعت کے لیے مقرر کرنے کا حکم دے دیا۔

اسلام آباد: (ویب ڈیسک) وزیرمملکت فرخ حبیب کا کہنا ہے کہ شریف برادران اور زرداری نے ماضی میں کرپشن کے ریکارڈ قائم کئے، شہبازگل کہتے ہیں عمران خان سے خوفزدہ سیاسی مخالف این آر او چاہتےہیں۔
فرخ حبیب کا کہنا ہے کہ دوہزار آٹھ سے اٹھارہ تک مک مکا کی قومی حکومت تھی، ان دس برسوں میں شریف برادران، زرداری اور فضل الرحمان نے کرپشن کے عالمی ریکارڈ بنائے، یہ سب لوٹ مار پر این آراو چاہتے ہیں۔
شہبازگل کا کہنا ہے کہ اپوزیشن کی اصل خواہش گرینڈاین آراو کی ہے، یہ چاہتے ہیں کہ قومی حکومت کی آڑ میں کسی طرح این آر او مل جائے، یہ بغیر الیکشن پانچ سال کی قومی چوروں کی حکومت مانگ رہے ہیں۔