لاہور: (ویب ڈیسک) سپیکر قومی اسمبلی اسد قیصر اور مسلم لیگ(ق) کے رہنما مونس الہی کے درمیان ٹیلی فونک رابطہ ہوا ہے۔
ٹیلی فونک گفتگو کے دوران سپیکر قومی اسمبلی اسد قیصر اور مونس الہی میں سیاسی صورتحال اور باہمی دلچسپی کے امور پر تبادلہ خیال ہوا۔ٹیلی فونک گفتگو کے حوالے سے گفتگو کرتے ہوئے مونس الٰہی کی جانب سے ٹویٹ کیا گیا ہے کہ سپیکر قومی اسمبلی اسد قیصر نے مجھے فون کیا ہے ، ہم نے موجودہ صورتحال پر تبادلہ خیال کیا ہے۔میں نے ان سے کہا کہ سیاسی بات چیت اور مشاورت جاری رہے گی، اس کا مطلب یہ نہیں کہ کوئی فیصلہ کیا گیا ہے۔ ہم اپنے وعدوں کے پابند ہیں اور ان کا مکمل احترام کریں گے۔

اسلام آباد: (ویب ڈیسک) وزیراعظم عمران خان نے کہا ہے کہ جنگ کسی کے مفاد میں نہیں، تنازعات کو بات جیت سے حل کیا جانا چاہیے۔
وزیراعظم عمران خان اور روسی صدر ولادیمیر پیوٹن کی آج ملاقات ہوئی جس میں دوطرفہ تعلقات ،علاقائی اورعالمی امورپرتفصیلی تبادلہ خیال کیا گیا۔
اعلامیے کے مطابق وزیراعظم نے روس کے ساتھ کثیرالجہتی تعلقات کے فروغ کےعزم کا اعادہ کیا۔
وزیراعظم عمران خان نے یوکرین اور روس کے درمیان تازہ صورتحال پرافسوس کا اظہار کرتے ہوئے کہا کہ جنگ کسی کےمفاد میں نہیں، تنازع سے ترقی پذیرملکوں کی معیشت کوسب سے زیادہ نقصان ہوتا ہے۔
انہوں نے کہا کہ پاکستان کو امید تھی کہ سفارت کاری کے ذریعے جنگ سے بچا جا سکتا تھا۔
اعلامیے کے مطابق دونوں رہنماوں کے درمیان ملاقات میں افغانستان میں انسانی بحران اورمعاشی مشکلات کے خاتمے کیلئے ہنگامی اقدامات پر زور دیا گیا۔
وزیراعظم عمران خان نے کہا کہ افغانستان میں قیام امن علاقائی توازن برقراررکھنے میں معاون ثابت ہو گا۔

لاہور: (ویب ڈیسک) پنجاب کے علاقے شیرا کوٹ میں 7 سالہ بچی کے ساتھ زیادتی کی کوشش کرنے والے ملزم کو پولیس نے گرفتار کرلیا۔
شیرا کوٹ پولیس نے 7 سالہ بچی سے زیادتی کی کوشش کرنے والے ملزم ابراہیم کو گرفتار کرلیا، جو بچی کا پڑوسی ہے۔
پولیس کے مطابق ملزم بچی کو بہانے سے کمرے میں لے کر گیا، جس کے بعد والدین اُسے تلاش کرتے ہوئے بالائی منزل پر واقع کمرے میں پہنچے تو وہاں ملزم بچی کے ساتھ زبردستی کرنے کی کوشش کررہا تھا۔
والدین نے بتایا کہ ملزم ابراہیم بھی مکان کے بالائی پورشن پر کرایہ پر رہائش پذیر ہے۔ والدین کی شکات پر پولیس نے مقدمہ درج کر کے ملزم کو حراست میں لیا۔
ایس پی اقبال ٹاؤن اخلاق اللہ تارڑ نے کہا کہ ملزم کے خلاف سخت قانونی کارروائی عمل میں لائی جائے گی، معصوم بچوں، خواتین کے ساتھ زیادتی اور انہیں ہراساں کرنے والے کسی رعایت کے مستحق نہیں ہیں۔

اسلام آباد: (ویب ڈیسک) وزیراطلاعات فواد چودھری نے کہا ہے کہ کسی کی خواہش پر تعلقات رکھنے یا ختم کرنے کا فیصلہ نہیں کریں گے، پاکستان اپنے مفادات کو دیکھے گا۔
اپنے بیان میں انہوں نے کہا کہ روس کے ساتھ باہمی تعلقات کا آغاز ہوا ہے، وزیراعظم اور روسی صدر میں عالمی صورتحال پر بھی گفتگو ہوئی، چاہتے ہیں تعلقات کا سلسلہ رکے نہیں آگے بڑھے۔
انہوں نے کہا کہ روس دنیا کا 40 فیصد گندم پیدا کرتا ہے جب کہ سب سے زیادہ گیس روس کے پاس ہے۔
فواد چودھری نے کہا کہ روسی نائب وزیراعظم توانائی کے معاملات بھی دیکھتے ہیں جس سے متعلق معاملات پر گفتگو ہو رہی ہے۔
ان کا کہنا تھا کہ چاہتے ہیں روس پاکستان کے توانائی کے معاملات میں سرمایہ کاری کرے۔
انہوں نے کہا کہ آج صبح فیصلہ کیا صورتحال کے باوجود دورے کو مکمل کرنا چاہیے، روسی صدر نے بھی دورے کو گرمجوشی سے لیا ہے۔

کراچی: (ویب ڈیسک) ملیر میں پولیس اور رینجرز نے خفیہ معلومات کی بنیاد پر کارروائی کرتے ہوئے کالعدم تنظیم سے تعلق رکھنے والے 3 ملزمان کو گرفتار کر کے ہینڈگرنیڈزاور اسلحہ و ایمونیشن بھی برآمد کرلیا۔
ترجمان رینجرز کے مطابق گرفتار ہونے والے ملزمان میں گہرام عرف مقبول سومرو،فدا سبزوئی اوروقار شامل ہیں، ابتدائی تفتیش کے دوران ملزمان نے رینجرز اور پاک آرمی پر ہینڈ گرنیڈحملوں کا اعتراف کیا ہے، ملزمان غیر قانونی اسلحہ و ایمونیشن کی ترسیل اور دیگرجرائم میں ملوث ہیں، گرفتار ملزمان کو مزید کاروائی کے لیے پولیس کے حوالے کردیا گیا۔
دوسری جانب بن قاسم پولیس نے اندھے قتل کا سراغ لگا کر ملوث ملزمان کو گرفتار کر لیا، دو ملزمان نے 14 فروری کو محمد سلطان کو سر پر سریا مار کر قتل کر دیا تھا، اور لاش جنگل میں چھپا دی تھی، گرفتار ملزمان میں حبدار سھاگ اور نصیر شامل ہیں، ملزمان قتل کی واردات کے بعد سندھ فرار ہو گئے تھے۔

ملتان: (ویب ڈیسک) پاکستان پیپلزپارٹی کی مرکزی رہنما شازیہ عطا مری نے کہا ہے کہ حکومت عوام کا اعتماد کھو چکی ہے اورمائیں و بہنیں حکومت کو گالیاں دی رہی ہیں۔ انہوں نے کہا کہ بس! اب حکومت نے پارلیمنٹ کا اعتماد کھونا ہے۔
پریس کانفرنس سے خطاب کرتے ہوئے شازیہ عطا مری نے کہا کہ ہم اقتدار کے نہیں جمہویت کے بھوکے ہیں۔ ان کا کہنا تھا کہ لوگوں کی پکار نے ہمیں باہر نکلنے پر مجبور کیا ہے۔
انہوں ںے کہا کہ عوام نے ہمیں باہر نکلنے کا اشارہ دیا ہے وگرنہ یہ دس دن کا سفر ہمارا آسان نہیں ہے۔ انہوں نے کہا کہ بلاول بھٹو نے ساڑھے تین سال بعد عوامی مارچ کا اعلان کیا ہے۔
رکن قومی اسمبلی شازیہ عطا مری نے کہا کہ اس وقت صورتحال یہ ہے کہ ادویات 700 فیصد تک مہنگی ہو چکی ہیں جب کہ غربت و مہنگائی نے عوام کا جینا دوبھر کردیا ہے۔
انہوں نے کہا کہ ہم نے ماضی میں بھی ہمیشہ یہی کہا تھا کہ استعفے دینے سے حکومت گرنے والی نہیں ہے لیکن اس حوالے سے پیپلزپارٹی پر الزامات لگائے گئے۔
پریس کانفرنس سے خطاب کرتے ہوئے شازیہ عطا مری نے کہا کہ جنہوں نے استعفوں کی بات کی تھی انہوں نے بھی استعفے نہیں دیے۔