اسلام آباد: (ویب ڈیسک) عالمی بینک نے بین الاقوامی سفر و سیاحت کے فروغ کے اشاریہ میں بہتری پرپاکستان کومبارکباد دی ہے۔
پاکستان میں عالمی بینک کے کنٹری ڈائریکٹرناجی بن حسائن نے پاکستان کو 2021 کے بین الاقوامی سفر و سیاحت کے فروغ کے اشاریہ میں 6 پوائنٹس کے اضافے کے ساتھ اپنا درجہ بہتر بنانے پر مبارک باد دی ہے۔
سماجی رابطوں کی ویب سائٹ ٹوئٹر پر جاری کردہ اپنے پغام میں 2019 میں عالمی رینکنگ میں پاکستان کا 89 واں نمبرتھا جو 2021 میں چھ پوائنٹس کی بہتری کے بعد 83 واں ہوگیا۔ ناجی بن حسائن نے کہاکہ ملک کی بہتر کارکردگی میں سازگار کاروباری ماحول،سیاحوں کی وسیع سیکورٹی اور باہمی رابطے کے بنیادی ڈھانچہ میں بہتری شامل ہے۔

اسلام آباد: (ویب ڈیسک) ترجمان دفتر خارجہ عاصم افتخار نے کہا ہے کہ بھارت مسلمانوں اور دیگر اقلیتوں کے خلاف بھرپور مہم جاری رکھے ہوئے ہے، توہین آمیز کلمات پرمعاملے پر بھارتی ناظم الامور کو طلب کر کہ شدید احتجاج ریکارڈ کرایا گیا، بھارت کسی اور کو نہیں بلکہ اپنے آپ کو ہی بیوقوف بنا رہا ہے، بھارت کو کشمیر میں مظالم بند کر کہ وہاں فوری اقوام متحدہ کی نگرانی میں آزادانہ استصواب رائے کرانا چاہیے۔
ہفتہ وار میڈیا بریفنگ میں عاصم افتخار نے کہا کہ بھارتی بی جے پی کے دو حکام کی جانب سے توہین آمیز کلمات کی بھرپور مذمت کرتے ہیں، سیکرٹری خارجہ سہیل محمود نے مختلف سفارتکاروں کو بھارت میں توہین آمیز کلمات، ہندوتوا کے فروغ اور اقلیتوں پر بھارتی مظالم سے آگاہ کیا، اگر بھارت میں تھوڑی سی بھی اخلاقی جرات ہے تو وہ فوری طور پر ان بی جے پی حکام کے بیانات کی مذمت کرے، بھارت ان حکام کو کٹہرے میں لائے، پاکستان مذہبی ہم آہنگی اور رواداری کو فروغ دے رہا ہے، پاکستان نے 6 سو سے زائد سکھ یاتریوں کو مقدس مقامات کی یاترا کے لیے ویزے جاری کیے۔
ترجمان دفتر خارجہ نے مزید کہا کہ جرمن وزیر خارجہ انالینا بئیر بوک نے پاکستان کا دورہ کیا، بدقسمتی سے کورونا ٹسٹ مثبت آنے کے باعث جرمن وزیر خارجہ کو دورہ مختصر کرنا پڑا، ایرانی سفیر نے وزیر اعظم سے ملاقات کی، شہباز شریف نے بلوچستان میں لگی آگ بجھانے میں ایران کی مدد پر شکریہ ادا کیا، گزشتہ روز وزارت خارجہ اور آذربائجان کے سفارت خانہ کی جانب سے مشترکہ تقریب کا انعقاد کیا گیا۔
ایک سوال کے جواب میں عاصم افتخار نے کہا کہ مقبوضہ کشمیر میں جاری بھارتی مظالم کے دوران مزید 5 کشمیریوں کو شہید کر دیا گیا، ان کشمیریوں میں ایک نوجوان طالب علم بھی تھا، بھارت کسی اور کو نہیں بلکہ اپنے آپ کو ہی بیوقوف بنا رہا ہے، بھارت کو کشمیر میں مظالم بند کرکہ وہاں فوری اقوام متحدہ کی نگرانی میں آزادانہ استصواب رائے کرانا چاہیے، بھارت کی سلامتی کونسل میں مستقل نمائندگی کے حوالے سے پاکستان کے بارے میں رپورٹس بے بنیاد ہیں، امریکی سیکریٹری خارجہ سے وزیر خارجہ کی ملاقات میں بھارت کی حمایت کے حوالے سے کوئی بات نہیں ہوئی، پاکستان سلامتی کونسل میں اصلاحات کا حامی ہے، ایک ایسی اصلاح شدہ سلامتی کونسل جو کہ اراکین کے مسائل کو حل کر سکے۔
ایک سوال کے جواب میں انہوں نے کہا کہ سعودی عرب میں پاکستانی کو سزا کے حوالے سے ہمیں سعودی عرب میں ہمارے مشن نے معلومات دیں، اس پاکستانی کو سعودی عرب میں مقدس جگہ پر نا خوشگوار واقعہ پر سوشل میڈیا کے استعمال پر سزا ہوئی، طاہر کو تین برس قید اور دس ہزار سعودی ریال کا جرمانہ ہوا، انہیں سوشل میڈیا پر اس واقعہ کی ویڈیو اپ لوڈ کرنے پر سزا ہوئی۔

اسلام آباد: (ویب ڈیسک) وزیراعظم محمد شہباز شریف نے وفاقی وزیر خزانہ مفتاح اسماعیل اور ان کی پوری ٹیم کو ایک متوازن، ترقی پر مرکوز اور عوام دوست بجٹ پیش کرنے پر مبارکباد دیتے ہوئے کہا ہے کہ مالی طور پر درپیش چیلنجوں اور بہت سی مشکلات کے باوجود بجٹ کی تیاری نہایت کٹھن کام تھا۔
سماجی رابطے کی ویب سائ ٹوئٹر پر پیغام جاری کرتے ہوئے شہباز شریف نے لکھا کہ حکومت نے بے نظیر انکم سپورٹ پروگرام کیلئے فنڈز میں اضافہ کیا ہے، بے نظیر سکالرشپ پروگرام کا دائرہ کار ایک کروڑ طلباء تک بڑھایا جائے گا۔
انہوں نے کہا کہ حکومت معاشرے کے مالی طور پر کمزور طبقات کی معاشی مشکلات کو کم کرنے کی خواہاں ہے اور میری سوچ یہ ہے کہ مالی لحاظ سے مضبوط لوگوں کو ٹیکسوں کی ادائیگی کے ذریعے قومی خزانے کیلئے اپنا کردار ادا کرنا چاہئے۔ وزیراعظم نے کہا کہ حکومت نے سولر پینلز کی درآمد اور ترسیل پر ٹیکس زیرو کر دیا ہے، زرعی مشینری و مداخل کی درآمد پر بھی ٹیکس صفر کر دیا گیا ہے، یہ کسانوں اور زراعت کی ترقی کیلئے بہت اہم قدم ہے۔
وزیراعظم نے کہا کہ اقتصادی و انتظامی کے حالیہ سالوں کے باعث ہمیں مشکل وقت کا سامنا ہے، اس بجٹ کے ذریعے میری حکومت مشکل فیصلوں کے ذریعے چیلنجوں پر قابو پائے گی اور معاشرے کے کمزور طبقات پر ان مشکل فیصلوں کے اثرات کو کم سے کم کیا جائے گا۔
شہباز شریف کا کہنا تھا کہ عوام کی مشکلات کو کم کرنے کیلئے وفاقی حکومت نے گھریلو صارفین کو سولر پینلز فراہم کرنے کا فیصلہ کیا ہے، میں نے دسمبر تک جنوبی بلوچستان میں ٹرانسمیشن لائنز کا کام مکمل کرنے اور جامع آف گرڈ سسٹم کا منصوبہ بنانے کی ہدایت بھی کی ہے۔

اسلام آباد: (ویب ڈیسک) تحریک انصاف کے جنرل سیکرٹری اسد عمر نے بجٹ پر ردعمل دیتے ہوئے کہا ہے کہ وزیر خزانہ مفتاح اسماعیل نے مہنگائی کم کرنے سے متعلق متعدد جھوٹ بولے ہیں اور امپورٹڈ حکومت کی جانب سے بجٹ کی شکل میں عوام پر مہنگائی کا بوجھ ڈال دیا گیا۔
انہوں نے کہا کہ کرپٹ حکمرانوں کے پاس عوام کو ریلیف دینے کے لیے کچھ بھی نہیں ہے، مفتاح اسماعیل نے چند ماہ پہلے قوم کو کہا تھا کہ پٹرول کی قیمت 137 روپے سے زیادہ نہیں ہونی چاہیے اور اب 210 روپے پر لے گئے ہیں۔
اسد عمر نے مزید کہا کہ اسی طرح مفتاح اسماعیل نے یہ بھی کہا تھا کہ 12 روپے یونٹ سے زیادہ بجلی نہیں ہونی چاہیے اور اب اس میں بھی 7 سے 8 روپے اضافہ کر دیا ہے، بجٹ پڑھنے سے قبل حکومتی اعداد و شمار کے مطابق پچھلے ایک سال کی نسبت بنیادی اشیا پر مہنگائی میں 24 فیصد اضافہ ہو چکا ہے۔
رہنما پی ٹی آئی نے کہا کہ بجلی گیس اور پیٹرولیم مصنوعات کی قیمتوں میں مزید اضافہ ہونے جا رہا ہے، ایک طرف تو مہنگائی کا طوفان ہے اور دوسری طرف معیشت تیزی سے تباہ ہورہی ہے، سیمنٹ کی سیل میں 16 فیصد کمی آ چکی ہے سیمنٹ کی سیل متاثر ہونے سے تعمیرات رک جائیں گی اور اس سے منسلک افراد بے روزگار ہو جائیں گے۔
اسد عمر نے کہا کہ ڈالر کی نسبت روپے کی قدر میں 24 روپے کمی واقع ہوئی ہے، اس وقت ملک میں معیشت کے حوالے سے صورت حال انتہائی تشویش ناک ہے خدانخواستہ سری لنکا جیسے حالات پیدا ہو سکتے ہیں، قوم کواس امپورٹ حکومت سے نجات دلانے کا وقت آن پہنچا ہے۔
انہوں نے کہا کہ سازش اور حرام کے پیسے کے ذریعے لائی گئی حکومت جب تک ختم نہیں ہوتی اور عوامی مینڈیٹ کے ذریعے نمائندے نہیں آتے ملک کے حالات تبدیل نہیں ہو سکتے۔