خانیوال: (ویب ڈیسک) میاں چنوں میں تلمبہ روڈ پر ٹریکٹر ٹرالی نے موٹرسائیکل رکشہ کچل دیا، جس کے نتیجے میں 4 خواتین اور بچہ جاں بحق ہوگیا۔
میاں چنوں نواحی گاؤں کی فیملی موٹرسائیکل رکشہ پر گھر جارہے تھے کہ راستے میں ٹریکٹرٹرالی نے ٹکرماردی، حادثے کے نتیجے 1 دوماہ کے بچے محمدعلی اور 4 خواتین جان کی بازی ہار گئیں۔
جاں بحق ہونے والی خواتین میں شہزادہ مائی، شمیم مائی، مریم بی بی اور زاہدہ بی بی شامل ہیں جبکہ ایک بچی اور 4 خواتین سمیت 6 زخمی ہوگئے۔
زخمی اور جاں بحق ہونے والوں کا تعلق ایک ہی خاندان سے ہے، زخمیوں اور جاں بحق ہونے والوں کوریسکیو 1122 نے تحصیل ہسپتال میاں چنوں منتقل کر دیا۔

راولپنڈی: (ویب ڈیسک) آرمی چیف جنرل قمر جاوید باجوہ نے کہا ہے کہ پاکستان آسٹریلیا سے اپنے تعلقات کو اہمیت دیتا ہے۔
پاک فوج کے شعبہ تعلقات عامہ ( آئی ایس پی آر) کی طرف سے جاری کردہ بیان کے مطابق جنرل قمر جاوید باجوہ سے آسٹریلین چیف آف ڈیفنس فورسز جنرل انگس جے کیمبل کی ملاقات ہوئی ہے۔
بیان کے مطابق ملاقات میں فوجی تعاون،افغانستان سمیت علاقائی سلامتی کی مجموعی صورتحال پر بات چیت کی گئی جبکہ ملاقات میں خطے کے امن و سلامتی کے لیے کوششوں پر بھی اتفاق کیا گیا۔ ملاقات میں دونوں جانب سے باہمی تعلقات کے فروغ کے عزم کا اعادہ بھی کیا گیا۔
آئی ایس پی آر کا یہ بھی کہنا ہے کہ ملاقات میں آسٹریلین چیف آف ڈیفنس فورسز جنرل انگس جے کیمبل نے پاکستان کی مسلح افواج کے پروفیشنلزم کو تسلیم کیا۔
اس موقع پرآرمی چیف جنرل قمر جاوید باجوہ نے آسٹریلین جنرل سے گفتگو کرتے ہوئے کہا کہ پاکستان آسٹریلیا سے اپنے تعلقات کو اہمیت دیتا ہے۔

اسلام آباد: (ویب ڈیسک) وزیراعظم عمران خان نے انفارمیشن ٹیکنالوجی (آئی ٹی ) سیکٹر کی ترقی کے لیے تاریخی اصلاحاتی پیکج کا اعلان کرتے ہوئے کہا ہے کہ اگلے چند سالوں میں آئی ٹی کی برآمدات کو 50 بلین ڈالر تک بڑھانے کا وژن ہے۔
وزیراعظم عمران خان کی زیر صدارت آئی ٹی سیکٹر سے متعلق اجلاس کا انعقاد کیا گیا۔
اجلاس میں وزیراعظم نے پاکستان ٹیکنالوجی سٹارٹ اپ فنڈ کے قیام کا اعلان کرتے ہوئے کہا کہ اس شعبے سے کرنٹ اکاؤنٹ کے بڑے خسارے کو پورا کیا جا سکتا ہے، ہم معاشی تبدیلی کے لیے آئی ٹی کے شعبے میں سرمایہ کاری کی ترغیب دیں گے، اگلے چند سالوں میں آئی ٹی کی برآمدات کو 50 بلین ڈالر تک بڑھانے کا وژن ہے۔
عمران خان نے کہا کہ اسلام آباد اور تمام صوبائی دارالحکومتوں میں فاسٹ ٹریک بنیادوں پر اسپیشل ٹیکنالوجی زونز قائم کیے جائیں، پہلے مرحلے میں شہروں میں ٹیکنالوجی کی جدت اور سرمایہ کاری کا مرکز بنایا جائے گا، فارن ایکسچینج اور انکم ٹیکس کی پالیسیوں میں ضروری تبدیلیاں متعارف کرائیں اور ملک میں آئی ٹی اسٹارٹ اپس کو پھلنے پھولنے میں مدد ملے گی۔

اسلام آباد: (ویب ڈیسک) پاکستان مسلم لیگ ن کے صدر اور قومی اسمبلی میں اپوزیشن لیڈر شہباز شریف پیپلز پارٹی کے شریک چیئرمین آصف علی زرداری سے ملنے پہنچ گئے۔
خیال رہے کہ ایک ماہ کے دوران اپوزیشن کی دونوں بڑی پارٹیوں کی اعلٰی سطح پر یہ دوسری ملاقات ہے۔ اس سے قبل آصف علی زرداری اور بلاول بھٹو زرداری لاہور میں ہی شہباز شریف کی رہائش گاہ پر ان سے ملاقات کے لیے گئے تھے۔
اُدھر لیگی صدر شہباز شریف کے ساتھ مسلم لیگ ن کے سینئر رہنما رانا ثنااللہ، پارٹی سیکرٹری جنرل احسن اقبال، خواجہ سعد رفیق اور پارٹی کی ترجمان مریم اورنگ زیب شامل ہیں۔
بلاول ہاؤس پہنچنے پر سابق صدر آصف زرداری، یوسف رضا گیلانی، راجہ پرویز اشرف، مخدوم احمد محمود، رخسانہ بنگش نے استقبال کیا۔
بعد ازاں جمعیت علمائے اسلام کی جانب سے مولانا اسعد الرحمان اور اکرم درانی بھی بلاول ہاؤس پہنچ گئے۔ آصف علی زرداری نے اپوزیشن رہنماؤں کو عشائیے کی دعوت دی تھی۔
ذرائع کے مطابق بلاول ہاؤس لاہور میں لیگی وفد کے لیے پرتکلف کھانوں کا اہتمام کیا گیا، مسلم لیگ ن کے صدر شہباز شریف کے لیے خصوصی طور پر کشمیری دال چاول، مکھنی دال تیار کی گئی جبکہ شرکاء کے عشائیہ میں فش سوپ، مٹن بریانی، سندھی بریانی، گرل فش، بار بی کیو، افغانی پلاؤ، پالک پنیر، قورمہ شامل ہے۔
ذرائع کے مطابق دیگر میں فش کباب، ویجیٹیبل کباب، مٹن قیمہ، چائنیز، پرائونز سوپ، سلاد، رائتہ، میٹھے میں دال کا حلوہ، گاجر کا حلوہ، پیٹھے کا حلوہ، کھیر، کسٹرڈ، سبز چائے شامل ہے۔

لاہور: (ویب ڈیسک) طلبہ کی موجیں ختم، رواں سال میٹرک اور انٹرمیڈیٹ میں عملی امتحانات ہونگے۔
پنجاب بورڈ کمیٹی چئیرمینز کے آن لائن اجلاس میں کئے گئے فیصلہ کے مطابق عملی امتحانات کا نصاب دسویں اور اور 12ویں کے نصاب سے تیار ہوگا، نویں سے 12ویں جماعت کے امتحانات پورے نصاب کے مطابق ہونگے ۔
خیال رہے کہ کورونا کی وجہ سے گذشتہ 2 سال سے عملہ امتحانات نہیں ہورہے تھے۔

لاہور: (ویب ڈیسک) معروف ٹک ٹاکر نبیل اکرم عرف بھولا ریکارڈ کی لڑکی سے زیادتی، غالب مارکیٹ پولیس نے زناء باالجبر کا مقدمہ درج کرلیا۔
پولیس کے مطابق ویڈیو شیئرنگ ایپلی کیشن ٹک ٹاک پر اپنی ویڈیوز کی وجہ سے شہرت رکھنے والے نبیل اکرم عرف بھولا ریکارڈ کے خلاف شائستہ طالب نامی خاتون نے زیادتی کا مقدمہ درج کروایا۔
مدعیہ مقدمہ کے مطابق ٹک ٹاکر نے اسے گلبرگ کے نجی ہوٹل میں بلایا اور وہاں پر مجھے زیادتی کا نشانہ بنا ڈالا۔
پولیس کا کہنا ہے کہ متاثرہ لڑکی کے بیانات کی روشنی میں تحقیقات جاری ہیں۔