لاہور: (ویب ڈیسک) اسپیکر چودھری پرویز الٰہی نے کہا ہے کہ علماء عوامی مسائل کے حل کے لیے حکومت کی رہنمائی کریں۔
اسپیکر چوہدری پرویز الہی سے چیرمین متحدہ علماء بورڈ طاہر محمود اشرفی اور مجلس احرار اسلام کے امیر مرکزیہ سید محمد کفیل بخاری، مرکزی ڈپٹی سیکرٹری جنرل میاں محمد ادریس اور محمد قاسم چیمہ نے سپیکر چیمبر میں ملاقات کی۔ اس موقع پر پرویز الہی کا کہنا تھا کِہ متحدہ علماء بورڈ، مجلس احرار اسلام نے ملک کے اندر فرقہ وارانہ تشدد اور انتہاپسندی کے خاتمے کے لیے بھرپور اور نمایاں کردار ادا کیا، ہم میں ایک دوسرے کی بات برداشت کرنے، سننے اور قبول کرنے کا جذبہ ہونا چاہیے۔
حافظ طاہر محمود اشرفی اور سید محمد کفیل بخاری نے کہا کہ پنجاب اسمبلی میں اتفاق رائے سے مذہبی اور ختم نبوت پر قانون سازی میں آپ کا کردار انشاء اللہ سنہری حروف سے لکھا جائے گا۔ متحدہ علماء بورڈ اور مجلس احرار اسلام دینی خدمات پیش کرنے پر سپیکر چودھری پرویز الٰہی کو خراجِ تحسین پیش کرتے ہیں۔ حافظ طاہر محمود اشرفی نے کہا کہ آپ کے دورِ حکومت میں بین المذاہب ہم آہنگی کو فروغ دیا گیا۔

لاہور: (ویب ڈیسک) وزیر قانون راجہ بشارت نے پی ایس ایل کے لاہور میں ہونے والے میچز میں مقامی اور غیر ملکی کھلاڑیوں کی نقل و حرکت بلٹ پروف گاڑیوں میں ہوگی، طے شدہ پلان پر عملدرآمد یقینی بنایا جائے۔
وزیر قانون راجہ بشارت کی زیر صدارت قذافی سٹیڈیم میں اعلی سطحی اجلاس ہوا، جس میں پی ایس ایل سکیورٹی کا جائزہ لیا گیا۔ چیف سیکرٹری، آئی جی نے اجلاس میں شرکت کی۔ کمشنر اور سی سی پی او لاہور نے سکیورٹی پلان پر اجلاس کے شرکت کو بریفنگ دی۔
راجہ بشارت کا کہنا تھا کہ طے شدہ سیکیورٹی پلان پر اس کی روح کے مطابق عملدرآمد یقینی بنایا جائے، وزیر قانون نے روٹ پر خراب کیمرے فوری تبدیل کر کے نئے لگانے کی ہدایت جاری کیں۔ ان کا کہنا تھا کہ اہل لاہور ماضی کی طرح مہمانوں کو خندہ پیشانی سے خوش آمدید کہیں، شہری کھیلوں کی بحالی کیلئے حکومتی انتظامات میں تعاون کریں۔
چیف سیکرٹری پنجاب کامران افضل کا کہنا تھا کہ پارکنگ ایریاز کے بارے میں میڈیا پر تشہیری مہم چلائی جائے۔ آئی جی کا کہنا تھا کہ اتوار کو تمام ادارے مشترکہ فرضی مشق کریں گے۔

پشاور: (ویب ڈیسک) الیکشن کمیشن نے جے یو آئی کو ڈیرہ اسماعیل خان میں5 اور 7 فروری کوریلی اور جلسے سے روک دیا۔
تفصیلات کے مطابق ڈیرہ اسماعیل خان کے ڈسٹرکٹ الیکشن کمشنر کےمتعلقہ ڈی آر او اور ڈی پی او کو بھجوائے گئے مراسلے میں کہا گیا ہے کہ جمعیت علماء اسلام ف اپنے امیدوار محمد کفیل نظامی کے لیے جلسہ کر رہے ہیں جو بلدیاتی انتخابات کے ضابطہ اخلاق کی خلاف ورزی ہے، الیکشن کمیشن کی جانب سے علاقے میں جلسہ اور رییی کی اجازت نہیں ہو گی، حلقے میں کسی جلسے اور ریلی کی اجازت نہ دی جائے۔

پشاور: (ویب ڈیسک) پشاورہائی کورٹ ایبٹ آباد بینچ نے خیبر پختونخوا میں 27 مارچ کو ہونیوالے بلدیاتی انتخابات ملتوی کر دیئے۔
پشاور ہائیکورٹ کے ایبٹ آباد بینچ میں الیکشن ملتوی کرنے سے متعلق دائر درخواست پر سماعت ہوئی، جسٹس ابراہیم اور جسٹس شکیل احمد پر مشتمل بنچ نے فیصلہ سنایا، فیصلے میں عدالت کا کہنا تھا کہ چیف الیکشن کمشنر رمضان المبارک کے بعد بلدیاتی الیکشن کروائیں ۔
فیصلے میں کہا گیا ہے کہ موجودہ حالات میں پہاڑی علاقوں میں صاف اورشفاف انتخابات کا انعقاد ممکن نہیں لگتا، برفباری کے باعث متعدد علاقوں کےعوام کو ووٹ ڈالنے میں مشکلات ہیں، کوہستان اور ناران کےعمائدین نے ہائیکورٹ ایبٹ آباد بینچ میں الیکشن ملتوی کرنے کی درخواست دائرکی تھی۔