اسلام آباد: (ویب ڈیسک) پاکستان تحریک انصاف (پی ٹی آئی) کے چیئر مین اور سابق وزیراعظم عمران خان نے کہا ہے کہ بھارت میں ہمارے پیارے نبی ﷺ کی شان میں گستاخی کی گئی، اگر چار عرب ممالک سخت ایکشن لے سکتے ہیں تو پاکستان بھی لے، شریف خاندان مودی سے اپنے تعلقات توڑ کر سخت ایکشن لے۔
بنی گالہ میں وکلاء کنونشن سے خطاب کرتے ہوئے سابق وزیراعظم نے کہا کہ میں نے تو سنا تھا تھوڑے سے لوگ آئیں گے، آپ لوگوں نے تو جلسہ کر دیا ہے، مجھے حکومت مخالف تحریک میں وکلا کی سب سے زیادہ ضرورت ہے۔ جمہوریت میں احتجاج ہر شہری کا حق ہے، سازش کے تحت چوروں، ڈاکوؤں کی حکومت مسلط کی گئی۔پاکستان کے وکلا کی سب سے زیادہ ضرورت ہے، دھمکی آمیز مراسلے کو نیشنل سیکیورٹی کے سامنے رکھا، صدر مملکت ڈاکٹر عارف علوی نے چیف جسٹس آف پاکستان جسٹس عمر عطاء بندیال کو بھی مراسلہ بھیجا، سپریم کورٹ کے پاس مراسلہ انویسٹی گیشن کے لیے پڑا ہے۔
انہوں نے کہا کہ ملک کے بڑے ڈاکوؤں کو سزا ہونا تھی، چیری بلاسم جوتے پالش کر کے اوپر پہنچ گیا ہے، یہ کیسے ہوسکتا ہے دنیا میں ملزم قاضی بن جائے؟ چھوٹی موٹی چوری نہیں شہبازشریف نے 16 ارب کی چوری کی، کرائم منسٹرکے کرپٹ بیٹے کو وزیراعلیٰ پنجاب بنا دیا گیا۔ قانون کی حکمرانی وکلا،عدلیہ کی ذمہ داری ہے۔ رول آف لا پرعدالتوں نے عملدرآمد کرانا ہے، وزیراعظم، چیف منسٹر 60 فیصد کابینہ پر مقدمات ہم سب کی توہین ہے۔
عمران خان نے کہا کہ بھارت میں ہمارے پیارے نبی ﷺ کی شان میں گستاخی کی گئی، اگر چار عرب ممالک سخت ایکشن لے سکتی ہیں تو پاکستان بھی لے، شریف خاندان مودی سے اپنے تعلقات توڑ کر سخت ایکشن لے، بھارت میں یہ پہلی دفعہ نہیں ہوا، بھارتی مصنوعات کا بائیکاٹ کیا جائے۔
پی ٹی آئی چیئر مین کا کہنا تھا کہ الیکشن کمیشن حمزہ ککڑی کو وزیراعلیٰ رکھنے کی کوشش کر رہا ہے، الیکشن کمیشن کہتا ہے کہ ضمنی الیکشن کے بعد فیصلہ ہو گا، یہ کیسے ہوسکتا ہے آئین کی دھجیاں اڑائی جا رہی ہیں، انہوں نے دھاندلی کے ذریعے الیکشن جیتنے کا پلان بنایا ہے، یہ ویسے تو الیکشن نہیں جیت سکتے،یہ جیسے ہی الیکشن کمپین میں جائیں گے چور، غدارکے نعروں کو سنیں گے، اب یہ الیکشن کمیشن کے ساتھ مل کر دھاندلی کرنا چاہتے ہیں، الیکشن کمیشن کی دھاندلی کے باوجود ہم ان کو ہرائیں گے۔
پی ٹی آئی چیئر مین کا کہنا تھا کہ ہماری حکومت میں ملک ترقی کر رہا تھا، امپورٹڈ جب سے آئی ہے ملک میں تاریخی مہنگائی ہورہی ہے، کبھی پٹرول، ڈیزل، بجلی، گیس کی قیتمیں کبھی اتنی نہیں بڑھیں تھی، عالمی ادارے بھی پاکستان کی معیشت کو منفی قراردے رہے ہیں، سابق چیئر مین واپڈا جنرل (ر) مزمل سے جب سے استعفی لیا گیا واپڈا کا ادارہ بھی نقصان میں جا رہا ہے، واپڈا کی ریٹنگ بھی نیچے چلی گئی ہے، ملک میں 50 سال بعد ڈیمز بن رہے تھے، ان کے آنے سے ملک کا مستقبل خطرے میں ہے، یہ ہماری نیشنل سیکیورٹی کے لیے سب سے بڑا خطرہ ہے۔ہمیں بھی آئی ایم ایف نے قیمتیں بڑھانے کا کہا تھا نہیں بڑھائی تھی۔
حکمرانوں پر تنقید کرتے ہوئے انہوں نے کہا کہ پہلے سازش کے تحت آئے اور پھر نیب میں کیسز ختم کرا رہے ہیں، لانگ مارچ کے دوران بدترین شیلنگ کی گئی، اس طرح تو مارشل لا کے دور میں بھی خواتین، بچوں پر تشدد نہیں ہوا، شہباز شریف، قاتل وزیرداخلہ ہمارے خلاف مقدمات بنا رہے ہیں، ان کی کوشش ہے کہ کیسز کر کے عمران کو جیل میں بند کر دیا جائے، آپ سب نے تیار رہنا ہے ہم نے کسی صورت حقیقی آزادی تحریک سے پیچھے نہیں ہٹنا، شفاف الیکشن کا اعلان ہونے تک پیچھے نہیں ہٹیں گے۔

لاہور: (ویب ڈیسک) پاکستان تحریک انصاف کے رہنما اور سابق وفاقی وزیر حماد اظہر نے حکومت پر تنقید کرتے ہوئے کہا ہے کہ اس وقت فوری طورپرعام انتخابات کی طرف جانے کی ضرورت ہے، انہوں نے توانائی شعبے اور ملکی سلامتی کو داؤ پر لگا دیا ہے، یہ دعا کر رہے ہیں کہ بارش ہوجائے تو لوڈشیڈنگ قدرتی طور پر کم ہوجائے گی۔
پریس کانفرنس کرتے ہوئے حماد اظہر نے کہا کہ عام انتخابات کرا کرمعیشت کو استحکام نہ دیا تو بہت دیر ہوجائے گی، حکومت کے پاس کوئی منصوبہ بندی نہیں، یہ اناڑی، نااہل ترین ہے، روزانہ 6 وزرا آتے ہیں اور 6 جھوٹ بولتے ہیں، معیشت جس طرف چلی گئی ہے یہ ہمارے لیے ناقابل قبول ہے۔
سابق وزیر توانائی کا کہنا تھا کہ عالمی ادارے، موڈیز کہتا ہے پاکستان کی معیشت منفی پر چلی گئی ہے، لوڈشیڈنگ کی وجہ ان کے ہاتھ سے لگے امپورٹڈ تیل پر چلنے والے پلانٹ ہیں، ہماری پلاننگ میں فقدان ہوتا تو ہماری حکومت میں بھی لوڈشیڈنگ ہوتی، ہم ترقی کی شرح 6 فیصد پر چھوڑ کر گئے تھے، اگلے سال مہنگائی کی شرح 13 سے 30 فیصد تک چلی جائے گی۔
حماد اظہر نے مزید کہا کہ یہ لوگ انتخابات سے فرار کیوں ہو رہے ہیں؟ وزیراعلیٰ پنجاب ہائی کورٹ کی تاریخوں پر چل رہے ہیں، آئی ایم ایف معاہدہ 3 سال کا تھا جو ستمبرمیں ختم ہو رہا تھا، اگر آئی ایم ایف سے ہمارا معاہدہ غلط تھا تو یہ سامنے کیوں نہیں لاتے۔
انہوں نے کہا کہ معیشت چھ فیصد پر ترقی کر رہی تھی، کورونا کے باوجود عالمی اداروں نے پاکستان کی معاشی بہتری کا اعتراف کیا تھا، تقریباً دو ماہ کے اندر صورتحال بہت خراب ہوچکی ہے، ڈالر ایک دن کے اندر 2 روپے 85 پیسے مہنگا ہوا، اس حکومت نے پہلے چالیس دن ابہام میں گزارے، موجودہ حکومت کے پاس ہر چیزکا حل قیمت بڑھا دیتے ہیں، کل ان کی معاشی ٹیم نے کہا فیول خرید لیا ہے، حکومت کی ہر بات جھوٹ ثابت ہوتی ہے، یہ لوڈشیڈنگ کے حوالے سے اب بھی جھوٹ بول رہے ہیں۔
پی ٹی آئی رہنما نے پریس کانفرنس میں کہا کہ مسلم لیگ (ن) نے پاکستان کی خودداری بیچی، غیر سنجیدگی کی انتہا دیکھیں وزیراعظم نے پہلے دن کہا ہفتے کے روز بھی کام کریں گے، آج کہتے ہیں ہفتے کی چھٹی اور جمعے کو بھی آدھا دن کام کریں گے، شرح سود 2009 سے بھی اوپر جا چکا ہے، مہنگائی اور بے روزگاری کا سیلاب آنے والا ہے۔
ان کا کہنا تھا کہ خدا کا واسطہ جھوٹ بولنا چھوڑ دیں، اگر معیشت نہیں سنبھالی جارہی تو چھوڑ دیں، ٹیکسٹائل انڈسٹری کو گیس، بجلی نہیں مل رہی، انڈسٹری تو بند ہوگئی ہے، حکومت کی کوئی منصوبہ بندی نہیں، روزانہ کے لحاظ سے ملک کو بری خبر ملتی ہے، ان کا تو سب کچھ بیرون ملک انہیں کوئی فرق نہیں پڑتا، معیشت بحران بہت سنگین ہوگیا، فوری طورپرعام انتخابات کی طرف جانا ہوگا، واضح ہوگیا یہ اناڑی لوگ ہے ان سے ملک نہیں سنبھل رہا، کوئی شک نہیں یہ نا اہل، نکمی ترین حکومت ہے۔