کراچی: (ویب ڈیسک) کھلے سمندر میں شکار کے دوران ماہی گیروں کے جال میں قیمتی ہیرا مچھلی کا جھنڈ پھنس گیا۔
ترجمان کوسٹل میڈیا سینٹر کمال شاہ کے مطابق گہرے سمندر میں مچھلی کے شکار پر جانے والےابراہیم حیدری کے ماہی گیروں کی اس وقت چاندی ہوگئی،جب کراچی کے ساحل کے قریب دوران شکار ان کے جال میں ہیرا مچھلی کا جھنڈ پھنس گیا۔
کمال شاہ کے مطابق ماہی گیروں کے ہاتھ لگنے والی ہیرا مچھلی کی مالیت لاکھوں روپے ہے، جو ان دنوں 600 سے 700 روپے فی کلو فروخت ہورہی ہے جبکہ موسم سرما میں اس کی طلب بڑھنے پر قیمت 1300 روپے فی کلو تک پہنچ جاتی ہے۔
انہوں نے بتایا کہ سمندر میں شکار کے دوران ہیرامچھلی نایاب ہونے کے سبب بہت کم ماہی گیروں کے جال میں پھنستی ہے۔ تیکینکی مشیر ڈبلیو ڈبلیو ایف معظم خان کے مطابق ہرہیرانسل کا شمار پاکستان کی اچھی اور لذید مچھلیوں میں ہوتا ہے، یہ زیادہ تر(شیلو واٹرز)100میٹرز کی گہرائی ملتی ہے اور جھینگے کھاتی ہے۔
ان کا کہنا ہے کہ انگریزی میں اس مچھلی کو مینگروز سنیپر جبکہ اردو اور سندھی زبان میں اسے ہیرا مچھلی کہتے ہیں، بلوچی میں یہ مچھلی کن لا کے نام سے مشہور ہے۔ انہوں نے کہا کہ عموما ہیرا مچھلی کے شکار کے لیے مخصوص جال استعمال ہوتا ہے، یہ ماہی گیروں کی خوش قسمتی ہے کہ عام قطرہ بوٹ اور دیگر مچھلی کے شکار کے لیے استعمال ہونے والے جال کے ذریعے اتنا بڑا جھنڈ شکار کرلیا۔
معظم خان کے مطابق ماہی گیروں کے جال میں پھنسنے والی مچھلی 12800کلو گرام(12.8 ٹن)وزنی تھی،جو 580 روپے کلو گرام کے حساب سے لگ بھگ 75 لاکھ روہے میں نیلام ہوئی۔

اسلام آباد: (ویب ڈیسک) امریکی سفیر ڈونلڈ بلوم نے کہا ہے کہ پاکستان کیساتھ ہم مشکل ترین حالات میں وہ کردار ادا کر رہے ہیں جو ایک دوست کو ادا کرنا چاہیے۔
امریکا اور پاکستان کے مابین سفارتی تعلقات کے قیام کی 75 ویں سالگرہ کے موقع پر امریکی سفارتخانہ میں سفارتی استقبالیہ ہوا، جس میں وزیراعظم شہباز شریف نے پاکستانی حکومت اور عوام کی نمائندگی کرتے ہوئے بطورِ مہمان خصوصی شرکت کی۔ جبکہ وزراء ، امریکی سفیر ڈونلڈ بلوم اور شہریوں کی بڑی تعداد میں شرکت کی۔
تقریب کے آغازپرسیلاب زدگان سے اظہاریکجہتی کے لیے ایک منٹ کی خاموشی اختیارکی گئی۔
اس موقع پر امریکی سفیر نے کہا کہ سیلاب کے دوران امریکا، پاکستان مضبوط دوستی کی عکاسی 6 کروڑ ساٹھ لاکھ ڈالر سے زائد کی حالیہ معاونت سے ہوتی ہے، امریکی عوام پاکستان کے ساتھ مستقل کھڑے ہیں، ہم مشکل ترین حالات میں وہ کردار ادا کر رہے ہیں جو ایک دوست کو ادا کرنا چاہئے۔
ڈونلڈ بلوم کا کہنا تھا کہ گزشتہ پچھتر برسوں میں امریکا اور پاکستان نے باہمی احترام، مشترکہ مقاصد کی بنیاد پر تعلقات قائم کیے،کئی دہائیوں تک 32 ارب ڈالر کی امریکی اعانت نے پاکستان کے عوام کی زندگیوں پر بہتر اثرات مرتب کئے ہیں،عالمی منظرنامہ دونوں مُمالک کے دوران شراکت کی ازسر نو ترتیب کا موقع فراہم کرتا ہے۔

اسلام آباد: (ویب ڈیسک) وفاقی وزیر برائے قانون وانصاف اعظم نذیرتارڑ نے کہا ہے کہ عمران خان کاسائفر کے معاملے پر غیرذمہ درانہ اور سازشی بیانیہ قوم کے سامنے آچکا ہے، سابق وزیراعظم نے ملکی مفاد کے خلاف خطرنا ک کھیل کھیلا اور آفیشل سیکرٹ ایکٹ کی خلاف ورزی کی، ملکی سلامتی پرکوئی سمجھوتہ نہیں کیا جائے گا۔
پریس کانفرنس کرتے ہوئے انہوں نے کہا کہ کل سے ایک آڈیو لیک زیربحث ہے جس میں سابق وزیراعظم عمران خان اور ان کے پرائیویٹ سیکرٹری کی گفتگو ہے۔ جب بطور ارکان پارلیمنٹ یا وزیراعظم کی حیثیت سے حلف اٹھایا جاتا ہے تو اس میں یہ عہد کرتے ہیں کہ قومی مفاد پر ذاتی مفاد کو ترجیحی نہیں دیں گے کیونکہ پبلک آفس ہولڈرکو وسیع ترقومی مفاد میں اہم فیصلے کرنے ہوتے ہیں۔
وفاقی وزیر قانون عمران خان کا سازشی بیانیہ اب لوگوں کے سامنے آچکا ہے،عمران خان نے ذاتی مفاد کو قومی مفاد پر ترجیح دی، سابق وزیراعظم نے سائفر کے معاملے پر غیر ذمہ دارانہ طرز عمل اپنایا۔ ہمیں ایسے فیصلے کرنے چاہیئں جو ریاست کے مفاد میں ہوں،سابق وزیراعظم نے ملکی مفاد کے خلاف خطرناک کھیل کھیلا۔
اعظم نذیر تارڑ نے کہا کہ امریکا کے ساتھ پاکستان کے سفارتی تعلقات کی طویل تاریخ ہے، قوم نے دیکھ لیا سازشی بیانیے کا آغاز کہاں سے ہوا، سابق وزیراعظم کو ان کے پرنسپل سیکرٹری صاف لفظوں میں بتا رہے ہیں کہ سائفر پبلک نہیں کیا جا سکتا لیکن انہوں نے کہا کہ ہمیں اس سے کھیلنا ہے اور پھر بیانیے کو آگے لے کر چلنے کی بات کی ، سابق پرنسپل سیکرٹری کو احساس ہونا چاہئے تھا کہ وہ ریاست کے ملازم ہیں انہیں سیاسی جماعت کا ایجنڈا لے کر نہیں چلنا چاہئے تھا۔
انہوں نے کہا کہ عمران خان نے آفیشل سیکرٹ ایکٹ کی خلاف ورزی کی، ان کے بیانیے کے بارے میں میڈیا اورعوام اچھی طرح جانتے ہیں ، سپریم کورٹ نے اپنے فیصلے میں لکھا کہ بادی النظرمیں کوئی سازش نہیں تھی جو ملک کو ہلاک ر کھ دے، منتخب قومی اسمبلی کو تحلیل نہیں کیا جاسکتا، عدالت نے ڈپٹی سپیکر کی رولنگ کو کالعدم قرار دیا، موجودہ حکومت نے سائفرکی تحقیقات کےلئے سابق وزیراعظم کی جانب سے جوڈیشل کمیشن بنانے کےلئے سپریم کورٹ کو بھیجا گیا خط ابھی تک واپس نہیں لیا تاہم سپریم کورٹ نے مناسب نہیں سمجھا کہ اس کے فیصلے کے بعد اس پر کارروائی ہو۔
اعظم نذیرتارڑ نے کہا کہ حکومت پاکستان سائفر کے معاملے کی قانونی طور پر تحقیقات کرے گی،ملکی سلامتی پر کسی قسم کا سمجھوتہ نہیں کیا جائے گا۔ سابق وزیراعظم عمران خان کی آڈیو سوشل میڈیا پرموجود ہے، انہوں نے سائفر عوام میں لہرا کر پبلک سیکرٹ ایکٹ کی خلاف ورزی کی ، انہیں اپنے گریبان میں جھانکنا چاہئے۔ قومی سلامتی کمیٹی کے اجلاس میں آڈیولیک کے معاملے کاتفصیلی جائزہ لیا گیا اور مستقبل کے حوالے سے فیصلے اور ترجیحات کا تعین کیا گیا،حکومت نے اس حوالے سے وزیر داخلہ کی سربراہی میں خصوصی کمیٹی بنائی ہے،کمیٹی میں سکیورٹی اداروں کے نمائندے شامل ہونگے،کمیٹی ان آڈیو لیکس اور خفیہ ریکارڈنگ کا جائزہ لے گی۔
انہوں نے کہا کہ دنیا بھرکوسائبر سکیورٹی کے چیلنج کا سامنا ہے، مختلف طریقوں سے سائبر سکیورٹی کے حملے ہوتے ہیں، پاکستان ایک ذمہ دار ریاست ہے، ہمیں ریاستی قوانین اور بنیادی انسانی حقوق میں توازن برقرار رکھتے ہوئے آگے بڑھنا ہے، جدید ٹیکنالوجی بالخصوص سائبر سکیورٹی کے تناظرمیں قانون سازی وقت کی ضرورت ہے۔ انہوں نے کہا کہ مجھے سائبر سیکورٹی سے متعلق قانون سازی کا ہدف دیا گیا ہے،اس سلسلے میں تمام متعلقہ اداروں اور سول سوسائٹی کی مشاورت سے آگے بڑھیں گے۔

اسلام آباد :(ویب ڈیسک) وزیراعظم شہبازشریف نےوفاقی کابینہ کاہنگامی اجلاس کل طلب کرلیا۔
اجلاس میں نیشنل سکیورٹی کمیٹی کے فیصلوں کی توثیق کی جائےگی، وفاقی کابینہ کو آڈیولیکس کی تحقیقات سے آگاہ کیا جائے گا۔
وفاقی وزیر قانون اعظم نذیر تارڑ کا کہنا ہے کہ وزیراعظم آفس کو کسی حساس ادارےکے دفتر کی طرح نہیں بنایا جاسکتا، پی ایم آفس کے تحفظ کیلئے ایس او پیز تبدیل کردیے ہیں۔
انہوں نے کہا کہ نیشنل سکیورٹی میٹنگ میں فیصلہ ہواکہ بگنگ کےخلاف قانون سازی ہو گی، سکیورٹی بریچ روکنے کیلئے طریقے کا فیصلہ سائبر کمیٹی کرے گی۔

لاہور: (ویب ڈیسک) پاکستان تحریک انصاف کے چیئر مین عمران خان نے سعودی ولی عہد محمد بن سلمان کو وزیراعظم منتخب ہونے پر مبارکباد دی ہے۔
سماجی رابطے کی ویب سائٹ ٹویٹر پر اپنے ایک بیان میں سابق ویزراعظم نے کہا کہ سعودی ولی عہد شہزادہ محمد بن سلمان کو مملکت کا وزیراعظم منتخب ہونے پر مبارکباد دیتا ہوں، پاکستان کے لیے آپ کی دوستی اور حمایت انمول ہے اور آپ اپنے وژن سے مملکت کو ایک نئے دور میں داخل کریں گے۔