اسلام آباد: (ویب ڈیسک) نیب ترامیم کے خلاف چیئرمین پاکستان تحریک انصاف (پی ٹی آئی) عمران خان کی درخواست سپریم کورٹ میں سماعت کے لیے مقررکردی گئی۔
چیف جسٹس عمرعطا بندیال کی سربراہی میں 3 رکنی بینچ 4 اکتوبر کو عمران خان کی درخواست کی سماعت کرےگا، جسٹس اعجاز الاحسن اور جسٹس منصور علی شاہ تین رکنی بینچ کا حصہ ہوں گے۔
عدالت نے اٹارنی جنرل اور ایڈیشنل پراسیکیوٹر جنرل نیب سمیت دیگر فریقین کو نوٹس جاری کر دیا۔
خیال رہےکہ چیئرمین تحریک انصاف عمران خان نے نیب ترامیم کو کالعدم قرار دینے کی استدعا کر رکھی ہے۔
عمران خان کے وکیل نے عدالت میں مؤقف اختیار کیا تھا کہ نیب ترامیم سپریم کورٹ کے فیصلوں اور آئین کے بنیادی ڈھانچے سے متصادم ہیں، ترامیم کے بعد اختیارات سے تجاوز کرکےکسی کوفائدہ پہنچانے پرکیس نہیں بنےگا، اس لیے نیب ترامیم کو کالعدم قرار دیا جائے۔

اسلام آباد: (ویب ڈیسک) تحریک انصاف کے رہنما فواد چوہدری نے ایون فیلڈ ریفرنس میں مریم نواز کی بریت کے فیصلے کو پاکستان کی تاریخ کا ایک اور تاریک دن قرار دے دیا۔
سماجی رابطے کی ویب سائٹ ٹویٹر پر فواد چوہدری نے لکھا کہ ’’مریم نواز کا جرم اربوں روپے کے ایون فیلڈ کے محلات ہیں اور اس جرم میں ان کا کردار کسی شک و شبہ سے بالاتر ہے، بہرحال پاکستان کی تاریخ کا ایک اور تاریک دن‘‘۔
پی ٹی آئی رہنما کا کہنا تھا کہ پاکستان کے ادارے عوام کا اعتماد کھو چکے ہیں، وہ کسی کے حق میں فیصلہ دیں یا خلاف عوامی رائے عامہ میں اس فیصلے کی کوئی حیثیت ہی نہیں رہ گئی۔
واضح رہے کہ اسلام آباد ہائی کورٹ نے ایون فیلڈ ریفرنس میں مریم نواز اور کیپٹن (ر) صفدر کی سزائیں کالعدم قرار دیتے ہوئے انہیں بری کر دیا ہے جبکہ اس کے ساتھ ہی مریم نواز کی نااہلی بھی ختم ہوگئی ہے۔
عدالت نے اپنے فیصلے میں ایون فیلڈ ریفرنس میں مریم نواز اور کیپٹن (ر) صفدر کی چار سال کے بعد اپیلیں منظور کیں۔ فیصلہ سنتے ہی مریم نواز نے والد نواز شریف سے ٹیلی فونک رابطہ کیا اور انہیں مبارک باد دی۔ فیصلے پر عدالت کے باہر ن لیگی کارکنوں نے خوشی سے نعرے بازی کی۔
یاد رہے کہ اسلام آباد کی احتساب عدالت نے ایون فیلڈ ریفرنس میں متعدد سماعتوں کے بعد جولائی 2018ء میں سابق وزیراعظم نواز شریف کو 11 سال قید کی سزا سناتے ہوئے ان پر 80 لاکھ برطانوی پاؤنڈ جرمانہ بھی عائد کیا تھا۔
عدالت نے اس ریفرنس میں مریم نواز کو سات سال قید کی سزا سناتے ہوئے 20 لاکھ برٹش پاؤنڈ جرمانہ بھی عائد کیا تھا۔ اسی طرح کیپٹن (ر) صفدر کو ایک سال قید کی سزا سنائی تھی تاہم عدالت نے مریم نواز اور کیپٹن (ر) صفدر کا مقدمہ نواز شریف کے مقدمے سے علیحدہ کر دیا تھا۔

اسلام آباد: (ویب ڈیسک) کسان اتحاد کی جانب سے مہنگی بجلی و کھاد کے خلاف احتجاجی ریلی نکالی گئی، مظاہرین تمام رکاوٹیں توڑ کر اسلام آباد میں داخل ہو گئے اور دھرنا دے دیا۔
مظاہرین کا کہنا ہے کہ اگر مطالبات نہ مانے گئے تو ڈی چوک کی طرف جائیں گے۔ کسان اتحاد کی جانب سے وفاقی حکومت کے خلاف احتجاج کیا گیا۔ کسان اتحاد ریلی جی ٹی روڈ کے راستے اسلام آباد داخل ہوگئی۔
مظاہرین نے کمپلکیس چوک پر دھرنا دے دیا۔ انتظامیہ نے متعدد بار مذاکرات کی کوشش کی تاہم تاحال حکام کامیاب نہ ہو سکے۔ اسلام آباد انتظامیہ کی جانب سے مظاہرین کو متبادل جگہ کی بھی پیشکش کی گئی تاہم وہ دھرنے پر مصر ہیں۔
کسانوں کی جانب سے مطالبہ کیا گیا ہے کہ بجلی کے بلوں میں شامل اضافی ٹیکس کو فی الفور ختم کیا جائے اور بلیک میں کھاد بیچنے والوں کے خلاف کارروائی عمل میں لائی جائے۔
مظاہرین کا کہنا ہے کہ اگر ہمارے مطالبات نہ مانے گئے تو ہم ڈی چوک کی طرف جائیں گے اور دھرنے پر ہی رہیں گے۔
دریں اثنا وزیر داخلہ رانا ثنا اللہ نے احتجاج پر بیٹھے کسان اتحاد کے وفد سے ملاقات کی جس میں کسان اتحاد نے اپنے مطالبات پیش کیے۔ رانا ثناء اللہ نے کسان رہنماؤں کو مسائل کے حل کی یقین دہانی کرائی۔
کسان اتحاد نے مطالبہ کیا کہ بجلی کے بلوں کو مؤخر اور بجلی کے ٹیرف پر نظر ثانی کی جائے، بجلی کے بلوں میں کمی کی جائے کیوں کہ مہنگی بجلی سے زراعت متاثر ہو رہی ہے، ہمارے مذاکرات کو سنجیدگی سے لیا جائے گا۔
اطلاعات کے مطابق کسان رہنماؤں اور وزیر داخلہ رانا ثناء اللہ کے درمیان مذاکرات جاری ہیں۔

پشاور: (ویب ڈیسک) ایف آئی اے نے پشاور ایئر پورٹ پر کارروائی کے دوران جعلی افغان پاسپورٹ پر بیرون ملک جانے والے افغان باشندے کو گرفتار کرلیا، مردان میں کارروائی کے دوران حوالہ ہنڈی کے کاروبار میں ملوث ملزم دھر لیا۔
ایف آئی اے کے مطابق باچا خان ایئرپورٹ پر کارروائی کی گئی جس کے دوران جعلی افغان پاسپورٹ پر بیرون ملک جانیوالے افغان باشندے کو گرفتار کیا گیا، افغان باشندہ نجی ایئر لائن کی پرواز سے برطانیہ جا رہا تھا، مردان میں کارروائی کے دوران حوالہ ہنڈی اور غیر قانونی منی چینجرز میں ملوث ایک ملزم کو گرفتار کیا گیا۔
ملزم سے ایک کروڑ 25 لاکھ روپے اور دیگر دستاویز برآمد ہوئیں، ایف آئی اے نے مقدمات درج کرکے مزید تحقیقات شروع کر دیں۔