اسلام آباد: (ویب ڈیسک) وفاقی وزیر منصوبہ بندی احسن اقبال نے کہا ہے کہ اگلے سال ترقیاتی بجٹ کا جحم800ارب ہوگا، 2018میں حکومت چھوڑی توترقیاتی بجٹ 1000 ارب روپے تھا۔
پریس کانفرنس سے خطاب کرتے ہوئے انہوں نے کہا کہ جاری منصوبوں کی تکمیل حکومت کی اولین ترجیح ہوگی، خزانہ خالی ہونےکےباعث پی ایس ڈی پی ترتیب دینامشکل کام تھا،آئندہ بجٹ میں پی ایس ڈی پی کے تحت تمام صوبوں اور وزارتوں کی سفارشات کا جائزہ لیا ہے۔
احسن اقبال نے کہا کہ ماضی میں سیاسی بنیادوں پر ترقیاتی اسکیمیں شامل کی گئیں، گزشتہ حکومت کی غلط پالیسیوں کی وجہ سے پورٹ اینڈ شپنگ اور گوادر کے منصوبے متاثر ہوئے۔
انہوں نے کہا کہ پانی ذخیرہ کرنے کیلئے ڈیم کی تعمیر اور اعلیٰ تعلیم ہماری ترجیح ہو گی۔
وفاقی وزیر نے کہا کہ انفارمیشن اور سائنس و ٹیکنالوجی کیلئے انوویشن فنڈ کے نام سے خطیر رقم رکھی جائے گی، حکومت نوجوانوں کو میرٹ پر لیپ ٹاپ فراہم کرے گی، سائبر سیکیورٹی ، آرٹیفیشل انٹیلیجنس اور نوجوانوں کے تربیتی پروگرام ترقیاتی بجٹ میں شامل ہیں۔
ان کا کہنا تھا کہ نئے مالی سال کے ترقیاتی بجٹ میں نوجوانوں کیلئے بہت کچھ رکھا ہے،ہر طالب علم آسان قسطوں پر لیپ ٹاپ خرید سکے گا ، چاہتے ہیں اعلیٰ تعلیم حاصل کرنے والے ہر طالب علم کے پاس لیپ ٹاپ ہو۔
مزید کہا کہ صوبوں کے ساتھ مل کر 250 ووکیشنل ٹریننگ انسٹی ٹیوٹ بجٹ میں شامل ہیں۔

ملتان: (ویب ڈیسک) سابق وزیر خارجہ اور پاکستان تحریک انصاف (پی ٹی آئی) کے رہنما شاہ محمود قریشی نے کہا ہے کہ ہمیں معلوم ہے عمران خان ہمت ہارنے والے نہیں ہیں۔
پی ٹی آئی رہنما شاہ محمود قریشی نے میڈیا سے گفتگو میں کہا کہ جہانگیر ترین، علیم خان اور حواریوں نے ہمیشہ لوٹوں کے بل بوتے پر سیاست کی، میں نے ہمیشہ کہا نوٹوں والے اور، ووٹوں والے اور ہوتے ہیں۔
انہوں نے کہا کہ نوٹوں کے زور پر سیاست کرنے والے ن لیگ کے ٹکٹ پر الیکشن لڑ رہے ہیں اور ووٹوں کے زور پر سیاست کرنے والے عمران خان کے ساتھ ہیں۔
حکومت پر تنقید کرتے ہوئے انہوں نے کہا کہ حکومت چلانا امپورٹڈ حکمرانوں کے بس کی بات نہیں ہے اور حکومت کے پاس ملک چلانے کا منصوبہ ہے نہ ہی ان میں اہلیت، موجودہ حکومت 13 جماعتوں پر مشتمل چوں چوں کا مربہ ہے۔
شاہ محمود قریشی نے کہا کہ ان جماعتوں کا نہ نظریہ ایک ہے اور نہ راستہ ایک ہے۔ عمران خان کو اندرونی وبیرونی سازش کے تحت اقتدار سے الگ کیا گیا لیکن ہمیں معلوم ہے کہ عمران خان ہمت ہارنے والے نہیں ہیں۔
انہوں نے کہا کہ اپوزیشن لیڈر پاکٹ اپوزیشن لیڈر ہے اور میں نے پہلی دفعہ میڈیا پر دیکھا کہ اپوزیشن لیڈر وزیر اعظم کی تقریر پر ڈیسک بجا رہا ہے۔ اب ذاتیات اور شخصیات کا مقابلہ نہیں بلکہ نظریات کی جنگ ہے۔،
سابق وزیر خارجہ نے کہا کہ ایک طرف عمران خان کا نظریہ اور دوسری طرف چوں چوں کا مربہ ہے۔ میں ہر حلقے میں عمران خان کے نظریہ کو لے کر جاؤں گا۔

سوات: (ویب ڈیسک) خیبرپختونخوا کے ضلع سوات اور گردونواح میں زلزلے کے جھٹکے محسوس کیے گئے جس کے باعث شہری خوف میں مبتلا ہوگئے۔
تفصیلات کےمطابق خیبرپختونخوا کی ملا کنڈ ڈویژن کے ضلع سوات اور گردونواح کے علاقوں میں زلزلے کے جھٹکے محسوس کیے گئے، ریکٹر سکیل پر زلزلے کی شدت 4.6 ریکارڈ کی گئی تھی۔
زلزلے کی زیر زمین گہرائی 191 کلو میٹر تھی، زلزلے کا مرکز کوہ ہندو کش کا پہاڑی سلسلہ تھا۔

اسلام آباد: (ویب ڈیسک) وزیراطلاعات مریم اورنگزیب نے سابق وزیراعظم اور پی ٹی آئی چیئر مین عمران خان کو چپ کر کے بیٹھنے اور 2023ء تک انتظار کرنے کا مشورہ دیدیا۔
دیر بالا میں عمران خان کے جلسے کے بعد رد عمل دیتے ہوئے مریم اورنگزیب نے کہا کہ عمران صاحب شہباز شریف کی کارکردگی سے ڈرتے ہیں، ان کو پتہ ہے شہباز شریف اسی محنت اورتوجہ سے کام کرتے رہے تو مہنگائی کم ہوجائے گی اور شہباز شریف معیشت ٹھیک کر دیں گے۔
انہوں نے کہا کہ عمران صاحب کو پتہ ہے شہباز شریف تمام ممالک سے پاکستان کے بگاڑے تعلقات بھی ٹھیک کر دیں گے، عمران صاحب کو یقین ہے شہبازشریف کو کام کرنے دیا تو پاکستان میں سرمایہ کاری واپس لے آئیں گے، شہباز شریف ان شااللہ نوجوانوں کو روزگار دیں گے، احتساب، ریاست مدینہ ،سازش کے بیانیے دفن ہونے کے بعد عمران صاحب کا نیا بیانیہ ڈیڑھ ماہ کی کارکردگی بن گیا ہے۔
وزیر اطلاعات کا کہنا تھا کہ اپنی نالائقی، نااہلی، کرپشن اور سیاسی منافقت کا چہرہ آئینے میں دیکھیں اور پھر تقریر کیا کریں، چپ کر کے گھر بیٹھیں اور 2023 میں مزید مسترد ہونے کا انتظار کریں۔ شہباز شریف آپ کی تباہ کی ہوئی معیشت سنبھالیں گے اور فتنے کا بھی خاتمہ کریں گے، وزیراعظم آپ کی تباہ کی ہوئی معیشت کو ٹھیک کر رہے ہیں، آپ کی لگائی مہنگائی ،بے روزگاری اور معاشی تباہی کی آگ شہبازشریف بجھا رہے ہیں۔

اسلام آباد: (ویب ڈیسک) سابق وزیر مملکت اور پاکستان تحریک انصاف (پی ٹی آئی) کے رہنما فرخ حبیب نے کہا ہے کہ معاشی صورت حال نے خطرے کی گھنٹی بجا دی۔
پی ٹی آئی رہنما فرخ حبیب نے میڈیا سے گفتگو کرتے ہوئے کہا کہ پیٹرول کی قیمت میں 60 روپے کا اضافہ کر دیا گیا اور معاشی صورت حال نے خطرے کی گھنٹی بجا دی ہے۔
انہوں نے کہا کہ یہ لوگ امریکہ، اسرائیل اور بھارت کا ایجنڈا آگے بڑھا رہے ہیں اور مہنگائی بڑھتی جا رہی ہے، ڈالر کا ریٹ ان سے کنٹرول نہیں ہو رہا۔
فرخ حبیب نے کہا کہ وزیر اعظم کی ترجیح بیرونی دورے کرنا ہے اور حکومت نے قانون کو مذاق بنا دیا ہے۔ ایف آئی اے کو شہباز شریف نے یرغمال بنایا ہوا ہے۔
انہوں نے کہا کہ لوٹوں کے چیف راجہ ریاض کو اپوزیشن لیڈر بنا دیا گیا ہے، 18 فروری کو وزیر اعظم پر فرد جرم عائد ہونا تھی لیکن کوئی عمل درآمد نہیں ہوا۔

لاہور: (ویب ڈیسک) عدالت نے وزیراعظم شہباز شریف، وزیراعلی پنجاب حمزہ شہباز، وزیرداخلہ رانا ثناء اللہ، ڈی آئی جی آپریشن سہیل چودھری، ایس پی وقار عظیم سمیت دیگر کے خلاف اندراج مقدمہ کی سماعت میں اہم پیشرفت سامنے آئی ہے، عدالت نے تھانہ داتا دربار کو قانون کے مطابق کاروائی کرنے کا حکم دے دیا
ایڈیشنل سیشن جج شہباز احد کھگا نے درخواستگزار افضال عظیم ایڈووکیٹ کی درخواست پر سماعت کی۔ درخواست گزار وکلا نے ولائل دیے کہ 25 مئی کو پرامن آزادی مارچ اسلام آباد میں شرکت کیلئے بسوں پر سوار ہوکر داتا دربار کے قریب پہنچے ۔ پولیس نے کنٹینر اور سیمنٹ کے بلاک لگا کر روڈ بلاک کیا ہوا تھا۔ پولیس نے ہماری بسوں پر دھاوا بول دیا۔
درخواست میں استدعا کی گئی کہ بسوں کے شیشے توڑ دئے مرد اور خواتین وکلاء کو بسوں سے اتار سڑکوں پر گھسیٹا گیا۔ اسلحے کے زور پر تشدد کیا گیا ۔موبائل , نقدی اور قیمتی اشیاء چھین لی گئی پرامن وکلاء پر سیدھی فائرنگ کی گئی ۔درجنوں وکلاء کو اغوا کیا گیا۔ 6 سو سے زائد پولیس اہلکاروں کیخلاف مقدمہ درج کرنے کا حکم دیا جائے۔
عدالت نے ایس پی سٹی انویسٹی گیشن کو حکم دیا کہ پٹیشنر کا بیان ریکارڈ کرے۔
عدالت نے متعلقہ پولیس داتا دربار کو قانون کے مطابق کاروائی کرنے کا حکم دے دیا۔