لاہور: (ویب ڈیسک) وزیراعلیٰ چودھری پرویز الٰہی اورسابق وفاقی وزیرمونس الٰہی سے امریکی سفیر ڈونلڈ بلوم نے ملاقات کی، جس میں امریکی سفیر کی طرف سے یقین دہانی کروائی گئی کہ پنجاب حکومت کے تعلیمی اداروں میں منشیات کے خاتمے کے اقدام کو سپورٹ کرینگے۔
وزیراعلیٰ پنجاب چودھری پرویز الٰہی اورسابق وفاقی وزیرمونس الٰہی سے امریکی سفیر ڈونلڈ بلوم کی ایوان وزیراعلی میں ملاقات ہوئی ملاقات میں باہمی دلچسپی کے امور، دو طرفہ تعلقات کے فروغ اور مختلف شعبوں میں تعاون بڑھانے پر تبادلہ خیال کیا گیا۔
امریکہ پنجاب حکومت کے تعلیمی اداروں میں منشیات کے خاتمے کے اقدام کو سپورٹ کرے گا زراعت، متبادل توانائی،بہبود آبادی اورواٹرمینجمنٹ کے شعبوں میں شراکت داری کو مزید فروغ دینے پر اتفاق کیاگیا۔
چودھری پرویز الٰہی نے پنجاب کے عوام کی فلاح وبہبوداور تعلیمی اداروں سے منشیات کے خاتمے کیلئے قانون سازی کے بارے میں آگاہ کیا۔
وزیراعلیٰ پنجاب نے بتایا کہ تعلیمی اداروں کو منشیات سے پاک کرنے کیلئے قانون سازی کا فیصلہ کیا ہے امریکی معاونت منشیات سے پاک پنجاب کے مشن میں ممدومعاون ثابت ہوگی،انسداد منشیات کیلئے خصوصی فورس بنے گی اورمنشیات کی خریدو فروخت کی اطلاع دینے والے کو انعام بھی دیا جائے گا۔ منشیات کی خریدو فروخت میں ملوث ملزمان کے ٹرائل کے لئے خصوصی کورٹس بنیں گی اورروزانہ کی بنیاد پر ٹرائل ہوگا۔
انہوں نے کہا کہ انسداد منشیات کے حوالے سے پنجاب حکومت سے امریکا کے تعاون کا خیرمقدم کرتی ہے، امریکا کے ساتھ تعلقات کو خصوصی اہمیت دیتے ہیں، ہماری حکومت تعلیم، صحت، بہبود آبادی، زراعت، متبادل توانائی اور واٹر مینجمنٹ کے شعبوں میں اصلاحات لارہی ہےاس ضمن میں امریکہ کی تکنیکی معاونت کا خیر مقدم کریں گے۔

اسلام آباد: (ویب ڈیسک) پاکستان علماء کونسل کے چیئرمین حافظ محمد طاہر محمود اشرفی نے کہا ہے کہ آئین میں واضح ہے کہ پاکستان میں کوئی بھی قانون قرآن و سنت کے خلاف نہیں بن سکتا، سیاست کے لئے مذہب کا استعمال جرم ہے، سیلاب زدگان کی امداد پر دوست ممالک کے مشکور ہیں۔
پریس کانفرنس سے خطاب کرتے ہوئے طاہر اشرفی نے کہا کہ پوری امت مسلمہ، وطن عزیز پاکستان میں رہنے والے پاکستانیوں کو ماہ ربیع الاول کی مناسبت سے ایک واضح پیغام ہے کہ رسول اکرمﷺ رحمت اللعالمین ہیں اور ان کا پیغام امن، محبت، رواداری اور مظلوموں، ضعفاء کا خیال رکھنا ہے، پوری قوم اور پوری امت سے گزارش کرتا ہوں کہ ان ایام میں جہاں ہم نے سیرت مصطفیٰﷺ ۖ کا پیغام پہنچانا ہے وہاں اس پر عملدرآمد بھی کرنا ہے۔
انہوں نے کہا کہ رسول اللہ ۖ نے فرمایا کہ مسلمان آپس میں بھائی ہیں اور اسی طرح فرمایا گیا کہ مسلمان ایک جسم کی طرح ہیں، جسم کے کسی بھی حصے میں تکلیف ہو تو پورے جسم میں تکلیف ہوتی ہے۔ اس وقت پاکستان میں ستر فیصد سیلاب زدگان بھائی اور بہنیں مصائب و مسائل کا شکار ہیں، ان کی مدد کے لئے آگے بڑھیں۔
طاہر اشرفی نے مزید کہا کہ سیلاب کے حوالے سے متحدہ عرب امارات، سعودی عرب، یورپی ممالک، برطانیہ، امریکہ، اومان، قطر، کویت، ترکی سے امداد کا سلسلہ جاری ہے، حکومت پاکستان اور عوام کی طرف سے شکریہ ادا کرتا ہوں۔
انہوں نے کہا کہ پاکستان علماء کونسل کے تحت ماہ ربیع الاول میں خطبات جمعہ میں رحمت اللعالمین ۖ کے حوالے سے موضوعات ہوں گے جن میں انسانیت کی بھلائی، اسلام میں خواتین اور اقلیتوں کے حقوق شامل ہیں۔ رسول اللہ ﷺکا فرمان ہے مسلمان وہ ہے جس کی زبان اور ہاتھ سے دوسرا انسان محفوظ رہے، لندن میں وزیر اطلاعات کے ساتھ پیش آنے والے واقعہ کی مذمت کرتے ہیں۔
حافظ طاہر محمود اشرفی نے کہا کہ آئین میں واضح ہے کہ پاکستان میں کوئی بھی قانون قرآن و سنت کے خلاف نہیں بن سکتا، جے یو آئی ٹرانس جینڈر ایکٹ کے حوالے سے ایک جامع بل لا رہی ہے۔ انہوں نے کہا کہ پاکستان کو اس وقت وحدت اور استحکام کی ضرورت ہے۔
انہوں نے سوال کیا کہ حزب اختلاف کے لیڈران میں سے کون کتنی مرتبہ سندھ اور بلوچستان کے لوگوں کے پاس گیا ہے، وہ پاکستان کا حصہ ہیں انہیں اپنے بھائی بہن سمجھیں، ایک طرف ان کا سب کچھ چلا گیا ہے، دوسری طرف آپ ان کے ساتھ چار بول بولنے کو تیار نہیں ہیں۔
انہوں نے کہا کہ ہم اپنے برادر اسلامی ممالک کے مشکور ہیں جنہوں نے اس مشکل وقت میں ہمارا ساتھ دیا۔ سعودی ولی عہد شہزادہ محمد بن سلمان کو وزیراعظم منتخب ہونے پر مبارکباد پیش کرتے ہیں۔ مستقبل میں پاکستان میں بہت بہتریاں آئیں گی، رابطہ عالم اسلامی کے سیکرٹری جنرل بھی پاکستان آ رہے ہیں، نومبر میں پاکستان میں بہت سی اہم اور بڑی شخصیات آئیں گی۔ ہمیں صرف ملک کے اندر استحکام اور امن و امان کی صورتحال کو بہتر بنانا ہے، پاکستان آئین، قانون اور دستور کے تحت چلتا ہے، اور انشاء اللہ اسی آئین اور دستور قانون کے چلتا رہے گا۔
طاہر محمود اشرفی نے کہا کہ ٹرانس جینڈر ایکٹ کے حوالے سے وفاقی وزیر قانون نے کہا ہے کہ وہ کمیٹی بنائیں گے، اس کمیٹی میں ہم یہ گزارش کریں گے اسلامی نظریاتی کونسل اور ملک کی دیگر شخصیات، علماء و مشائخ کو بھی اس میں شامل کیا جائے اور اس قانون میں موجود سقم کو دور کرنے کے لئے توجہ مبذول کرانے پر جمعیت علمائے اسلام اور سینیٹر مشتاق احمد کا مشکور ہوں۔

اسلام آباد: (ویب ڈیسک) جمعیت علمائے اسلام ف (جے یو آئی )ف کے سربراہ مولانا فضل الرحمان نے کہا ہے کہ پی ٹی آئی نے انتقام کی سیاست کے ذریعے قومی وحدت کو پارہ پارہ کردیا۔
موجودہ سیاسی صورتحال سے متعلق اپنے بیان میں انہوں نے کہا کہ جلد ہی پی ڈی ایم کا اجلاس بلا کر پالیسی امور کو اپ ڈیٹ کریں گے، قوم کو داخلی تقسیم سے نکال کرملی وحدت کی طرف لے جانے کی کوشش کر رہے ہیں۔
ان کا کہنا تھا کہ کسی بھی ملک میں سیاسی استحکام ہی معاشی ارتقا کا زینہ ہوتا ہے۔
انہوں نے کہا کہ آئین 22 کروڑعوام کی اجتماعی سوچ کا مظہر ہےاور قومی میثاق کا درجہ رکھتا ہے، عمران خان نے دانستہ پارلیمنٹ کو کمزور،عدلیہ اور الیکشن کمیشن کومتنازعہ بنایا ہے۔

لاہور: (ویب ڈیسک) لاہور ہائی کورٹ نے سابق چیئرمین نیب پر ہراسانی کے الزامات کے انکوائری کمیشن میں سابق ڈی جی نیب لاہور شہزاد سلیم کی طلبی کا نوٹس معطل کر دیا۔
چیف جسٹس لاہور ہائی کورٹ جسٹس امیر بھٹی نے شہزاد سلیم کی درخواست پر سماعت کی، عدالت نےکمیشن میں سابق ڈی جی نیب لاہور شہزاد سلیم کی طلبی کا نوٹس معطل کرتے ہوئے آئندہ سماعت پر سرکاری وکیل سے جواب طلب کرلیا۔
خیال رہےکہ سابق ڈی جی نیب شہزاد سلیم نے طیبہ گل نامی خاتون کے سابق چیئرمین نیب پر ہراساں کرنے کے الزامات کی انکوائری کرنے والےکمیشن میں طلبی کے نوٹس کو چیلنج کیا تھا۔
طیبہ گل کے معاملےکی انکوائری کرنے والے کمیشن نے شہزاد سلیم کو ریکارڈ سمیت 28 ستمبر کو طلب کیا تھا۔
درخواست گزار شہزاد سلیم کے وکیل نے عدالت کو بتایا کہ اسی سے متعلقہ 3 درخواستوں پر عدالت پہلے ہی حکم امتناعی دے چکی ہے۔