اسلام آباد: (ویب ڈیسک) پارلیمنٹ کے مشترکہ اجلاس کا شیڈول ایک مرتبہ پھر تبدیل کر دیا گیا۔
یاد رہے کہ حکومت کی طرف پارلیمنٹ کا مشترکہ اجلاس 22 اگست 2022ء کو سہ پہر 4 بجے کے بجائے 22 ستمبر 2022ء کو سہ پہر 4 بجے پارلیمنٹ ہاؤس میں منعقد کرنے کا کہا گیا تھا، سپیکر قومی اسمبلی راجہ پرویز اشرف نے مشترکہ اجلاس کے شیڈول میں تبدیلی پارلیمنٹ کے جوائنٹ سیٹنگز رولز 1973کے قاعدہ 4کے تحت تفویض شدہ اختیارات کو بروئے لاتے ہوئے کی تھی۔
دوسری طرف ایک مرتبہ پھر پارلیمنٹ کے مشترکہ اجلاس کا شیڈول تبدیل کر دیا گیا ہے، اب پارلیمنٹ کا مشترکہ اجلاس 22 ستمبر کے بجائے آئندہ ماہ کی 20 اکتوبر کو ہو گا۔ اجلاس کے شیڈول میں تبدیلی کا نوٹیفکیشن جاری کر دیا گیا۔

سمر قند: (ویب ڈیسک) وزیر اعظم شہباز شریف نے امام بخاری رحمۃ اللہ علیہ کے مزار پر حاضری دی اور فاتحہ خوانی کی۔
وزیر اعظم شہباز شریف شنگھائی تعاون تنظیم کے سربراہی اجلاس میں شرکت کے لیے سمرقند میں موجود ہیں۔مزار پر حاضری کے موقع پر وزیر خارجہ بلاول بھٹو زرداری، وزیر دفاع خواجہ آصف اور پاکستانی وفد کے دیگر اراکین بھی وزیر اعظم کے ہمراہ تھے۔

کوئٹہ: (ویب ڈیسک) بلوچستان کے صوبائی دارالحکومت کوئٹہ کے علاقے سبزل روڈ پر دھماکا ہوا جس کی زد میں آ کر ایک شخص جاں بحق ہو گیا اور 13 افراد شدید زخمی ہوئے ہیں۔
تفصیلات کے مطابق کوئٹہ میں دھماکہ سبزل روڈ پر پود گلی چوک کے قریب ہوا، پولیس کے مطابق دھماکے کے اطلاع ملتے ہی سیکیورٹی فورسز اور ریسکیو ٹیمیں موقع پر پہنچ گئیں اور علاقے کو گھیرے میں لیکر زخمیوں کو سول ہسپتال منتقل کیا گیا۔
ہسپتال انتظامیہ کے مطابق ایک لاش اور 13 زخمیوں کو سول ہسپتال لایا گیا ، زخمیوں میں ایک خاتون بھی شامل ہے، زخمیوں کو سول ہسپتال کے ٹراما سینٹر میں طبی امداد فراہم کی جا رہی ہے۔
دھماکے کی زد میں ایک رکشہ آیا جسے نقصان پہنچا، بم ڈسپوزل سکوارڈ دھماکے کے بعد موقع پر پہنچ گئی جہاں سے شواہد اکٹھے کیے جا رہے ہیں۔

پشاور: (ویب ڈیسک) صوبہ خیبرپختونخوا کے وزیر خزانہ تیمور سلیم جھگڑا نے کہا ہے کہ ہمارے صوبے میں تنخواہوں کا بل 6 ارب روپے ہے لیکن تنخواہوں کیلئے ہمیں ساڑھے 4 ارب روپے مل رہے ہیں، وفاق خیبرپختونخوا کی 60 ارب کی سبسڈی کھا گیا ہے، آخری 2 سال میں عمران خان نے خیبرپختونخوا میں 68 ارب روپے ٹرانسفر کئے۔
پی ٹی آئی سے تعلق رکھنے والے صوبائی وزیر خزانہ نے سابق وزیر دفاع پرویز خٹک اور سابق اسپیکر قومی اسمبلی اسد قیصر کے ہمراہ منعقدہ مشترکہ پریس کانفرنس سے خطاب کرتے ہوئے کہا کہ ان مسائل کا حل صرف الیکشن میں ہے لیکن عمران خان کے خوف سے یہ الیکشن نہیں کروا رہے ہیں، الیکشن نہ کروانے کی قیمت عوام ادا کر رہی ہے، پاکستان کی معیشت مکمل تباہ ہو گئی ہے۔
انہوں ںے کہا کہ پیناڈول کی فیکٹری اور قیمت کو تو حکومت سنبھال نہیں پا رہی ہے، آئی ایم ایف ڈیل کو بھی متنازع بنایا جا رہا تھا لیکن آئی ایم ایف کی ڈیل تو کامیابی سے پوری ہو گئی۔
خیبرپختونخوا کے وزیر خزانہ تیمور سلیم جھگڑا نے کہا کہ ایف بی آر کی ٹیکس کولیکشن ہمیں دیدیں کیونکہ وفاق نے صرف 8 فیصد ٹیکس اکھٹا کیا ہے، گزشتہ سال 30 فیصد ٹیکس اکھٹا کیا گیا تھا جب کہ خیبرپختونخوا کی ٹیکس کولیکشن 42 فیصد ہے۔
تیمور سلیم جھگڑا نے کہا کہ کل عمران خان نے معیشت پر بات کی، خیبرپختونخوا اور تمام چھوٹے صوبوں کی معیشت پر اثر پڑ رہا ہے، تاریخی سیلاب میں حکومت کی نا اہلی پوری دنیا کے سامنے ہے، پاکستان کو اس وقت چیلنجز کا سامنا ہے لیکن حکومت عمران خان پر غیر قانونی مقدمات بنانے میں لگی ہوئی ہے۔
مشترکہ پریس کانفرنس سے خطاب کرتے ہوئے وزیر خزانہ تیمور سلیم جھگڑا نے کہا کہ وفاقی حکومت اپنے اقدامات کو اون نہیں کر رہی ہے جب کہ مفتاح اسماعیل اپنے بجٹ کو اون نہیں کر رہا ہے۔ انہوں نے کہا کہ حکومت والے ماضی میں مہنگائی مارچ پر نکلے تھے، آج ملک میں تاریخ کی بد ترین مہنگائی ہے، آئی ایم ایف کی ڈیل کے بعد ڈالر 211 سے 236 پر پہنچ گیا ہے، پیٹرول، ڈیزل اور اشیائے خورد ونوش کی قیمتیں آسمان کو چھو رہی ہیں، معاشی مسائل کا حل عوامی مینڈیٹ میں ہے۔

کراچی: (ویب ڈیسک) پاک بحریہ کے سربراہ ایڈمرل محمد امجد خان نیازی نے پاک بحریہ کی امدادی کارروائیوں کا جائزہ لینے کے لیے سجاول اور ملحقہ علاقوں کا دورہ کیا۔
پاک بحریہ کی جانب سے جاری اعلامیہ کے مطابق نیول چیف کو جاری ریسکیو اور ریلیف آپریشنز کے حوالے سے جامع بریفنگ دی گئی۔
بریفنگ کے دوران چیف آف دی نیول اسٹاف کو سیلاب زدہ علاقوں کی صورتحال کے ساتھ ساتھ پاک بحریہ کی جانب سے جاری امدادی اور بحالی کے آپریشنز کا تفصیلی جائزہ پیش کیا گیا۔
نیول چیف نے مون سون میں موسلادھار بارشوں سے ہونے والے جانی اور مالی نقصان کا ذکر تے ہوئے مسلسل کوششوں اور تعاون سے قدرتی آفات جیسے چیلنجز پر قابو پانے کے عزم پر زور دیا انھوں نے سیلاب میں تعینات جوانوں کے ساتھ ملاقات کی اور سیلاب متاثرین کی بروقت امداد کو یقینی بنانے پر ان کی پیشہ ورانہ مہارت اور لگن کو سراہا۔
پاک بحریہ کے سربراہ نے سول انتظامیہ اور مختلف مخیر حضرات اور تنظیموں کی جانب سے اپنے غمزدہ بھائیوں کی مسلسل مدد کو بھی سراہا۔پاک بحریہ مصیبت زدہ ہم وطنوں کی بحالی تک ریسکیو اور ریلیف آپریشن جاری رکھنے کے لیے پرعزم ہے۔