ملتان: (ڈیلی خبریں) ملتان میں ضلعی انتظامیہ کی عدم دلچسپی کے باعث جنرل بس سٹینڈ کے خراب سی سی ٹی وی کیمرے تبدیل نہیں ہو سکے جس کی وجہ سے چوری اور ڈکیتی کی وارداتیں بڑھنے پر مسافروں کی اکثریت پریشان ہے۔

ملتان میں جنرل بس سٹینڈ کے تمام سی سی ٹی وی کیمرے گزشتہ چھے ماہ سے خراب پڑے ہیں جس کی وجہ سے رواں ماہ اب تک چوری اور ڈکیتی کی 13 وارداتیں ہو چکی ہیں جس سے مسافروں کی اکثریت عدم تحفظ کا شکار ہوچکی ہے جس پر مسافروں نے حکومت سے بس سٹینڈ کی صو رتحال کا نوٹس لے کر سی سی ٹی وی کیمرے فوری تبدیل کرانے کا مطالبہ ہے۔

میٹرو پولیٹن کارپوریشن نے نئے کیمروں کا تخمینہ دو کروڑ روپے لگایا لیکن ضلعی انتظامیہ کی عدم دلچسپی کے باعث کیمروں کا مسئلہ حل نہیں ہو سکا جس کے حوالے سے ڈپٹی کمشنر کاموقف ہے کہ نئےسی سی ٹی وی کیمروں کی تنصیب ترجیح ہے جس کیلئے اقدامات کر رہے ہیں۔

جنرل بس سٹینڈ کی چھتیں مختلف جگہوں سے ٹوٹ پھوٹ کا شکار ہو چکی ہیں اور سہولیات کا بھی فقدان ہے جبکہ رہی سہی کسر گندگی کے ڈھیر نے پوری کر دی ہے۔

لاہور: (ڈیلی خبریں) وزیراعلی پنجاب سردار عثمان بزدار نے گورنر پنجاب چوہدری سرور سے ملاقات کی جس کے دوران صوبے میں عوامی ترقی و خوشحالی کے لیے اقدامات کو مزید تیز کرنے پر اتفاق کیا گیا۔
وزیراعلی پنجاب سردار عثمان بزدار آج گورنر ہاوس پہنچے، ملاقات کے دوران گورنر پنجاب نے صوبے میں انصاف کارڈ کی فراہمی پر وزیر اعلی پنجاب کی کاوشوں کو سراہا، ملکی معاشی ترقی میں اپوزیشن کی رکاوٹوں کو غیر جمہوری اور غیر اخلاقی قرار دے دیا۔ حکومت اور وزیر اعظم عمران خان کہیں نہیں جا رہے، گورنر و وزیراعلی نے اپوزیشن پر واضح کر دیا۔
چودھری سرور کا کہنا تھا کہ سیاسی مخالفین ہر معاملے پر پواٸنٹ سکورنگ نہ کریں، مارچ 2022 اور مارچ 2023 بھی گزر جاٸے گا مگر حکومت قائم رہے گی۔ اپوزیشن کو بھی سب سے پہلے ملکی و عوامی مفادات کو ترجیح دینی چاہیے، صحت انصاف کارڈ سمیت ہر منصوبے کا مقصد عوام کو ریلیف دینا ہے۔

اسلام آباد: (ڈیلی خبریں) وفاقی دارالحکومت میں جرائم کی روک تھام کیلئے پرائیویٹ شاپنگ مالز اور ہاؤسنگ سوسائٹیز کے کیمروں کو بھی سیف سٹی پراجیکٹ میں شامل کرلیا گیا۔ پولیس کنٹرول روم بھی سیف سٹی کی عمارت میں منتقل کر دیا گیا۔ وفاقی دارالحکومت کا سیف سٹی منصوبہ، پرائیویٹ شاپنگ مالز اور ہاوسنگ سوسائٹیوں کے کیمرے بھی سیف سٹی پراجیکٹ میں شامل ہو گئے جس کے بعد کیمروں کی تعداد 1995 ہو گئی۔ آئی جی اسلام آباد کی ہدایت پر پولیس کنٹرول روم بھی سیف سٹی کی عمارت میں منتقل کر دیا گیا ہے تاکہ کو آرڈی نیشن کو بہتر بنایا جا سکے۔ سیف سٹی کے اندر سوشل میڈیا اور ٹی وی مانیٹرنگ ڈیسک بھی قائم کر دیا گیا ہے۔ پولیس حکام کا کہنا ہے کہ اقدام سے جرم کی تحقیقات کیساتھ روک تھام میں بھی مدد ملے گی۔ حکام کا دعویٰ ہے کہ نئے نظام کے تحت پولیس کے رسپانس ٹائم میں بھی واضع کمی ہوئی ہے اور اب یہ 2 منٹ ہو چکا ہے۔

پشاور: (ڈیلی خبریں) خیبرپختونخوا میں رواں مالی سال کے بجٹ میں سو فیصد ترقیاتی فنڈز جاری کرنے کے باوجود نصف سال میں ترقیاتی بجٹ کا صرف چوتھائی حصہ ہی خرچ ہوسکا، صوبے میں متعدد محکمے ایک پائی بھی خرچ نہ کرسکے۔ خیبرپختونخوا میں جاری مالی سال 2021-22 کے نصف سال کے دوران 371 ارب روپے کے سالانہ ترقیاتی پروگرام میں سے صرف 89 ارب 23 کروڑ سے زائد روپے خرچ ہوسکے۔ محکمہ خزانہ کی دستاویزکے مطابق حکومت کی جانب سے بندوبستی اضلاع کے 270 ارب میں سے 162 ارب 82 کروڑ روپےجاری ہوئے جس میں سے صرف 70 ارب 23 کروڑ روپے خرچ ہوئے، ضم اضلاع کے لیے مختص 100 ارب 41 کروڑ میں سے 45 ارب سے زائد جاری ہوئے جبکہ صرف 19 ارب روپے ہی خرچ کیے جاسکے۔ ضم شدہ اضلاع میں قومی مالیاتی ایوارڈ کے تین فیصد کے مطابق ملنے والی 34 ارب 65 کروڑ کی رقم میں سے کچھ بھی خرچ نہیں کیا جاسکا، ضلعی اے ڈی پی، ماحولیات، ایکسائز اینڈ ٹیکسیشن اور دیگر محکمے ایک پائی بھی خرچ نہ کرسکے۔