All posts by Khabrain News

اہم خبریں, پاکستان

بہو کا قتل: صحافی ایاز امیر اور اہلیہ کے وارنٹ گرفتاری جاری، بیٹے کا جسمانی ریمانڈ منظور

اسلام آباد: (ویب ڈیسک) بہو کے قتل کے کیس میں صحافی ایاز امیر اور اہلیہ کے وارنٹ گرفتاری جاری کردیے گئے۔ بیٹے کو جسمانی ریمانڈ پر پولیس کے حوالے کر دیاگیا۔
سینئر صحافی ایاز امیر کی بہو کے قتل کے کیس کی سماعت ڈسٹرکٹ اینڈ سیشن عدالت اسلام آباد میں ہوئی ۔صحافی ایاز امیر کے بیٹے ملزم شاہنواز امیر کو جوڈیشل مجسٹریٹ مبشر حسن چشتی کی عدالت میں پیش کیا گیا۔
پولیس نے ملزم کے جسمانی ریمانڈ کی استدعا کی۔ پولیس نے عدالت کو بتایا کہ ملزم نامزد ہے برآمدگی کرنی ہے ۔ملزم نے کینڈین نثراد پاکستانی اہلیہ کو بیرون ملک سے بلا کر قتل کیا ہے۔
جس پر جج نے ملزم سے سوال کیا کہ آپ کچھ بولنا چاہتے ہیں؟آپکو علم ہے آپ پردفعہ 302 لگی۔
ملزم شاہنواز کے وکیل نے کہا یہ اندھا قتل ہے، پہلا ریمانڈ ہے، کوئی اعتراض نہیں۔یہ قتل صرف الزام کی حد تک ہے۔
عدالت نے ایاز امیر کے بیٹے شاہنواز کے جسمانی ریمانڈ کی استدعا پر فیصلہ محفوظ کر لیا۔ جسے بعد میں سناتے ہوئے ملزم شاہنواز امیر کو دو روزہ جسمانی ریمانڈ پر پولیس کے حوالے کر دیا گیا۔
پولیس نے مرکزی ملزم کے والدین کے وارنٹ گرفتاری کی درخواست دائر کرتے ہوئے کہا کہ ایاز امیر،انکی اہلیہ ملزم کے چچا اور چچی کے وارنٹ گرفتاری جاری کیے جائیں۔
عدالت کی جانب سے ایاز امیر اور انکی اہلیہ کے وارنٹ گرفتاری کی درخواست منظور کر لی گئی۔
واضح رہے کہ صحافی ایاز امیر کے بیٹے شاہنواز امیر نے گزشتہ روز اپنی اہلیہ سارہ کو قتل کردیا تھا۔

اہم خبریں, کھیل

ٹینس کی دنیا کا بادشاہ راجر فیڈرر ریٹائر

لاہور: (ویب ڈیسک) ٹینس کے عالمی میدانوں پر دو دہائیوں سے زیادہ عرصے تک راج کرنے والےکھلاڑی راجر فیڈرر نے ٹینس کو الودع کہہ دیا۔
راجر فیڈرر لیور کپ میں آخری بار اپنے لیجنڈری حریف رافیل نڈال کے ڈبلز کے ساتھی کے طور پر کھیلے، جہاں ان کے آخری میچ میں انہیں جان سوک اور فرانسس ٹیافو نے شکست دی۔
میچ کے اختتام پر فیڈرر اپنے جذبات پر قابو نہ پا سکے، اس دوران ان کے ساتھ رافیل نڈال بھی اپنے آنسووں کو روک نہ سکے۔ دونوں عظیم کھلاڑیوں کو ایک دوسرے کا ہاتھ تھامے اور جزباتی ہوتے دیکھ سوشل میڈیا صارفین نے بے حد پسند کیا۔ جس میں بھارتی کپتان ویرات کوہلی بھی شامل ہیں، انہوں نے دونوں کی تصویر شئیر کرتے ہوئے لکھا کہ یہ میری زندگی کی بہترین تصویر ہے۔
سوئس ٹینس لیجنڈ کی طرف سے پندرہ ستمبر کو ریٹائرمنٹ کے اعلان کیا گیا تھا، 41 سالہ راجر فیڈرر نے اب تک 20 گرینڈ سلیم ٹائٹل جیتے ہیں اور کئی ماہرین انہیں ٹینس کا آج تک کا بہترین کھلاڑی سمجھتے ہیں۔
گزشتہ ہفتے اپنے انسٹاگرام اکاونٹ پر راجر فیڈرر نے لکھا تھا کہ میں نے 24 سال کے دوران 1500 سے زائد میچ کھیلے ہیں۔،ٹینس نے میرے ساتھ اس سے بھی زیادہ فراخ دلانہ سلوک کیا ہے جتنا میں نے کبھی خواب میں بھی نہیں سوچا تھا۔ لیکن اب مجھے یہ تسلیم کرنا ہوگا کہ میرے کیریئر کے خاتمے کا وقت آ گیا ہے۔ اگلے ہفتے لندن میں لیور کپ میرا آخری اے ٹی پی ایونٹ ہوگا۔

اہم خبریں, شوبز

فواد خان کو کرسچیئن بیل کی نقل کرنا مہنگا پڑ گیا

کراچی:(ویب ڈیسک) پاکستان کے سپر اسٹار فواد خان نے انکشاف کیا ہے کہ انہوں نے ہالی ووڈ اداکار کرسچیئن بیل جیسی باڈی بنانے کی کوشش کی جس وجہ سے انہیں کئی دن اسپتال میں گزارنے پڑے۔ حال ہی میں ایک انٹرویو کے دوران اداکار فواد خان نے کہا ہے کہ فلمی کردار کی مناسبت سے جسم بنانے کی کوشش ان کو بہت مہنگی پڑ گئی تھی۔ انہوں نے بتایا کہ کسی دور میں ان پر کرسچیئن بیل اور عامر خان جیسی باڈی بنانے کا بھوت سوار ہوا تھا تاہم وہ کوشش کے باوجود ان جیسی جسامت حاصل نہ کر سکے۔ فواد خان کا یہ بھی کہنا تھا کہ ’وہ اچھا نہیں تھا، جو میں نے اپنے ساتھ کیا کیونکہ اس نے مجھ پر منفی اثر ڈالا اور آئندہ کبھی ایسا نہیں کروں گا انہوں نے کہا کہ ایسا کرنے والے لوگوں کو معلوم ہونا چاہیے کہ اس سے ان کی صحت کو نقصان بھی ہو سکتا ہے۔ انہوں نے انکشاف کیا کہ ’انہیں 10 روز کیلئے اسپتال میں رہنا پڑ گیا تھا‘۔ انہوں نے بتایا کہ’انہیں مکمل طور پر صحت یاب ہونے میں انہیں تین ماہ کا عرصہ لگا تھا جس کے بعد سے وہ ذیابیطس کے مرض میں مبتلا ہیں جس نے ان کی صحت پر بہت برا اثر ڈالا ہے‘۔ انہوں نے بتایا کہ’ فلم کے لیے وزن بڑھانے سے قبل ان کا وزن 73 سے 75 کلوگرام تھا تاہم کردار کے لیے اس کو 100 کلوگرام تک بڑھانا تھا جو کہ ان کی سب سے بڑی غلطی تھی‘۔ انہوں نے اپنے اقدام کو غلطی قرار دیتے ہوئے کہا کہ ’میں اس پر گھنٹوں صرف کرتا رہا کیونکہ میرے پاس وقت کم تھا تاہم یہ درست طریقہ نہیں تھا۔ میں کرسچیئن بیل نہیں ہوں مگر وہی کرنے کی کوشش کی جو وہ کرتے ہیں جبکہ عامر خان کی طرح بننے کی کوشش بھی کی‘۔ فواد خان نے باڈی ٹرانسفارمیشن کے خواہش مند افراد کو مخاطب کرتے ہوئے کہا کہ ’جسم میں اس قسم کی تبدیلیاں راتوں رات نہیں آتیں، میں جسم میں ایسی تبدیلیوں کے لیے کبھی کسی حوصلہ افزائی نہیں کروں گا‘۔ یاد رہے کہ فواد خان ان دنوں اپنی سب سے بڑی ’دی لیجنڈ آف دی مولا جٹ ‘کی پروموشن میں مصروف ہیں جوکہ 13 اکتوبر کو سنیما گھروں کی زینت بنے گی۔

اہم خبریں, پاکستان

فورٹ عباس؛ یونیورسٹی کا طالب علم مبینہ طور پر اغوا

لاہور:(ویب ڈیسک) غلام رسول ٹاؤن میں یونیورسٹی بی فارمیسی کا طالب علم مبینہ طور پر اغوا کرلیا گیا۔ 21 سالہ حمزہ خلیل مغرب کی نماز پڑھنے گیا اور واپس نہیں آیا۔ والدین کی جانب سے بیٹے کے اغوا کا شبہہ ظاہر کیا گیا ہے، جس کی اطلاع پولیس کو کردی گئی ہے۔ پولیس کے مطابق 21 سالہ حمزہ خلیل کے والدین کی جانب سے رپورٹ درج کروانے کے بعد طالب علم کی تلاش شروع کردی گئی ہے۔ پولیس نے والد کی درخواست پر نا معلوم افراد کے خلاف مقدمہ درج کر لیا۔

اہم خبریں, پاکستان

بلوچستان؛ 24 گھنٹوں کے دوران سیلاب سے مزید 13 افراد جاں بحق

کوئٹہ:(ویب ڈیسک) بلوچستان میں 24 گھنٹوں کے دوران سیلاب کے نتیجے میں ہونے والے حادثات میں مزید 13 افراد کے جاں بحق ہونے کی تصدیق ہوگئی ہے۔ پی ڈی ایم اے کے مطابق جاں بحق ہونے والوں میں 146 مرد، 80خواتین اور 97 بچے شامل ہیں۔ سب سے زیادہ40 ہلاکتیں کوئٹہ جب کہ کچھی سے 24 اور ژوب سے 23اموات رپورٹ ہوئیں۔ صوبے میں بارشوں کے دوران مختلف حادثات میں زخمی ہونے والے افراد کی تعداد 186 ہے ۔

اہم خبریں, پاکستان

اسحاق ڈار کے دائمی وارنٹس معطل ہونے کا تحریری فیصلہ جاری

لاہور: (ویب ڈیسک) احتساب عدالت نے اسحاق ڈار کے دائمی وارنٹس معطل ہونے کا تحریری فیصلہ جاری کردیا۔ فیصلے میں کہا گیا ہے کہ اسحاق ڈار کو موقع دیا جاتا ہے 7 اکتوبر کو ٹرائل کا سامنا کرنے پیش ہوں، سات اکتوبر تک اسحاق ڈار کے وارنٹس پر عملدرآمد معطل رہے گا۔
فیصلے میں کہا گیا ہے کہ فیئر ٹرائل اور قانونی پراسیس کا بنیادی حق ہر شہری کو حاصل ہے۔ اسحاق ڈار کے وارنٹس ان کی عدالت حاضری یقینی بنانے کیلئے ہی تھے، اسحاق ڈار کے وکیل نے بتایا وہ متعدد بیماریوں میں مبتلا ہیں، بتایا گیا کہ اسحاق ڈار کو ڈاکٹر نے ابھی بھی کہا اپنے رسک پر سفر کریں۔
یاد رہے گزشتہ روز احتساب عدالت اسلام آباد نے اسحاق ڈار کے 7 اکتوبر تک وارنٹ معطل کر دئیے تھے۔ جج محمد بشیر نے ریمارکس میں کہا تھا کہ اسحاق ڈار کو پاکستان آنے پر گرفتار نہ کیا جائے۔ اسحاق ڈار پاکستان واپس آ جائیں پھر وارنٹ منسوخی کو دیکھیں گے۔

انٹر نیشنل, اہم خبریں

ملکہ برطانیہ الزبتھ دوم کی قبر کی پہلی تصویرسامنے آگئی

برطانیہ : (ویب ڈیسک) آنجہانی ملکہ برطانیہ الزبتھ دوم کی آخری آرام گاہ کی پہلی تصویر منظر عام پر آگئی۔
ملکہ الزبتھ کی قبر پر سیاہ رنگ کا کتبہ نصب کیا گیا ہے۔ اس کتبے پر ملکہ الزبتھ دوم اور ان کے آنجہانی شوہرشہزادہ فلپ کا نام، تاریخ پیدائش اور تاریخ وفات درج ہے۔
سیاہ پتھر کے صلیب پر لکھی گئی سنہری حروف کی تحریر میں ملکہ الزبتھ دوم، کے والد بادشاہ جارج ششم اور ان کی والدہ کے نام بھی تاریخ پیدائش اور وفات کے ساتھ کندہ ہیں۔ ملکہ الزبتھ کی قبر کے قریب پھول رکھے گئے ہیں۔
7 دہائیوں تک برطانیہ پر حکمرانی کرنے والی ملکہ الزبتھ دوم رواں ماہ انتقال کر گئیں تھیں ۔ ان کی آخری رسومات کے بعد انہیں 19 ستمبر کو کنگ جارج ششم میموریل چیپل میں دفن کیا گیا تھا۔

انٹر نیشنل, اہم خبریں

مودی سرکار میں ہندو انتہا پسندوں کا راج، نماز پڑھنے پرخاتون کیخلاف مقدمہ درج

نئی دہلی:(ویب ڈیسک) بھارت میں ہندوانتہاپسندوں کی جانب سے مسلمانوں کونشانہ بنانے کا ایک اور واقعہ سامنے آگیا۔ نماز پڑھنے پر خاتون کیخلاف مقدمہ درج کرلیا گیا۔
بھارت کی ریاست اترپردیش میں نماز پڑھنے والی خاتون کے خلاف مقدمہ درج کرلیا گیا۔ خاتون مقامی اسپتال میں داخل اپنے عزیز کی عیادت کے لئے آئی تھیں۔ نماز کا وقت ہونے پر خاتون نے ایک خالی کمرے میں نماز ادا کی جس کی ویڈیو سوشل میڈیا پر وائرل ہوگئی۔
پولیس نے اسپتال میں نماز پڑھنے پر خاتون کے خلاف مقدمہ درج کرلیا۔
واضح رہے کہ گزشتہ روز مدھیہ پردیش میں مسلمان ماں اور بیٹے کو ہندوانتہاپسند عورتوں اور مردوں نے بدترین تشدد کا نشانہ بنایا تھا ان پرتشدد کرنے والے مجمع کے خلاف کوئی کارووائی نہیں کی گئی۔

اہم خبریں, پاکستان

مریم نواز کی پاسپورٹ واپس لینے کی درخواست سماعت کے لیے مقرر

لاہور: (ویب ڈیسک) لاہور ہائیکورٹ نے مریم نواز کی پاسپورٹ واپس لینے کی درخواست سماعت کے لیے مقرر کر دی۔
مریم نواز کیلئے عدالت سے اچھی خبر،لاہور ہائیکورٹ نے مریم نواز کی پاسپورٹ واپس لینے کی درخواست سماعت کے لیے مقرر کر دی، رجسٹرار آفس نے کازلسٹ جاری کردی، ہائیکورٹ کا تین رکنی بنچ 27 ستمبر کو درخواست پر سماعت کرے گا۔
چیف جسٹس لاہور ہائیکورٹ کی سربراہی پر مشتمل تین رکنی بنچ سماعت کرے گا، مریم نواز نے عدالتی تحویل سے پاسپورٹ واپس لینے کے لیے رجوع کررکھا ہے۔

اہم خبریں, پاکستان

پی ٹی آئی کی تعزیرات پاکستان میں بغاوت کی دفعہ 124اے کے خلاف درخواست مسترد

اسلام آباد: (ویب ڈیسک) ہائی کورٹ نے پاکستان تحریک انصاف کی جانب سے تعزیرات پاکستان میں بغاوت کی دفعہ 124 اے کالعدم قرار دینے کی درخواست مسترد کرتے ہوئے خارج کردی۔
اسلام آباد ہائی کورٹ کے چیف جسٹس اطہر من اللہ نے درخواست ناقابل سماعت قرار دے کر خارج کر دی، درخواست میں مؤقف اختیار کیا گیا تھا کہ بغاوت کی دفعہ آئین پاکستان میں دیے گئے بنیادی حقوق سے متصادم ہے، پی ٹی آئی رہنما شیریں مزاری نے درخواست میں تعزیرات پاکستان کی دفعہ 124 اے کالعدم قرار دینے کی استدعا کی تھی۔
درخواست میں مزید کہا گیا تھا کہ بغاوت کی دفعہ 124A اظہار رائےکی آزادی سلب کرنے کے لیے استعمال کی جارہی ہے۔ تنقید اور اظہار رائے کو دبانے کے لیے بغاوت کے مقدمات کا سہارا لیا جاتا ہے۔
گزشتہ روز ہونے والی سماعت کے دوران شیریں مزاری کے وکیل ابوذرسلمان خان نیازی نے عدالت میں دفعہ 124 اے کو کالعدم قرار دینے کے لیے دلائل دیے، دوران سماعت چیف جسٹس نے ریمارکس دیے کہ پی ٹی آئی حکومت میں بھی بغاوت کے الزامات کے مقدمات درج ہوتے رہے۔ عدالت نے شیریں مزاری کو ہدایت دی کہ قانون سازی پارلیمنٹ کا اختیار ہے، آپ کو پارلیمنٹ جانا چاہیے۔ عدالت قانون سازی میں مداخلت نہیں کرے گی۔
چیف جسٹس اطہر من اللہ کا گزشتہ روز سماعت میں کہنا تھا کہ سب کو پارلیمان پر اعتماد کرنا چاہیے۔ اسلام آبادہائیکورٹ بغاوت کے مقدمات غیر قانونی قرار دے چکی ہے۔ بعد ازاں عدالت نے بغاوت کی دفعہ 124 اے کالعدم قرار دینے کی درخواست پر فیصلہ محفوظ کرلیا تھا، جسے آج جاری کیا گیا ہے۔