کوئٹہ: (ویب ڈیسک) وفاقی وزیر ریلوے خواجہ سعد رفیق نے کہا ہے کہ سیلابی پانی ختم ہوتے ہی ریلوے ٹریک بحال کر دیں گے۔
وفاقی وزیر ریلوے خواجہ سعد رفیق کی زیرصدارت کوئٹہ میں اجلاس ہوا جس میں ڈی ایس ریلوے نے وفاقی وزیر کو سیلابی صورتحال پر بریفنگ دی۔
اس موقع پر وفاقی وزیر ریلوے خواجہ سعد رفیق نے کہا کہ کوئٹہ ریلوے اسٹیشن ٹریک کا جائزہ لیا، سیلاب کے باعث ریلوے ٹریک متاثر ہوئے ہیں اور پانی میں ڈوبے ہوئے ہیں تاہم ریلوے ٹریک کو بحال کرنے کے لیے عملہ مصروف عمل ہے لیکن کئی علاقوں میں اب بھی پانی کھڑا ہے۔
انہوں نے کہا کہ کوئٹہ تفتان ٹریک 104 مقامات سے متاثر ہوا جسے 30 ستمبر تک بحال کر دیں گے اور بولان میں بہہ جانے والے پل کو کچھ وقت درکار ہے۔ ڈیرہ اللہ یار سے جیکب آباد تک 11 کلو میٹر ٹریک پانی کے نیچے ہے اور پانی نیچے جاتے ہی نقصانات کا تخمینہ لگا کر مرمت کا کام شروع کریں گے۔
خواجہ سعد رفیق نے کہا کہ سبی ہرنائی ریلوے ٹریک پر 4 سال گزرنے کے بعد بھی کوئی پیش رفت نہ ہو سکی تاہم جتنی جلدی مکمن ہوسکا ریلوے ٹریک بحال کریں گے۔
انہوں نے کہا کہ کوئٹہ ائیر پورٹ کا بھی جائزہ لیں گے اور کوئٹہ ریلوے اسٹیشن کی اپگریڈیشن کے لیے اقدامات کرنے کی کوشش کریں گے۔ گوادر میں ریلوے کا دفتر قائم کیا جا رہا ہے اور گوادر میں ہمارے پاس 285 ایکڑ زمین موجود ہے۔

اسلام آباد : (ویب ڈیسک) وزیراعظم شہباز شریف کا کہنا تھا کہ پاکستان کا امن افغانستان میں امن سے جڑا ہے،افغانستان کو نظر انداز کرنا بہت بڑی غلطی ہوگی، موسمیاتی تبدیلی کےاثرات کا خمیازہ پاکستان بھگت رہا ہے، ہمیں موسمیاتی تبدیلی کے اثرات سے نمٹنے کے لیے موثر اقدامات کرنے ہوں گے۔
شنگھائی تعاون تنظیم اجلاس میں وزیراعظم شہباز شریف نے خطاب کرتے ہوئے کہا کہ شنگھائی تعاون تنظیم علاقائی مسائل کے حل کے لیے بہترین فارم ہے، پاکستان کا امن افغانستان میں امن سے جڑا ہے، افغانستان پاکستان کا ہمسایہ ملک اور امن کی ضمانت ہے ، افغانستان کو نظر انداز کرنا بہت بڑی غلطی ہوگی، خطے میں امن و امان کے لیے تمام رکن ممالک کو کام کرنے کی مزید ضرورت ہے، خوشحال ،ترقی یافتہ اور تعلیم یافتہ افغانستان خطے کے تمام ممالک کے لیے اہم ہے، انسانی ہمدردی کی بنیاد پر افغانستان کو معاشی طور پر مضبوط کرنے کی ضرورت ہے۔
پاکستان عالمی حدت اور موسمیاتی تبدیلی کے زیر اثر ہے، موسمیاتی تبدیلی کے اثرات کی قیمت پاکستان نے سیلاب سے تباہ کاریوں کی صورت میں ادا کی، پاکستان ایسا سیلاب کبھی دیکھا نہیں تھا، متاثرہ علاقوں کا دورہ کیا حالات ٹھیک نہیں ، سیلاب اور بارش کا پانی جگہ جگہ موجود ہے جس کے باعث ملیریا، ڈینگی اور دیگر بیماریاں جنم لے رہی ہیں۔
یہ بھی پڑھیں: سوئیڈن کی وزیراعظم نے انتخابی شکست تسلیم کرتے ہوئے استعفی دے دیا
وزیراعظم نے بتایا کہ سیلاب سے ایک ہزار 400 افراد جاں بحق ہوئے ،ہزار وں زخمی اور متعدد لاپتہ ہوئے ہیں، سیلاب سے مویشی ، فصلیں ،گھر،بستیاں اور شہر متاثر ہوئے ہیں، سیلاب متاثرین کو شدید مشکلات کا سامنا ہے ،دنیا کو ہماری مدد کے لیے آگے آناہوگا، موسمیاتی تبدیلی کےاثرات کا خمیازہ پاکستان بھگت رہا ہے، ہمیں موسمیاتی تبدیلی کے اثرات سے نمٹنے کے لیے موثر اقدامات کرنے ہوں گے، کیا یہ آفت اور تباہی پاکستان کے لیے آخری ہوگی یا دیگر ممالک کو بھی ایسی صورتحال کا سامناکرناہوگا؟ ہمارے درمیان موجود کچھ ممالک نے سیلاب متاثرین کی بہت مددکی ان کامشکور ہوں۔
شنگھائی تعاون تنظیم میں نئے ممالک کی شمولیت پر مبارکباد دیتاہوں ، دہشتگردی کے خاتمے کے لیے ایس ایس او کے تمام ممالک کومل کر کام کرنا ہوگا۔

اسلام آباد : (ویب ڈیسک) سابق وزیر اطلاعات اور تحریک انصاف کے رہنما فواد چوہدری کا کہنا ہے کہ روس سے گیس اورتیل وقت پر لے لیتے تو آج پاکستان میں مہنگائی کا طوفان نہ ہوتا۔روسی صدر ولادی میر پیوٹن نے پاکستان کو پھرشعبہ توانائی میں تعاون کی پیشکش کی ہے۔ فواد چوہدری نے سماجی رابطے کی ویب سائیٹ ٹویٹر پر کہا کہ روسی صدر کی پیشکش کو فوری طور پرعملی جامہ پہنانے کی ضرورت ہے،حکومت نے مغربی آقاؤں کوخوش کرنے کیلئے روس سے معاہدہ میں تاخیر کی۔

لاہور : (ویب ڈیسک) تحریک انصاف کے رہنما چودھری اورنگزیب نے این اے 137 کا ٹکٹ دینے پر وہ اپنے قائد عمران خان کے شکر گزار ہیں،بنی گالا میں پی ٹی آئی کے چیئرمین سے ملاقات کے بعد گفتگو کرتے ہوئے انہوں کہا کو وہ انشاء اللہ اپنے قائد کے اعتماد پر پورا اتریں گے اور پاکستان کی حقیقی آزادی میں اْنکے ساتھ کندھے سے کندھے ملا کے اپنا کردار ادا کریں گے۔

تاشقند: (ویب ڈیسک) وزیر اعظم شہباز شریف نے کہا ہے کہ پاکستان اور آذربائیجان کے درمیان مثالی اور گہرے تعلقات ہیں۔
شنگھائی تعاون تنظیم اجلاس کے دوران وزیر اعظم شہباز شریف کی آذربائیجان کے صدر سے ملاقات ہوئی۔ وزیر اعظم نے سیلاب متاثرین کے لیے مالی امداد فراہم کرنے پر آذربائیجان کا شکریہ ادا کیا۔
وزیر اعظم شہباز شریف نے کہا کہ موسمیاتی تبدیلی کی وجہ سے قدرتی آفت سے نمٹنے کے لیے اقدامات کی ضرورت ہے جبکہ پاکستان اور آذربائیجان کے درمیان مثالی اور گہرے تعلقات ہیں۔
انہوں نے کہا کہ پاکستان اور آذربائیجان مشترکہ تاریخ، عقیدے اور ثقافت سے جڑے ہوئے ہیں۔
وزیر اعظم شہباز شریف نے نگورنو کاراباخ پر پاکستان کے آذربائیجان کی اصولی حمایت کا اعادہ کیا اور وزیر اعظم نے آذربائیجان کے مقبوضہ علاقوں کو آزاد کرانے میں کامیابی پر مبارکباد دی۔
وزیر اعظم شہباز شریف نے آرمینیا کے بلااشتعال حملے میں 71 آذری فوجیوں کی شہادت پر اظہار تعزیت کیا اور سالمیت کے تحفظ میں آذربائیجان کے دفاع کے حق کی حمایت کا اعادہ کیا۔
وزیر اعظم اور آذربائیجان کے صدر نے سیاسی، اقتصادی، توانائی، دفاعی اور تعلیمی شعبے میں تعاون بڑھانے کا عزم کیا جبکہ دونوں سربراہان نے عوامی روابط سمیت مختلف شعبوں میں دوطرفہ تعاون کو بڑھانےکا بھی عزم کیا۔
وزیر اعظم نے زراعت، انفارمیشن ٹیکنالوجی اور سیاحت کے شعبوں میں تعاون کو بڑھانے پر زور دیا اور آذربائیجان کے صدر کو دورہ پاکستان کی دعوت دی جبکہ آذربائیجان کے صدر الہام علیوف نے بھی وزیر اعظم کو جلد از جلد آذربائیجان کے دورے کی دعوت دی۔

لاہور: (ویب ڈیسک) سپریم کورٹ نے شہباز گل کے جسمانی ریمانڈ کیخلاف اپیلوں پروفاق کو نوٹس جاری کردیا، عدالت نے کیس کے تفتیشی کو ریکارڈ سمیت آئندہ سماعت پر پیش ہونے کا حکم دے دیا، دوران سماعت جسٹس مظاہرعلی اکبرنقوی نے شہباز گل کے وکیل سے استفسار کیا کہ بتائیں کس بنیاد پرجسمانی ریمانڈ دیا گیا؟
وکیل بولے آپ عرض کردیں کہ جسمانی ریمانڈ کیوں دیا گیا، جسٹس مظاہرنقوی نے وکیل کی سرزنش کرتے ہوئے کہا کہ میں عرض کروں،آپ کیا بات کر رہے ہیں،جج سے ایسے بات کرتے ہیں؟ جس کے بعد وکیل نے الفاظ واپس لیتے ہوئے معذرت کر لی۔
جسٹس اعجازالاحسن کی سربراہی میں 3 رکنی خصوصی بنچ نے سماعت کی، دوران سماعت جسٹس مظاہرعلی اکبرنقوی نے استفسار کیا کہ کیا پولیس نے شہباز گل سے زبان ریکور کرنا تھی جس سے وہ بولا تھا؟ شہباز گل سے جو ریکوری کی گئی اس کا کیس سے کوئی تعلق ہی نہیں، شہباز گل کو متعلقہ فورم پر درخواست دائر کرنے سے کس نے روکا ہے؟ تشدد کیخلاف شہباز گل کو متعلقہ فورم سے رجوع کرنا ہوگا، جسٹس مظاہر علی اکبر نقوی جسٹس جمال مندوخیل نے کہا کہ کیا پی ٹی آئی حکومت میں کسی پر پولیس نے تشدد نہیں کیا؟ شہبازگل کے وکیل سلمان صفدر کا کہنا تھا کہ پولیس تشدد کے واقعات کم ہی سامنے آتے ہیں۔
ملکی تاریخ کا سب سے متنازع ریمانڈ شہباز گل کا دیا گیا، ٹرائل کورٹ نے اپنے اختیارات سے تجاوز کیا۔ شہباز گل نے ایک تقریر کی جس کو بنیاد بنا کر 13 دفعات لگائی گئیں جسٹس مظاہرعلی اکبرنقوی کا کہنا تھا کہ شہباز گل نے تقریر نہیں کی بلکہ ٹی وی پر انٹرویو دیا تھا۔ آپ نے کیس کی تیاری ہی نہیں کی۔ آپ کو جسمانی ریمانڈ دینے کے طریقہ کار اور مقصد کا ہی نہیں پتہ۔
جج نے آرڈر میں لکھا کہ شہباز گل کے جسم پر تشدد کے نشانات ہیں، کیا جج صاحب تشدد کے کیس میں بطور گواہ بھی پیش ہونگے؟ مجسٹریٹ قیدی کے حقوق کا ضامن ہوتا ہے آپ کو اتنا بھی علم نہیں۔ کیا ضابطہ فوجداری کا اطلاق سپریم کورٹ پر ہوتا ہے؟ وکیل نے کہا کہ سپریم کورٹ پر ضابطہ فوجداری کا اطلاق ہوتا ہے۔ اس پر جسٹس مظاہرعلی نقوی کا کہنا تھا کہ ماشاءاللہ وکیل صاحب، سپریم کورٹ پر ضابطہ فوجداری کا اطلاق نہیں ہوتا، عدالت نے سماعت غیر معینہ مدت تک ملتوی کردی۔

اسلام آباد: (ویب ڈیسک) وفاقی وزیر شیری رحمان نے کہا ہے کہ مخالفین کی نقلیں اتارنے اور اردو ٹھیک کرنے والے خود لیٹر اور کلو میں فرق بھول گئے؟
وفاقی وزیر شیری رحمان نے اپنے ایک بیان میں کہا کہ دوسروں کی غلطیاں تب نکالیں جب آپ خود کوئی غلطی نہ کرتے ہوں۔ اگر کسی اور سے یہ غلطی ہوئی ہوتی تو تحریک انصاف اس کے خلاف مہم چلا چکی ہوتی۔
انہوں نے کہا کہ عمران خان غلطیاں کریں لیکن ہم نقلیں نہیں اتاریں گے اور عمران خان کو یاد رکھنا چاہیے کہ زبان ہر انسان کی پھسل سکتی ہے اور غلطی ہر کوئی کر سکتا ہے۔
شیری رحمان نے کہا کہ پاکستان تحریک انصاف (پی ٹی آئی) حکومت کی غلط معاشی پالیسیوں کی وجہ سے ہی روپے کی قدر گر رہی ہے۔

اسلام آباد : (ویب ڈیسک) اسلام آباد میں ڈینگی کے وارنہ تھمے، گزشتہ 24 گھنٹے میں مزید 113 کیسز سامنے آگئے۔
مریضوں کی مجموعی تعداد ایک ہزار 56 تک پہنچ گئے۔شہر میں ڈینگی کے باعث اب تک 4 افراد زندگی کی بازی ہار چکے ہیں۔ ڈسٹرکٹ ہیلتھ آفیسر کے مطابق گزشتہ 24 گھنٹے کے دوران دیہی علاقوں میں 58 شہری علاقوں میں ڈینگی کے 55 مریض رپورٹ ہوئے۔
پمز ہسپتال میں ڈینگی کے 155 مریض اور پولی کلینک میں 34 مریض زیرعلاج ہیں۔
راولپنڈی میں بھی ڈینگی وائرس کے مریضوں میں مسلسل اضافہ ہو رہا ہے، محکمہ صحت کے مطابق گزشتہ چوبیس گھنٹوں کے دوران مزید 70 افراد میں ڈینگی وائرس کی تشخیص ہوئی ہے، رواں برس ڈینگی کے مریض کی تعداد 1122 تک جا پہنچی، بینظیر بھٹو اسپتال میں 5 ڈینگی مریضوں کی حالت تشویشناک ہے، راولپنڈی کے الائید اسپتالوں میں اس وقت 176 مریض زیر علاج ہیں، جبکہ 126 مریضوں کا تعلق راولپنڈی سے ہے۔