لاہور: (ویب ڈیسک) تحریک انصاف کے مرکزی رہنما اور سابق وفاقی وزیر حماد اظہر نے کہا ہے کہ وزیر بجلی اور وزیر پٹرولیم بدترین لوڈشیڈنگ پر قابو پانے میں ناکامی پر فوری استعفیٰ دیں۔
سوشل میڈیا پر اپنے بیان میں سابق وفاقی وزیر حماد اظہر نے کہا ہے کہ وہ پاور پلانٹ جو تحریک انصاف کے دور میں کبھی بند نہیں ہوئے وہ اب یا تو بند پڑے ہیں یا پچیس فیصد پیداواری صلاحیت پر چلائے جا رہیں ہیں۔
انہوں نے مزید کہا کہ بند یا کم صلاحیت پر چلائے جانے والے پاور پلانٹس میں سی پیک کے بھی پلانٹ شامل ہیں۔ بدانتظامی کی انتہا ہو چکی اور کوئی پوچھنے والا نہیں۔

اسلام آباد: (ویب ڈیسک) پاکستان پیپلز پارٹی کے رہنما یوسف رضا گیلانی نے کہا ہے کہ عمران خان کا بیان ملک کے لیے خطرناک ہے، سب کو اس بیان کی مذمت کرنی چاہیے۔
سینیٹ کے اجلاس میں اظہار خیال کرتے ہوئے یوسف رضا گیلانی نے کہا کہ چیئرمین پی ٹی آئی سے اپیل ہے وہ اپنا بیان واپس لیں، عمران خان کی طرف سے ایسا بیان آنا ملک کیلئے خطرناک ہے، یہ کہنا کہ ملک دیوالیہ ہوجائے گا یہ ملک دشمن ہی کہہ سکتا ہے، بطور پاکستانی یہ نہیں کہنا چاہیے کہ ملک 3 حصوں میں تقسیم ہو جائے گا۔
انہوں نے مزید کہا کہ پیپلز پارٹی نے کبھی اداروں کے خلاف بات نہیں کی، پیپلز پارٹی نے ہمیشہ عدلیہ کااحترام کیا، ہم نے 1985 میں غلطی کی اور قومی اسمبلی کا بائیکاٹ کیا۔
یوسف رضا گیلانی کا کہنا تھا کہ عمران خان کیخلاف عدم اعتمادغیرجمہوری نہیں ہے، زرداری صاحب 11 سال جیل میں رہے، پیپلز پارٹی کی لیڈر شپ جیل میں رہی کبھی اداروں کے خلاف بات نہیں کی۔

پشاور: (ویب ڈیسک) سابق وزیراعظم عمران خان نے راہداری ضمانت کیلئے درخواست دائر کر دی، پشاور ہائیکورٹ نے راہداری ضمانت فوری سماعت کیلئے منظور کر لی۔
درخواست پرچیف جسٹس پشاور ہائیکورٹ کچھ دیر بعد سماعت کریں گے۔ عمران خان پشاور ہائیکورٹ پہنچ گئے، بابر اعوان سمیت دیگر پی ٹی آئی رہنما ان کے ہمراہ ہیں۔
واضح رہے کہ عمران خان نے 25 مئی کے لانگ مارچ کے دوران درج مقدمات میں ضمانت کیلئے عدالت میں درخواست دائر کی ہے۔چیئرمین تحریک انصاف کے خلاف سرکاری املاک کو نقصان پہنچانے اور کارسرکار میں مداخلت کی 14 ایف آئی آرز درج کی گئی تھیں۔

اسلام آباد: (ویب ڈیسک) پاکستان تحریک انصاف کے وائس چیئرمین شاہ محمود قریشی نے کہا ہے کہ عمران خان کی ملک سے والہانہ محبت کو پوری قوم جانتی ہے، ہمیں تاریخ سے سبق سیکھنا چاہیے۔
شاہ محمود قریشی کا کہنا ہے کہ اس ملک کی سلامتی اور بقا ہر پاکستانی کو اپنی جان سے زیادہ عزیز ہے، تاریخ بتاتی ہے کہ جب ماضی میں ہم سے غلطیاں ہوئیں تو ملک دو لخت ہو گیا، ماضی میں ہماری غلطیوں کے باعث بلوچستان میں شورش نے جنم لیا، ماضی میں امن مخالف قوتوں نے “پختونستان” کا شوشہ چھوڑا۔
انہوں نے کہا کہ ملک میں تقسیم پیدا کرنے کی کوشش کی گئی، ہمارے اداروں اور عوام کو ماضی سے سبق سیکھنا چاہیئے، ملک کی سلامتی اور یکجہتی کیلئے درست فیصلے کرنا ہوں گے، ہمیں اپنی دفاعی قوت کے تحفظ کو یقینی بنانا ہے، مت بھولیے کہ ایسی قوتیں ہیں جو پاکستان کو اندرونی طور پر کھوکھلا کرنا چاہتی ہیں۔
شاہ محمودقریشی نے مزید کہا کہ اس وقت، مخدوش معاشی صورتحال سے نمٹنا ہمارے لیے سب سے بڑا چیلنج ہے، موجودہ معاشی صورتحال کے باعث ملک دیوالیہ ہونے کے قریب ہے، اگر خدانخواستہ ملک دیوالیہ ہوتا ہے تو پابندیاں پہلے سے کہیں زیادہ سنگین ہو سکتی ہیں، ہمارے دفاعی اثاثے جو ہماری بقا کیلئے ناگزیر ہیں وہ بھی ان پابندیوں کی زد میں آ سکتے ہیں۔
سابق وزیر خارجہ کا کہنا تھا کہ عمران خان ہمیشہ مضبوط قومی فوج کے داعی رہے ہیں، پاک فوج ہماری قومی، جغرافیائی اور نظریاتی حدود کے تحفظ اور دفاع کی ضامن ہے، عمران خان اداروں کو مضبوط اور مستحکم دیکھنے کے حامی ہیں۔

لاہور: (ویب ڈیسک) تحریک انصاف نے مہنگائی اور بجلی کی لوڈ شیڈنگ کے خلاف کل ملک بھر میں احتجاج کی کال دے دی۔
تحریک انصاف کے مرکزی سیکرٹری اطلاعات فرخ حبیب نے اعلان کیا ہے کہ تحریک انصاف کے چئیرمین عمران خان کی ہدایات پر ملک میں بڑھتی ہوئی مہنگائی اور بجلی کی لوڈشیڈنگ کیخلاف کل بروز جمعہ ملک گیر احتجاج کیا جائے گا ۔
فرخ حبیب کا کہنا ہے کہ موجودہ امپورٹڈ حکومت کی نااہلی اورغلط پالیسیوں کے باعث لوڈشیڈنگ اور مہنگائی میں اضافہ ہوتا جا رہا ہے، مہنگائی اور لوڈ شیڈنگ سےعوام کو مشکلات کاسامنا ہے۔

لاہور: (ویب ڈیسک) عمران خان کے متنازع بیان کے خلاف پنجاب اسمبلی میں ن لیگ کی جانب سے مذمتی قرارداد جمع کرا دی گئی، قرارداد میں بیان کی مذمت کرتے ہوئے سپریم کور ٹ سے بیان کا نوٹس لینے کامطالبہ کیا گیا ہے۔
پنجاب اسمبلی میں قرارداد مسلم لیگ (ن) کی رکن سعدیہ تیمور اور سمیرا کومل کی جانب سے جمع کرائی گئی، قرارداد میں کہا گیاہےکہ عمران خان سوچی سمجھی سازش کے تحت ملک میں انارکی پھیلانا چاہتے ہیں۔
قرار داد میں مزید کہا گیا کہ قوم افواج پاکستان کے ساتھ ہے، بائیس کروڑ عوام عمران خان کے ناپاک عزائم کبھی کامیاب نہیں ہونے دینگے۔