انقرہ: (ویب ڈیسک) وفاقی وزیر خارجہ بلاول بھٹو زرداری نے کہا ہے کہ ہم گن پوائنٹ یا کسی کے دباؤ میں قانون سازی کرنا نہیں چاہتے۔
ترک میڈیا کو انٹرویو دیتے ہوئے وفاقی وزیر خارجہ نے کہا کہ پاکستان اور ترکی کے عوام کا تعلق مضبوط تاریخی بنیادوں پر استوار ہے، دونوں ملکوں کے معاشی تعلقات میں بہت پوٹینشل ہے، ہماری دو طرفہ تجارت صرف 1 ارب ڈالر ہے، موجودہ وزیر اعظم اس تجارت کو 5 ارب ڈالر تک لے جانا چاہتے ہیں۔
انہوں نے کہا کہ موجودہ اپوزیشن انتخابی اصلاحات کے بغیر الیکشن چاہتی ہے، ہماری حکومت صاف اور شفاف انتخابات کے لیے انتخابی اصلاحات کرنے کی خواہشمند ہے، ہم گن پوائنٹ یا کسی کے دباؤ میں قانون سازی کرنا نہیں چاہتے، ہم نے انتخابی اصلاحات کا پہلا مرحلہ شروع کردیا جو پارلیمنٹ سے پاس ہوچکا ہے۔

راولپنڈی: (ویب ڈیسک) سابق وزیرداخلہ اور عوامی مسلم لیگ کے سربراہ شیخ رشید کا کہنا ہے کہ اللہ کے بعد اس ملک کی حقیقی ذمہ داری سپریم کورٹ پر آ گئی ہے۔
اسلام آباد کچہری میں میڈیا سے بات کرتے ہوئے شیخ رشید کا کہنا تھا کہ جھوٹی حکومت اور جھوٹا وزیر داخلہ اور طعنے مجھے تھانے کے ملتے ہیں، مجھ پر سازش کے تحت موجودہ حکومت نے جھوٹی ایف آئی آر کٹوائی اور مقدمہ بنایا، سپریم کورٹ سے تحفظ چاہتے ہیں، رانا ثنااللہ کی شکل نہیں کہ اس کے خلاف بغاوت کی جائے اس پر فرد جرم ہے اور کبھی عدالت میں پیش نہیں ہوا، اس نے میری بہنوں کے گھروں پر ریڈ کیا اس کو کبھی معاف نہیں کروں گا، اس کا انجام سب کے سامنے ہوگا۔
شیخ رشید کا کہنا تھا کہ اس ملک کو موجودہ حکومت کچھ نہیں دے پائی، گھی اور آٹے پر سبسڈی ختم کردی گئی ہے، یہ ایف آئی اے اور نیب میں کیسز ختم کروانا چاہتے ہیں، عمران خان اس حکومت کو نہیں مانتے، اگر حکومت انتخابات کی تاریخ دے، ہم مذاکرات کرنے کو تیار ہیں، سپریم کورٹ ہی ملک کو بچا سکتی ہے اور کوئی نہیں بچا سکتا۔
اس سے قبل اپنے بیان میں سابق وفاقی وزیر اور عوامی مسلم لیگ کے سربراہ شیخ رشید کا کہنا تھا کہ جس کام کے لئے چور امپورٹڈ حکومت کو لایا گیا ہے اتنی ہی ان کی معیاد ہے مذاکرات سے کچھ نہیں نکلے گا کیونکہ حکمران اپنے کیس ختم کروانے آئے ہیں اور اب وہ جیل جانے سے ہر صورت بچنا چاہتے ہیں،جمہوریت غنڈہ گردی کی بھینٹ چڑھی ہوئی ہے، بکنے والے لیڈر آف اپوزیشن اور جھوٹ بکنے والے حکمران بن گئے ہیں۔
شیخ رشید کا کہنا تھا کہ امپورٹڈ حکمران اپنے کیسز پر فرد جرم عائد نہیں ہونے دے رہے، کبھی ملک سے باہر چلے جاتے ہیں کبھی دوسرے شہر چلے جاتے ہیں اور کبھی کمر میں درد نکل آتی ہے، ایف آئی اے، اے این ایف اور نیب شدید ترین دباؤ میں ہے سپریم کورٹ اس کا نوٹس لے، اللہ کے بعد اس ملک کی حقیقی ذمہ داری سپریم کورٹ پر آ گئی ہے۔
سابق وفاقی وزیر نے کہا کہ جو لوگ مہنگائی ختم کرنے کا نعرہ لگاتے تھے انہوں نے غریب کو ہی تل دیا ہے، کھانے پکانے کے گھی میں 200 روپے فی کلو کا ایک دن کا اضافہ ظلم عظیم ہے، کھاد کی قیمتوں میں بھی سبسڈی ختم کردی گئی ہے، 8 سے 12 گھنٹے کی روزانہ لودشیڈنگ ہے اور کوئی پوچھنے والا نہیں، جتنے عمران خان نے ساڑھے تین سال میں غیر ملکی دورے کیے اتنے امپورٹڈ حکومت نے ایک مہینے میں کرلیے، اللہ تعالی اس ملک کی معیشت جمہوریت مہنگائی اور لوڈشیڈنگ پر رحم فرمائے، جس طرح ملک اور صوبے پر قبضہ کروایا گیا اس کا نوٹس سپریم کورٹ ہی لے سکتا ہے۔
شیخ رشید کا کہنا تھا کہ 25 مئی کو جو وحشیانہ طاقت کا استعمال کیا گیا اس کی مثال دنیا میں کہیں نہیں ملتی، اسلام آباد کوئی واشنگٹن ڈی سی نہیں ہے اور یہاں پر خود بھی کئی بار ان لوگوں نے احتجاج کیے ہیں، اور کسی نے ان کو ہاتھ تک نہیں لگایا، اجرتی قاتل راناثنا اللہ ہر روز لوگوں کو ڈرا دھمکا رہے ہیں، اس پر سپریم کورٹ کو از خود نوٹس لینا چاہیے اور فرانزک رپورٹ طلب کرنی چاہیے۔

اسلام آباد: (ویب ڈیسک) یوکرین کی عوام کے لیے پاکستان سے خیر سگالی کے تحت بھیجی گئی امداد کی دوسری کھیپ پولینڈ پہنچ گئی۔
پاکستان ائیر فورس کے سی ون تھرٹی طیارے نے ساڑھے سات ٹن امدادی سامان پولینڈ پہنچایا۔ ائیر پورٹ پر پاکستان کے سفیر ملک محمد فاروق اورپولش وزارت خارجہ کے ایکٹنگ ڈائریکٹر سمیت دیگر عہدیداران نے امدادی پرواز کا استقبال کیا۔
اس موقع پر یوکرینی اور پولش حکام کا کہنا تھا کہ پاکستان کا جذبہ خیر سگالی دوسرے ملکوں کے لیے ایک مثال ہے۔
یوکرین کے دفاعی اتاشی کرنل سانچینکو نے پاکستان کا شکریہ ادا کیا۔

اسلام آباد: (ویب ڈیسک) پاکستان میں ایک اور بچی پولیو وائرس کا شکار ہو گئی ہے جس کے بعد رواں برس پاکستان میں پولیو کیسز کی مجموعی تعداد 7 ہو گئی ہے جن میں سے چھ کیسز شمالی وزیرستان کی تحصیل میر علی سے رپورٹ ہوئے۔
شمالی وزیرستان کی تحصیل میر علی کی 7 ماہ کی بچی وائرس کا شکار ہوئی ہے جس میں 2مئی کو معذوری رپورٹ ہوئی تھی۔ ابتدائی تحقیقات کے مطابق بچی کا بایاں بازو اور دونوں ٹانگیں مفلوج ہوگئی ہیں۔
وفاقی وزیر صحت عبدالقادر پٹیل نے کہا کہ شمالی وزیرستان میں 2014 اور 2019ء کی طرز پر دوبارہ پولیو کی وبا پھوٹ پڑی ہے کیونکہ اُس دوران بھی پولیو کیسز رپورٹ ہورہے تھے، ہم اس وبا کے خاتمے کے لیے انتھک کوششیں کررہے ہیں۔ خیبرپختونخوا کے جنوبی اضلاع بشمول شمالی و جنوبی وزیرستان، ڈی آئی خان، بنوں، ٹانک اور لکی مروت پولیو وائرس کے لیے حساس ہیں۔ بنوں سے رواں سال اپریل اور مئی کے دو ماحولیاتی نمونوں سے وائرس کی تصدیق ہوئی جو اس بات کی تائید کرتے ہیں کہ پولیو وائرس کا پھیلاؤ شمالی وزیرستان تک محدود نہیں ہے۔

انقرہ: (ویب ڈیسک) سندھ کے صوبائی وزیر اطلاعات، ٹرانسپورٹ اور ماس ٹرانزٹ شرجیل میمن نے ترکی کے نائب وزیر برائے ٹرانسپورٹ مسٹر سیلن دورسن سے ملاقات کی اور انھیں پاکستان بالخصوص سندھ میں مینوفیکچرنگ پلانٹس لگانے کی دعوت دی۔
سندھ کے وزیرِ ٹرانسپورٹ شرجیل میمن نے ترکی کے دارالحکومت میں انقرہ میں مصروف دن گزارا۔ صوبائی وزیر نے ترکی کے نائب وزیر ٹرانسپورٹ سے دوبدو ملاقات کی اور ٹرانسپورٹ کے شعبے میں ترکی کی کامیابیوں کو سراہا۔
اس موقع پر صوبائی وزیر ٹرانسپورٹ شرجیل میمن نے ترک کمپنیوں کو پاکستان بالخصوص سندھ میں ٹرانسپورٹ مینوفیکچرنگ پلانٹس لگانے کی دعوت دیتے ہوئے کہا کہ سندھ حکومت ترک سرمایہ کاروں کو پبلک پرائیویٹ پارٹنرشپ کے معاہدوں اور ضرورت کے مطابق سبسڈی اور دیگر سہولیات فراہم کرنے کے لیے تیار ہے۔
صوبائی وزیر شرجیل میمن نے ترکی کی بسوں اور ماس ٹرانزٹ گاڑیوں کے ڈیزائن اور دیگر تفصیلات سندھ حکومت کو جلد از جلد فراہم کرنے کی درخواست کرتے ہوئے ترکی کے ماہرین کو اس معاملے پر پیش رفت کے لیے سندھ کے دورے کی دعوت بھی دی۔

شمالی وزیر ستان: (ویب ڈیسک) بنوں ویسٹ بلاک میں تیل و گیس کے ذخائر دریافت ہوئے ہیں۔
تیل و گیس کے شعبے سے ملک کے لیے ایک اچھی خبر سامنے آگئی۔ خیبر پختونخوا میں ماری پیٹرولیم نے شمالی وزیرستان کے بنوں ویسٹ بلاک میں تیل و گیس کے ذخائر دریافت کر لئے ہیں، اس نئی دریافت سے 25 ایم ایم سی ایف ڈی گیس اور 300 بیریل یومیہ تیل حاصل ہوگا۔
ترجمان ماری پٹرولیم نے اپنے اعلامئے میں تیل و گیس کے ذخائر کے دریافت کی خوشخبری سناتے ہوئے بتایا کہ شمالی وزیرستان میں یہ تیل و گیس کی پہلی دریافت ہے، نئی دریافت سے تیل وگیس کی طلب پوری کرنے میں مدد ملے گی، اور اس سے ملک میں ہائیڈروکاربن کے ذخائر میں اضافہ ہوگا، جب کہ مقامی وسائل کی دریافت سے زرمبادلہ کے ذخائر کی بھی بچت ہوگی۔

اسلام آباد: (ویب ڈیسک) پاکستان تحریک انصاف (پی ٹی آئی) نے اسلام آباد میں لانگ مارچ کے لیے سپریم کورٹ میں درخواست دائر کردی جس پر رجسٹرار آفس نے اعتراض عائد کر دیا۔
ذرائع کے مطابق سپریم کورٹ میں تحریک انصاف کے لانگ مارچ سے متعلق درخواست پر رجسٹرارڈ آفس نے اعتراض اٹھاتے ہوئے کہا کہ درخواست میں جو نکتہ اٹھایا گیا ہے اس پر عدالت عظمیٰ فیصلہ دے چکی ہے، ایک معاملے پر فیصلہ ہو جانے کے بعد دوبارہ شنوائی نہیں ہوسکتی۔
اعتراض میں کہا گیا کہ درخواست گزار نے متعلقہ فورم سے رجوع نہیں کیا، متبادل فورم کے دستیابی کے باوجود سپریم کورٹ سے رجوع کیا گیا۔
رجسٹرار آفس نے اعتراض لگا کر معاملہ حتمی فیصلے کیلئے رجسٹرار سپریم کورٹ کو بھجوا دیا۔
اس سے قبل سپریم کورٹ میں درخواست پی ٹی آئی کے سیکرٹری جنرل اسد عمر کی جانب سے علی ظفر ایڈووکیٹ نے جمع کرائی جس میں استدعا کی گئی کہ وفاقی اور پنجاب حکومت کو احتجاج کیلئے اجازت کا حکم دیا جائے، درخواست میں وزارت داخلہ، آئی جی اسلام آباد اور ہوم سیکرٹریز کو فریق بنایا گیا ہے۔
درخواست میں عدالت سے استدعا کی گئی ہے کہ وفاقی اور پنجاب حکومت کو احتجاج کے لیے اجازت کا حکم دیا جائے۔ احتجاج کے دوران کسی کارکن کو گرفتار نہ کیا جائے، احتجاج کے راستے میں رکاوٹیں حائل نہ کی جائیں، وفاقی اور پنجاب حکومت کو تشدد اور طاقت کے استعمال سے روکا جائے۔ احتجاج ہر شہری کا بنیادی حق ہے، آئین پاکستان بھی پرامن احتجاج کی اجازت دیتا ہے، آرٹیکل 4 کے مطابق تمام شہریوں کو یکساں حقوق حاصل ہیں۔
پی ٹی آئی نے درخواست میں استدلال کیا کہ آئین کا آرٹیکل 15، 16، 17 اور 19 پرامن طریقے سے نقل و حرکت، جمع ہونے، بولنے اور اظہار رائے کا حق دیتا ہے۔ تحریک انصاف کے احتجاج کے دوران بڑے پیمانے پر گرفتاریاں احتجاج روکنے کے لیے تھیں۔ تحریک انصاف کے کارکنوں کے خلاف مقدمات آزادی اظہار رائے پر قدغن کے مترادف ہیں۔

اسلام آباد: (ویب ڈیسک)  پاکستان تحریک انصاف کے لانگ مارچ کے دوران توڑ پھوڑ کے معاملے پر سابق وفاقی وزیر داخلہ شیخ رشید احمد کی دو مقدمات میں ضمانت منظور کر لی گئی۔
پی ٹی آئی لانگ مارچ کے دوران توڑ پھوڑ کے معاملے پر شیخ رشید کی درخواست ضمانت پر سماعت ہوئی، سیشن جج کامران بشارت مفتی نے 5.5 ہزار روپے مچلکے پر ضمانت منظور کر لی۔
عدالت نے دو مقدمات میں شیخ رشید کی ضمانت منظور کی، عدالت نے پولیس کو 13 جون کے لیے ریکارڈ سمیت طلب کر لیا۔