لاہور: (ویب ڈیسک) اب ڈاکیے الیکٹرک موٹر سائیکلوں پر ڈاک تقسیم کریں گے. ڈاک خانوں میں بجلی کی بچت کیلئے شمسی توانائی کا استعمال ہو گا.
پوسٹ ماسٹر جنرل پنجاب نے پوسٹ مینز کو الیکٹرک موٹر سائیکل فراہم کرنے کے ساتھ ساتھ ڈاک خانوں کی سولر سسٹم پر منتقلی کا اعلان کردیا۔
پوسٹ ماسٹر جنرل پنجاب خواجہ عمران رضا کا کہنا ہے کہ ہم ان کو موٹر سائیکل کی جگہ الیکٹرک بائیک دین گے جس سے فیول بھی بچے گا اور آلودگی بھی کم ہوگی۔ سولر سسٹم پر بھی دفاتر کو شفٹ کریں گے۔
گزشتہ روز پاکستان سمیت دنیا بھر میں ورلڈ پوسٹ ڈے منایا گیا ۔نو اکتوبر اٹھارہ سو چوہتر کو عالمی سطح پر یونیورسل پوسٹل یونین کا قیام عمل میں آیا، اس یونین میں پاکستان سمیت دنیا بھر کے ایک سو بانوے ممالک شامل ہیں، عالمی یوم ڈاک کی مناسبت سے جی پی او لاہور میں تقریب سجائی گئی۔
ورلڈ پوسٹ ڈے کو منانے کا مقصد عوام میں ڈاک کے نظام اور اس کی خدمات کے حوالے سے شعور و آگہی پیدا کرنا ہے۔ لاہور سمیت پنجاب بھر میں سات ہزار سے زائد ڈاک خانے موجود ہیں۔

اسلام آباد: (ویب ڈیسک) سابق وفاقی وزیر اطلاعات اور پاکستان تحریک انصاف (پی ٹی آئی) کے رہنما فواد چودھری نے کہا ہے کہ پاکستان کی تنہائی کی وجہ حکمران ہیں کیونکہ دنیا انہیں بدعنوان سمجھتی ہے۔
پی ٹی آئی کے رہنما فواد چودھری نے سماجی رابطے کی ویب سائٹ ٹوئٹر پر لکھا کہ 2006 میں زلزلہ آیا تو پوری دنیا پاکستان کے لیے پریشان تھی اور 2006 زلزلے میں بھی امداد توقع کے برعکس آئی تھی۔
انہوں نے کہا کہ 2010 سیلاب میں بھی پاکستان کو بھرپور مدد ملی لیکن اس بار سیلاب میں بڑی تباہی کے باوجود پاکستان تنہا ہے۔
فواد چودھری نے کہا کہ پاکستان کی تنہائی کی وجہ حکمران ہیں اور دنیا انہیں بدعنوان سمجھتی ہے۔ دنیا پاکستان کے بدعنوان حکمرانوں کو امداد دینے سے گریزاں ہے۔

راولپنڈی: (ویب ڈیسک) سربراہ عوامی مسلم لیگ شیخ رشید کا کہنا ہے کہ امید ہے10 اکتوبر کو لانگ مارچ کی تاریخ کا بگل بج جائے گا
سابق وزیر داخلہ شیخ رشید کا کہنا ہے کہ مہنگائی مزید30 فیصد بڑھ گئی ۔ آڈیو ویڈیو لیک اور سائیفر غریب کا مسئلہ نہیں۔
انہوں نے سوشل میڈیا پلیٹ فارم ٹوئٹر پر پیغام میں کہا ہے کہ امید ہے10 اکتوبر کو لانگ مارچ کی تاریخ کا بگل بج جائے گا،پھر راج کرے گی خلق خدا۔
ان کا کہنا ہے کہ سیاست کا تناؤ اور ٹکراؤ کسی طرف بھی جاسکتا ہے۔حکومت ضمنی الیکشن سے بھاگ رہی ہے۔ سائیفر حقیقت تھا اس لیےقومی سلامتی کمیٹی کی میٹنگ میں لایاگیا۔

کاکول: (ویب ڈیسک) آرمی چیف جنرل قمر جاوید باجوہ نے کہا ہے کہ پاکستان کو دہشتگردی سے نجات دلانے کیلئے فوج نے بڑی قربانیاں دی ہیں۔
ملٹری اکیڈمی کاکول (پی ایم اے) میں 146 ویں پاسنگ آؤٹ پریڈ سے خطاب کرتے ہوئے آرمی چیف جنرل قمر جاوید باجوہ نے پاس آؤٹ ہونے والے کیڈٹس کو مبارکباد پیش کرتے ہوئے کہا کہ آپ لوگوں کو فخر ہونا چاہیے کہ آپ اس عظیم فوج کا حصہ بننے جا رہے ہیں، اس ادارے سے پاس آؤٹ ہونا بڑے فخر کی بات ہے، 146 ویں لانگ کورس کی پاسنگ آؤٹ پریڈ کامعائنہ کرنا باعث فخرہے۔
جنرل قمر جاوید باجوہ نے کہا کہ ہماری امن کی خواہش کو کمزوری نہ سمجھا جائے، پاکستان ایک پرامن ملک ہے اور ہمسائیوں سے اچھے تعلقات چاہتا ہے، ہمسایوں کے ساتھ تمام مسائل پرامن طور پر حل کرنے کے خواہاں ہیں۔
آرمی چیف نے کہا کہ 42 سال پہلے میں نے بھی اسی ادارے سے ٹریننگ حاصل کی تھی، تب میں نے یہ کبھی نہیں سوچا تھا کہ میں بھی اس عظیم فوج کو کمانڈ کروں گا، آگے کا سفر آپ کے لیے بہت سے چیلنجز لے کر آئے گا، آپ کو مستقبل میں مشکل اور بڑے فیصلے لینے ہوں گے۔
سربراہ پاک فوج کا کہنا تھا کسی بھی فیک نیوز اور پروپیگنڈے پر توجہ نہ دیں، ملک کی حفاظت مضبوط ہاتھوں میں ہے ، کسی ملک، گروپ یا تنظیم کو پاکستان کو سیاسی یا معاشی غیرمستحکم کرنے نہیں دیا جائے گا۔
قبل ازیں پاکستان ملٹری اکیڈمی کاکول ایبٹ آباد میں 146 ویں لانگ کورس کی پاسنگ آؤٹ پریڈ کا اہتمام کیا گیا، آرمی چیف جنرل قمر جاوید باجوہ نے تقریب میں بطور مہمان خصوصی شرکت کی۔
پاسنگ آؤٹ پریڈنگ کے آغاز میں پریڈ ایڈجوٹینٹ میجر سعد امجد راجا براق پر سوار نظر آئے جنہوں نے تقریب کے مہمان خصوصی آرمی چیف جنرل قمر جاوید باجوہ کو پریڈ کے معائنے کی دعوت دی، اس موقع پر پی ایم اے کاکول کے کمانڈنٹ میجر جنرل عمر احمد بخاری بھی آرمی چیف کے ہمراہ موجود تھے۔
پاسنگ آؤٹ پریڈ کے موقع پر اعلیٰ سول اور فوجی حکام سمیت غیرملکی سفارت کاروں نے شرکت کی، پاس آؤٹ ہونے والوں میں 24 ویں ٹیکنیکل گریجویٹ کورس کے کیڈٹس شامل ہیں جبکہ 65 ویں انٹیگریٹڈ کورس کے کیڈٹس بھی اس پاسنگ آؤٹ کا حصہ ہیں، پاس آؤٹ ہونے والوں میں 20 ویں لیڈی کورس اور پانچویں بیسک ملٹری ٹریننگ کورس کے کیڈٹس بھی شامل تھے۔
پی ایم اے کاکول کی پاسنگ آؤٹ پریڈ میں بہترین کارکردگی پر 146 ویں پی ایم اے لانگ کورس کے کیڈٹس کو اعزازی شمشیر دی گئی، طلائی تمغہ 146 ویں پی ایم اے لانگ کورس کے نمبر 2 کیڈٹس کو دیا گیا۔
چیئرمین جوائنٹس چیف آف اسٹاف کمیٹی اوور سیز گولڈ میڈل دوست ممالک کے بہترین کیڈٹس کو دیا گیا، پاسنگ آؤٹ پریڈ میں 4 خواتین سمیت 20غیر ملکی کیڈس شامل تھے، غیر ملکی کیڈس کا تعلق قطر، سری لنکا، نیپال عراق سے ہے۔

لاہور : (ویب ڈیسک) وزیراعظم شہباز شریف کا کہنا ہے کہ ہم عدالتوں اور قانون کا احترام کرتے ہیں، ہم عدالتوں میں مقدمات کا سامنا کررہے ہیں، نوازشریف نے خود پانامہ کی تحقیقات کےلیے عدالت کوخط لکھا تھا۔
منی لانڈرنگ کیس میں عدالت میں پیش ہونے کے بعد شہباز شریف نے میڈیا سے بات کرتے ہوئے کہا کہ نواز شریف اور مریم نواز عدالت میں پیش ہوتے تھے، نواز شریف نے عدالتوں سے کوئی این آر او نہیں لیا، عمران خان الزام لگاتے ہیں کہ مریم نواز اور نوازشریف نے این آر او لیا، مریم نواز کوعدالت نے میرٹ پر بری کیا ہے، شاہد خان عباسی، سعد رفیق اوررانا ثنااللہ نے جرات سے جیلیں کاٹی تھیں۔
ن لیگی رہنماوں نے بھی ہر ظلم برداشت کیا لیکن عمران خان کی جانب سے مریم نواز پر این آر او لینے کا الزام قابل مذمت ہے، مریم نواز کو نیب قانون سے بریت نہیں ملی، پارٹی قیادت کو برترین سیاسی انتقام کا نشانہ بنایا گیا ہے۔
شہباز شریف نے کہا کہ علیمہ خان کو این آر او میں نے تو نہیں دلوایا، فرح خان کو بھی این آر او میں نے نہیں دلوایا ، عمران خان نے انہیں کلین چیٹ دی، بی آر ٹی جس میں کئی 100 ارب روپے کا گھپلا ہوا، تحقیقات ہوتی رہیں، جب بھی آرڈر دیا جاتا عمران خان ا سٹے لیتے رہے، بی آر ٹی پشاور میں ثابت ہوچکا کہ اربوں کی کرپشن ہوئی، حقائق سے ثابت کر چکا ہوں کہ عمران خان غلط بیانی سے کام لیتے ہیں، عمران خان کہتے تھے کی امپورٹڈ حکومت امریکی ساز باز سے آئی وہ سب ڈرامہ تھا، عمران خان کہتے رہے امریکا کا نام نہیں لینا، بس کھیلنا ہے، ان کا پرنسپل سیکریٹری کہتا رہا فکر نہ کریں، منٹس میں نے بنانے ہیں، عمران خان کی آڈیو میں کہا گیا کہ میں نے 5 بندے خرید لیے ہیں۔
شہباز شریف نے مزید کہا کہ وزیر اعظم ، ہاؤس میں بولی لگا رہا ہے، خریدوفروخت کر رہا ہے، وہ پیسہ کہاں سے آیا؟ سابق چیف جسٹس ثاقب نثار دن رات عدالت لگاتے تھے، سابق چیف جسٹس ثاقب نثار سے سوال کرتا ہوں 56کمپنیاں اور کرپشن کہا گیا، ان 56 کمپنیوں میں اوروں نے بھی کمپنیاں بنائیں تھیں۔
عمران خان کہتے تھے جو ضمیر فروشی کرے اس کے بچوں سے کوئی شادی نہیں کرے گا، ضمیر فروشی کرنے والا شرک کرتا ہے وہ فتوے دیتے تھے، کہاں ریاست مدینہ کہاں ہم خطا کار، ہم اس کی ہلکی جھلک بھی لے آئے تو ملک بہتر ہوجائے گا، عمران خان اعتراف کر رہے ہیں کہ میں نے 5 ووٹ خریدے ہیں، عمران خان نے پاکستان کو برباد کیا، کس طرح امریکا کے ساتھ تعلقات متاثر ہوئے، ہمیں پاکستان کو بچانا ہے، جھوٹ سے نہیں۔
عمران خان کہتے ہیں کہ میں نے خیبرپختونخوا میں اتنے اسپتال بنائے، یہ کر دیا وہ کردیا، کاش مجھے ایسا کچھ نہ کہنا پڑتا لیکن کہنے پر مجبور ہوں۔
پنجاب ان ہاوس تبدیلی آئینی طریقے سے ہوتی ہے جیسے قومی اسمبلی میں ہوئی تو اعتراض نہیں ہونا چاہیے، عمران خان کہہ رہے ہیں میر جعفر اور میر صادق کا پروپیگنڈا کرو، عمران خان کی سوچ نے پاکستان کو دنیا میں گندہ کر دیا ہے اس طرح کوئی بھی آکر کوئی بات کرسکے گا، میں نے قوم کو گورننس میں اپنا خون پسینہ دیا ہے ، نواز شریف کے دور میں پاکستان ایٹمی طاقت بنا، لوڈشیڈنگ ختم ہوئی، کسانوں کو آدھی قیمت میں کھاد دی گئی، میرا سیاسی کیریئر پاکستان پر اربوں بار قربان کر دوں۔
انہوں نے کہا کہ ڈالر نیچے آرہا ہے یہ اسحاق ڈار کی محنت ہے۔

کراچی: (ویب ڈیسک) نوبل امن انعام یافتہ ملالہ یوسف زئی 12 اکتوبر کو تین روزہ دورہ پر پاکستان واپس پہنچ رہی ہیں۔
رپورٹ کے مطابق ملالہ پاکستان کے سیلاب سے متاثرہ علاقوں کا دورہ کریں گی، محکمہ داخلہ سندھ کی جانب سے ملالہ یوسف زئی کی سیکورٹی کے سخت انتظامات کرنے کی ہدایت کی ہے۔ وہ سب سے پہلے کراچی پہنچیں گی جہاں سے انہیں سخت حفاظتی انتظامات کے تحت دادو میں سیلاب سے متاثرہ علاقوں کا دورہ کرایا جائے گا۔
ملالہ فنڈ پہلے ہی انٹرنیشنل ریسکیو کمیٹی (IRC) کو ہنگامی امدادی گرانٹ جاری کر چکا ہے۔ اس گرانٹ سے آئی آر سی سندھ اور بلوچستان میں لڑکیوں کو نفسیاتی مدد فراہم کرے گا۔ یہ ہنگامی تعلیمی خدمات بھی فراہم کرے گا تاکہ اس بات کو یقینی بنایا جا سکے کہ لڑکیاں اپنی تعلیم جاری رکھ سکیں، جبکہ لڑکیوں کے 10 سرکاری سکولوں کی تباہ شدہ عمارتوں کی مرمت اور بحالی بھی کی جائے گی۔

گلگت: (ویب ڈیسک) بابو سر ٹاپ کے قریب سیاحتی مقام پر پھنس جانے والے حکومتی وزیر عبید اللہ گلگت بلتستان پہنچ گئے۔
چلاس جلکھڈ روڈ پر مظاہرے کے باعث پھنس جانے والے وزیر عبیداللہ گلگت بلتستان پہنچ گئے۔مظاہرین نے چلاس جلکھڈ روڈ بھی ٹریفک کے لیے کھول دیا۔
چلاس جھلکڈ روڈ گزشتہ روزمظاہرین نے مطالبات کے حق میں بند کردیا تھا۔عبید اللہ اسلام آباد سے گلگت آ رہے تھے کہ بابوسر میں روڈ بند تھا۔گلگت بلتستان کے حکومتی وزیر عبید اللہ دیگر مسافروں کے ساتھ پھنسے رہے۔
حکومتی وزیر عبید اللہ سڑک کھولنے کے لیے مظاہرین سے مذاکرات کا حصہ بنے۔ڈی سی دیامر فیاض احمد،ایس پی دیامر شیرخان ،علما کرام نے مظاہرین سے مذاکرات کیے۔