پنڈی بھٹیاں تا فیصل آباد ایم-4 کی توسیع شروع، منصوبہ 15 دسمبر تک مکمل

اسلام آباد(نامہ نگار خصوصی) وفاقی وزیر مواصلات عبدالعلیم خان کی زیر صدارت نیشنل ہائی وے اتھارٹی سینٹرل ریجن کے ترقیاتی منصوبوں کے  حوالے سے اہم اجلاس منعقد ہوا جس میں موٹرویز اور قومی شاہراہوں کے متعدد منصوبوں پر جاری کاموں کی پیش رفت کا جائزہ لیا گیا۔ اجلاس میں جاری منصوبوں کو مقررہ مدت میں مکمل کرنے اور تعمیراتی کاموں میں تیزی لانے کے حوالے سے اہم فیصلے کیے گئے۔اجلاس میں پنڈی بھٹیاں تا فیصل آباد ایم-4 کو 4 سے 6 لین میں توسیع دینے کے منصوبے پر جاری کام رفتار اور اب تک کی پیش رفت سے آگاہ کیا گیا۔ وفاقی وزیر مواصلات عبدالعلیم خان نے ہدایت کی کہ اس منصوبے پر کام مزید تیز کیا جائے اور 15 دسمبر تک ایم فور کو 6 لین کرنے کے کام کو ہر حال میں مکمل کیا جائے۔وفاقی وزیر مواصلات عبدالعلیم خان نے کہا کہ لودھراں تا ملتان ایکسپریس وے کی تعمیر بھی تیزی سے جاری ہے جس سے جنوبی پنجاب کے عوام کو خاطر خواہ ریلیف ملے گا انہوں نے ہدایت کی کہ این ایچ اے سینٹرل ریجن میں جاری تمام منصوبوں کو مقررہ اہداف کے مطابق مکمل کیا جائے۔ وفاقی وزیر مواصلات نے جی ٹی روڈ این-5 پر لالہ موسی بائی پاس کی تعمیر کے ابتدائی کام کو بھی تیز کرنے کی ہدایت کی۔عبدالعلیم خان نے کہا کہ دریائے ستلج پر بابا فرید برج کی بحالی کے منصوبے پر بھی جلد کام شروع کیا جائے گا جبکہ جنوبی پنجاب میں لیہ اور تونسہ پلوں کو شاہراہوں سے منسلک کرنے کے منصوبوں پر بھی پیش رفت یقینی بنائی جائے گی۔وفاقی وزیر مواصلات نے قومی شاہراہ این-5 پر پھول نگر انٹرچینج کی بہترین اور معیاری تعمیر کی ہدایت کرتے ہوئے کہا کہ نئے منصوبوں میں عوام کو بہتر سفری سہولیات فراہم کرنے کے ساتھ ساتھ جدید تقاضوں کو بھی مدنظر رکھا جائے۔انہوں نے ہدایت کی کہ نئی شاہراہوں کو جدید لائٹس، معیاری انفراسٹرکچر اور بہترین ریسٹ ایریاز کے ساتھ تعمیر کیا جائے۔ ان کا کہنا تھا کہ نئی تعمیرات میں معیار پر کوئی سمجھوتہ نہیں ہوگا اور اسلام آباد مری ایکسپریس وے کو ماڈل کے طور پر اپنایا جائے۔وفاقی وزیر مواصلات عبدالعلیم خان نے واضح کیا کہ سرکاری فنڈز کے ایک ایک پیسے کا حساب رکھا جائے گا اور قومی خزانے کے وسائل ضائع نہیں ہونے دیے جائیں گے۔ انہوں نے متعلقہ حکام کو منصوبوں میں شفافیت معیار ،مقررہ مدت کی سختی سے پابندی یقینی بنانے اور شہریوں کی جانوں کے تحفظ کے حوالے سے بھی اہم ہدایات جاری کیں۔ وفاقی وزیرعبدالعلیم خان نے کہا کہ شاہراہوں پر پیدل چلنے والوں کے لیے محفوظ گزرگاہیں اور مناسب کراسنگ پوائنٹس بنائے جائیں تاکہ حادثات سے انسانی جانوں کا تحفظ یقینی بنایا جا سکے۔تعمیراتی کاموں کے دوران ٹریفک کی روانی برقرار رکھنے کے لیے متعلقہ ڈی آئی جی موٹرویز کو بھی ذمہ داریاں تفویض کرنے کا فیصلہ کیا گیا۔ اجلاس میں اس امر پر اتفاق کیا گیا کہ جاری تعمیراتی سرگرمیوں کے دوران عوام کو غیر ضروری مشکلات سے بچانے کے لیے موثر ٹریفک مینجمنٹ پلان پر عملدرآمد یقینی بنایا جائے گا۔اجلاس میں چیئرمین این ایچ اے کو نئے ٹاسک بھی تفویض کیے گئے اور ترقیاتی منصوبوں سے متعلق پیش رفت کی جامع رپورٹ جلد پیش کرنے کی ہدایت کی گئی۔وفاقی وزیر مواصلات عبدالعلیم خان نے کہا کہ قومی شاہراہوں اور موٹرویز کے منصوبوں کی بروقت تکمیل سے نہ صرف عوام کو بہتر سفری سہولیات میسر آئیں گی بلکہ ملکی تجارت، صنعت اور معاشی سرگرمیوں کو بھی فروغ ملے گا۔