کراچی : (ویب ڈیسک) تاخیر سے سہی، کراچی والو کی سن لی گئی۔ وزیراعلی سندھ مراد علی شاہ نے ایمبولنس سروس ڈبل ون، ڈبل ٹو کا افتتا ح کردیا۔ پہلے مرحلے میں پچاس ایمبولنسز کراچی پہنچی ہیں، عملے کی تقرری اور تربیت کا عمل بھی شروع کردیا گیا۔
رپورٹ کے مطابق محکمہ ری ہیبلٹیشن نے 50 جدید ایمبولنسز محکمہ صحت سندھ کے حوالے کردیں ہیں، سندھ انٹیگریٹڈ ایمرجنسی اینڈ ہیلتھ سروس کے تحت شہر میں چلنے والی ایمبولنس سروس کو سندھ ایمرجنسی سروس ریسکیو 1122 کا نام دیا گیا ہے۔
افتتاحی تقریب سے خطاب کرتے ہوئے وزیر اعلی سندھ کا کہنا تھا کہ 230 ایمبولنسز میں سے پہلے مرحلے میں 50 ایمبولنسز کراچی آئی ہیں۔ ایمبولنسز کو ورلڈ بینک کے تعاون سے خریدا گیا ہے۔ ورلڈ بینک کے کنٹری ہیڈ ناجے بھیسن کا کہنا تھا کہ پاکستان ماحولیاتی تبدیلیوں کے زیر اثر ہے۔ ان حالات میں اس سروس کا شروع کیا جانا ضروری تھا۔
ایڈمنسٹریٹر کراچی نے کہا کہ اگلے مرحلے میں پولیس، فائر بریگیڈ سروس اور ایمبولنسز کو ایک ہی نمبر پر یکجا کرنے کا ارادہ ہے۔ ایمبولنس سروس کو چلانے کے لیے اسٹاف کی تقرری اور ٹریننگ کا سلسلہ بھی شروع کردیا گیا ہے۔

کوئٹہ : (ویب ڈیسک) کوئٹہ کی احتساب عدالت نے بلوچستان کے گریڈ 20 کے ایک اور حاضر سروس افسر کواربوں روپے قومی خزانے کونقصان پہنچانے کے جرم میں قید اورجرمانے کی سزا سنا کر جیل بھجوا دیا۔
ترجمان کے مطابق نیب بلوچستان نے کچھ عرصہ قبل حاضر سروس ڈی جی خزانہ اینڈ اکاونٹس و سابق ڈی جی پسنی فش ہاربرعلی گل کرد کے خلاف تحقیقات کا آغاز کیا تو دوران تفتیش ثابت ہوا کہ ملزم نے شہر کے مہنگے علاقے سمنگلی روڈ پر کمرشل پلازے بنا رکھے ہیں۔ مزید تحقیقات کے نتیجے میں ملزم اوراسکے بیٹے کے نام کوئٹہ اور مستونگ میں کئی ایکڑ اراضی، 90فلیٹس، شادی ہال اور 25 دکانیں سامنے آئیں۔ جس پرنیب بلوچستان نے ملزم کے خلاف ریفرنس احتساب عدالت کوئٹہ آفتاب احمد لون کی عدالت میں دائر کرایا۔
عدالت نے ٹرائل کے بعد ملزم کے خلاف ناقابل تردید ثبوتوں اور دلائل کی روشنی میں حاضر سروس افسر سابق ایم ڈی پسنی فش ہاربر علی گل کرد کو 63 کروڑ روپے جرمانے، 7 سال قید بامشقت کی سزا سنا دی ہے جبکہ شہر کے مہنگے علاقے میں اربوں روپے مالیت کے کمرشل پلازے اور ایکڑوں اراضی بحق سرکار ضبط کرنے کے احکامات جاری کئے ہیں۔ عدالت کے فیصلے کے بعد پولیس نے ملزم کو گرفتار کرکے جیل منتقل کردیا۔

کراچی: (ویب ڈیسک) کراچی میں جیل چورنگی کے قریب سپر سٹور میں آتشزدگی سے ایک شخص زخمی ہو گیا۔
فائر بریگیڈ کی تیرہ گاڑیاں امدادی کارروائیوں میں مصروف ہیں، حکام نے آگ تیسرے درجے کی قرار دی ہے۔ ڈپٹی کمشنر ایسٹ کے مطابق عمارت میں بنے فلیٹس میں مقیم افراد کو بحفاظت باہر نکال لیا گیا ہے۔
چیف فائر افسر کا کہناہے کہ بلڈنگ کے پچھلے حصے سے احتیاطی طور پر دیوار توڑی جارہی ہے۔ آگ کے شوللں تک پہنچ چکے ہیں جلد قابو پالیں گے تاہم حتمی وقت نہیں دے سکتے۔

اسلام آباد: (ویب ڈیسک) چیف جسٹس اسلام آباد ہائیکورٹ اطہر من اللہ نے ریمارکس دیئے ہیں کہ کسی بھی قانون میں اوورسیز پاکستانیوں کو ووٹ کے حق سے محروم نہیں کیا گیا۔
اسلام آباد ہائی کورٹ کے چیف جسٹس اطہر من اللہ نے داؤد غزنوی کی درخواست پر سماعت کی۔ پٹیشنر کی جانب سے عارف چودھری ایڈووکیٹ پیش ہوئے اور موقف اختیار کیا کہ گزشتہ حکومت نے بیرون ملک پاکستانیوں کو ووٹ کا حق دیا، نئی ترمیم خلاف آئین ہے۔
عدالت نے کہا جو پہلے ترمیم تھی وہ بھی یہی تھی۔ اب والی ترمیم میں زیادہ وضاحت دی گئی ہے۔ لوگ باہر سکونت رکھتے ہیں، دونوں ترامیم ان کے حقوق کو ختم نہیں کر رہیں۔ بادی النظر میں گزشتہ حکومت کی ترمیم سپریم کورٹ کے فیصلے کے مطابق نہیں تھی۔
عارف چودھری ایڈووکیٹ نے عدالتی استفسار پر بتایا نوے لاکھ لوگ بیرون ملک میں مقیم ہیں۔ چیف جسٹس نے کہا ایک جواب دے دیں، نوے لاکھ بیرون ملک پاکستانی کس حلقے میں ووٹ دیں گے؟ اوورسیز پاکستانیوں کے ووٹ کےطریقہ کار کو اداروں نے طے کرنا ہے عدالت نے نہیں۔ ملک کے آئینی اداروں اور پارلیمنٹ کا احترام کریں۔ کیس کی مزید سماعت تین جون تک ملتوی کردی گئی۔

اسلام آباد: (ویب ڈیسک) چیف الیکشن کمشنر نے پی ٹی آئی ممنوعہ فنڈنگ کیس کی سماعت ملتوی کرنے کی درخواست پر کہا کہ ایسا تاثر جارہا ہے کہ دانستہ معاملہ لٹکایا جارہا ہے، معاملے کو مزید التواء کا شکار نہیں بننے دینگے۔
تفصیلات کے مطابق الیکشن کمیشن میں پی ٹی آئی ممنوعہ فنڈنگ کیس کی سماعت ملتوی کرنے کی درخواست پر سماعت ہوئی جس میں تحریک انصاف کے وکیل نے سماعت ملتوی کرنے کی استدعا کی۔
دوران سماعت چیف الیکشن کمشنر کا کہنا تھا کہ آپ نے آج فنڈز کا موازنہ مکمل کرنے کی یقین دہانی کرائی تھی، ہم تو مزید سننے کو تیار ہیں، پی ٹی آئی فنڈز پر سوالات اٹھائے جارہے ہیں، اس موقع چیف الیکشن کمشنر نے استفسار کیا کہ آپ کے فنانشل ایکسپرٹ کو مزید کتنا وقت چاہیے؟ وکیل انور منصور نے کہا کہ الیکشن کمیشن میں کیس اسلام آباد ہائیکورٹ کے کیس پر اثر انداز ہورہا ہے، اسلام آباد ہائیکورٹ کا فیصلہ آنے تک الیکشن کمیشن سکروٹنی کا عمل مؤخر کرے۔
وکیل کے دلائل پر چیف الیکشن کمشنر نے کہا الیکشن کمیشن اور اسلام آباد ہائیکورٹ کا الگ دائرہ اختیار ہے، پہلے ہی یہ کیس کئی سال سے زیر التواء ہے، بین الاقوامی سطح پر اس کیس کی وجہ سے پی ٹی آئی کا خراب تاثر جارہا ہے۔
وکیل انور منصورنے کہا کہ کل فنانشل ایکسپرٹ کے ساتھ بیٹھ کر بتا دوں گا مزید کتنا وقت چاہیے، چیف الیکشن کمشنر نے کہا یہ ریکارڈ سمجھانا پانچ منٹ کا کام ہے، ہمیں آپ کا ریکارڈ ذبانی یاد ہو چکا ہے، الیکشن کمیشن معاملے کو مزید التوا کا شکار نہیں کرے گا، کل تک بتائیں دلائل مکمل کرنے میں مزید کتنا وقت لگے گا۔
بعدازاں چیف الیکشن کمشنر نے کیس کی مزید سماعت کل ساڑھے 12 بجے تک ملتوی کردی۔

اسلام آباد: (ویب ڈیسک) سابق وفاقی وزیر اطلاعات فواد چودھری نے کہا ہے کہ کوئی عزت دار شخص موجودہ سسٹم کے ذریعے عہدہ قبول نہیں کرے گا۔ حکومت الیکشن شیڈول کا اعلان کرے ہم بات چیت کیلئے تیار ہیں۔
سابق وفاقی وزیر اطلاعات اور پاکستان تحریک انصاف (پی ٹی آئی) کے رہنما فواد چودھری نے میڈیا سے گفتگو کرتے ہوئے کہا کہ پنجاب بغیر حکومت کے چل رہا ہے اور حمزہ شہباز غیر قانونی طریقے سے وزیراعلیٰ بنے ہیں۔ حمزہ شہباز کا مقدمہ روزانہ کی بنیاد پر چلنا چاہیے۔
انہوں نے کہا کہ اسپیکر ری الیکشن کا آرڈر کریں اور سپریم کورٹ کے فیصلے کے بعد حمزہ شہباز وزیر اعلیٰ نہیں رہے اور حمزہ شہباز کے پاس اب اکثریت بھی نہیں رہی۔ پنجاب کے لوگوں کو آئینی حق سے محروم نہ کیا جائے۔کوئی عزت دار شخص موجودہ سسٹم کے ذریعے عہدہ قبول نہیں کرے گا۔
فواد چودھری نے کہا کہ کوئی عزت دار شخص موجودہ سسٹم کے ذریعے عہدہ قبول نہیں کرے گا۔ الیکشن کمیشن نے آئین کے آرٹیکل 224 کو معطل کر دیا ہے اور کوشش کی جارہی ہے کہ کسی طرح غیر آئینی انداز سے حمزہ شہباز کو وزیر اعلیٰ رہنے دیا جائے۔
انہوں نے کہا کہ تحریک انصاف کوئی شدت پسند گروہ نہیں اور ایسا نہیں ہوتا کہ بات چیت نہ کریں بلکہ آپ پہلے الیکشن کا شیڈول دیں پھر ہم بات چیت کریں گے اور الیکشن کی ٹرمز اور فریم کے لیے بیٹھیں گے۔
پی ٹی آئی رہنما نے کہا کہ ہم مذاکرات کے ذریعے ہی آگے بڑھنا چاہتے ہیں تاہم اب اسپیکر کے پاس کوئی اختیار نہیں کہ وہ ہمیں طلب کر کے ہماری رائے لیں اور جب اسپیکر کے پاس رائے لینے کا اختیار ہی نہیں تو اراکین ان کے پاس کیوں جائیں۔

لاہور: (ویب ڈیسک) پی ٹی آئی کی منحرف خاتون رکن پنجاب اسمبلی عائشہ نواز نے الیکشن کمیشن فیصلے کیخلاف سپریم کورٹ سے رجوع کر لیا، فیصلہ کالعدم قرارد دینے استدعا بھی کردی۔
عائشہ نواز کی جانب سے دائر درخواست میں موقف اختیار کیا گیاہے کہ الیکشن کمیشن کا فیصلہ قانون کے بر خلاف کیا گیا ،الیکشن کمیشن نے سپریم کورٹ فیصلوں میں طے کردہ اصولوں کی خلاف ورزی کی۔پارٹی سربراہ کا ڈیکلریشن قانون کے مطابق نہیں ۔الیکشن کمیشن فیصلے میں پارٹی سربراہ اور پارلیمانی سربراہ کے عہدوں میں تفریق نہیں کی گئی ۔پی ٹی آئی کی جانب سے قانون کے مطابق شوکاز نوٹس جاری نہیں کیے گئے۔
درخواست گزار کا کہنا تھا کہ گزشتہ تاریخوں سے شوکاز جاری کئے گئے قانون کے مطابق شوکاز نوٹس جاری کرنا لازم ہےاراکین پنجاب اسمبلی کو پی ٹی آئی سربراہ کی ووٹ کیلئے جانب سے کوئی ہدایات نہیں تھیں۔ ریفرنس دائر کرنے والے شخص نے اپنی ہار کی وجہ سے ریفرنس دائر کئے۔ الیکشن کمیشن فیصلے کو کالعدم قرار اور سپریم کورٹ کے فیصلے تک الیکشن کمیشن کا فیصلہ معطل کیا جائے۔

انقرہ: (ویب ڈیسک) وزیراعظم شہباز شریف نے کہا ہے کہ ترکی نے صدر اردوان کی قیادت میں زبردست ترقی کی ہے، پاکستان اور ترکی کو باہمی سرمایہ کاری کے فروغ کیلئے رکاوٹوں کو دور کرنا ہو گا۔
وزیراعظم شہباز شریف نے پاک ترک بزنس فورم سے خطاب کرتے ہوئے کہا کہ پاکستان اورترکی کے درمیان قریبی تاریخی برادرانہ تعلقات ہیں، برصغیر کے مسلمانوں نے ترکی کی جنگ آزادی کیلئے بھرپور تعاون کیا۔ ترک قوم کبھی اپنےدوستوں کونہیں بھولتی، ترکی نے زلزلے، سیلاب اور قدرتی آفات کے دوران پاکستان کی مدد کی۔
انہوں نے کہا کہ ترکی کی برآمدات 270 ارب ڈالرسے بڑھ گئی ہیں، ترکی نے اپنے انفراسٹرکچر کو بہت ترقی دی ہے۔ پاکستان مختلف شعبوں خصوصا صنعت میں ترکی کے تجربات سےاستفادہ کرنا چاہتا ہے، دونوں ممالک کے درمیان تجارت، عوامی روابط بڑھانے کے مواقع موجود ہیں، ٹیکسٹائل انڈسٹری کے شعبے میں تعاون کیا جا سکتا ہے، ترک تاجروں کو پاکستان میں سرمایہ کاری کی دعوت دیتے ہیں۔