اسلام آباد: (ویب ڈیسک) وزیر اعظم شہباز شریف آج تین روزہ دورے پر ترکی روانہ ہوں گے، وزیر اعظم کا عہدہ سنبھالنے کے بعد ترکی کا پہلا دورہ ہو گا.
دفتر خارجہ کے مطابق ترک صدر طیب ایردوان پہلے عالمی رہنما تھے جنہوں نے شہباز شریف کو وزیر اعظم منتخب ہونے مبارکباد دی تھی، دونوں رہنماؤں نے عیدالفطر کے موقع پر ٹیلی فون پر بھی بات کی۔
وزیر اعظم کے ساتھ وزراء، معاونین خصوصی اور اعلیٰ سطح کا وفد بھی ہوگا، عاصم افتخار نے بتایا کہ پاکستان کا مختلف کمپنیوں کے نمائندگان پر مشتمل وفد بھی ترکی کا دورہ کرے گا، دورے کے دوران وزیراعظم ترک صدر سے ملاقات کریں گے، دونوں رہنماوں کی ملاقات کے بعد وفود کی سطح پر بات چیت ہوگی، دونوں رہنما علاقائی اور بین الاقوامی امور پر تبادلہ خیال کریں گے، دونوں رہنما ملاقاتوں کے بعد مشترکہ پریس کانفرنس سے خطاب کریں گے۔
ترک صدر وزیراعظم شہباز شریف کے اعزاز میں عشائیہ بھی دیں گے، اس سال پاکستان اور ترکی سفارتی تعلقات کے قیام کی 75ویں سالگرہ منا رہے ہیں، وزیراعظم اور ترک صدر مشترکہ طور پر ایک لوگو کی تقریب رونمائی میں شرکت کریں گے، وزیراعظم سے ترک وزیرخارجہ اور صحت بھی ملاقات کریں گے۔
وزیراعظم تاجروں اور سرمایہ کاروں کے ساتھ بات چیت کریں گے، وزیراعظم پاکستان ترکی بزنس کونسل فورم میں بھی شرکت کریں گے، وزیراعظم شہبازشریف سرمایہ کاری کے وسیع امکانات کو اجاگر کریں گے، وزیراعظم ترک کمپنیوں کو پاکستان میں سرمایہ کاری کیلئے ترغیب دینگے، پاکستان ترکی تجارتی اور اقتصادی تعلقات کو مضبوط بنانے کیلئے کام کرنے کی ترغیب دیں گے، پاکستان کے ممتاز کاروباری شخصیات ان تقریبات میں شرکت کریں گے۔
ترجمان دفترخارجہ نے مزید کہا کہ پاکستان اور ترکی دیرینہ تعلقات اور شاندار روایت پر مضبوطی سے جڑے ہوئے ہیں، ترک قیادت اور حکومت نے مسئلہ کشمیر پر ہمیشہ حمایت کی ہے، ترکی جموں و کشمیر پر او آئی سی رابطہ گروپ کا ایک اہم اور فعال رکن ہے، دونوں ممالک پرامن افغانستان سمیت متعدد مسائل پر یکساں خیالات رکھتے ہیں، ترک کمپنیوں نے پاکستان میں ایک ارب ڈالر سے زیادہ کی سرمایہ کاری کی ہے، ترک کمپنیوں کے سربراہان وزیراعظم شہباز شریف سے بھی ملاقات کریں گے۔

کراچی: (ویب ڈیسک) ملک میں بجلی کا بحران بڑھنے لگا، شارٹ فال سات ہزار میگا واٹ تک پہنچ گیا، شہری علاقوں میں 8 سے 10 گھنٹے تک لوڈشیڈنگ سے عوام شدید گرمی میں اذیت کا شکار ہیں۔
ملک میں بجلی کا شاٹ فال کم ہونے کی بجائےمزید بڑھنے لگا ،پاور ڈویژن ذرائع کے مطابق ملک میں آج بجلی کی طلب 28200 میگاواٹ ہے جبکہ بجلی کی پیداوار 21ہزار200میگاواٹ ہے۔ طلب اور رسد میں فرق بڑھنے کے باعث لوڈشیڈنگ کا دورانیہ بھی بڑھا دیا گیا۔
شہری علاقوں میں 8سے 10 گھنٹے تک بجلی کی لوڈشیڈنگ جاری ہے، دیہی علاقوں میں لوڈشیڈنگ کا دورانیہ 12 سے 14 گھنٹے تک پہنچ گیا، بجلی چوری اور نقصانات والے علاقوں میں لوڈشیڈنگ کا دورانیہ اس سے بھی زیادہ ہے۔

اسلام آباد: (ویب ڈیسک) وزارت مذہبی امور نے حج اخراجات کا تو اعلان کر دیا مگرعازمین کے ٹکٹ کی بکنگ اور ادائیگی نہ ہونے کے باعث پی آئی اے اور دیگر ائر لائنز نے آج سے شروع ہونے والا حج آپریشن ایک ہفتے کے لیے ملتوی کر دیا۔
وزارت مذہبی امور نے سرکاری سکیم کے تحت حج اخراجات کا اعلان کر دیا، سرکاری حج سکیم کے تحت اسلام آباد، خیبر پختونخوا اور پنجاب سے جانے والے عازمین کیلئے حج اخراجات 8 لاکھ 387 روپے جبکہ سندھ اور بلوچستان کے عازمین کیلئے حج اخراجات 7 لاکھ 91 ہزار مقرر کیے گئے ہیں تاہم پی آئی اے سمیت ملکی اور غیر ملکی ایئرلائنز نے وزارت کی جانب سے نوٹی فیکشن جاری نہ ہونے اور بکنگ پے منٹ نہ ہونے کے باعث آج سے شروع ہونے والا فلائٹ آپریشن ایک ہفتے کیلئے موخر کردیا ہے۔
قومی ایئر لائنز حکام کا کہنا ہے کہ وزات مذہبی امور کی جانب سے حج اخراجات کی تفصیل آنے پر بکنک کا آغاز کیا جائے گا۔

لاہور: (ویب ڈیسک) موسم کا حال بتانے والوں کے مطابق اسلام آباد، لاہور اور گوجرانوالہ میں آج بارش کا امکان ہے، سندھ اور بلوچستان کے کچھ علاقوں میں موسم شدید گرم رہے گا۔
محکمہ موسمیات نے آج پنجاب میں لاہور، گوجرانوالہ، گجرات اور دیگر علاقوں میں بارش کی پیشگوئی کی ہے، خیبرپختونخوا میں پشاور، سوات، مانسہرہ میں بادل برسنے کا امکان ہے۔
کشمیر اور گلگت بلتستان میں بھی بارش کی توقع ہے، جنوبی پنجاب اور سندھ میں موسم شدید گرم رہے گا۔ موہنجوداڑو، دادو میں درجہ حرارت انچاس تک جانے کا امکان ہے۔

لاہور: (ویب ڈیسک) پنجاب کی آٹھ رکنی کابینہ نے پہلے مرحلے میں حلف اٹھا لیا، گورنر بلیغ الرحمان نے صوبائی وزرا سے حلف لیا۔
صوبائی کابینہ کی حلف برداری تقریب گورنر ہاوس لاہور میں منعقد کی گئی، وزیراعلیٰ حمزہ شہباز بھی اس موقع پر موجود تھے، صوبائی وزرا میں خواجہ سلمان رفیق، ملک احمد خان، رانا محمد اقبال، علی حیدر گیلانی شامل ہیں، عطا تارڑ، اویس لغاری، حسن مرتضیٰ، چودھری بلال اصغر بھی حلف اٹھانے والوں میں شامل تھے۔ وزیراعلی حمزہ شہباز نے حلف اٹھانے کے بعد صوبائی وزرا کو مبارک باد دی۔
یہ امر قابل ذکر ہے کہ حمزہ شہباز نے 30 اپریل کو وزیراعلی پنجاب کے عہدے کا حلف اٹھایا تھا جبکہ صوبائی کابینہ تقریبا ایک ماہ کی تاخیر سے تشکیل پائی ہے۔