لاہور: (ویب ڈیسک) وزیر اعظم شہباز شریف اور وزیر اعلیٰ پنجاب حمزہ شہباز کی عبوری ضمانت میں 4 جون تک توسیع کر دی گئی۔
وزیر اعظم شہباز شریف اور وزیر اعلیٰ پنجاب حمزہ شہباز کے خلاف اسپیشل سینٹرل کورٹ لاہور میں منی لانڈرنگ ریفرنس کی سماعت ہوئی۔ وزیر اعظم شہباز شریف کے وکیل امجد پرویز کی جانب سے دلائل دیئے گئے۔
امجد پرویز ایڈووکیٹ نے مؤقف اختیار کیا کہ استغاثہ یہ کہتا ہے اکاؤنٹ سلمان شہباز کی ٹرانزیکشن کے لیے کھولا گیا اور کوئی پیسے بھی آتے ہیں تو ہر طرح سے اسے دیکھا جا سکتا ہے۔ فارم میں کہیں نہیں لکھا کہ اکاؤنٹ شہباز شریف کے لیے کھولا جا رہا ہے۔
عدالت نے استفسار کیا کہ کیا چالان میں چودھری شوگر مل کا ذکر ہے ؟ جس پر وکیل امجد پرویز نے کہا کہ چالان میں رمضان شوگر مل اور العریبیہ شوگر مل کا ذکر ہے جبکہ ایف آئی اے کی جانب سے چالان میں کہانیاں لکھی گئی ہیں اور چالان میں کوئی شواہد نہیں لگائے گئے۔
انہوں نے کہا کہ ایف آئی اے نے کئی لوگوں کے بیانات ریکارڈ کیے۔ ملزم بنایا گیا نہ گواہ اور مقصود چپڑاسی کے بیان دیکھیں تو ان کے تمام چیکس پر سیلف لکھا گیا ہے۔
اسپیشل سینٹرل کورٹ لاہور میں ملزمان کے اوپننگ اکاؤنٹ فارم پیش کیے گئے اور کیشیئر رمضان کا اکاؤنٹ اوپننگ فارم بھی پیش کیا گیا۔
عدالت نے ریمارکس دیئے کہ پرسنل ڈیٹا فارم پر کراس لگا ہوا ہے۔
وکیل امجد پرویز نے مؤقف اختیار کیا کہ محمد مقصود پر الزام ہے کہ اس نے 3 ارب 40 کروڑ روپے کی ٹرانزیکشن کی اور محمد مقصود کا تنخواہ کے علاوہ جو بھی اکاؤنٹ کھلا وہ رمضان شوگر مل کے لیٹر پیڈ پر نہیں تھا۔ محمد مقصود کے اکاؤنٹ میں 98 فیصد ٹرانزیکشن کیش نہیں بلکہ ٹرانسفر اینٹریز ہیں۔
انہوں نے کہا کہ محمد مقصود کے اکاؤنٹ سے کبھی شہباز شریف کو پیسے نہیں گئے اور ریکارڈز کے مطابق محمد مقصود اپنی ریٹررنز جمع کراتا تھا۔ اگر مان لیں کہ مقصود بے نامی تھا تو یہ دیکھنا ہے کہ وہ کس قانون کے تحت مجرم ہے کیونکہ وہ پبلک آفس ہولڈر نہیں تھا اور کیس کو جس انداز سے دیکھ لیں، شہباز شریف سے کوئی بھی تعلق بنتا ہو تو چلا جاؤں گا۔ تفتیشی نے سارا کیس کمرے میں بیٹھ کر بنایا۔
شہباز شریف کے وکیل امجد پرویز نےعبوری ضمانت کی توثیق پر دلائل مکمل کر لیے جس کے بعد اسپیشل سینٹرل عدالت لاہور نے حمزہ شہباز کے وکیل کو آئندہ سماعت پر دلائل دینے کی ہدایت کی۔

پشاور: (ویب ڈیسک) وزیر اعلیٰ خیبر پختونخوا نے کہا ہے کہ امپورٹڈ حکومت کے تشدد کا بدلہ ہر صورت لیا جائے گا۔
وزیر اعلیٰ خیبر پختونخوا محمود خان نے کالام میں عوامی اجتماع سے خطاب کرتے ہوئے کہا کہ امپورٹڈ حکومت نے آزادی مارچ کے دوران پر امن کارکنوں پر بدترین تشدد کیا اور ہم امپورٹڈ حکومت کی جانب سے تشدد کو کسی صورت معاف نہیں کریں گے۔
انہوں نے کہا کہ میں کارکنوں کو یقین دلاتا ہوں امپورٹڈ حکومت کے تشدد کا بدلہ ہر صورت لیا جائے گا۔ وزیر اعظم اور وزیر داخلہ کے خلاف شہید کارکنوں کے قتل کا مقدمہ درج ہو گا۔ رانا ثنا اللہ نے میرے خلاف ایف آئی اے درج کروائی ہے اور رانا ثنا اللہ کے قلم میں جتنا زور ہے وہ میرے خلاف استعمال کر لیں۔
محمود خان نے کہا کہ امپورٹڈ حکومت جتنا بھی تشدد کرے ہم حقیقی آزادی کی جنگ سے پیچھے ہٹنے والے نہیں ہیں اور ہمارے لیڈر عمران خان دوبارہ کال دیں گے تو پہلے سے زیادہ تعداد میں عوام نکلے گی۔
انہوں نے کہا کہ ہمارے پرامن کارکنوں پر جو تشدد ہوا اس کی ملکی تاریخ میں مثال نہیں ملتی اور یہ ملک اس لیے نہیں بنا تھا کہ یہ وسائل چوری کر کے بیرون ملک اپنے اثاثے بنائیں۔ امپورٹڈ وزیر اعظم قومی احتساب بیورو (نیب) کو مطلوب ہے اور آدھے سے زیادہ کابینہ ضمانت پر ہے۔
وزیر اعلیٰ کے پی کے نے کہا کالام گبرال ہائیڈرو پاور پراجیکٹ علاقے کی ترقی و خوشحالی میں سنگ میل ثابت ہو گا اور منصوبہ 36 ارب روپے کی لاگت سے مکمل کیا جائے گا۔

راولپنڈی: (ویب ڈیسک) مسلح افواج نے نیوکلیئر صلاحیت حاصل کرنے میں کردار ادا کرنے والوں کو خراج تحسین پیش کیا۔
پاک فوج کے شعبہ تعلقات عامہ (آئی ایس پی آر) کے مطابق 24 سال قبل 28 مئی 1998 کو پاکستان نے نیوکلیئر صلاحیت حاصل کی تھی اور 24 سال قبل اسی دن پاکستان ایٹمی قوت بنا جس سے خطے میں طاقت کا توازن بحال ہوا۔
آئی ایس پی آر کے مطابق مسلح افواج نے نیوکلیئر صلاحیت حاصل کرنے میں کردار ادا کرنے والوں کو خراج تحسین پیش کیا۔
ملک کا دفاع مضبوط کرنے والوں نے مشکلات کے باوجود نیوکلیئر صلاحیت کو ممکن بنایا۔

اسلام آباد: (ویب ڈیسک) وزیر خزانہ مفتاح اسماعیل کا کہنا ہے کہ آئی ایم ایف سے اسٹاف لیول معاہدہ جون میں ہو گا، اسکے بعد پیسے آجائیں گے۔علم نہیں یکم جون سے پیٹرول کی قیمت بڑھے گی یا نہیں۔
وزیر خزانہ مفتاح اسماعیل کا کہنا ہے کہ آئی ایم ایف سے اسٹاف لیول معاہدہ جون میں ہو گا۔ معاہدے کے بعد پیسے آ جائیں گے۔ آئی ایم ایف سے 3 بلین ڈالر ملنے ہیں۔ ہم نے درخواست کی 2 بلین ڈالر مزید دیں۔ امید ہے آئی ایم ایف سے سب ملا کر 5 بلین ڈالر آئیں گے۔
انہوں نے کہا ہے کہ آئی ایم ایف سے معاہدے کے بعد ورلڈ بینک سے ایک ارب ڈالر ملیں گے۔ ڈھائی ارب ڈالر ایشیائی ترقیاتی بینک سے ملٰیں گے۔ سعودی عرب سے تین بلین ڈالر کی توسیع بھی ہو جائے گی۔
یکم جون کو پیٹرول مہنگا ہو گا یا نہیں؟ وزیر خزانہ مفتاح اسماعیل نے صحافی کے سوال پر لاعلمی کا اظہار کردیا۔ کہاعلم نہیں پیٹرول کی قیمت بڑھے گی یا نہیں، ابھی پیٹرول مہنگا کیا۔ نہیں لگتا چار دن بعد دوبارہ قیمت بڑھے گی۔ بجلی کی قیمتیں بڑھانے کی ابھی کوئی سمری نہیں آئی۔
وزیرخزانہ مفتاح اسماعیل نے مزیدمہنگائی کا عندیہ دیتے ہوئے کہا ہے کہ پیٹرول اور ڈیزل مہنگا کیا گیا اورمہنگائی آئے گی۔پیٹرول مہنگا نہ کرتے تو زیادہ مہنگائی ہوتی اور روپے کی قدر بھی کم ہوتی۔پیٹرول کی قیمت خوشی سے نہیں بڑھائی، بین الاقوامی منڈی میں بڑھ گئی تھی ۔
ان کا کہنا ہے کہ جو مہنگائی کا طوفان پچھلی حکومت کی وجہ سے آیا اس کا تدارک ضروری ہے۔ڈیزل کی قیمت بڑھنے سے اندازہ ہے کہ بسوں کے کرائے بھی بڑھیں گے۔ ملک میں85فیصد پیٹرول 40 فیصد امیر ترین گھرانے استعمال کرتے ہیں۔
ان کا کہنا ہے کہ شوکت ترین کا معاہدہ ڈیزل کی قیمت 300 اور پیٹرول 260 روپے کرناتھا۔ہم شوکت ترین کے والے فارمولے پر عمل نہیں کررہے۔شوکت ترین کہہ گئے تھے کہ وہ پیسے رکھ کے گئے ہیں۔ہمیں بتا دیں وہ پیسے کہاں ہیں، ہمیں کہیں نہیں ملے۔عمران خان نے جو کیا اس سے ملک کی معیشت دیوالیہ ہوجاتی۔
ان کا کہنا ہے کہ 8کروڑ 40 لاکھ پاکستانیوں کو ماہانہ وظیفہ دیا جائے گا۔وظیفہ دینے سے 28 کروڑروپے کے اخراجات حکومت برداشت کرے گی۔ غریب ترین لوگوں کو 2 ہزار روپے دیئے جائیں گے۔بےنظیر انکم سپورٹ والے رجسٹرڈ افراد کو دو دن تک پیسے دے دیئے جائیں گے۔
انہوں نے کہا ہے کہ آبادی کے ایک تہائی افراد کو جون میں وظیفہ دینے کا اعلان کیا۔شناختی کارڈکےذریعےتصدیق کےبعد 2ہزارروپےاداکیےجائیں گے۔ریلیف ا سکیم سے فائدہ اٹھانے کےلیے 786 نمبر پر شناختی کارڈنمبر بھیجا جاسکتا ہے۔ غریب عوام کی مددکرناہماری اولین ترجیح ہے۔وزیر اعظم کی ہدایت پر اگلے سال وظیفے میں اضافہ بھی کریں گے۔

اسلام آباد: (ویب ڈیسک) حکومتی اتحادی جماعتوں کی جانب سے چیئرمین قومی احتساب بیورو (نیب) کا نام فائنل کر لیا گیا۔
ذرائع کے مطابق چیئرمین نیب جسٹس ریٹائرڈ جاوید اقبال کی جگہ نئے چیئرمین نیب کا نام حکومتی اتحاد نے فائنل کر لیا۔ سپریم کورٹ کے سابق جج جسٹس ریٹائرڈ مقبول باقر کے نام پر حکومتی اتحادی جماعتوں میں آپس میں اتفاق کیا گیا ہے۔
مسلم لیگ ن، پیپلز پارٹی اور دیگر اتحادی جماعتوں کے مابین نئے چیئرمین نیب کے نام پر مشاورت ہوئی جس میں جسٹس ریٹائرڈ مقبول باقر کے نام پر اتفاق کیا گیا۔ سابق صدر آصف علی زرداری اور سابق وزیر اعظم نواز شریف نے بھی اس نام پر اتفاق کیا۔
ذرائع کے مطابق قومی اسمبلی میں اپوزیشن لیڈر اور پاکستان تحریک انصاف (پی ٹی آئی) کے منحرف رکن راجہ ریاض بھی جسٹس ریٹائرڈ مقبول باقر کے نام پر اتفاق کریں گے اور جس کے بعد قوی امکان ہے کہ وہی نئے چیئرمین نیب ہوں گے۔
واضح رہے کہ جسٹس (ر) مقبول باقر سندھ ہائی کورٹ سے سپریم کورٹ میں پروموٹ ہوئے تھے اور ان کے بطور جج کردار پر کبھی کوئی اعتراض نہیں ہوا۔
موجودہ چیئرمین جسٹس (ر) جاوید اقبال کے عہدے کی مدت 2 جون کو ختم ہو جائے گی اس لیے نئے چیئرمین نیب کی تعیناتی اس سے قبل ہی ہونے کا امکان ہے۔

لاہور : (ویب ڈیسک) لاہورسمیت ملک بھر میں بجلی کے شارٹ فال کے باعث لوڈشیڈنگ کا دورانیہ 12 گھنٹے تک پہنچ گیا، گرمی کی وجہ سے شہری بلبلا اٹھے۔
تفصیلات کے مطابق شدید گرمی میں بجلی کی طلب بھی بڑھ گئی، لیسکو کی بجلی کی طلب 4750 میگاواٹ سے تجاوز کر چکی ہے، شہری علاقوں میں لوڈشیڈنگ کا دورانیہ 8 سے 10 جبکہ دیہات میں 12 گھنٹے تک پہنچ گیا ہے، بجلی کی بندش کی وجہ سے شہریوں کو شدید مشکلات کا سامنا کرنا پڑ رہا ہے، معمولات زندگی بری طرح متاثر ہو گئے ہیں۔
دوسری جانب پاور ڈویژن ذرائع کا کہنا ہے کہ اس وقت پانی سے 4 ہزار 611 میگاواٹ بجلی پیدا کی جارہی ہے، سرکاری تھرمل پلانٹس ایک ہزار 156 میگاواٹ بجلی پیدا کررہے ہیں، نجی شعبے کے بجلی گھروں کی مجموعی پیداوار 9 ہزار 568 میگاواٹ ہے، ونڈ پاور پلانٹس 828 میگاواٹ اور سولرپلانٹس سے پیداوار 126 ہے، بگاس سے چلنے والے پلانٹس 142 میگاواٹ بجلی پیدا کررہے ہیں، جوہری ایندھن 2 ہزار 284 میگاواٹ بجلی پیدا کی جارہی ہے۔
ملک میں بجلی کی پیداوار کم ہونے پر لیسکو کا کوٹہ بھی کم کردیا گیا این پی سی سی کی جانب سے لیسکو کو 3750 میگاواٹ بجلی فراہم کی جارہی ہے اور لیسکو کو 700 میگاواٹ بجلی کے شارٹ فال کا سامنا ہے،شارٹ فال بڑھنے کے باعث شہر کے مختلف علاقوں میں جبری لوڈشیڈنگ کا سلسلہ شروع ہونے سے شہریوں کا گرمی سے برا حال ہو گیا۔