کوئٹہ: (ویب ڈیسک) ملک کی موجود صورتحال کے پیش نظر گورنر بلوچستان سید ظہور آغا نے استعفیٰ دے دیا۔
ملک بھر میں جاری سیاسی صورتحال کے پیش نظر گورنر بلوچستان نے اپنا استعفیٰ صدر مملکت ڈاکٹر عارف علوی کو بھجوا دیا ہے۔
سید ظہور آغا نے کہا کہ میں امپورٹڈ اور کرپٹ وزیر اعظم کے انڈر کام نہیں کر سکتا۔
قبل ازیں گورنر سندھ عمران اسماعیل، گورنر خیبر پختونخوا شاہ فرمان اور گورنر گلگت بلتستان نے بھی استعفیٰ دے دیا تھا۔
انقرہ: (ویب ڈیسک) مصر میں سیاحوں کو لے جانے والی بس سامنے سے آنے والے ٹرک سے ٹکرا گئی جس کے نتیجے میں 10 افراد ہلاک اور 14 زخمی ہوگئے۔
عالمی خبر رساں ادارے کے مطابق مصر میں دریائے نیل کی سیر کو جانے والے سیاحوں کی بس ایک تیز رفتار ٹرک سے ٹکراگئی۔ تصادم اتنا خوفناک تھا کہ بس کے پرخچے اُڑ گئے۔
حادثے میں 10 سیاح ہلاک ہوگئے جن میں سے 4 کا تعلق فرانس اور ایک بیلجیئم کا شہری کا تھا جب کہ 14 زخمیوں میں بھی 8 فرانسیسی اور 6 بیلجیئم کے شہری ہیں۔ زخمیوں کو اسپتال منتقل کردیا گیا۔
تصادم کے بعد بس میں آگ بھڑک اُٹھی تھی جس پر فائر بریگیڈ کے عملے نے قابو پالیا۔ زخمیوں میں سے دو کی حالت نازک بتائی جا رہی ہے۔ مصر میں سیاحوں کی حفاظت کے لیے انتظامات ناکافی ہونے کے باعث ایسے حادثات ہوتے رہتے ہیں۔
کابل: (ویب ڈیسک) افغانستان میں ایرانی قونصل خانوں پر شہریوں کے حملے پر تہران نے افغان وفد کو طلب کر کے شدید احتجاج کیا۔
افغان میڈیا کے مطابق ایران میں افغان مہاجرین کو مبینہ تشدد کا نشانہ بنائے جانے پر افغانستان میں مظاہرے جاری ہیں۔ ایرانی وزارت خارجہ نے تہران میں طالبان حکومت کے ناظم الامور کو طلب کیا اور افغانستان میں ایران مخالف مظاہروں پر سخت احتجاج ریکارڈ کروایا۔
حکام نے طالبان عہدیدار کو مطلع کیا کہ افغان شہریوں کی جانب سے کیے گئے حملوں کے بعد ایرانی قونصل خانے بند رہیں گے اور تمام کارروائیاں اس وقت تک معطل رہیں گی جب تک طالبان سفارتکاروں کی سیکورٹی کو یقینی نہ بنائیں اور حملہ آوروں کیخلاف شدید ایکشن نہ لیں۔
واضح رہے کہ ایران کا یہ اقدام افغان شہر ہیرات میں ایرانی قونصل خانے پر شہریوں کے پتھراؤ کرنے کے ایک دن بعد سامنے آیا ہے جبکہ کابل میں ایرانی سفارت خانے کے دروازے کو بھی نذرِ آتش کیا گیا۔
کیف: (ویب ڈیسک) یوکرین کی سیکیورٹی فورسز نے فوجی وردی پہن کر جھانسہ دینے کی کوشش کرنے والے پوٹن کے ایک قریبی اتحادی کو گرفتار کرلیا۔
عالمی خبر رساں ادارے کے مطابق یوکرینی صدر وولودیمیر زیلنسکی نے روس سے کہا ہے کہ صدر پوٹن اپنے قریبی اتحادی کی رہائی چاہتے ہیں تو بدلے میں یوکرینی قیدیوں کو قید سے آزاد کردیں۔
یوکرینی صدر کی یہ پیشکش ملکی سیکیورٹی فورسز کے آپریشن میں روسی صدر پوٹن کے اہم اتحادی اور بااثر سیاست دان وکٹر میدویدچوک کی گرفتاری کے بعد سامنے آئی ہے۔
وکٹر میدویدچوک کو اس وقت گرفتار کیا گیا تھا جب وہ سیکیورٹی فورسز کو جھانسہ دینے کی کوشش کرتے ہوئے اپنے گھر سے محفوظ مقام کی جانب فرار ہو رہے تھے۔ وکٹر میدویدچوک یوکرین کے رہائشی ہیں اور امیر ترین افراد میں سے ایک ہیں۔
وکٹر میدویدچوک یوکرین میں روس کے مفادات کا تحفظ کرتے تھے اور سیاسی طور پر بھی روسی صدر کی حمایت کیا کرتے تھے۔
یوکرین کی سیکیورٹی سروسز کے سربراہ ایوان باکانوف نے فیس بک پوسٹ میں لکھا کہ آپ روس کے اتحادی سیاست دان ہو سکتے ہیں اور برسوں تک جارح ریاست کے لیے کام کر سکتے ہیں اور چھپنے کے لیے یوکرینی فوج کی وردی بھی پہن سکتے ہیں لیکن یہ آپ کو سزا سے بچنے میں مدد گار نہیں ہوگی۔
نابلس: (ویب ڈیسک) صیہونی فورسزکی جانب سے فلسطین میں ظلم و بربریت کا سلسلہ تھم نہ سکا، 34 سالہ فلسطینی نوجوان کو سینے میں گولی مار کر شہید کر دیا۔
ظالم صیہونی فوج نے نابلس شہر میں آج ایک اور فلسطینی شہری کی جان لے لی۔ غیرملکی خبر ایجنسی کے مطابق 34 سالہ جوان کی شناخت محمد حسن کے نام سے ہوئی ہے جسے سینے پر گولی مارکر شہید کیا گیا۔
صیہونی فورسز کی جانب سے نام نہاد آپریشن کا سلسلہ پانچ روز سے جاری ہے۔
کراچی: (ویب ڈیسک) کراچی کے علاقے سٹیل ٹاون میں 7 سالہ بچے کو زیادتی کے بعد سفاکانہ طریقے سے قتل کرنے والا درنده صفت ملزم گرفتار کر لیا گیا۔
ایس ایس پی ملیر کے مطابق ملزم ارشد نے دو روز قبل 7 سالہ معصوم بچے علی کو گھر سے بہلا پھسلا کر اغوا کیا اور زیادتی کے بعد قتل کر دیا۔ واردات کے بعد ملزم نے بچے کی لاش علاقے سے کچھ دور سورما گوٹھ کی جھاڑیوں میں پھینک دی، بچے کے اچانک لاپتہ ہونے سے اہلخانہ سخت پریشان ہو گئے اور بچے کو دن بھر تلاش کرتے رہے۔
شام کو علاقہ مکینوں کی جانب سے پولیس کو بچے کی لاش ملنے کی اطلاع دی گئی، پولیس نے اہل خانہ کو مطلع کیا تو انہوں سات سالہ علی عباس کو شناخت کرلیا۔ پولیس نے مقدمہ درج کر کے ملزم کی گرفتاری کے لئے خصوصی ٹیم تشکیل دی۔
ایس ایس پی ملیر کے مطابق پولیس نے ٹیکنیکل شواہد کی روشنی میں دو دن میں ملزم کو گرفتار کرلیا، ملزم سے مزید تفتیش کی جارہی ہے۔ واضح رہے بچوں کے حقوق اور جنسی تشدد کے واقعات کی روک تھام کے لئے 2019 میں پیش کردہ زینب الرٹ بل تاحال التوا کا شکار ہے۔
سنہ 2019 میں وزارت انسانی حقوق کی جانب سے پیش کیے جانے والے مسودے کے مطابق بچوں کے خلاف جرائم کے واقعات کی روک تھام کے لیے اور ایسے کسیز پر جلد از جلد کارروائی اور مجرم کی سزا کے حوالے سے نکات شامل کیے گئے۔ مسودے کے مطابق پولیس کو اس بات کا پابند کیا گیا کہ کسی بچے کی گمشدگی یا اغوا کے واقعے کی رپورٹ درج ہونے کے دو گھنٹے کے اندر اس پر کارروائی عمل میں لائی جائے گی جبکہ بل میں یہ بھی کہا گیا کہ اگر کوئی پولیس افسر قانون کے مطابق اس پر عمل درآمد نہیں کرتا تو اس کا یہ اقدام قابلِ سزا جرم تصور ہو گا۔ ماہرین کے مطابق اس قانون کا چاروں صوبوں میں اطلاق اور اس پر عمل درآمد سے ایسے افسوسناک واقعات میں کمی آئے گی۔
ممبئی: (ویب ڈیسک) دھوکا دہی اور فراڈ کے کیس میں بالی ووڈ اداکارہ شلپا شیٹھی کی والدہ سنندا شیٹھی کو بڑا ریلیف مل گیا۔
بھارتی میڈیا کے مطابق ممبئی کی میٹروپولیٹن مجسٹریٹ کی عدالت نے حال ہی میں اداکارہ شلپا شیٹھی کی والدہ سنندا شیٹھی کو دھوکا دہی اور فراڈ کے ایک کیس میں ان کے خلاف جاری کردہ قابل ضمانت وارنٹ گرفتاری کو منسوخ کرنے کے بعد ضمانت دے دی۔
رپورٹس کے مطابق سنندا شیٹھی نے عدالت میں پیش ہوکر اپنے وارنٹ گرفتاری جو کہ گزشتہ ماہ ان کے کیس کی سماعت کے دوران عدالت میں حاضر نہ ہونے پر اندھیری کے میٹروپولیٹن مجسٹریٹ آر آر خان نے جاری کیے تھے کو منسوخ کرنے کی درخواست دائرکی تھی۔
اگرچہ سنندا کے وکیل نے سماعت سے استثنیٰ کی درخواست کی تھی لیکن عدالت نے درخواست مسترد کرتے ہوئے 1000 روپے کے وارنٹ جاری کردئیے تھے۔ اب عدالت نے انہیں ضمانت پر رہائی کی اجازت دے دی ہے۔
میڈیا رپورٹس کے مطابق عدالت نے سنندا شیٹھی کی 15 ہزار کے ذاتی مچلکوں کے عوض اور 25000 رو پے کی عبوری ضمانت منظور کرلی ہے۔
واضح رہے کہ شکایت کنندہ بزنس مین پرہاد امرا نے الزام لگایا ہے کہ شلپا شیٹھی کندرا کے آنجہانی والد سریندر شیٹھی نے ان سے 2015 میں 21 لاکھ روپے بطور قرض لیے تھے جو انہیں جنوری 2017 میں واپس کرنے تھے۔ لیکن انہوں نے ان کے پیسے ادا نہیں کیے اور اب ان کی بیوی اور بیٹیاں بھی انہیں مذکورہ رقم واپس کرنے سے انکار کررہی ہیں۔
دوسری جانب اداکارہ شلپاشیٹھی نے پرہاد امرا پر ان کی اور ان کی بہن شمیتا شیٹھی کی عوامی ساکھ کو مبینہ طور پر نقصان پہنچانے کا الزام لگایا ہے۔ اداکارہ کا مزید کہنا ہے کہ پرہاد امرا کی شکایت ’’بھتہ خوری کا طریقہ کار‘‘ ہے اور ان کی ’’شہرت اور عوامی حیثیت‘‘ کو خطرہ ہے۔
کیلفورنیا: (ویب ڈیسک) ایپل واچ سمیت کئی فِٹ بِٹ آلات بطورِ خاص دل کی دھڑکن ناپنے کے لیے امریکی فوڈ اینڈ ڈرگ اتھارٹی ( ایف ڈی اے) کی منظوری کے منتظر تھے۔ اب ادارے نے باضابطہ طور پر اسے ’پیسوو ہارٹ ردم مانیںٹرنگ‘ کے لیے منظور کرلیا گیا ہے۔
نئی ٹیکنالوجی کے تحت فِٹ بِٹ وقفے کے ساتھ دن میں کئی مرتبہ دل کی دھڑکن اور اس میں اتارچڑھاؤ کو نوٹ کرتا ہے اور کسی خطرناک کیفیت کی صورت میں دیکھتا ہے کہ کیا دل کی کیفیت متاثر ہورہی ہے؟ اسے ہم آرٹیریئل فِبلریشن کہا جاتا ہے۔یہ کیفیت ایک جانب تو مریض کو فالج تک لے جاسکتی ہے اور دوم ان کو جان کے لالے بھی پڑسکتے ہیں۔
فِٹ بٹ سافٹ ویئر سے خود مریض بھی اپنی کیفیات جان سکتے ہیں ورنہ یہ بھی ممکن ہے کہ آلہ پس منظر میں رہ کر دل کی کیفیت اور دھڑکن نوٹ کرسکتا ہے۔
فٹ بٹ نے 2020 میں یہ فیچر پیش کیا تھا۔ اسے کئی افراد پر آزمایا گیا تو اس نے 98 فیصد درستگی سے دل کی بے ترتیب دھڑکن کے کئی کیس شناخت کئے اور ان مریضوں کی جان بچانا ممکن ہوئی۔ پھر ایپل واچ میں اسے مزید بہتر بنایا گیا ہے۔ اس کے بعد ایپل نے اپنے فٹ بٹ کے لیے بار بار ایف ڈی اے سے رابطہ کرتی رہی تھی۔ دو ماہ قبل ایپل نے دوبارہ ایف ڈی اے سے درخواست کی تھی کہ وہ نئے مصدقہ ثبوت کی روشنی میں اسے عام استعمال کی منظوری دیدے۔
اگرچہ اب بھی فٹ بٹ آلات روایتی آلات کے مقابلے میں قدرے مؤثر نہیں لیکن اس سے خطرناک مواقع کی نشاندہی کرکے مریض فوری طبی امداد کے لیے ہسپتال جاسکتا ہے۔ ماہرین کا خیال ہے کہ فٹ بٹ پہننے سے دل کے مریض آٹریئل فبلریشن کو فوری طور پر شناخت ضرورکرسکتے ہیں۔ اس طرح دل کی کفییت پر مسلسل نظر رکھی جاسکتی ہے۔
فٹ بٹ نے اعلان کیا ہے کہ منظوری کے بعد سب سے پہلے اسے امریکی عوام کے لیے پیش کیا جائے گا۔
نیویارک: (ویب ڈیسک) نیویارک میں نیل آرم سٹرانگ کی جانب سے چاند سے لائی گئی مٹی کو فروخت کیلئے پیش کر دیا گیا۔
چاند کی مٹی کا انتہائی اہمیت کا حامل نمونہ انیس سو انہتر میں اپالو گیارہ مشن پر جانے والے خلا نورد نیل آرم سٹرانگ مشن کی تکمیل کے بعد اپنے ساتھ لائے جس کا کچھ حصہ اب بون ہیمس سپیس ہسٹری کی جانب سے فروخت کیلئے پیش کیا جا رہا ہے۔
بولی میں ادارے نے مزید خلائی اشیاء بھی فروخت کیلئے پیش کیں۔
نئی دہلی: (ویب ڈیسک) گرمی کے توڑ کیلئے رکشہ ڈرائیور عموما واٹر کولر لگاتے ہیں تاہم ایک انوکھی سوچ پر عمل کرتے ہوئے ڈرائیور نے اپنے رکشے کی چھت پر گھاس اگا لی۔
میڈیا رپورٹ کے مطابق بھارت میں ایک شخص نے گرمی کا توڑ اس طرح نکالا کہ اس نے اپنے رکشے کی چھت پر گھاس کے ساتھ ساتھ مختلف پودے بھی اگا لئے جو سب کی توجہ کا مرکز بن گئے۔
اس حوالے سے جاری کردہ ایک تصویر میں دیکھا جا سکتا ہے کہ ڈرائیور رکشہ میں بیٹھا ہے جب کہ اس کا رکشہ کافی منفرد دکھائی دے رہا ہے کیونکہ اس شخص نے گرمی سے بچنے کیلئے رکشہ کو چمن میں بدل دیا۔
تصویر کے ساتھ ایک کیپشن دی گئی ہے کہ بھارتی رکشہ ڈرائیور نے اپنے رکشے پر گھاس اگائی ہوئی ہے تاکہ گرمی میں خود کو بھی ٹھنڈا رکھ سکے ، یہ ایک شاندار آئیڈیا ہے۔
Error 403: The request cannot be completed because you have exceeded your quota..
Domain code: youtube.quota
Reason code: quotaExceeded
