نئی دہلی: (ویب ڈیسک) بھارت میں چوروں کے ایک گروہ نے 60 فٹ طویل لوہے کا پل تین روز میں چوری کر لیا۔
غیر ملکی خبر رساں ایجنسی کے مطابق بھارتی ریاست بہار میں کباڑیوں کے ایک گروہ نے سرکاری ملازمین کا روپ دھاڑ کر لوہے کا پل نکال کر لے گئے انہیں یہ پل غائب کرنے میں صرف 3 دن لگے۔
پولیس کے مطابق چور محکمہ آبپاشی کے ملازمین بن کر مکمل تیاری کے ساتھ آئے تھے اور وہ اپنے ساتھ بڑی گاڑیوں کے علاوہ لوہے کو کاٹنے کے لیے بلڈوزر اور گیس کٹرز بھی لائے تھے۔ چوروں نے 3 دن کے اندر اپنی تمام کارروائی مکمل کی اور 500 ٹن وزنی لوہے کا پُل ٹکڑوں میں لے کر فرار ہو گئے۔
سرکاری افسران کا روپ دھارے چوروں نے مقامی محکمے کے ملازمین سے بھی مدد لی اور دن دیہاڑے سب کی آنکھوں میں دھول جھونک کر پل کے ٹکڑے ٹکڑے کر کے چلتے بنے۔
محکمہ آبپاشی کے انجینیئر ارشد کمال شمسی کے مطابق گاؤں والوں نے اطلاع دی تھی کہ کچھ افراد پرانے اور خستہ حال پل کو اُکھاڑ رہے ہیں۔ چور 60 فٹ طویل اور 12 فٹ اونچا پُل آہستہ آہستہ اُکھاڑتے رہے لیکن اچانک ایک دن اس 50 سال پرانے پُل کے غائب ہو جانے پر گاؤں والے حیران ہو کر رہ گئے۔
لوہے کا یہ پُل 1972 میں ایک نہر کے اوپر تعمیر کیا گیا تھا لیکن اس کے مخدوش ہونے پر 5 سال قبل اس کی جگہ ایک متبادل پل بنایا گیا جو اب عوام کے استعمال میں ہے۔
پولیس نے اس دلچسپ چوری کی تحقیقات کا آغاز کردیا ہے تاہم ابھی تک کوئی گرفتاری عمل میں نہیں لائی جا سکی ہے۔
