اسلام آباد: (ویب ڈیسک) کورونا وائرس کے تیزی سے پھیلاؤ کے باعث اسلام آباد کے 9 سرکاری تعلیمی اداروں کو فوری طور پر بند کرنے کے احکامات جاری کردیئے گئے ہیں۔
اسلام آباد کے تعلیمی اداروں میں کورونا کا پھیلاؤ تیزی کے ساتھ جاری ہے ، وفاقی دارالحکومت میں مزید 9 سرکاری تعلیمی اداروں میں کورونا کے 21 کیس رپورٹ ہوئے ہیں جس کے بعد کورونا مثبت کیسز والے تعلیمی اداروں کو فوری بند کرنے کے لیے ڈی ایچ او نے انتظامیہ کو مراسلہ جاری کردیا ہے۔
ڈسٹرکٹ ہیلتھ آفیسر کی جانب سے جاری کردہ مراسلہ کے مطابق کورونا کیس رپورٹ ہونے والے تعلیمی اداروں کو فوری بند کیاجائے ، تعلیمی اداروں کو آئندہ احکامات تک بند رکھا جائے ۔
واضح رہے کہ گزشتہ 4 روز میں 19 سرکاری تعلیمی اداروں میں کورونا کے 49 کیس رپورٹ ہوئے۔

اسلام آباد: (ویب ڈیسک) الیکشن کمیشن نے اثاثوں کی تفصیلات جمع کرانے پر حماد اظہر اور فرخ حبیب سمیت گیارہ ارکان پارلیمنٹ کی رکنیت بحال ک
الیکشن کمیشن نے اثاثوں کی تفصیلات جمع کرانے پر ایک سینیٹر،سات ارکان قومی اسمبلی،پنجاب اسمبلی کے دو اور سندھ اسمبلی کے ایک ایم پی اے کی رکنیت بحال کر دی،،وفاقی وزیر حماد اظہر اور وزیر مملکت فرخ حبیب کی رکنیت بحال ہو گئی،، سینٹر مصدق ملک ، رکن قومی اسمبلی فرخ الطاف ،صالح محمد، قاسم نون ،منورہ بلوچ اور شنیلہ رتھ کی رکنیت بھی بحال کردی گئی۔
پنجاب اسمبلی کے ارکان عبد الرؤف مغل اور حسینہ بیگم ،سندھ اسمبلی کے رکن ہری رام کی بھی رکنیت بحال ہو گئی۔

اسلام آباد: (ویب ڈیسک) ڈسٹرکٹ اینڈ سیشن کورٹ اسلام آباد نے عثمان مرزا تشدد کیس میں متاثرہ لڑکی اورلڑکے کے ناقابل ضمانت وارنٹ گرفتاری جاری کر دئیے ہیں۔
ایڈیشنل ڈسٹرکٹ اینڈ سیشن جج عطا ربانی نے سیکٹر ای الیون میں لڑکا لڑکی تشدد اور بلیک میلنگ کیس کی سماعت کی ۔
عدالت نے متاثرہ لڑکے اور لڑکی کی طلبی کے باوجود عدم پیشی پر وارنٹ گرفتاری جاری کردئیے، وکیل کی جانب سے عدالت میں استدعا کی گئی کہ متاثرین شہر سے باہر ہیں، عدالت پہنچنے میں تین گھنٹے لگ جائیں گے ۔ بعدازاں عدالت نے تشدد کیس کی سماعت 19 جنوری تک ملتوی کردی ہے۔

اسلام آباد: (ویب ڈیسک) وفاقی دارالحکومت میں فائرنگ کا ایک اور واقعہ سامنے آیا ہے، نامعلوم افراد کی فائرنگ سے ایک شخص جاں بحق ہو گیا۔
تھانہ کورال کے علاقہ علی پور میں فائرنگ کا واقعہ ہوا۔دو موٹرسائیکل سواروں نے مقتول پر فائرنگ کی، فائرنگ سے یوسف نامی شہری جاں بحق ہوگیا۔
ایس پی رورل ضیاء الدین کا کہا ہے کہ ابتدائی تحقیقات کے مطابق واقعہ خاندانی دشمنی کا ہے۔ ملزمان کی گرفتاری کے لئے پولیس ٹیمیں چھاپے ماررہی ہیں۔

اسلام آباد: (ویب ڈیسک) وفاقی وزیر برائے اطلاعات و نشریات فواد چودھری نے انکشاف کیا ہے کہ کورونا کی نئی قسم اومیکرون سے اسکولوں کے بچے زیادہ متاثر ہو رہے ہیں۔ ان کا کہنا تھا کہ اومیکرون کیسزکی تعداد میں اضافہ تشویشناک ہے۔
وفاقی وزیر حماد اظہر کے ہمراہ وفاقی کابینہ اجلاس کے بعد میڈیا سے گفتگو کرتے ہوئے انہوں نے کہا کہ چاہتے ہیں دو تین امور پر اپوزیشن کے ساتھ بیٹھیں لیکن اپوزیشن ایسا نہیں چاہتی، چئیرمین نیب اور جوڈیشل ترامیم پر اپوزیشن سے مشاورت ضروری ہے۔ اپوزیشن سمجھتی ہے حکومت جلد گر جائے گی لیکن ایسا نہیں ہو گا۔ اپوزیشن لیڈرشپ نے حکومت گرانے کے چکرمیں چارسال گزاردیئے، میرا خیال ہے اپوزیشن اسی چکرمیں اگلے پانچ سال بھی گزارے گی۔
کورونا وائرس کے حوالے سے ان کا کہنا تھا کہ سکولوں کے بچے کورونا کی نئی قسم اومی کرون سے متاثر ہو رہے ہیں، اومی کرون کیسز میں اضافہ تشویش ناک ہے، روزانہ پانچ ہزار کے قریب کیسز رپورٹ ہو رہے ہیں، کراچی میں اومی کرون کے کیسززیادہ سامنے آرہے ہیں، دو ارب ڈالرسے زائد ویکسین ہم نے امپورٹ کی، کرنٹ اکاؤنٹ خسارے میں دو بلین ڈالرکی ویکسین شامل ہے۔ کابینہ کواومی کرون کے حوالے سے بریفنگ دی گئی، جن لوگوں نے بوسٹر ڈوز لگوائی، انہیں اومی کرون کا کم خطرہ ہے۔
وفاقی وزیر اطلاعات کا کہنا تھا کہ یوریا کی پیداوارپاکستان کی تاریخ کی سب سے بڑی پیداوارہے، پاکستان کے زیادہ ترعلاقوں میں کھاد اس وقت میسرہے، گردشی قرضے میں کمی آنے کا یہ پہلا سال ہو گا۔ ایسے ممبران کو سٹینڈنگ کمیٹی کا ممبرنہ بنایا جائے جن کا کسی بزنس سے تعلق ہو۔
اس موقع پر وفاقی وزیر برائے توانائی حماد اظہر کا کہنا تھا کہ سردیوں میں کراچی میں گیس کا مسئلہ پیدا ہوا، سردیوں میں کراچی کی 1900 انڈسٹریز کو گیس روکی جاتی تھی لیکن اس سال انہوں نے عدالت سے حکم امتناع لے لیا، امید ہے کل سندھ ہائیکورٹ کا فیصلہ اچھا آئے گا، گیس کے لیے گھریلوصارفین کو ترجیح دے رہے ہیں،
انہوں نے کہا کہ دنیا بھرمیں مہنگائی ہے، اپوزیشن یہاں سیاست کررہی ہے، اپوزیشن سے پوچھیں سٹیٹ بینک والا ہمارا قانون تبدیل کریں گے، یہ (ن)لیگ والا، مسلم لیگ (ن)نے آخری سال گروتھ دکھانے کے لیے اربوں ڈالرجھونکے، اگرآزاد اسٹیٹ بینک ہوتا تو 2017 میں اتنا بڑا کرائسز نہ آتا۔ اپوزیشن نے سٹیٹ بنک کو متنازعہ بنانے کی کوشش کی۔
وفاقی وزیر برائے توانائی کا کہنا تھا کہ پورپ نے ہماری طرز پر بل پاس کروایا اور وہاں سٹیٹ بینک آزاد ہے، سٹیٹ بینک کے بورڈ کا تعین وفاقی حکومت کرے گی ، گورنر اور ڈپٹی گورنر کی تقرری بھی وفاقی حکومت کرے گی، مرکزی بینک کے تمام اثاثہ جات وفاقی حکومت کی ملکیت ہی رہیں گے، اس معاملے پر ہماری آئی ایم ایف سے طویل بات ہوئی۔

اسلام آباد: (ویب ڈیسک) وزیر داخلہ شیخ رشید احمد سے برطانیہ کے پاکستان میں ہائی کمشنرکرسچن ٹرنر کی ملاقات ہوئی۔پاکستان برطانیہ دو طرفہ تعلقات سمیت باہمی دلچسپی کے دیگر امور پر بات چیت کی۔
ملاقات میں سزا یافتہ شہریوں کی واپسی اور مجرمان کی حوالگی سے متعلق پاک برطانیہ معاہدوں پر پیش رفت کا جائزہ لیا۔ملاقات میں پاک برطانیہ دو طرفہ معاہدوں کو جلد حتمی شکل دینے اور جلد دستخط کرنے پر اتفاق کیا گیا۔
دونوں رہنماؤں کے درمیان اتفاق کیا گیا کہ معاہدے دونوں ممالک کے مشترکہ مفاد میں ہیں۔ معاہدوں پر پیش رفت کو تیز کرنے کی ضرورت ہے۔
شیخ رشید احمد کا کہنا تھا کہ باہمی معاہدوں سے تعلقات میں مزید وسعت اور مضبوطی آئیگی۔ برطانیہ اور پاکستان کے تعلقات انتہائی دیرینہ ہیں۔ برطانیہ کے ساتھ تعلقات کو قدر کی نگاہ سے دیکھتے ہیں۔ پاکستان اور برطانیہ کے درمیان تعلقات انتہائی دوستانہ اور ہمہ جہت ہیں۔
برطانوی ہائی کمشنر کاکہنا پاکستان کی افغانستان کے معاملے میں غیرملکی اور افغان شہریوں کے انخلاء میں معاونت قابل ستائش ہے۔