لاہور: (ویب ڈیسک) پنجاب اسمبلی میں اپوزیشن لیڈر سبطین خان نے پاکستان تحریک انصاف (پی ٹی آئی) کے ایک رکن کے منحرف ہونے کی تصدیق کر دی ہے۔
خیال رہے کہ 22 جولائی کو وزارت اعلیٰ کا انتخاب پنجاب اسمبلی میں ہوگا، مسلم لیگ (ن) کے امیدوار حمزہ شہباز جبکہ تحریک انصاف کی طرف سے نامزد کئے گئے پرویز الٰہی میدان میں ہونگے۔
پنجاب اسمبلی میں اپوزیشن لیڈر سبطین خان نے تصدیق کرتے ہوئے کہا کہ رحیم یار خان سے ایم پی اے میاں مسعود کی بولی لگ گئی ہے، آج پارلیمانی پارٹی کے اجلاس میں 175 ارکان کی گنتی مکمل تھی، کل پارلیمانی پارٹی کے اجلاس میں 187 ارکان مکمل ہوں گے۔
انہوں نے مزید کہا کہ کچھ ارکان بیماری یا شہر سے باہر ہونے کی وجہ سے آج اجلاس میں نہیں پہنچے، جو رکن آج پارلیمانی پارٹی کے اجلاس میں نہیں آیا انہوں نے ہمیں اعتماد میں لیا تھا۔

لاہور: (ویب ڈیسک) پاکستان تحریک انصاف (پی ٹی آئی) کے وائس چیئرمین شاہ محمود قریشی اور اسپیکر پنجاب اسمبلی پرویز الہٰی کی ملاقات کی اندرونی کہانی سامنے آگئی۔
ذرائع کے مطابق شاہ محمود قریشی نے پرویز الہٰی کو تحفظات بارے آگاہ کرتے ہوئے کہا کہ ق لیگ کے کچھ ارکان پنجاب اسمبلی حکومتی اتحاد سے رابطے میں ہیں۔
انہوں نے مشورہ دیا کہ ق لیگ کے رہنماوں کو 22 جولائی تک کسی سے ملاقات نہیں کرنی چاہیے۔
ذرائع کے مطابق شاہ محمود قریشی نے کہا کہ آصف زرداری اور چودھری شجاعت کی ملاقات سے شک و شہبات پیدا ہوئے ہیں۔
جس پر چودھری پرویز الہٰی نے جواب دیا کہ چودھری شجاعت کو ملاقات سے تو نہیں روکا جاسکتا۔
شاہ محمود قریشی نے اصرار کیا کہ ضرورت ہے کہ تمام ارکان متحد ہوں تبھی آپ وزیراعلی ٰبن سکیں گے، جب تک آصف زرداری لاہور میں ہیں ملاقات نہ ہو تو اچھا ہے۔
خیال رہے کہ گزشتہ روز پیپلز پارٹی کے شریک چیئرمین آصف زرداری نے مسلم لیگ ق کے صدر چودھری شجاعت حسین سے ملاقات کی تھی۔
سابق صدر نے چودھری شجاعت سے ملاقات میں حکومتی اتحاد کا ساتھ دینے کی درخواست کی تھی۔
ذرائع کے مطابق آصف زرداری نے وزارت اعلیٰ کے انتخاب کے لیے پرویز الہیٰ کو حکومتی امیدوار بنانے کی پیشکش بھی کی ہے۔

اسلام آباد: (ویب ڈیسک) پاکستان تحریک انصاف کے چیرمین عمران خان نے کہا ہے کہ آصف زرداری ایم پی ایز کو 50، 50 کروڑ میں خریدنے کی کوشش کررہے ہیں۔
سابق وزیر اعظم نے ٹوئٹ کرتے ہوئے کہا کہ آج لاہورمیں بھی سندھ ہاؤس اسلام آباد والی ہارس ٹریڈنگ کی صورتحال دوبارہ ہورہی ہے، ایم پی ایز کو خریدنے کیلئے 50 کروڑ کی آفر کی جارہی ہے۔
عمران خان نے بتایا کہ اس سب کے پیچھے آصف زرداری ہیں، جو اپنی کرپشن پر این آر او حاصل کرتے ہیں اور لوٹی ہوئی دولت سے لوگوں کو خریدتے ہیں۔
عمران خان کا کہنا تھا کہ یہ نہ صرف ہماری جمہوریت بلکہ ہمارے معاشرے کے اخلاقی اقدارپر حملہ ہے، اگر سپریم کورٹ نے ایکشن لیا ہوتا اور ان لوٹوں پر تاحیات پابندی لگائی ہوتی تو یہ سلسلہ رک سکتا تھا۔

راولپنڈی: (ویب ڈیسک) 92 سالہ بھارتی خاتون رینا ورما کی 75 سال بعد اپنی جنم بھومی راولپنڈی آمد، ڈی اے وی کالج روڈ پہنچنے پر اہل محلہ نے شاندار استقبال کیا، پھولوں کی پتیاں نچھاورکیں، ڈھول کی تھاپ پر رینا ورما بھی جھوم اٹھیں۔
بھارتی خاتون رینا ورما کو 75 سال بعد اپنی جنم بھومی راولپنڈی کھینچ لائی، ڈھولک کی تھاپ پر اہل محلہ نے رقص کیا، رینا بھی خوشی سے جھوم اٹھی، رینا ورما اپنے آبائی گھر ڈی اے وی کالج روڈ راولپنڈی پہنچ کر جذباتی ہوگئیں، جذبات میں آنسو نکل آئے۔
تقسیم ہند کے وقت بھارت منتقل ہونے والی رینا ورما کا کہنا تھا کہ انہیں اپنا گھر بھولا نہ گلی اور دوست، کھانے بھی یاد ہیں اور بچپن کی ساری اٹھکیلیاں بھی۔
رینا ورما کی آنکھوں میں پاکستان کی محبت آج بھی چمک رہی اور کہا کہ جو محبت اور اپنا پن چھوڑ کر گئی، اس سے زیادہ ملا ہے۔

اسلام آباد: (ویب ڈیسک) پاکستان مسلم لیگ ن کی اتحادیوں پر مبنی حکومت کے قیام کے بعد جمعیت علمائے اسلام (ف) کی ایک اور کوشش رنگ لے آئی، سود کے خاتمے کے لیے ٹاسک فورس قائم کر دی گئی۔
مولانا فضل الرحمن کی کاوشوں سے سود کے خاتمے کیلئے بنائی گئی ٹاسک فورس میں وفاقی وزیر قانون سینیٹر اعظم نذیر تارڑ سربراہ ہوں گے، دیگر میں مفتی تقی عثمانی، مفتی اسعد محمود، علامہ راغب نعیمی، محمد حسین اکبر شامل ہیں۔
ترجمان جمعیت علمائے اسلام کے مطابق جےیوآئی ہر فورم پر سود کے خلاف آواز بلند کرے گی، سود کو جڑ سے ختم کرنے کیلئے اپنی جدوجہد جاری رکھیں گے۔
یاد رہے کہ مولانا فضل الرحمن نے چند روز قبل وزیراعظم شہبازشریف سے ٹاسک فورس بنانے سے متعلق سفارش کی تھی۔