لاہور: (ویب ڈیسک) پاکستان پیپلز پارٹی کے شریک چیئرمین اور سابق صدر مملکت آصف زرداری کی طبیعت ناساز ہوگئی ۔
تفصیلات کے مطابق سابق صدر مملکت آصف علی زرداری علیل ہو گئے اور ان کے ذاتی معالج کراچی سے لاہور پہنچے ۔
طبیعت ناسازی کے بعد آصف زرداری نے لاہور میں تمام مصروفیات ترک کر دیں جبکہ ڈاکٹروں نے سابق صدر کو آرام کا مشورہ دے دیا ہے۔
واضح رہے کہ شریک چیئرمین پاکستان پیپلز پارٹی آصف زرداری چند روز سے لاہور میں مقیم ہیں۔

لندن: (ویب ڈیسک) برطانیہ میں پاکستان مسلم لیگ ن کے صدر اور قومی اسمبلی میں اپوزیشن لیڈر شہباز شریف کے خلاف تحقیقات میں عدالتی دستا ویز سامنے آگئیں۔
دستاویز کے مطابق لیگی صدر شہباز شریف نیشنل کرائم ایجنسی کی منی لانڈرنگ تحقیقات کا ہدف تھے۔ این سی اے کو شبہ تھا شریف فیملی کی دولت مجرمانہ طرز عمل سے حاصل ہوئی۔ شہباز شریف کے خلاف تحقیقات پاکستانی حکومت کے کہنے پر شروع ہوئیں۔
یاد رہے کہ این سی اے نے دسمبر 2019 میں شہباز شریف اور سلیمان شہباز کے اثاثے ضبط کر لئے تھے۔ برطانیہ میں ٹیکس کے ادارے ایچ ایم آر سی نے بھی شہباز اور سلیمان کے خلاف تحقیقات کیں۔ ثبوت نہ ملنے پر این سی اے نے شہباز اور سلمان کے خلاف کرمنل انویسٹی گیشن ختم کردی۔ نیشنل کرائم ایجنسی نے شہباز شریف کو منی لانڈرنگ الزامات میں بے گناہ قرار دیدیا ۔

پشاور: (ویب ڈیسک) وزیراطلاعات فواد چوہدری کا کہنا ہے کہ اتحادی جماعتیں ہوں یا کوئی بھی ہو وہ سیاست میں اپنے مفادات دیکھتے ہیں، جوعمران کوچھوڑ کر جائے گا وہ صفر ہوجائے گا۔
صحافی رحیم اللہ یوسفزئی اور حافظ ثناء اللہ کے تعزیتی ریفرنس سے خطاب کرتے ہوئے وزیر اطلاعات فواد چوہدری کا کہنا تھا کہ صحافت میں ذاتی پسند و ناپسند بڑھ گئی ہے، غلط خبریں پھیلائی جاتی ہیں، پاکستان ان ممالک میں شامل ہے جہاں میڈیا بہت آزاد ہے، حکومت آزادی صحافت پر یقین رکھتی ہے، صحافیوں نے بڑا مشکل وقت دیکھا ہے، 100 بڑی کمپنیوں نے 929 ارب کامنافع کمایا لیکن ورکروں تک اثرات نہیں پہنچے، ہم قوانین لانے کی کوشش کرتے ہیں تو رکاوٹیں پیدا کی جاتی ہیں۔
فواد چوہدری کا کہنا تھا کہ 1947 سے 2006 تک 6 ٹریلین قرضہ لیا گیا، زرداری اور نوازشریف کے ادوار 2008 سے 2018ء تک 23 ٹریلین قرضہ لیا گیا، اسحق ڈار اور دیگر نے باہر جائیدادیں بنائیں اور ملک کو تباہ کیا، سابقہ حکومتوں نے صنعتیں ختم کیں، اور معیشت بیٹھ گئی، یہ ملک سے بھاگنے کے لیے ہلچل پیدا کررہے ہیں، شہباز شریف پہلے پیسہ دیں پھر ان سے بات ہوگی، ورنہ انہیں باہر نہیں جانے دیں گے، سیاسی جماعتوں میں بونے بیٹھے ہوئے ہیں، یہ جماعتیں تحقیق کے بغیر کام کرتی ہیں، اتحادی جماعتیں ہوں یا کوئی بھی ہو وہ سیاست میں اپنے مفادات دیکھتے ہیں، جوعمران کوچھوڑ کر جائے گا وہ صفر ہوجائے گا، اب جانے والوں کی نہیں آنے والوں کی لائن لگے گی۔
وفاقی وزیر نے کہا کہ عمران خان نے تین سالوں میں مسائل ختم نہیں کئے لیکن سماجی ریاست یا ریاست مدینہ بنانے کی بنیاد رکھ دی ہے، ہم نے صحت کارڈ، احساس پروگرام اور راشن پروگرام شروع کیے تاکہ غرباء کوریلیف مل سکے، ہمارے دور میں گندم، گنا اور چاول کی بمپر فصلیں ہوئیں، ہم اب یہاں مہنگی فصلیں پیدا کر رہے ہیں، 1100 ارب زراعت اور ایک ہزار ارب تعمیراتی صنعت کودئیے گئے، اگلے دوسالوں میں اٹھارہ ارب ڈالر کا قرضہ واپس کرنا ہوگا، ہم نے ملک میں سیاسی استحکام پیدا کیا اور اداروں سے ٹکراؤ کی پالیسی نہیں اپنائی۔