کراچی: (ویب ڈیسک) پاکستان میں تعینات امریکی سفیر ڈونلڈ بلوم کراچی پہنچ گئے، انہوں نے لیاقت میموریل لائبریری میں قائم لنکن کارنر کا دورہ کیا اور سٹارٹ اپ لیب کا افتتاح کیا۔
تقریب سے خطاب کرتے ہوئےامریکی سفیر نے کہا کہ سٹارٹ اپ لیب سے کاروبار کا شوق رکھنے والے افراد مفت جدید ٹیکنالوجی اور آلات استعمال کر کے اپنا کاروبار شروع کرنے کے خواب کو حقیقت میں بدل سکتے ہیں۔
انہوں نے امریکی سفارت خانے اور سندھ کے محکمہ سیاحت کی شراکت داری کو باعث فخر قرار دیا جس کے ذریعے یقینی بنایا جا سکے گا کہ پاکستانی لوگ اکیسویں صدی کے چیلنجز کا مقابلہ کرنے کے لیے تیار ہیں۔
امریکی سفیر نے میڈیا سے بات کرتے ہوئے کہا کہ امریکہ اور پاکستان میں عوامی سطح پر تعلقات ہماری بڑی طاقت ہیں، پاکستان کے مختلف شہروں میں قائم لنکن کارنرز مفت تعلیم اور ثقافتی پروگرامز کے ساتھ پاکستان کے نوجوانوں کو ٹیکنالوجی اور معلومات کے ذرائع فراہم کرتا ہے۔
واضح رہے کہ کراچی میں اپنی نوعیت کی پہلی جدید امریکی سٹارٹ اپ لیب نوجوانوں کے لیے روبوٹکس، لیگوز، تھری ڈی پرنٹرز، فوٹوگرافی سیٹ اپ، ونڈوز اینڈ میک کمپیوٹرز اور ویڈیو ایڈیٹنگ ایکوئپمنٹ کی سہولیات سے لیس ہے۔
All posts by Khabrain News
سابق امریکی صدر ڈونلڈ ٹرمپ کا اگلا صدارتی انتخا ب خطرے میں پڑ گیا
نیویارک: (ویب ڈیسک) سابق امریکی صدر ڈونلڈ ٹرمپ کا اگلا صدارتی انتخا ب خطرےمیں پڑ گیا، خفیہ دستاویزات کو حفاظت سے نہ رکھنے کی تحقیقات میں تیزی آ گئی۔
تفصیلات کے مطابق سابق امریکی صدر ڈونلڈ ٹرمپ کے ریاست فلوریڈا میں واقع گھر پر وفاقی تحقیقاتی ادارے (ایف بی آئی) کے ڈرامائی چھاپے سے ان کے خلاف جاری تحقیقات میں اچانک تیزی آگئی ہے جس نے دوسرے قانونی سوالوں سمیت اس سوال کو بھی جنم دیا ہے کہ کیا نظریے کی حد تک سہی ہے، یہ تحقیقات امریکی صدارتی عمل کو بدل سکتی ہیں۔
اس کی وجہ یہ ہے کہ اگر ان کے خلاف جاری انکوائری جس میں مبینہ طور پر ٹرمپ کے خفیہ صدارتی دستاویزات کو حفاظت سے نہ رکھنے کی تحقیقات ہو رہی ہیں انھیں مجرم ٹھہرایا جاتا ہے تو بعض ماہرین کے خیال میں وہ قانونی طور پر صدارتی انتخابات میں دوبارہ حصہ لینے کے لیے اہل نہیں رہیں گے۔
قانون کے مطابق جس شخص کی تحویل میں بھی سرکاری کاغذات ہوں اور وہ انھیں جان بوجھ کر چھپائے، لے جائے، خراب کرے، تلف کرے، تباہ کرے وہ کسی بھی سرکاری آفس میں فائل یا جمع کروایا ریکارڈ، اجلاس کی کارروائی، نقشہ، کتاب، کاغذ، دستاویز یا کوئی اور شے ہو ایسے شخص کو جرمانے یا تین برس قید کی سزا دی جا سکتی ہے۔
اس میں اہم بات یہ ہے کہ جس شخص کو بھی اس قانون کی خلاف ورزی کا مرتکب پایا گیا تو کسی بھی وفاقی عہدے کے لیے نااہل قرار پائے گا۔
یہ سبب ہے کہ بعض لوگوں کے خیال میں اگر سابق صدر ٹرمپ کو مجرم پایا گیا تو ایوان صدر میں واپس آنے سے متلعق ان کی مبینہ امیدوں پر پانی پھر جائے گا۔
آرمی چیف جنرل قمر جاوید باجوہ سرکاری دورے پر برطانیہ پہنچ گئے
راولپنڈی: (ویب ڈیسک) آرمی چیف جنرل قمر جاوید باجوہ سرکاری دورے پر برطانیہ پہنچ گئے۔
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ رائل ملٹری اکیڈمی میں بطور مہمان خصوصی پاسنگ آؤٹ پریڈ میں شرکت کریں گے۔
آئی ایس پی آر نے کہا ہے کہ آرمی چیف جنرل قمر جاوید باجوہ اپنے سرکاری دورے میں برطانوی فوجی قیادت سے ملاقات بھی کریں گے۔
بادلوں کے لاہور میں ڈیرے، 3 سے 4 روز تک موسلا دھار بارشیں متوقع
لاہور: (ویب ڈیسک) بارشیں برسانے والے نئے نظام نے لاہور میں ڈیرے ڈال دئیے، تین سے چار روز تک موسلا دھار بارشیں متوقع ہیں جبکہ جنوبی پنجاب میں بھی شدید بارشوں کی پیش گوئی کی گئی ہے۔ شہر میں اپنے قیام کے دوران یہ بادل وقفے وقفے سے کبھی تیز اور کبھی ہلکی بارش برساتے رہیں گے جس کے باعث شہر کے نشیبی علاقوں میں ناخوشگوار صورت پیدا ہونے کے خدشات بھی ظاہر کیے گئے ہیں۔ لاہور کے ساتھ ساتھ جنوبی پنجاب کے اضلاع میں بھی شدید بارشوں کی پیش گوئی کی گئی ہے جس کے باعث وہاں کے ندی نالوں میں ایک مرتبہ پھر سیلابی صورت حال پیدا ہوسکتی ہے۔
کورونا پھر سر اٹھانے لگا، مثبت کیسز کی شرح 3 فیصد سے متجاوز
اسلام آباد: (ویب ڈیسک) کورونا پھر سر اٹھانے لگا، ملک بھر میں مثبت کیسز کی شرح 3 فیصد سے متجاوز کر گئی ہے۔ قومی ادارہ برائے صحت (این آئی ایچ) کے مطابق ملک بھر میں گزشتہ 24 گھنٹے کے دوران کورونا کے مزید 353 کیسز رپورٹ ہوئے اور کورونا وائرس سے گزشتہ 24 گھنٹے میں ایک مریض انتقال کر گیا۔ این آئی ایچ کے مطابق گزشتہ 24 گھنٹے میں 11 ہزار 388 کورونا ٹیسٹ کیے گئے، کورونا کےمثبت کیسز کی شرح 3.10 فیصد رہی۔ قومی ادارہ برائے صحت کی رپورٹ کے مطابق عالمی وبا کورونا سے متاثرہ 155 مریضوں کی حالت ابھی بھی تشویش ناک ہے۔
سیرالیون میں مہنگائی کیخلاف مظاہرے، تشدد سے دو پولیس اہلکار ہلاک
فری ٹاؤن: (ویب ڈیسک) افریقی ملک سیرا لیون میں مہنگائی کے خلاف مظاہرے پرتشدد شکل اختیار کر گئے، مظاہرین کے تشدد سے دو پولیس اہلکار ہلاک ہوگئے۔
غیر ملکی خبر رساں ادارے کے مطابق مظاہرین نے ایک خاتون اور ایک مرد پولیس اہلکار کر تشدد کرکے موت کے گھاٹ اتار دیا۔
مہنگائی کے خلا ف سڑکوں پر نکلنے والے شہری صدر سے مستعفی ہونے کا مطالبہ کر رہے ہیں، صورتحال پر قابو پانے کے لیے ملک بھر میں کرفیو نافذ کردیا گیا۔
رانا ثںا اللہ اور عابد شیر علی کے گلے شکوے دور ہوگئے
اسلام آباد: (ویب ڈیسک) وزیر داخلہ رانا ثنا اللہ نے عمرہ ادائیگی پر روانہ ہونے سے قبل عابد شیر علی کے والد سے معافی مانگ لی جس کے بعد مسلم لیگ ن کی دو بڑی سیاسی شخصیات کے درمیان گلے شکوے دور ہوگئے۔
ذرائع کے مطابق وزیر داخلہ رانا ثناء اللہ اور عابد شیر علی کی طویل عرصے بعد ایک اہم جگہ پر ملاقات ہوئی، جس میں دونوں نے شکوے اور غلط فہمیوں پر بات چیت کی اورسیاسی اختلافات کو ختم کرلیا۔ زرائع کے مطابق مسلم لیگی رہنما فیصل آباد میں جلد اکٹھے نظر آئیں گے.
واضح رہے کہ وزیر داخلہ رانا ثناء اللہ کے ساتھ عابد شیر علی کے والد شیر علی کی شدید اختلافات تھے، رانا ثناء اللہ عمرہ کی ادائیگی پر روانہ ہورہے ہیں، اسی لیے انہوں نے روانگی سے قبل معافی تلافی کرنے کا فیصلہ کیا۔
ملاقات کے بعد سوال پر عابد شیر علی نے جواب دیتے ہوئے کہا کہ کہ ہم بہت جلد اکٹھے نظر آئیں گے۔
پشاور: پولیس موبائل پر فائرنگ، اے ایس آئی شہید
پشاور: (ویب ڈیسک) پشاور کے علاقے ریگی ماڈل ٹاؤن میں پولیس موبائل پرفائرنگ کے نتیجے میں ایک اے ایس آئی شہید ہوگیا۔
پولیس کا کہنا ہے کہ نامعلوم موٹرسائیکل سوارملزمان پولیس موبائل پر فائرنگ کرکے فرار ہوگئے، واقعے کے بعد پولیس نے علاقے میں سرچ آپریشن شروع کردیا ہے۔
سپریم کورٹ نے جسٹس سجاد علی شاہ کے اعزاز میں فُل کورٹ ریفرنس منسوخ کردیا
اسلام آباد: (ویب ڈیسک) سپریم کورٹ نے جسٹس سجاد علی شاہ کے اعزاز میں فُل کورٹ ریفرنس منسوخ کر دیا۔
سپریم کورٹ نے جسٹس سجاد علی شاہ کے اعزاز میں ہونے والے 11 اگست کے فل کورٹ ریفرنس اور عشائیے کی منسوخی کا اعلامیہ جاری کر دیا ہے۔
اعلامیے کے مطابق جسٹس سجاد علی شاہ کی درخواست پر ان کے اعزاز میں ہونے والا فُل کورٹ ریفرنس منسوخ کیا گیا ہے۔
جسٹس سجاد علی شاہ کے اعزاز میں ہونے والا عشائیہ بھی سپریم کورٹ بلڈنگ کے بجائے اب ججز کالونی میں ہوگا۔
کراچی: بارش کے بعد سڑکیں، گلیاں اور محلے تالاب کا منظر پیش کرنے لگے
کراچی: (ویب ڈیسک) شہر قائد میں ہونے والی موسلا دھار بارش کے بعد مختلف علاقوں میں سڑکیں، گلیاں اور محلے تالاب کا منظر پیش کرنے لگے ہیں جب کہ بجلی کی بندش نے شہریوں کی اذیت و تکلیف میں بے پناہ اضافہ کردیا ہے۔
کراچی میں ایک مرتبہ پھر ہونے والی موسلا دھار بارش نے شہریوں کو سخت اذیت میں مبتلا کردیا ہے، درجنوں گاڑیاں سڑکوں پہ بند ہو گئیں جس کی وجہ سے ٹریفک کی روانی بری طرح متاثر ہوئی جب کہ موٹر سائیکل سواروں کی بڑی تعداد فٹ پاتھوں کو سڑک سمجھ کر منزل پر پہنچنے کی کوشش کرتی دکھائی دی۔
گزشتہ بارشوں کی طرح اس مرتبہ بھی سندھ ہائی کورٹ کے مرکزی گیٹ کے سامنے تالاب بن گیا، خیابان بحریہ پانی سے لبالب بھر گئی، ڈیفنس لائبریری روڈ پانی میں ڈوب گئی، کھڈا مارکیٹ کے مقام پر برساتی پانی جمع ہوگیا، پی ای سی ایچ ایس میں درخت بارش کی وجہ سے گرگیا۔
شہر کی کئی سڑکوں پر جمع ہونے والے برساتی پانی کی وجہ سے فٹ پاتھوں کا نشان تک مٹ گیا تھا جو حادثات کا بھی سبب بنا جب کہ گاڑیوں کے ساتھ ساتھ اسکول بچوں کی وین بھی برسات میں کھڑی دکھائی دی۔
شہر میں ہونے والی موسلا دھار بارش کی وجہ سے مائی کولاچی روڈ پر پانی جمع ہو گیا، شارع فیصل پر واقع وائرلیس گیٹ کے اطراف آمد و رفت تقریباً معطل ہو گئی، شہری گاڑیوں اور موٹرسائیکلوں کو دھکے لگاتے رہے، گرومندر کے اطراف واقع سڑکیں پانی میں ڈوبی رہیں، حیدری سے فائیو اسٹار چورنگی جانے والی سڑک دور دور تک دکھائی نہیں دے رہی تھی۔
رات ہونے کے باوجود شہر کی صورتحال میں کوئی واضح تبدیلی دکھائی نہیں دے رہی ہے، حقانی چوک بدستور پانی میں ڈوبا ہوا ہے اور نیوچالی کے مکینوں کو بھی سخت دشواری کا سامنا ہے جب کہ شاہ فیصل کالونی کے حالات بھی مختلف نہیں ہیں۔
کراچی میں تیز بارشوں کی پیشن گوئی کو مدنظر رکھتے ہوئے اعلی ثانوی تعلیمی بورڈ نے کل ہونے والے پرچے ملتوی کردیے ہیں۔
اس سلسلے میں ترجمان بورڈ کے حوالے سے بتایا ہے کہ آرٹس ریگولر، آرٹس پرائیوٹ اور خصوصی امیدواروں کے پرچے ملتوی کیے گئے ہیں جب کہ تمام ملتوی شدہ پرچے اب 22 اگست کو لیے جائیں گے۔
