کراچی: (ویب ڈیسک) آرمی چیف جنرل قمر جاوید باجوہ نے کہا ہے کہ ہمیں کسی بھی مہم جوئی کا مناسب جواب دینے کے لیے چوکنا رہنا چاہیے۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق آرمی چیف جنرل قمر جاوید باجوہ نے کراچی کا دورہ کیا اور آرڈیننس سنٹر ملیر میں کرنل کمانڈنٹ کی تقریب میں شرکت کی، اس دوران میجرجنرل شہاب شاہد کو کرنل کمانڈنٹ کے بیجز لگائے۔ کراچی آمد پر آرمی چیف کے ہمراہ کور کمانڈر کراچی لیفٹیننٹ جنرل محمد سعید بھی تھے۔
بیان کے مطابق تقریب میں آرڈیننس کور کے حاضر سروس اور ریٹائرڈ افسران اور جوانوں کی بڑی تعداد نے شرکت کی۔ سپہ سالار نے جنگ اور امن میں بالخصوص دہشت گردی کے خلاف جنگ کے دوران کور کے کردار کو سراہا۔
آئی ایس پی آر کے مطابق آرمی چیف نے کراچی میں پی اے ایف ایئر وار کالج انسٹیٹیوٹ کا بھی دورہ کیا۔
35ویں ایئر وار کورس کے شرکاء سے خطاب میں جنرل قمر جاوید باجوہ پاک فضائیہ کی مکمل پیشہ ورانہ مہارت، اسکی قابل رشک کامیابیوں کو سراہا۔
اس موقع پر انہوں نے کہا کہ افسران کا جدید دور کے تقاضوں کے ساتھ ہم آہنگ رہنا ضروری ہے جدید دور کے میدان جنگ میں برتری صرف اسی صورت میں برقرار رکھی جا سکتی ہے جب ہم عصری چیلنجوں کے لیے چوکنا رہیں اور ابھرتے جدید تصورات کے مطابق ان سے نمٹنے کے لیے تیار ہوں۔ ہمیں کسی بھی مہم جوئی کا جواب دینے کے لیے چوکنا رہنا چاہیے۔
آئی ایس پی آر کے مطابق آرمی چیف نے کراچی میں فوجی فاؤنڈیشن کا بھی دورہ کیا، اس دوران انہیں فوجی فاؤنڈیشن کے جاری اور مستقبل کے منصوبوں پر تفصیلی بریفنگ دی گئی جبکہ سپہ سالار نے معیاری خدمات کی فراہمی، فوجی فاؤنڈیشن کی کارکردگی اور عزم کو سراہا۔

راولپنڈی: (ویب ڈیسک) چیئرمین جوائنٹ چیفس آف سٹاف کمیٹی جنرل ندیم رضا نے عمان کا دورہ کیا اعلیٰ حکام سے ملاقاتیں کیں۔
پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف سٹاف کمیٹی جنرل ندیم رضا کو دورہ عمان میں المرتفع کیمپ پہنچنے پر گارڈ آف آنر پیش کیا گیا۔
آئی ایس پی آر کے مطابق جنرل ندیم رضا کی نائب وزیر اعظم برائے دفاعی امور ، وزیر شاہی دفتر، چیف آف سٹاف سے ملاقاتوں میں باہمی دلچسپی کے امور، دوطرفہ تعاون بشمول سکیورٹی، انسداد دہشت گردی، افغانستان کے تناظرمیں علاقائی سلامتی کی صورتحال اور دونوں ممالک کے درمیان فوجی مہارتوں کی سطح اور دائرہ کار کو بڑھانے کے اقدامات پر بھی تفصیلی تبادلہ خیال کیا گیا۔
آئی ایس پی آر کے مطابق دونوں ممالک کے درمیان فوجی روابط پر گفتگو کی گئی اور گہرے تزویراتی تعلقات کے فروغ کے عزم کا اعادہ بھی کیا گیا۔
اس موقع پر جنرل ندیم رضا نے کہا کہ پاکستان اور عمان دو برادر اسلامی ممالک ہیں، دونوں ممالک دوطرفہ دفاعی تعلقات میں توسیع کے لئے تعمیری کام کررہے ہیں، خطے میں امن و استحکام کے لئے بھی اقدامات کررہے ہیں۔
عمانی قیادت نے عمان کی مسلح افواج کی صلاحیت میں اضافے کے لئے پاک افواج کے کردار اور دہشتگردی کے خلاف پاکستان کی قربانیوں کو بھی سراہا۔

لاہور: (ویب ڈیسک) وفاقی وزیر برائے آبی سائل مونس الٰہی سے جمہوریہ کوریا کے سفیر سوہ سنگ پیونے ملاقات کی ہے جس میں باہمی دلچسپی کے امور سمیت خطے کی موجودہ صورتحال پر تبادلہ خیال کیا گیا۔ کورین سفیر نے چودھری شجاعت حسین کی خیریت دریافت کی اور ان کیلئے نیک خواہشات کا اظہار بھی کیا۔
مونس الٰہی نے کہا کہ پاکستان اور کوریا کے درمیان گہرے دوستانہ تعلقات ہیں جنہیں پاکستان انتہائی قدر کی نگاہ سے دیکھتا ہے، پاکستان اور کوریا کے مابین سیاسی، معاشی، سائنسی، دفاعی اور عوامی تعاون کے کئی پہلو ہیں، پاکستانی عوام کوریا کو بہت زیادہ عزت دیتے ہیں اور وہاں پر باعزت روزگار کما رہے ہیں۔
انہوں نے کہا کہ کوریا کی تیزی سے معاشی ترقی ہمارے لیے باعث تقلید ہے، گزشتہ سالوں میں کورین کمپنیوں نے پاکستانی مارکیٹ میں اپنے شیئرز میں اضافہ کیا ہے۔ مونس الٰہی نے کہا کہ پاکستان کوریا کے ساتھ تجارتی اور سرمایہ کاری کے تعلقات کو مزید وسعت دینے کا خواہشمند ہے، کوریا واٹرسیکٹر میں پاکستان کی مزید معاونت کرے تاکہ ہم ان کے وسیع تجربے سے استفادہ حاصل کر سکیں۔
کورین سفیر سوہ سنگ پیو نے کہا کہ پاکستان اور کوریا کے تعلقات ہمیشہ سے مثبت رہے ہیں، کورین ہائیڈرو پاور کمپنیاں پاکستان میں مختلف منصوبوں پر کام کر رہی ہیں۔

لاہور: (ویب ڈیسک) مسلم لیگ ن اور پیپلز پارٹی کی جانب سے ملاقاتوں کی پیشکش پر غور کے لیے ماڈل ٹاؤن لاہور میں رہنما تحریک انصاف جہانگیر ترین کی رہائش گاہ پر ترین گروپ کا اجلاس ہوا۔
ذرائع کے مطابق اجلاس میں ملکی سیاسی صورت حال پر غیر رسمی مشاورت کی گئی اور ملاقاتوں کے لیے اپوزیشن جماعتوں کی دعوتوں پر سوچ بچارکیا گیا۔
ملاقات میں اسحاق خاکوانی، نعمان لنگڑیال، زوار وڑائچ اور عون چوہدری، فیصل جبوانہ، اجمل چیمہ، لالہ طاہر، خرم لغاری اور سلمان نعیم موجود تھے، اس موقع پر غیر حاضر ساتھیوں سے فون پر مشاورت کی گئی۔
ذرائع کا کہنا ہے کہ ترین گروپ کے ارکان نے فیصلہ کیا ہے کہ فی الحال پارٹی کے ساتھ کھڑے رہنےکا مؤقف اختیار کیا جائےگا لیکن اپوزیشن کے حتمی کارڈز سامنے آنے کے بعد ترین گروپ اپنا لائحہ عمل سامنے لائےگا۔

اسلام آباد: (ویب ڈیسک) وفاقی وزیر خزانہ شوکت ترین نے کہا ہے کہ سرکاری ملازمین کی تنخواہوں میں اضافہ تو ابھی شروعات ہے ہم اور بھی ضروریات پوری کریں گے۔
یہ بات انہوں نے احتجاج و دھرنے کیلئے اکھٹے ہونے والے سرکاری ملازمین سے گفتگو کرتے ہوئے کی، وہ وزیراعظم کی جانب سے تنخواہیں بڑھانے کے اعلان کے بعد سرکاری ملازمین کی جانب سے منعقد کردہ اجتماع میں پہنچے۔
اس موقع پر شوکت ترین نے کہا کہ ملازمین کے لیے بہتر اقدامات اٹھائے جائیں گے، حکومت نے جو وعدہ کیا تھا وہ پورا کیا، کل ہم نے وزیراعظم کو بتایا کہ ہم نے ملازمین سے ایک سال پہلے وعدہ کیا تھا جس پر عمران خان نے کہا کہ بالکل، ملازمین سے کیے گئے وعدہ پورے کریں اور پھر وزیراعظم نے وعدہ پورا کردیا ہے۔
وزیر خزانہ کا کہنا تھا کہ یہ ابھی شروعات ہے، انشااللہ آپ کی اور بھی ضروریات پوری کریں گے، نوکری پیشہ افراد کو مہنگائی نے تنگ کیا ہوا ہے، ہم انہیں سپورٹ کریں گے۔
واضح رہے کہ حکومت نے سرکاری ملازمین کے پارلیمنٹ ہاؤس کے سامنے احتجاج سے قبل تنخواہوں میں اضافے کا اعلان کیا، جس کا اطلاق مارچ سے ہوگا۔

اسلام آباد: (ویب ڈیسک) پاکستان نے سعودی عرب کے ایئر پورٹ پر حوثی باغیوں کے ڈرون حملے کی مذمت کی ہے۔
دفترخارجہ کے ترجمان عاصم افتخار احمد کے مطابق ڈرون حملے میں متعدد افراد زخمی ہوئے ہیں جن کی جلد صحت یابی کے لیے دعاگو ہیں۔
انہوں نے کہا کہ ایسے حملے خطے اور سعودی عرب کی سلامتی کیلئے خطرہ ہیں، پاکستان ایسے حملوں کی فوری بندش کا مطالبہ کرتا ہے۔
ان کا کہنا تھا کہ پاکستان سعودی عرب کے ساتھ بھرپور یکجہتی اور حمایت کرتا ہے۔
یاد رہے کہ آج سعودی عرب کے بین الاقوامی ہوائی اڈے پر حوثیوں باغیوں نے ڈرون حملہ کیا جس سے 12 افراد زخمی ہو گئے۔
العربیہ اردو کی رپورٹ کے مطابق سعودی عرب کے فضائی دفاع نظام نے اَبھا کے بین الاقوامی ہوائی اڈے کو نشانہ بنانے کے لیے داغے گئے ڈرون کو ناکارہ بنایا۔
ڈرون کا ملبہ گرنے سےمختلف قومیتوں سے تعلق رکھنے والے 12 افراد زخمی ہوئے ہیں۔تباہ شدہ ڈرون کاملبہ ہوائی اڈے کے احاطے اوراس کے آس پاس گرا۔
ترجمان کے مطابق اس ڈرون حملے کی ابتدائی رپورٹ کے صرف ایک گھنٹے کے بعد فضائی ٹریفک معمول پرآ گئی تھی۔