نیویارک: (ویب ڈیسک) امریکی محکمہ خارجہ نے پاکستانی نژاد امریکی سفارت کار دلاور سید کو تجارتی اور کاروباری امور کے لیے نمائندہ خصوصی بنانےکا اعلان کردیا۔
پاکستان میں موجود امریکی سفارت خانے نے محکمہ خارجہ کے فیصلےکا خیرمقدم کرتے ہوئے کہا کہ دلاور سید امریکی کاروباری امور میں ایک نئی اور مضبوط سوچ لائیں گے۔
اِس موقع پر دلاور سید نے خوشی کا اظہار کرتے ہوئےکہا کہ عالمی سطح پر امریکا کی نمائندگی کرنا زندگی کا سب سے بڑا اعزاز ہے۔
ٹوئٹر پر اپنی پوسٹ میں دلاور سید نے کہا کہ 30 سال قبل جب وہ امریکا میں ایک طالب علم کی حیثیت سے آئے تھے تو سوچا بھی نہیں تھا کہ انہیں امریکا کی سفارت کاری کرنے کا اعزاز حاصل ہوگا۔
دلاور سید کا کہنا تھا کہ ایسا ہونا صرف امریکا میں ہی ممکن ہے، اگر آپ اپنے مقاصد پر قائم رہیں تو کوئی بھی چیز ناقابل تسخیر نہیں ہے۔

پیرس: (ویب ڈیسک) فرانس کی جانب سے کہا گیا ہے کہ ایران کے پاس جوہری ڈیل تسلیم کرنے کے لئے چند روز کی مہلت ہے۔
غیر ملکی میڈیا رپورٹس کے مطابق ملکی سینیٹ میں بریفنگ کے دوران فرانس کے وزیر خارجہ جین یویس کا کہنا تھا کہ ایران نے اگلے چند دنوں میں جوہری معاہدہ تسلیم نہیں کیا تو سنگین بحران جنم لےگا۔
ایران کے قومی سلامتی مشیر نے ذمہ داری امریکا اور یورپی اتحادیوں پر عائد کرتے ہوئے کہاکہ امریکا اور یورپی ممالک جوہری معاہدکے تحت اپنی ذمہ داریاں نبھانے میں ناکام رہے ہیں، تہران کے لئے جوہری معاہدہ اندر سے خالی اور کھوکھلا بن چکا ہے۔

صنعا: (ویب ڈیسک) یمن میں انسانی بحران مزید گھمبیر ہونے کا خدشہ پیدا ہوگیا اور اقوام متحدہ نے خطرے کی گھنٹی بجادی ہے۔
غیر ملکی میڈیا رپورٹس کےمطابق یو این کے نمائندہ خصوصی برائے یمن مارٹن گریفتھس کا کہنا ہے کہ اگلے ماہ 80 لاکھ یمنی شہری امداد سے محروم ہوجائیں گے، بھوک و افلاس کے شکار یمنی شہریوں کی امداد کے لئے ہنگامی فنڈز کی ضرورت ہے۔
انہوں نے مزید کہا کہ جنوری میں فنڈز کی قلت کے باعث اقوام متحدہ کے دو تہائی امدادی پروگرامز ختم ہوچکے ہیں۔

لندن: (ویب ڈیسک) برطانوی شہزادہ چارلس کے خیراتی ادارے پرنس فاؤنڈیشن کے خلاف برطانوی پولیس نے تفتیش شروع کردی ہے تاہم کوئی گرفتاری عمل میں نہیں آئی ہے۔
عالمی خبر رساں ادارے کے مطابق میٹروپولیٹن پولیس شہزادہ چارلس کے خیراتی ادارے کی جانب سے ایک سعودی شہری کو برطانوی شہریت دلانے سمیت دیگر اعزازات کے حصول میں غیر قانونی مدد کی پیشکش پر تفتیش کا آغاز کردیا۔
پولیس کا کہنا ہے کہ وہ شہزادہ چارلس کے فلاحی ادارے کے خلاف آنرز ایکٹ 1925 کے تحت تحقیقات کر رہی ہے تاہم ابھی کوئی گرفتاری عمل میں نہیں لائی گئی اور نہ ہی کسی کا انٹرویو کیا گیا ہے۔
کوئی گرفتاری نہ ہونے کے باعث سمجھا جارہا ہے کہ شہزادہ چارلس کے خیراتی ادارے کی جانب سے میٹروپولیٹن پولیس کے ساتھ مکمل تعاون کیا جا رہا ہے۔
پولیس نے شہزادہ چارلس کی فاؤنڈیشن کے خلاف تحقیقات کا فیصلہ گزشتہ برس ستمبر میں موصول ہونے والے ایک خط کے جائزے کے بعد کیا۔ یہ خط مبینہ طور پر شہزادہ چارلس کے شاہی خدمت گار مائیکل فاسٹ نے لکھا تھا۔
اس خط سے ظاہر ہوتا ہے کہ شاہی خدمت گار مائیکل فاسٹ مبینہ طور پر سعودی شہری کے لیے اعزاز حاصل کرنے میں مدد کی پیشکش کی تھی۔
خط کے منظر عام پر آنے کے بعد مائیکل فاسٹ نے شہزادہ چارلس کی فاؤنڈیشن کے چیف ایگزیکٹو کے عہدے سے استعفیٰ دیدیا تھا تاہم شہزادہ چارلس کے ادارے نے کہا تھا کہ الزامات کی تحقیقات کی جا رہی ہے۔
ادارے نے اپنے بیان میں مزید کہا تھا کہ شہزادہ چارلس کو ان کے خیراتی اداروں کو عطیہ کی بنیاد پر اعزاز یا برطانوی شہریت کی مبینہ پیشکش کا کوئی علم نہیں تھا۔