لاہور: (ویب ڈیسک) پی ٹی آئی رہنما فرخ حبیب کا کہنا ہے کہ الیکشن کمیشن ن لیگ اور پیپلز پارٹی ممنوعہ فنڈنگ کا فیصلہ بھی پی ٹی آئی ممنوعہ فنڈنگ کیس کےساتھ کرے۔
رہنما پی ٹی آئی فرخ حبیب نےوزیراعظم شہباز شریف کے بیان پر ردعمل دیتے ہوئے کہاہے کہ وزیراعظم کوکہناچاہتے ہیں کہ یہ فارن نہیں ممنوعہ فنڈنگ کیس ہے۔ضمنی الیکشن میں شکست ہو گئی تو الیکشن کمیشن کو کیسے فیصلے کا حکم دے رہے ہیں؟
پی ٹی آئی سیکریٹری اطلاعات فرخ حبیب کا کہنا ہے کہ الیکشن کمیشن ن لیگ اور پیپلز پارٹی ممنوعہ فنڈنگ کا فیصلہ بھی ساتھ کرے۔ن لیگ اور پیپلز پارٹی کی ا سکروٹنی مکمل ہوچکی ہے۔
انہوں نے کہاہے کہ دونوں جماعتوں نےالیکشن کمیشن سے بینک اکاؤنٹس چھپائے ہیں۔پیپلز پارٹی 36 کروڑاور ن لیگ نے 66کروڑروپے کا حساب نہیں دیا۔
انہوں نے کہا ہے کہ فوری انکی رپورٹ الیکشن کمیشن میں جمع کرواکر روزانہ کی بنیاد پر سماعت کرکے فیصلہ دیا جائے۔ ن لیگ اور پیپلز پارٹی کو لاڈلہ نہ بنایا جائے۔
واضح رہے کہ اس سے قبلوزیر اعظم شہباز شریف نے سوشل میڈیا پلیٹ فارم ٹوئٹر پر ایک پیغام میں کہا ہے کہ میں الیکشن کمیشن سے درخواست کرتا ہوں کہ طویل عرصے سے التوا کے شکار پی ٹی آئی غیر ملکی فنڈنگ ​​کیس پر فیصلہ سنائے۔
انہوں نے اپنی ٹویٹ میں کہا ہے کہ ریاستی اداروں پر بار بار شرمناک حملوں کے باوجود عمران نیازی کو کھلی چھٹی دی جارہی ہے۔عمران نیازی کو دیئے گئے استثنیٰ نے ملک کو نقصان پہنچایا ہے۔

اسلام آباد: (ویب ڈیسک) سابق وزیراعظم و رہنما مسلم لیگ ن شاہد خاقان عباسی نے کہا ہے کہ ضمنی الیکشن کا عام انتخابات سے کوئی تعلق نہیں، چار سال جھوٹے احتساب کا ڈرامہ چلتا رہا، نیب کا سرکس ابھی تک چل رہا ہے، ان کو ایک ایک ظلم کا حساب دینا ہوگا۔
اسلام آباد میں نیب عدالت کے باہر میڈیا سے گفتگو کرتے ہوئے شاہد خاقان عباسی نے کہا ہے کہ نیب کا سرکس ابھی تک چل رہا ہے، نیب کا چیئرمین تو گھر چلا گیا اس سے کوئی پوچھ گچھ کرے تو مختلف بہانے سے جان بچانے کی کوشش کرتا ہے لیکن جان بچے گی نہیں ، شاہد خاقان عباسی جو ظلم ان لوگوں نے کیے ہیں ان کو جواب دینا پڑے گا۔
انہوں نے کہا کہ آج ہم نے عدالت سے پوچھا کہ یہ بتائیں ہمارا جرم کیا ہے، یہ پراسیکیوشن بھی بتانے سے قاصر ہے اور عدالت بھی بتانے سے قاصر ہے، ہر دوسرا لفظ منی لانڈرنگ کے لیے استعمال ہوتا ہے۔
شاہد خاقان نے کہا میں نے عدالت سے پوچھا کہ کیا کسی جرم کے بغیر منی لانڈرنگ ہوسکتی ہے، جس پیسے پر ٹیکس دیا ہو کیا اس پر منی لانڈرنگ ہو سکتی ہے، اسکا جواب نہ نیب کے پاس ہے نہ عدالت کے پاس ہے۔
ان کا مزید کہنا تھا کہ ہم پنجاب میں ہار گئے تو پی ٹی آئی کی طرح اٹھ کر بھاگیں گے نہیں، یہ 20 سیٹیں پی ٹی آئی کی تھیں اب انھوں نے 15 جیتیں ، لوڈشیڈنگ کم ہو رہی ہے، مزید کم ہو گی۔

اسلام آباد: (ویب ڈیسک) فیصل واوڈا نااہلی کیس میں چیف جسٹس سپریم کورٹ عمر عطا بندیال نے کہا ہے کہ آرٹیکل 62 ون ایف کا اطلاق ایک سنجیدہ معاملہ ہے فریقین تیاری کرکے آئیں، سماعت ستمبر تک ملتوی کر دی گئی۔
چیف جسٹس عمر عطا بندیال کی سربراہی میں تین رکنی بینچ نے فیصل واوڈا نا اہلی کیس کی سماعت کی، چیف جسٹس نے ریمارکس میں کہا کہ عدالت کے سامنے اہم سوال آرٹیکل 62 ون ایف کا ہے، دیکھنا ہے کیا الیکشن کمیشن آرٹیکل 62 ون ایف لگا سکتا ہے، آرٹیکل 62 ون ایف کا اطلاق بڑا سیریس ایشو ہے۔
عدالت نے فیصل واوڈا کے وکیل کی اپیل پر جلد سماعت کی استدعا مسترد کرتے ہوئے سماعت ستمبر تک ملتوی کر دی۔

جیکب آباد : (ویب ڈیسک) جیکب آباد میں دیرینہ تنازع پر فائرنگ سے میاں بیوی جاں بحق ہو گئے، ملزمان اسلحہ پھینک کر فرار، لاشیں ہسپتال منتقل کردی گئیں۔
تھانہ سٹی کی حدود اللہ بخش پارک کے قریب مسافر وین سے اترنے والے ضعیف العمر میاں بیوی کو مسلح افراد نے تشدد کا نشانہ بنایا اور فائرنگ کر کے قتل کردیا، واردات کے بعد ملزمان اسلحہ پھینک کر فرار ہوگئے۔
اطلاع پر پولیس نے لاشوں کو تحویل میں لیکر سول ہسپتال منتقل کردیا جہاں پر مقتولین کی شناخت خادم اور سدوری بنگلانی کے نام سے ہوئی۔ پولیس کے مطابق واقعہ دیرینہ تنازع کا شاخسانہ ہے، ملزمان کی گرفتاری سمیت واقعہ کی مزید تفتیش کا آغاز کر دیا گیا ہے۔

اسلام آباد: (ویب ڈیسک) عالمی کریڈٹ ریٹنگ ایجنسی فِچ ریٹنگز نے پاکستان کے آؤٹ لک کو مستحکم سے منفی کر دیا۔
فچ کے مطابق منفی ریٹنگ سال 2022 کے اوائل سے پاکستان کی بگڑتی لیکویڈیٹی اور بیرونی فنڈنگ صورتحال کی عکاسی کرتی ہے، آئی ایم معاہدے پر عملدرآمد، جون 2023 کے بعد فنڈنگ کے حصول پر خدشات ہیں، مالی سال 2023 میں کرنٹ اکاونٹ خسارہ، 10 ارب ڈالرز رہنے کے اندازے ہیں، زرمبادلہ ذخائر پر کرنٹ اکاونٹ خسارے کے باعث دباو ہے۔
ادارے کی رپورٹ میں کہا گیا ہے کہ کرنٹ اکاونٹ خسارہ مالی سال 22 میں 17 ارب ڈالرز رہا۔