اسلام آباد: (ویب ڈیسک) گرمی کی شدت کیساتھ ہی بجلی کا شارٹ فال پھر بڑھنے لگا، لوڈ شیڈنگ کا دورانیہ 8 گھنٹے تک پہنچ گیا.
ملک بھر میں بجلی کا شارٹ فال 6 ہزار 65 میگا واٹ تک پہنچ گیا جبکہ بجلی کی کل طلب 28 ہزار 500 میگاواٹ ہوگئی ہے۔
ذرائع کے مطابق اس وقت بجلی کی مجموعی پیداوار 22 ہزار 435 میگا واٹ ہے، ہائیڈل سے 6 ہزار 600 میگا واٹ بجلی پیدا کی جارہی ہے، تھرمل پاور پلانٹس 1 ہزار 120میگا واٹ بجلی پیدا کررہے ہیں۔
نجی شعبے کے بجلی گھروں سے مجموعی پیداوار 11 ہزار میگا واٹ تک ہے، ونڈ پاور پلانٹس 1100 میگا واٹ اور سولر پلانٹس 170 میگا واٹ بجلی پیدا کر رہے، بگاس سے بجلی کی پیداوار 160میگا واٹ ہے، جوہری ایندھن سے 2 ہزار 285 میگا واٹ بجلی پیدا کی جارہی ہے۔
توانائی ذرائع کے مطابق ملک بھر کے بڑے شہروں میں 8 گھنٹے تک کی لوڈشیڈنگ کی جارہی ہے جبکہ دیہات میں لوڈشیڈنگ کا دورانیہ اس سے زیادہ ہے، زیادہ نقصانات والے علاقوں میں لوڈشیڈنگ کا دورانیہ زیادہ ہے۔

کراچی: (ویب ڈیسک) کراچی میں سٹریٹ کرائم عروج پہنچ گیا، دن ہو یا رات شہری ملزمان کا نشانہ بنتے رہتے ہیں۔ رواں سال کے پہلے چھ ماہ کے دوران کے شہری 27 ہزار سے زائد موٹر سائیکلوں، 1173 گاڑیوں اور 14 ہزار موبائل فونز سے محروم ہو گئے۔ سی پی ایل سی نے رپورٹ جاری کر دی۔
پیپلزپارٹی کی سندھ حکومت اور پولیس، رینجرز سمیت قانون نافذ کرنے والے ادارے سب کے سب کراچی میں سٹریٹ کرمنلز کے آگے بے بس نظر آتے ہیں۔ بے چارے شہری سڑکوں پر روز لٹتے ہیں۔ موبائل فون، گاڑیوں اور نقدی سے ہاتھ دھو بیٹھتے ہیں اور یہ سلسلہ برسوں سے چلا آ رہا ہے۔ رواں سال کے چھ ماہ بھی کراچی والوں پر بڑے بھاری گزرے۔
چھ ماہ کے دوران ڈاکوؤں نے شہریوں سے 14 ہزار 490 موبائل فونز چھینے، گزشتہ سال کے چھ ماہ میں یہ تعداد 12 ہزار 393 تھی۔ رواں سال شہریوں کی 27 ہزار 319 موٹرسائکلیں چوری اور چھینی گئیں، 2021 کے چھ ماہ میں 25 ہزار 467 موٹرسائکلز چوری ہوئیں۔
لٹیروں نے شہریوں کو 1173 گاڑیوں سے بھی محروم کر ڈالا، گزشتہ نصف سال میں یہ تعداد 919 تھی۔ شہر میں ڈکیتی اور دیگر واقعات میں رواں ماہ 150 سے زائد افراد قتل ہوئے۔ کراچی کے شہری سٹریٹ کرائم پر برسوں سے آواز اٹھا رہے ہیں مگر سندھ کے حکمرانوں نے کوئی سنجیدہ قدم نہ اٹھایا۔
متعدد سی سی ٹی وی فوٹیجز سامنے آنے کے باوجود پولیس ملزمان کو موثر سزا دلوانے میں ناکام نظر آتی ہے، موثر قانون سازی نہ ہونے کے باعث گرفتار ملزمان بھی رہا ہوجاتے ہیں۔

لاہور: (ویب ڈیسک) آج لاہور میں موسم کی ملی جلی کیفیت برقرار رہے گی۔ تمام دن بادلوں اور سورج کے درمیان آنکھ مچولی کا سلسلہ جاری رہنے کا امکان ہے۔ کل سے لاہور میں بارشیں برسانے والا نیا نظام داخل ہوگا۔
لاہور میں بادلوں کی موجودگی کے باوجود بارش کا زیادہ امکان نہیں ہے،کم سے کم درجہ حرارت 26 اور زیادہ سے زیادہ 37 ڈگری سینٹی گریڈ رہنے کا امکان ہے۔
محکمہ موسمیات نے بدھ سے شہر میں بارشوں کے نئے نظام کی پیش گوئی کردی، بارشوں کا نیا سلسلہ دوسے تین روز تک جاری رہنے کا امکان ہے۔

اسلام آباد: (ویب ڈیسک) ملک بھر میں کورونا وائرس کے پھیلاؤ میں مسلسل اضافہ ہو رہا ہے، مثبت کیسز کی شرح 2.80 فیصد تک جا پہنچی ہے۔
قومی ادارہ برائے صحت (این آئی ایچ ) کی جانب سے جاری کردہ اعداد و شمار کے مطابق ملک میں گزشتہ 24 گھنٹوں میں مثبت کیسز کی شرح 2.80 فیصدریکارڈ کی گئی۔
این آئی ایچ کے مطابق ایک دن میں16 ہزار 419 کووڈ ٹیسٹ کیے گئے جن میں سے 459 افراد میں وائرس کی تشخیص ہوئی۔
گزشتہ 24 گھنٹوں میں کورونا وائرس سے کوئی ہلاکت سامنے نہیں آئی جبکہ 163 افراد کی حالت تشویشناک ہے۔

لاہور: (ویب ڈیسک) انسداد دہشت گردی عدالت نے 25 مئی کو لانگ مارچ کے دوران توڑ پھوڑ، سرکاری املاک کو نقصان پہنچانے، پولیس پر تشدد کرنے کے کیس میں 18 ملزمان پی ٹی آئی رہنماوں کی عبوری ضمانتوں میں 26 جولائی تک توسیع کا حکم دے دیا۔
ملزمان کی طرف سے برہان معظم ملک ایڈووکیٹ پیش ہوئے، پی ٹی آئی رہنماؤں جمشید اقبال چیمہ ، حماد اظہر ،ڈاکٹر یاسمین راشد بھی عدالت میں پیش ہو کر حاضری مکمل کروائی۔
دوران سماعت پی ٹی آئی رہنما اعجاز چوہدری، میاں محمود الرشید ،میاں اسلم اقبال، زبیر نیازی، ندیم عباس بارا بھی کمرہ عدالت میں موجود تھے۔
طارق اقبال، عدیل، زمان خان، افضال عظیم ، حسان نیازی، مراد راس اور یاسر گیلانی نے عبوری ضمانتیں دائر کیں، ملزمان رہنماؤں نے تھانہ شاہدرہ، بھاٹی گیٹ، شفیق آباد اور گلبرگ میں درج مقدمہ میں ضمانتیں دائر کر رکھیں ہیں۔
انسداد دہشت گردی عدالت کی جج عبہر گل خان نے ضمانتوں پر سماعت کی، اس موقع پر پی ٹی آئی رہنماؤں کے وکیل برہان معظم ملک ایڈووکیٹ نے کہا کہ پولیس دانستہ طور پر ملزمان کو شامل تفتیش نہیں کر رہی، ملزمان شامل تفتیش ہونے کیلئے جاتے ہیں تو تفتیشی موجود نہیں ہوتا۔
دوران سماعت عدالت نے ہدایت کی کہ ملزمان آج ہی پولیس کے روبرو پیش ہو کر شامل تفتیش ہوں۔