لاہور: (ویب ڈیسک) مسٹر ایکس اور مسٹر وائے کون ہیں؟ مسلم لیگ ن کے رہنما ایاز صادق نے وضاحت کردی۔
رہنما مسلم لیگ ن ایاز صادق نے کہا ہے کہ مسٹر ایکس مانیکا صاحب ہے۔ مسٹر وائی عمران خان خود ہیں۔ پی ٹی آئی حکومت میں بیڈ گورننس کی انتہاء کی گئی۔
ان کا کہنا ہے کہ ہم 50 روپے پر چینی فی کلو چھوڑ کرگئے تھے۔ عمران خان کی حکومت نے مہنگائی کو پروان چڑھایا۔ ایازصادق نے جلیل شرقپوری کے استعفے کے بارے میں تبصرہ کرتے ہوئے کہا ہےکہ استعفی خوش آئند ہے۔
واضح رہے کہ گزشتہ رات ضمنی انتخابات سے چند گھنٹوں قبل مسلم لیگ ن کے ایک اور رکن میاں جلیل احمد شرقپوری پنجاب اسمبلی نے استعفیٰ دے دیا ۔

لاہور: (ویب ڈیسک) پنجاب کے ضمنی انتخابات میں 52 ہزار سے زائد اہلکار و افسران ڈیوٹی پر مامور ہیں۔
پنجاب کے 14 اضلاع کی 20 صوبائی نشستوں پر ضمنی انتخابات کے سلسلے میں ووٹنگ کا عمل جاری ہے اور تمام ہی حلقوں میں پاکستان تحریک انصاف (پی ٹی آئی) اور مسلم لیگ ن کے درمیان کانٹے کا مقابلہ ہے۔ اس حوالے سے حکومت کی جانب سے سیکیورٹی کے سخت انتظامات کیے گئے ہیں۔
ترجمان پنجاب پولیس کے مطابق پولنگ اسٹیشنز میں اے کیٹیگری کے 676، بی کیٹیگری کے ایک ہزار 197 اور سی کیٹیگری کے ایک ہزار 258 اسٹیشنز شامل ہیں اور سیاسی جماعتوں کے ایک ہزار سے زائد کارکن و امیدواران سے شورٹی بانڈز لیے گئے ہیں۔
خواتین کے پولنگ بوتھوں پر لیڈی پولیس اہلکار تعینات ہیں جبکہ حساس اضلاع میں اینٹی رائٹ اور ریزور فورس کے اضافی دستے اسٹینڈ بائی ہیں۔ پر امن انتخابات کو ہر صورت یقینی بنایا جائے گا۔
ترجمان پنجاب پولیس کے مطابق مکمل شفاف انتخابات کے انعقاد کے لیے الیکشن کمیشن کو ہر ممکن سپورٹ فراہم کی جائے گی جبکہ اسلحے کی نمائش، ہوائی فائرنگ، لڑائی جھگڑے اور مخالفین کے کیمپ اکھاڑنے کی اجازت نہیں ہو گی۔
لاؤڈ اسپیکر ایکٹ سمیت ہر قسم کی خلاف ورزی پر زیرو ٹالرینس ہو گا اور نقص امن کا باعث بننے والے عناصر قانون کی گرفت میں ہوں گے۔

لاہور: (ویب ڈیسک) پنجاب میں ضمنی الیکشن کے دوران لڑائی جھگڑے کے واقعات پیش آئے، مخالفین ایک دوسرے پر بد نظمی کے الزامات دھرتے رہے۔
لاہور کے حلقہ پی پی 158 میں ووٹ کاسٹ کرنے کے دوران لڑائی ہوئی، واقعہ دھرم پورہ میں پیش آیا جہاں پولنگ سٹیشن کے اندر جانے پر جھگڑا ہوا۔ پی ٹی آئی کارکنان کا کہنا تھا کہ انہیں پولنگ سٹیشن کے اندر جانے سے روکا جا رہا ہے۔
لاہور ہی کے حلقے پی پی 168 میں بد نظمی کے دوران تحریک انصاف اور مسلم لیگ ن کے ووٹر آمنے سامنے آ گئے۔ ووٹرز کا کہنا تھاکہ سٹیشن 50 اور 51 میں ووٹ کاسٹ کرنے مشکل در پیش ہیں ۔تحریک انصاف کے ووٹرزنے الزام لگایا کہ مسلم لیگ ن نے اپنے بندے پولنگ سٹیشن کے اندر تعینات کیے ہیں۔واقعے کی اطلاع پر امیدوار پی پی 168 اسد کھوکھر موقع پر پہنچ گئے، ان کا کہنا تھاکہ پی ٹی آئی نے دو ہزار ووٹ کا ریٹ لگایا مگر ووٹرزمسلم لیگ ن کو ووٹ کاسٹ کررہے ہیں لہذا پی ٹی آئی کے کارکن الزام لگا رہے ہیں۔

لاہور: (ویب ڈیسک) پی ٹی آئی رہنما حماد اظہر نے کہا ہے کہ الیکشن ن لیگ کے خلاف نہیں بلکہ بیرونی سازش اور الیکشن کمیشن کیخلاف ہے، ن لیگ کا تو کہیں وجود ہی نہیں۔
لاہور میں میڈیا سے گفتگو کرتے ہوئے سابق وفاقی وزیر حماد اظہر نے کہا کہ آج پی ٹی آئی کامیابیاں سمیٹے گی، آج اراکین صوبائی اسمبلی حکومت کو چھوڑ کر اپوزیشن کی طرف آ رہے ہیں۔
لاہور کے حلقے پی پی 168 کا تحریک انصاف کے رہنما عثمان ڈار نے دورہ کیا۔ اُن کا کہنا تھا کہ امید کرتے ہیں پولنگ کا عمل پرامن طریقے سے جاری رہے گا۔ ن لیگ کی وکٹیں گرنا شروع ہو گئی ہیں، مزید چار سے پانچ استعفے آرہے ہیں۔
مظفر گڑھ میں پی ٹی آئی رہنما شہباز گل نے جعلی ووٹ ڈالنے کا الزام عائد کر دیا، ان کا کہنا تھا کہ مظفرگڑھ کے دو حلقوں میں جعلی ووٹ ڈالے جا رہے ہیں ، پی پی 272 میں پولنگ سٹیشن 44 اور 46 سے ہمارے پولنگ ایجنٹس کونکال دیا گیا، حکومت دھاندلی کرنے سے باز رہے، جعلی حکمرانوں کو عبرت ناک شکست دیں گے۔

لاہور: (ویب ڈیسک) وفاقی وزیر اطلاعات مریم اورنگزیب نے کہا ہے کہ عوام ترقی اور خوشحالی کو ووٹ دیکر ن لیگ کو کامیاب بنائیں گے۔
پنجاب میں ضمنی انتخابات سے متعلق بیان میں وزیر اطلاعات مریم اورنگزیب کا کہنا تھا کہ عمران خان نے 4 سال پورے ملک اور 9 سال خیبرپختونخوا کے عوام کو رلایا، 100 یونٹ مفت بجلی کا ریلیف عوام سے چھینا گیا، عوام کرپشن، عہد شکن اور آئین شکن کی سیاست مسترد کریں گے۔
دوسری جانب مسلم لیگ ن کے رہنما سردار ایاز صادق نے دعویٰ کیا کہ لاہور کے چاروں حلقوں میں ن لیگ کامیاب ہو گی، عمران خان کی پونے چار سال کی کارکردگی عوام کے سامنے ہے۔ اُنہوں نے کہا کہ مسٹر ایکس اور وائی کا پتہ چل چکا ہے۔

لاہور: (ویب ڈیسک) وزیراعظم شہباز شریف نے کہا ہے کہ پنجاب کے ضمنی انتخابات میں عوام اپنا ووٹ ڈالتےہوئے عمران حکومت کے پونے 4سالہ سیاہ دور کی کرپشن،نا اہلی، معاشی تباہی، مافیا کی سہولت کاری و سرپرستی اور تبدیلی کےنام پر برپا کی گئی تباہی کےبارے ضرور سوچیں۔
پنجاب میں ضمنی انتخاب کی جنگ سے متعلق اپنے ٹویٹر پیغام میں وزیراعظم شہباز شریف کا کہنا تھا کہ عوام کا ووٹ ہی ان کی طاقت ہے. اس طاقت سے انتشار، نفرت اور تقسیم کی سیاست کو مسترد کریں۔ ایک شخص کی اناء، اندازِ سیاست اور نااہلی نے ہمارے معاشرے کے حسن کو تہ و بالا کرکے رکھ دیا ہے. اپنا ووٹ قومی ترقی اور اپنے بچوں کے روشن مستقبل کیلئے ڈالیں. مجھے آپکی قوتِ انتخاب پر پورا بھروسہ ہے۔
انہوں نے کہا کہ پنجاب کو پونے 4 سال بدترین گورننس کا نشانہ بنایا گیا۔ شہریوں کو مفت ادویات اور طلباء کو وظائف سےمحروم کیا گیا۔ سرکاری آسامیوں اور تبادلوں کی کھلے عام خرید و فروخت کی گئی۔ شہری سہولیات کی حالت ابتر اور لاقانونیت عروج پررہی. پنجاب کی جو حالت کی گئی وہ پنجاب کےلوگوں کی توہین سےکم نہیں۔

لاہور: (ویب ڈیسک) پنجاب میں اقتدار کا ہما حمزہ شہباز یا پرویز الہیٰ کس کے سر بیٹھے گا، فیصلہ آج ہونے والے ضمنی الیکشن میں ہو گا۔
ملک کے سب سے بڑے صوبے کی 20 نشستوں پر ضمنی الیکشن وزیراعلیٰ پنجاب کی قسمت کا فیصلہ کرے گا۔ پنجاب میں حکومت سازی کیلئے 186 ارکان درکار ہیں۔ مسلم لیگ (ن) کوحکومت بنانےکیلئے 11 نشستوں پر کامیابی درکار ہے۔ مسلم لیگ (ن) اور اتحادیوں کے ممبران کی تعداد 175 ہے جن میں مسلم لیگ (ن) 163، پیپلزپارٹی 10، آزاد 4، راہ حق پارٹی کا ایک ممبر شامل ہے۔ ایک آزاد امیدوار چودھری نثارموجودہ صورتحال میں غیرجانبدار ہیں۔
تحریک انصاف کو حکومت بنانے کیلئے 13 نشستوں کی ضرورت ہے، تحریک انصاف اور (ق) لیگ کے ممبران کی تعداد 173 ہے جن میں پی ٹی آئی 163، مسلم لیگ (ق) کے ممبران کی تعداد 10 ہے۔
صوبائی دارالحکومت لاہورکے چاروں حلقوں میں گھمسان کا رن ہے۔ پی پی 158 لاہورمیں روایتی حریف (ن) لیگ اور پی ٹی آئی میں مقابلہ ہے جہاں ن لیگ کے رانا احسن شرافت اور پی ٹی آئی کے اکرم عثمان مدمقابل ہیں۔ پی پی 167 لاہورمیں (ن) لیگ کے نذیرچوہان کامیابی کےلیے پرعزم ہیں تو پی ٹی آئی کے شبیر احمد گجر لیگی امیدوار کو ٹف ٹائم دیتے دکھائی دیتے ہیں۔ پی پی 168 لاہور میں لیگی امیدوارملک اسد کھوکھر جیت کےلیے کوشاں ہیں ان کا مقابلہ تحریک انصاف کے نوازاعوان کر رہے ہیں۔
پی پی 170 لاہور میں (ن) لیگ اور پی ٹی آئی کا میدان امین ذوالقرنین اور ظہیرعباس کھوکھر نے سنبھالا ہے۔ راولپنڈی کے حلقہ پی پی 7 میں (ن) لیگ کے راجہ صغیراحمد اور پی ٹی آئی کے کرنل (ر) شبیراعوان میں کانٹے کا مقابلہ ہے۔ پی پی 83 خوشاب میں 3 امیدواروں میں مقابلہ ہے جن میں ن لیگ کے امیر حیدر، پی ٹی آئی کے حسن اسلم ملک مدمقابل ہیں جبکہ ن لیگ کےباغی آصف ملک آزاد حیثیت سے قسمت آزمائی کر رہے ہیں۔
پی پی 90 بھکر میں (ن )لیگ اور پی ٹی آئی کی پنجہ آزمائی سعید اکبر نوانی اور عرفان اللہ نیازی کے ذمہ ہے۔ پی پی 97 فیصل آباد میں ن لیگ کے اجمل چیمہ اور پی ٹی آئی کے علی افضل ساہی مدمقابل ہیں۔
پی پی 125 جھنگ میں بھی بڑا ٹاکرا ہے جہاں ن لیگ کےفیصل حیات جبوانہ اور پی ٹی آئی کےاعظم چیلہ میں مقابلہ ہے، آزاد امیدوار افتخار احمد بلوچ بھی جیت کےلیے پرعزم ہیں۔ پی پی 127 جھنگ کے معرکےمیں مہراسلم بھروانہ اور نواز بھروانہ جیت کے لیے بھرپور جنگ جاری رکھے ہوئے ہیں۔
پی پی 140 شیخوپورہ سے خالد محمود مسلم لیگ (ن) کے امیدوار ہیں جبکہ پی ٹی آئی نے خرم شہزاد ورک کو میدان میں اتارا ہے۔ ساہیوال کے حلقہ پی پی 202 کا معرکہ ن لیگ کےنعمان لنگڑیال اور پی ٹی آئی کےغلام سرور کے مقابل ہے۔
پی پی 217 ملتان میں بھی نون اور جنون میں مقابلہ ہے جہاں ن لیگ کےسلمان نعیم اورپی ٹی آئی کے زین قریشی آمنے سامنے ہیں، زین قریشی والد کی شکست کا بدلہ لینے کے خواہش مند ہیں تو سلمان نعیم والد کے بعد بیٹےکو بھی ہرانے کے لیے پرجوش ہیں۔
پی پی 224 لودھراں میں روایتی حریف ٹکرا رہے ہیں، ن لیگ کےزوار وڑائچ اور پی ٹی آئی کےعامراقبال شاہ میں مقابلہ ہے۔ پی پی 228 لودھراں میں نذیر احمد خان مسلم لیگ (ن) کے امیدوار ہیں جبکہ کیپٹن (ر)عزت جاوید پی ٹی آئی کے ٹکٹ پر قسمت آزمائی کر رہے ہیں۔
پی پی 237 بہاولنگر میں (ن) لیگ اورپی ٹی آئی میں ٹاکرا فدا حسین وٹو اور سید آفتاب رضا کے مابین ہو رہا ہے۔ پی پی 272 مظفرگڑھ سے ن لیگ کی زہرہ باسط بخاری جیت کے لیے پرعزم ہیں۔ پی ٹی آئی کے معظم جتوئی کا لیگی امیدوار کو ٹف ٹائم دینے کی کوشش میں ہیں۔
پی پی 273 مظفرگڑھ سے سبطین رضا (ن) لیگ کی ٹکٹ پر میدان میں اترے ہیں تو تحریک انصاف کےیاسرعرفات جتوئی بھی جیت کے لیے پرعزم ہیں۔ پی پی 282 لیہ سے ن لیگ اور پی ٹی آئی میں پنجہ آزمائی طاہررندھاوا اور قیصرعباس مگسی کے مابین ہے۔ پی پی 288 ڈی جی خان میں ن لیگ کےعبدالقادر کھوسہ اور پی ٹی آئی کے سیف الدین کھوسہ مدمقابل ہیں۔

شیخوپورہ : (ویب ڈیسک) شیخوپورہ میں ضمنی الیکشن کے دوران اسلحہ کی برآمدگی پر 3 افراد کو گرفتار کر لیا گیا۔
ڈی پی او فیصل مختارکے مطابق ناکہ بندی کے دوران مشکوک گاڑی کو روکا گیا۔ جب گاڑی کی تلاشی لی گئی تواس میں سے اسلحہ نکل آیا۔ پولیس نے تین ملزمان کو جدید اسلحہ سمیت گرفتار کر کے مقدمہ درج کرلیا۔
ڈی پی او کا مزید کہنا ہے کہ الیکشن ڈے پر قانون کی خلاف ورزی کسی صورت برداشت نہیں کی جائے گی۔

لاہور: (ویب ڈیسک) تخت پنجاب پر حکمرانی کی سیاسی جنگ کا میدان تیار، پنجاب کے بیس حلقوں میں پولنگ کا آغاز ہو گیا، ووٹنگ شام پانچ بجے تک جاری رہے گی۔
پنجاب میں ضمنی انتخاب کیلئے سکیورٹی کے سخت انتظامات کئے گئے ہیں۔ لاہور، ملتان اور بھکر میں رینجرز اور پاک فوج کے جوان حساس پولنگ سٹیشنز پر ڈیوٹی پر موجود ہیں۔ ریٹرننگ اور پریذائیڈنگ افسروں کو مجسٹریٹ کے اختیارات تفویض کئے گئے ہیں۔ بیس حلقوں میں ضمنی الیکشن کے دوران ایک سو پچھتر امیدوار آمنے سامنے ہیں، تین ہزار ایک سو چالیس پولنگ اسٹیشن قائم کئے گئے ہیں جہاں پینتالیس لاکھ چھیانوے ہزار سے زائد ووٹرز حق رائے دہی استعمال کریں گے۔
نمبر گیم صورتحال
الیکشن کمیشن آف پاکستان کی طرف سے نوٹی فکیشن جاری ہونے کے بعد پنجاب میں نمبر گیم کی صورتحال دلچسپ ہو گئی ہے، پنجاب اسمبلی کا ایوان371 ارکان پر مشتمل ہے، حکومتی ارکان کی تعداد 175 ہے، جس میں مسلم لیگ ن کے 163، پیپلز پارٹی کے 7 اور چار آزاد امیدوار شامل ہیں۔ ن لیگ کے ایک رکن منحرف ہیں، خانیوال سے رکن صوبائی اسمبلی محمد فیصل نیازی نے استعفیٰ دیا جو منظور کر لیا گیا۔ بعد ازاں انہوں نے پی ٹی آئی کے چیئر مین عمران خان سے ملاقات کی اور حمایت کا اعلان کر دیا۔
پاکستان تحریک انصاف کو پانچ مخصوص نشستوں ملنے کے بعد تعداد 163 ہو گئی ہے۔ مسلم لیگ ق 10 کے رکن کے بعد یہ تعداد 173 ہو گئی ہے۔

راولپنڈی: (ویب ڈیسک) بلوچستان کے علاقے زیارت میں سیکیورٹی فورسز کے آپریشن میں 2 دہشت گرد ہلاک جب کہ ان کے قبضے سے اسلحہ اور گولہ بارود برآمد کر لیا گیا۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے زیارت کے علاقے ورشوم میں مغوی عمر جاوید کی بازیابی کیلئے آپریشن کیا اور دہشتگردوں کے ٹھکانے کا سراغ لگا کر اس کا صفایا کر دیا گیا۔
آئی ایس پی آر کے مطابق فائرنگ کے تبادلے میں 2 دہشتگرد مارے گئے، بدقسمتی سے عمرجاوید شہید کی لاش قریبی نالے سے ملی۔ ابتدائی اندازے کے مطابق دہشتگردوں نے عمرجاوید کو اغوا کے فوری بعد شہید کردیا گیا تھا۔
آئی ایس پی آر کے مطابق بھاگنے والے 3سے 4 دہشت گردوں کی تلاش کیلئےعلاقے میں آپریشن جاری ہے۔