لاہور: (ویب ڈیسک) پی ٹی آئی سینٹرل پنجاب کی صدر یاسمین راشد نے ضمنی الیکشن کے حوالے سے اپنے پیغام میں کہا ہے کہ عوام گھروں سے نکلیں اور بلے پر مہر لگائیں۔
پاکستان تحریک انصاف سینٹرل پنجاب کی صدر ڈاکٹر یاسمین راشد نے ضمنی الیکشن کے حوالے سے اپنے پیغام میں کہا ہے کہ 17 جولائی پاکستان کی سالمیت اور ایک آزاد قوم بننے کا دن ہے، عوام گھروں سے نکلیں اور بلے پر مہر لگاکر عمران خان کو کامیاب کرائیں۔
یاسمین راشد نے کہا کہ 17 جولائی کو لاہور کے 4 حلقوں میں ووٹنگ ہوگی، حلقے کے ووٹرز اپنا اور اپنی فیملی کا ووٹ پی ٹی آئی کو دیں تاکہ ہم ایک مضبوط اور مستحکم پاکستان بنا سکیں۔

لاپور: (ویب ڈیسک) وزیراعظم شہباز شریف کی زیر صدارت ملک میں ڈینگی کی صورتحال پر جائزہ اجلاس آج لاہور میں منعقد ہوا
وزیراعظم شہباز شریف نے ڈینگی کے پھیلاؤ کی روک تھام کے لیے خصوصی حفاظتی اقدامات کرنے کی تاکید کی.
وزیراعظم شہباز شریف نے چیف سیکرٹری پنجاب کو خصوصی کمیٹی بنانے کی ہدایت کی جو 36 اضلاع میں ضلعی انتظامیہ کی طرف سے ڈینگی کے تدارک کے لیے کیے گئے انتظامات کا تفصیلی جائزہ لے گی۔
وزیراعظم شہباز شریف نے اس امر پر خصوصی زور دیا کہ ڈینگی کے خلاف مرحلہ وار اقدامات میں ضلعی انتظامیہ کا کلیدی کردار ہے اس لیے ضلعی انتظامیہ کو پیشہ ورانہ تربیت یافتہ عملے اور جدید فنی طریقوں کو اپناتے ہوئے ڈینگی کے خلاف جنگی بنیادوں پر مؤثر طریقے سے انتظامات کرنے کی ضرورت ہے.
وزیراعظم شہباز شریف نے کہا کہ ڈینگی وباء کی شروعات میں پاکستان عالمی سطح پر ڈینگی کے خلاف خاطر خواہ کامیابی سے نبرد آزما تھا کارکردگی کے اسی پیمانے کو دوبارہ فعال کرنے کی ضرورت ہے۔
وزیراعظم شہباز شریف نے ڈینگی سے بچاؤ کی عوامی آگاہی مہم اور عوامی مقامات پر حفاظت کو یقینی بنانے کے لئے ہرممکن اقدامات کرنے کی ہدایت کی۔
اجلاس میں چیف سیکرٹری پنجاب, سیکرٹری بورڈ آف انویسٹمنٹ پنجاب , سیکرٹری ایگریکلچر پنجاب , سیکرٹری آبپاشی پنجاب , سیکرٹری لوکل گورنمنٹ پنجاب ،کمشنر لاہور ڈویژن اور ڈپٹی کمشنر لاہور سمیت دیگر اعلی حکام نے شرکت کی۔ کمشنر راولپنڈی ڈویژن اور ڈپٹی کمشنر اسلام آباد بذریعہ ویڈیو لنک اجلاس میں شریک ہوئے.

لاہور: (ویب ڈیسک) پاکستان تحریک انصاف (پی ٹی آئی) کے سینئر رہنما اور سابق وفاقی وزیر اطلاعات فواد چودھری نے کہا ہے کہ امپورٹڈ حکومت جو بھی ہتھکنڈے اپنالے ضمنی انتخاب میں پی ٹی آئی بھرپور کامیابی حاصل کرے گی۔ امید ہے 16 نشستوں پر بھرپور کامیاب ہو گی۔
لاہور میں پریس کانفرنس کرتے ہوئے تحریک انصاف کے رہنما فواد چودھری نے کہا کہ پنجاب میں ضمنی الیکشن کی ابتدا ہی دھاندلی سے ہوئی ہے، الیکشن کمیشن خود ہی دھاندلی کررہا ہے، الیکشن کمیشن کہتا ہے جب ہم ہیں تو کسی کو دھاندلی کی ضرورت نہیں ہے، الیکشن کمیشن کے ہر فیصلے کو عدالتوں میں مسترد کیا گیا، آج عدالت نے پولنگ ایجنٹ دوسری جگہ سے نہ لینے کا بھی فیصلہ معطل کردیا، الیکشن کمیشن کا کل کا فیصلہ بھی عدالت نے مسترد کیا، الیکشن کمیشن سے کوئی پوچھنے والا ہی نہیں ہے۔
ان کا کہنا تھا کہ پنجاب میں بجٹ اجلاس نہیں ہوا اس وقت جو بھی خرچہ ہورہا ہے غیر قانونی ہے، پنجاب میں جہازوں کو رکشہ بنایا گیا ہے، انتخابی مہم ہیلی کاپٹرز پر چل رہی ہے، وقت آنے پر یہ سارے حساب کتاب ہوں گے۔
انہوں نے کہا کہ پنجاب میں کوئی بھی پی ٹی آئی میں شامل ہوتا ہے تو اسے بڑا مجرم بنادیا جاتا ہے، پی ٹی آئی امیدواروں پر جعلی کیسز بنائے جارہے ہیں، پی ٹی آئی امیدواروں کو روکنے کیلئے ریاستی مشینری استعمال کی جارہی ہے۔ پنجاب میں غیرقانونی گرفتاریاں کی جارہی ہے، جو بھی پی ٹی آئی کی حمایت کررہا ہے اسے گرفتار کرلیا جاتا ہے، انتخابی مہم میں متحرک لوگوں کو بھی جعلی کیسز میں پھنسایا جارہا ہے۔
رہنما تحریک انصاف نے کہا کہ جمہوریت میں اکثریت دکھا کر آنا پڑتا ہے، حمزہ شہباز کو آمریت کا شوق ہے تو الگ بات ہے، یہ جو بھی ہتھکنڈے اپنالیں ضمنی انتخاب میں پی ٹی آئی بھرپور کامیابی حاصل کرے گی، ہمیں امید ہے تحریک انصاف 16 نشستوں پر بھرپور کامیاب ہو گی۔

لاہور: (ویب ڈیسک) پنجاب میں ضمنی انتخابات کے لیے لاہور کے حلقہ پی پی 168 میں ایک شخص سے شناختی کارڈ ملنے کے معاملے پر زیرحراست شخص کی فرخ حبیب کے ساتھ مبینہ واٹس ایپ گفتگو لیک ہوگئی۔
ملزم نے پی ٹی آئی رہنما حافظ فرحت عباس سے مبینہ طور پرگفتگو کی۔ ملزم نے گزشتہ رات تمام شناختی کارڈزمبینہ طور پر فرخ حبیب کو بھیجے۔
ملزم اور پی ٹی آئی رہنما حافظ فرحت کے درمیان چیٹ مئی میں شروع ہوئی۔ ملزم نے حافظ فرحت کو مبینہ طور پر سینکڑوں شناختی کارڈ خرید کر بھیجے گئے۔
فرخ حبیب نے ملزم خالد سندھو کو جون میں واٹس ایپ میسج کیا۔ واٹس ایپ چیٹ کے مطابق فرخ حبیب نے ملزم کو اپنے گھر پر بلایا۔ ملزم نے بتایا کہ وہ گزشتہ رات تک 7 ہزار ووٹ خرید چکا تھا۔
اُدھر الیکشن کمیشن آف پاکستان نے زیرحراست شخص کی فرخ حبیب کے ساتھ مبینہ بات چیت کا نوٹس لے لیا اور ڈسٹرکٹ مانیٹرنگ آفیسر سے رپورٹ طلب کرلی۔
ترجمان الیکشن کمیشن نے کہا ہے کہ رپورٹ موصول ہونے کے بعد کارروائی عمل میں لائی جائے گی۔

کراچی: (ویب ڈیسک) پاکستان پیپلزپارٹی کے شریک چیئر مین اور سابق صدر آصف علی زرداری نے کہا ہے کہ سیاسی جماعتوں اور اسٹبلیشمنٹ کے تعلقات میں وقت کے ساتھ بہت بہتری آئی ہے اور وقت کے ساتھ اور بہتری آئے گی۔
ان خیالات کا اظہار سابق صدر نے کراچی میں صوبائی وراء سے ملاقات کے دوران کیا۔
ان کا کہنا تھا کہ کاش عمران خان کو صحافیوں کے حقوق کا خیال اپنے دور حکومت میں بھی آجاتا، پپیلزپارٹی کے دور حکومت میں ہمیشہ صحافیوں کو آزادی ملی ہے اور ملتی رہے گی۔ عمران خان کا دور آزادی صحافت کے لحاظ سے سیاہ دور رہا ہے۔
اپنی بات کو جاری رکھتے ہوئے آصف علی زرداری نے کہا کہ سیاسی جماعتوں اور اسٹبلیشمنٹ کے تعلقات میں وقت کے ساتھ بہت بہتری آئی ہے اور وقت کے ساتھ اور بہتری آئے گی کیونکہ سب کا مقصد ملک کی ترقی اور جمہوریت کی مضبوطی ہے۔
ان کا کہنا تھا کہ ہم سب نے وقت سے بہت کچھ سیکھا ہے، اس ملک کو اتحادی حکومت، اسٹبلیشمنٹ اور عدلیہ ، سب نے ملکر اور آئین کی پاسداری کرتے ہوئے اس بحران سے نکالنا ہے جس میں عمران خان ہمیں چھوڑ کر گیا ہے۔

اسلام آباد: (ویب ڈیسک) وزیراعظم شہباز شریف نے مسلم لیگ ن کی نائب صدر مریم نواز اورکیپٹن (ر) صفدر کے کورونا میں مبتلا ہونے پر دونوں کے لیے نیک تمناؤں کا اظہار کیا ہے۔
ٹوئٹر پر ایک بیان میں شہباز شریف کا کہنا تھا کہ یہ سن کر دکھ ہوا کہ مریم بیٹی اورکیپٹن صفدرکا کووڈ ٹیسٹ مثبت آیا ہے، دونوں کی جلد صحت یابی کے لیے میری دلی دعائیں اور نیک تمنائیں ان کے ساتھ ہیں۔
وزیراعظم کا مزید کہنا تھا کہ جس طرح مریم نے مسلم لیگ ن کی سیاسی مہم کی قیادت کی، اس پر ہم سب کو فخر ہے۔
خیال رہےکہ مریم نواز نے ٹوئٹر پر جاری بیان میں بتایا تھا کہ ان کا کووڈ ٹیسٹ مثبت آیا ہے۔
واضح رہےکہ مریم نواز پنجاب کے ضمنی انتخابات میں ن لیگ کی انتخابی مہم چلارہی تھیں اور گزشتہ چند دن میں انہوں نے پنجاب کے مختلف شہروں میں انتخابی جلسےکیے تھے۔
خیال رہےکہ پنجاب کے 20حلقوں میں ضمنی انتخاب کے لیے پولنگ کل بروز 17 جولائی کو ہوگی جس میں پاکستان تحریک انصاف اور مسلم لیگ ن کے درمیان سخت مقابلے کی توقع ہے۔

حیدرآباد: (ویب ڈیسک) صوبائی وزیراطلاعات شرجیل انعام میمن نے کہا ہے کہ حیدرآباد واقعے پر کسی کو سیاست چمکانے کی اجازت نہیں دی جائے گی اور جو شرانگیزی پھیلائے گا اُس کے خلاف بلا تفریق کارروائی کریں گے۔
حیدرآباد میں میڈیا سے گفتگو کرتے ہوئے شرجیل میمن نے کہا کہ حیدرآباد میں بلال نامی نوجوان کے قتل کے بعد سندھ حکومت نے تمام جماعتوں سے رابطے کیے اور سب نے ہی امن و امان برقرار رکھنے پر اتفاق کیا۔
انہوں نے کہا کہ لسانی فساد کی کوشش کو ناکام بنایا جائے گا اور کسی کو سیاست چمکانے کی اجازت نہیں دی جائے گی، حکومت کسی کو یہ اختیار بھی نہیں دے گی کہ وہ اس معاملے پر شرانگیزی پھیلائے۔
شرجیل میمن نے عوامی نیشنل پارٹی سندھ کے صدر اور قوم پرست رہنماؤں کی جانب سے امن برقرار رکھنے کے بیانات اور کاوشوں کو سراہتے ہوئے کہا کہ ایسی کاوشوں سے ہم لسانی فساد کی کوشش کو ناکام بنائیں گے۔

لاہور: (ویب ڈیسک) پاکستان مسلم لیگ ن کی نائب صدر مریم نواز نے کہا ہے کہ دھاندلی پاکستان تحریک انصاف (پی ٹی آئی) کے ڈی این اے میں ہے۔
ان خیالات کا اظہار پاکستان مسلم لیگ ن کی نائب صدرنے سماجی رابطے کی ویب سائٹ ٹویٹر پر کیا۔
انہوں نے لکھا کہ دھاندلی پی ٹی آئی کے ڈی این اے میں شامل ہے، اب تھیلے اور الیکشن کمشن کا عملہ چُرا کر نہیں بھاگ سکتے، اب یہ دھاندلی کا دوسرا طریقہ نکال لائے، یہ جانتے ہیں دھاندلی کیے بغیر یہ نا پہلے الیکشن جیتے تھے نا انشاءاللّہ اب جیت سکتے۔
مریم نواز نے کہا کہ یہ سیلیکشن نہیں،الیکشن ہو رہاہے، مسٹر ایکس وائے زیڈ آخر میں دھاندلی خان خود نکلے گا!

کراچی: (ویب ڈیسک) صوبائی وزیر بلدیات ناصر حسین شاہ نے کہا ہے کہ سازش کے تحت لسانی فسادات کرانے کی کوشش کی گئی، جس کا مقصد بلدیاتی انتخابات کو متاثر کرنا ہے۔
صوبائی وزیر بلدیات ناصر حسین شاہ نے کراچی سمیت سندھ کے مختلف اضلاع میں ہونے والے فسادات پر ردعمل کا اظہار کرتے ہوئے کہا ہے کہ سازش کے تحت لسانی فسادات کرانے کی کوشش کی گئی، جس کا مقصد بلدیاتی انتخابات کو متاثر کرنا ہے۔
ان کا کہنا تھا کہ کچھ سیاسی لوگ مفادات کے لیے جرائم پیشہ لوگوں کو استعمال کر رہے ہیں، یہ فسادات کرانے کی سازش کہاں ہوئی؟ سندھ حکومت اس کی تحقیقات کرائے گی اور کسی قاتل کو معاف نہیں کیا جائے گا۔
واضح رہے کہ سندھ میں بلدیاتی انتخابات کے دوسرے مرحلے میں کراچی، حیدرآباد اور ٹھٹھہ ڈویژن میں آئندہ اتوار 24 جولائی کو پولنگ ہوگی۔
سندھ میں بلدیاتی انتخابات کے پہلے مرحلے میں پیپلز پارٹی نے نمایاں کامیابی حاصل کی تھی۔