لاہور: (ویب ڈیسک) وزیراعظم شہباز شریف نے کہا ہے کہ پنجاب کے ضمنی انتخابات میں عوام اپنا ووٹ ڈالتےہوئے عمران حکومت کے پونے 4سالہ سیاہ دور کی کرپشن،نا اہلی، معاشی تباہی، مافیا کی سہولت کاری و سرپرستی اور تبدیلی کےنام پر برپا کی گئی تباہی کےبارے ضرور سوچیں۔
پنجاب میں ضمنی انتخاب کی جنگ سے متعلق اپنے ٹویٹر پیغام میں وزیراعظم شہباز شریف کا کہنا تھا کہ عوام کا ووٹ ہی ان کی طاقت ہے. اس طاقت سے انتشار، نفرت اور تقسیم کی سیاست کو مسترد کریں۔ ایک شخص کی اناء، اندازِ سیاست اور نااہلی نے ہمارے معاشرے کے حسن کو تہ و بالا کرکے رکھ دیا ہے. اپنا ووٹ قومی ترقی اور اپنے بچوں کے روشن مستقبل کیلئے ڈالیں. مجھے آپکی قوتِ انتخاب پر پورا بھروسہ ہے۔
انہوں نے کہا کہ پنجاب کو پونے 4 سال بدترین گورننس کا نشانہ بنایا گیا۔ شہریوں کو مفت ادویات اور طلباء کو وظائف سےمحروم کیا گیا۔ سرکاری آسامیوں اور تبادلوں کی کھلے عام خرید و فروخت کی گئی۔ شہری سہولیات کی حالت ابتر اور لاقانونیت عروج پررہی. پنجاب کی جو حالت کی گئی وہ پنجاب کےلوگوں کی توہین سےکم نہیں۔

لاہور: (ویب ڈیسک) پنجاب میں اقتدار کا ہما حمزہ شہباز یا پرویز الہیٰ کس کے سر بیٹھے گا، فیصلہ آج ہونے والے ضمنی الیکشن میں ہو گا۔
ملک کے سب سے بڑے صوبے کی 20 نشستوں پر ضمنی الیکشن وزیراعلیٰ پنجاب کی قسمت کا فیصلہ کرے گا۔ پنجاب میں حکومت سازی کیلئے 186 ارکان درکار ہیں۔ مسلم لیگ (ن) کوحکومت بنانےکیلئے 11 نشستوں پر کامیابی درکار ہے۔ مسلم لیگ (ن) اور اتحادیوں کے ممبران کی تعداد 175 ہے جن میں مسلم لیگ (ن) 163، پیپلزپارٹی 10، آزاد 4، راہ حق پارٹی کا ایک ممبر شامل ہے۔ ایک آزاد امیدوار چودھری نثارموجودہ صورتحال میں غیرجانبدار ہیں۔
تحریک انصاف کو حکومت بنانے کیلئے 13 نشستوں کی ضرورت ہے، تحریک انصاف اور (ق) لیگ کے ممبران کی تعداد 173 ہے جن میں پی ٹی آئی 163، مسلم لیگ (ق) کے ممبران کی تعداد 10 ہے۔
صوبائی دارالحکومت لاہورکے چاروں حلقوں میں گھمسان کا رن ہے۔ پی پی 158 لاہورمیں روایتی حریف (ن) لیگ اور پی ٹی آئی میں مقابلہ ہے جہاں ن لیگ کے رانا احسن شرافت اور پی ٹی آئی کے اکرم عثمان مدمقابل ہیں۔ پی پی 167 لاہورمیں (ن) لیگ کے نذیرچوہان کامیابی کےلیے پرعزم ہیں تو پی ٹی آئی کے شبیر احمد گجر لیگی امیدوار کو ٹف ٹائم دیتے دکھائی دیتے ہیں۔ پی پی 168 لاہور میں لیگی امیدوارملک اسد کھوکھر جیت کےلیے کوشاں ہیں ان کا مقابلہ تحریک انصاف کے نوازاعوان کر رہے ہیں۔
پی پی 170 لاہور میں (ن) لیگ اور پی ٹی آئی کا میدان امین ذوالقرنین اور ظہیرعباس کھوکھر نے سنبھالا ہے۔ راولپنڈی کے حلقہ پی پی 7 میں (ن) لیگ کے راجہ صغیراحمد اور پی ٹی آئی کے کرنل (ر) شبیراعوان میں کانٹے کا مقابلہ ہے۔ پی پی 83 خوشاب میں 3 امیدواروں میں مقابلہ ہے جن میں ن لیگ کے امیر حیدر، پی ٹی آئی کے حسن اسلم ملک مدمقابل ہیں جبکہ ن لیگ کےباغی آصف ملک آزاد حیثیت سے قسمت آزمائی کر رہے ہیں۔
پی پی 90 بھکر میں (ن )لیگ اور پی ٹی آئی کی پنجہ آزمائی سعید اکبر نوانی اور عرفان اللہ نیازی کے ذمہ ہے۔ پی پی 97 فیصل آباد میں ن لیگ کے اجمل چیمہ اور پی ٹی آئی کے علی افضل ساہی مدمقابل ہیں۔
پی پی 125 جھنگ میں بھی بڑا ٹاکرا ہے جہاں ن لیگ کےفیصل حیات جبوانہ اور پی ٹی آئی کےاعظم چیلہ میں مقابلہ ہے، آزاد امیدوار افتخار احمد بلوچ بھی جیت کےلیے پرعزم ہیں۔ پی پی 127 جھنگ کے معرکےمیں مہراسلم بھروانہ اور نواز بھروانہ جیت کے لیے بھرپور جنگ جاری رکھے ہوئے ہیں۔
پی پی 140 شیخوپورہ سے خالد محمود مسلم لیگ (ن) کے امیدوار ہیں جبکہ پی ٹی آئی نے خرم شہزاد ورک کو میدان میں اتارا ہے۔ ساہیوال کے حلقہ پی پی 202 کا معرکہ ن لیگ کےنعمان لنگڑیال اور پی ٹی آئی کےغلام سرور کے مقابل ہے۔
پی پی 217 ملتان میں بھی نون اور جنون میں مقابلہ ہے جہاں ن لیگ کےسلمان نعیم اورپی ٹی آئی کے زین قریشی آمنے سامنے ہیں، زین قریشی والد کی شکست کا بدلہ لینے کے خواہش مند ہیں تو سلمان نعیم والد کے بعد بیٹےکو بھی ہرانے کے لیے پرجوش ہیں۔
پی پی 224 لودھراں میں روایتی حریف ٹکرا رہے ہیں، ن لیگ کےزوار وڑائچ اور پی ٹی آئی کےعامراقبال شاہ میں مقابلہ ہے۔ پی پی 228 لودھراں میں نذیر احمد خان مسلم لیگ (ن) کے امیدوار ہیں جبکہ کیپٹن (ر)عزت جاوید پی ٹی آئی کے ٹکٹ پر قسمت آزمائی کر رہے ہیں۔
پی پی 237 بہاولنگر میں (ن) لیگ اورپی ٹی آئی میں ٹاکرا فدا حسین وٹو اور سید آفتاب رضا کے مابین ہو رہا ہے۔ پی پی 272 مظفرگڑھ سے ن لیگ کی زہرہ باسط بخاری جیت کے لیے پرعزم ہیں۔ پی ٹی آئی کے معظم جتوئی کا لیگی امیدوار کو ٹف ٹائم دینے کی کوشش میں ہیں۔
پی پی 273 مظفرگڑھ سے سبطین رضا (ن) لیگ کی ٹکٹ پر میدان میں اترے ہیں تو تحریک انصاف کےیاسرعرفات جتوئی بھی جیت کے لیے پرعزم ہیں۔ پی پی 282 لیہ سے ن لیگ اور پی ٹی آئی میں پنجہ آزمائی طاہررندھاوا اور قیصرعباس مگسی کے مابین ہے۔ پی پی 288 ڈی جی خان میں ن لیگ کےعبدالقادر کھوسہ اور پی ٹی آئی کے سیف الدین کھوسہ مدمقابل ہیں۔

شیخوپورہ : (ویب ڈیسک) شیخوپورہ میں ضمنی الیکشن کے دوران اسلحہ کی برآمدگی پر 3 افراد کو گرفتار کر لیا گیا۔
ڈی پی او فیصل مختارکے مطابق ناکہ بندی کے دوران مشکوک گاڑی کو روکا گیا۔ جب گاڑی کی تلاشی لی گئی تواس میں سے اسلحہ نکل آیا۔ پولیس نے تین ملزمان کو جدید اسلحہ سمیت گرفتار کر کے مقدمہ درج کرلیا۔
ڈی پی او کا مزید کہنا ہے کہ الیکشن ڈے پر قانون کی خلاف ورزی کسی صورت برداشت نہیں کی جائے گی۔

لاہور: (ویب ڈیسک) تخت پنجاب پر حکمرانی کی سیاسی جنگ کا میدان تیار، پنجاب کے بیس حلقوں میں پولنگ کا آغاز ہو گیا، ووٹنگ شام پانچ بجے تک جاری رہے گی۔
پنجاب میں ضمنی انتخاب کیلئے سکیورٹی کے سخت انتظامات کئے گئے ہیں۔ لاہور، ملتان اور بھکر میں رینجرز اور پاک فوج کے جوان حساس پولنگ سٹیشنز پر ڈیوٹی پر موجود ہیں۔ ریٹرننگ اور پریذائیڈنگ افسروں کو مجسٹریٹ کے اختیارات تفویض کئے گئے ہیں۔ بیس حلقوں میں ضمنی الیکشن کے دوران ایک سو پچھتر امیدوار آمنے سامنے ہیں، تین ہزار ایک سو چالیس پولنگ اسٹیشن قائم کئے گئے ہیں جہاں پینتالیس لاکھ چھیانوے ہزار سے زائد ووٹرز حق رائے دہی استعمال کریں گے۔
نمبر گیم صورتحال
الیکشن کمیشن آف پاکستان کی طرف سے نوٹی فکیشن جاری ہونے کے بعد پنجاب میں نمبر گیم کی صورتحال دلچسپ ہو گئی ہے، پنجاب اسمبلی کا ایوان371 ارکان پر مشتمل ہے، حکومتی ارکان کی تعداد 175 ہے، جس میں مسلم لیگ ن کے 163، پیپلز پارٹی کے 7 اور چار آزاد امیدوار شامل ہیں۔ ن لیگ کے ایک رکن منحرف ہیں، خانیوال سے رکن صوبائی اسمبلی محمد فیصل نیازی نے استعفیٰ دیا جو منظور کر لیا گیا۔ بعد ازاں انہوں نے پی ٹی آئی کے چیئر مین عمران خان سے ملاقات کی اور حمایت کا اعلان کر دیا۔
پاکستان تحریک انصاف کو پانچ مخصوص نشستوں ملنے کے بعد تعداد 163 ہو گئی ہے۔ مسلم لیگ ق 10 کے رکن کے بعد یہ تعداد 173 ہو گئی ہے۔

راولپنڈی: (ویب ڈیسک) بلوچستان کے علاقے زیارت میں سیکیورٹی فورسز کے آپریشن میں 2 دہشت گرد ہلاک جب کہ ان کے قبضے سے اسلحہ اور گولہ بارود برآمد کر لیا گیا۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے زیارت کے علاقے ورشوم میں مغوی عمر جاوید کی بازیابی کیلئے آپریشن کیا اور دہشتگردوں کے ٹھکانے کا سراغ لگا کر اس کا صفایا کر دیا گیا۔
آئی ایس پی آر کے مطابق فائرنگ کے تبادلے میں 2 دہشتگرد مارے گئے، بدقسمتی سے عمرجاوید شہید کی لاش قریبی نالے سے ملی۔ ابتدائی اندازے کے مطابق دہشتگردوں نے عمرجاوید کو اغوا کے فوری بعد شہید کردیا گیا تھا۔
آئی ایس پی آر کے مطابق بھاگنے والے 3سے 4 دہشت گردوں کی تلاش کیلئےعلاقے میں آپریشن جاری ہے۔

لاہور: (ویب ڈیسک) پنجاب اسمبلی کے 20 حلقوں کے ضمنی انتخابات میں آج ووٹ ڈالے جائیں گے۔
صوبے کے 14 اضلاع کے ضمنی انتخابات میں 175 امیدوار آمنے سامنے ہیں۔ 20 حلقوں میں رجسٹرڈ ووٹرز کی مجموعی تعداد 45 لاکھ 79 ہزار 898 ہے جن کیلئے 3 ہزار 131 پولنگ اسٹیشنز قائم کیے گئے ہیں۔
676 پولنگ اسٹیشنز انتہائی حساس اور ایک ہزار194پولنگ اسٹیشنز کو حساس قرار دیا گیا ہے جبکہ انتہائی حساس اور حساس پولنگ اسٹیشنز پر سی سی ٹی وی کیمرے نصب کیے گئے ہیں۔
ضمنی انتخاب کے دوران امان و امان کی صورتحال کے پیش نظر پنجاب رینجرز کے د ستے گشت کریں گے اور فوج اسٹینڈ بائی پوزیشن پر ہوگی۔
پنجاب اسمبلی کے ضمنی انتخابات راولپنڈی کے حلقے پی پی 7، خوشاب میں پی پی 83، پی پی 90 بھکر 2، پی پی 97 فیصل آباد 1، پی پی 125 جھنگ، پی پی 127 جھنگ 4 ، پی پی 140 شیخوپورہ کی نشست پر ہوں گے۔
اس کے علاوہ لاہور کے حلقوں پی پی 158، پی پی 167، پی پی 168، پی پی 170 پر کل ووٹ ڈالیں جائیں گے۔
پنجاب اسمبلی کے حلقے پی پی 202 ساہیوال، پی پی 217 ملتان، پی پی 224 لودھراں ون اور پی پی 228 لودھراں 5، پی پی 237 بہاولنگر، پی پی 272 مظفر گڑھ 5، پی پی 273 مظفر گڑھ 6، پی پی 28 8 لیہ اور پی پی 288 ڈیرہ غازی خان میں کل ضمنی انتخاب ہوگا۔
ضمنی انتخابات میں مسلم لیگ ن اور تحریک انصاف کے امیدواروں کے درمیان سخت مقابلے کی توقع ہے اور ن لیگ نے پی ٹی آئی کے ڈی سیٹ ہونے والے ارکان کو ٹکٹ دیے ہیں۔
الیکشن کمیشن نے انتظامات مکمل کرلیے ہیں اورانتخابی سامان کی ترسیل جاری ہے۔
واضح رہے کہ یہ ضمنی انتخابات بہت دلچسپ ہیں جس میں حمزہ شہباز کو وزیراعلیٰ برقرار رکھنے کیلئے ن لیگ کو 20 میں سے 9 نشستیں جیتنا ضروری ہے۔
خیال رہے کہ 20 مئی کو الیکشن کمیشن نے پنجاب اسمبلی میں حمزہ شہباز کو وزیراعلیٰ کا ووٹ دینے والے تحریک انصاف کے 25 منحرف ارکان کو ڈی سیٹ کردیا تھا۔
ڈی سیٹ کیے جانے والے 20 ارکان کی جنرل نشستوں پر ضمنی انتخابات ہو رہے ہیں۔

حیدرآباد: (ویب ڈیسک) سندھ کے دوسرے بڑے شہر میں خاتون کے ہاں بیک وقت چار جڑواں بچوں کی پیدائش ہوئی ہے۔
حیدرآباد کے علاقے ٹنڈو حیدر کی رہائشی خاتون زہرہ نامی خاتون نے اسٹیشن روڈ پر واقع فلاحی تنظیم کے اسپتال میں بیک وقت چار لڑکوں کو جنم دیا۔
ڈاکٹرز کے مطابق خاتون کو زچگی کے لیے ایک روز قبل اسپتال لایا گیا جہاں اُن کو نگرانی میں رکھا گیا، بعد ازاں آپریشن کے ذریعے بچوں کی پیدائش ہوئی۔
ڈاکٹرز نے بتایا کہ تین بچے مکمل صحت یاب جبکہ ایک کو تھوڑی طبیعت ناساز ہونے پر نرسری میں رکھا گیا ہے، امید ہے کہ وہ بھی جلد اپنی والدہ کے پاس ہوگا۔

اسلام آباد: (ویب ڈیسک) وفاقی وزیر اطلاعات مریم اورنگزیب نے سابق وزیراعظم عمران خان کی تقریر پر ردعمل میں کہا ہے کہ آزاد میڈیا کی بات کرنے والے عمران خان کا دور میڈیا کیلئے سیاہ ترین دور رہا۔
اسلام آباد میں پریس کانفرنس کرتے ہوئے مریم اورنگزیب کا کہنا تھاکہ رپورٹرز ود آؤٹ بارڈرز کی رپورٹ میں عمران خان کو پری ڈیٹر قرار دیا گیا، ایک چھوٹا شخص میڈیا کی آزادی پر پابندی لگاتا رہا۔
انہوں نے کہا کہ عمران خان کے ٹرولز نے سوشل میڈیا پر غریدہ فاروقی کے خلاف غلیظ مہم چلائی، عنبر رحیم شمسی اور عاصمہ شیرازی سمیت کئی خواتین صحافیوں کو ہراسانی کا سامنا کرنا پڑا۔
وفاقی وزیر اطلاعات کا کہنا تھاکہ عمران خان کے دور میں صحافیوں کو دھمکیاں دی گئیں، اسد طور اور محسن بیگ پر تشدد کیا گیا، ابصار عالم کو گولیاں ماری گئیں، مطیع اللہ جان کو اغوا کیا گیا اور مرتضیٰ سولنگی کا پروگرام بند کیا گیا ۔
ان کا کہنا تھاکہ طلعت حسین کو نکلوایا گیا،
انہوں نے مزید کہا کہ عمران خان اتنے ڈرپوک ہیں کہ ٹی وی پر نواز شریف اور مریم نواز کی آواز بند کرادی۔
خیال رہے کہ سابق وزیراعظم عمران خان نے ایک تقریب سے خطاب میں کہا ہے کہ مجھے کبھی میڈیا سے خطرہ نہیں تھاکوئی ڈر نہیں تھا، میں نے میڈیا کے خلاف کبھی کوئی کارروائی نہیں کی، میری ہدایت پر کسی بھی صحافی کو نہیں اٹھایاگیا۔

لاہور: (ویب ڈیسک) اسپیکر پنجاب اسمبلی چودھری پرویز الٰہی کا کہنا ہے کہ الیکشن کمیشن کے پاس سنہری موقع ہے کہ وہ غیر جانبداری کا ثبوت دے
اسپیکر پنجاب اسمبلی چودھری پرویز الٰہی سے پی ٹی آئی رہنما اسد قیصر نے ملاقات کی۔
اس موقع پر چودھری پرویز الٰہی نے کہا الیکشن کمیشن اپنے پچھلے غلط کاموں کا دھونا دھو دے۔ پی ٹی آئی اور ق لیگ کے ورکر دھاندلی کو روکنے کیلئے پہرا دے رہے ہیں۔ بین الاقوامی میڈیا کی بھی حالات پر پوری نظر ہے ۔
اسد قیصر کاکہناتھاکہ ضمنی انتخابات میں لوٹے امیدواروں کو عبرتناک شکست ہوگی، دھاندلی کے تمام منصوبوں کا ڈٹ کر مقابلہ کیا جائے گا۔