لاہور کے مقامی ہوٹل میں متحدہ اپوزیشن کے ارکان کی موجودگی پر تحریک انصاف کے کارکن احتجاج کرنے پہنچ گئے۔
تحریک انصاف کے کارکن ریلی کی شکل میں ہوٹل کے باہر پہنچے، خواتین کارکن بھی ریلی میں شامل تھیں۔
ہوٹل کے باہر پولیس نفری تعینات ہے، مین بلیو وارڈ گلبرگ ٹریفک کے لیے بند کردیا گیا ہے۔
تحریک انصاف کے کارکنوں کی جانب سے شرم کرو حیا کرو کے نعرے لگائے جارہے ہیں، اپوزیشن ارکان بھی ہوٹل سے باہر آگئے، متحدہ اپوزیشن نے اپنی خواتین ارکان اسمبلی کو کمروں میں بھیج دیا۔
ن لیگ کے رہنما خواجہ عمران نذیر کے پولیس اور انتظامیہ کے ساتھ مذاکرات ہوئے جس کے بعد وہ ساتھی ارکان کو ہوٹل کے اندر لےگئے۔
خواجہ عمران نذیر کا کہنا تھا کہ اگر تحریک انصاف کے ورکرز یہاں سے نہ گئے تو ذمہ دار انتظامیہ ہوگی اور ہم بھی اپنے کارکنوں کو طلب کرلیں گے، جس کے بعد حالات کی ذمہ دار انتظامیہ ہوگی۔
ہوٹل کے اطراف راستے بند ہونے سے شہریوں کو مشکلات کا سامنا ہے، گلبرگ کے علاقے میں ٹریفک کا شدید دباؤ ہے۔
خیال رہے کہ گذشتہ روز اسپیکر نے پنجاب اسمبلی کا اجلاس ملتوی کردیا تھا جس کے بعد اپوزیشن ارکان نے ایوان سے باہر جانے سے انکار کردیا تھا تاہم بعد ازاں اپوزیشن نے طے کیا کہ وزیراعلیٰ کے انتخاب تک ارکان گھر نہیں جائیں گے۔

پاکستان تحریک انصاف (پی ٹی آئی) کے منحرف رکن پنجاب اسمبلی علیم خان نے عمران خان پر تنقید کرتے ہوئے کہا ہے کہ 183 ارکان میں سےآپ کوکوئی ایک بندہ پسند نہیں آیا، آپ جس کو پنجاب کا سب سے بڑا ڈاکو کہتےتھے اسےکہتےہیں 183ووٹ ڈال دو۔
علیم خان نے کہا کہ ہم تو غدار بن گئے، چیمہ اور سالک کو بھی کہو غدار ہیں، پیسےلے لیے ہیں، علیم خان پر الزام لگاؤ تو سہی کہ اس نے پیسے لے لیے ہیں، مجھےآپ پر اور ان لوگوں پر افسوس ہوتا ہے جو الزامات لگاتےہیں،میں نے 2010 سے 2018 تک بہت مشکل وقت گزارا ہے۔
علیم خان نے عمران خان کو مخاطب کرتے ہوئے کہا کہ میں امریکی سفیر کو آپ کے ساتھ آپ کے گھرمیں ملاتھا،کیا وہ غداری تھی؟ آپ نے اسمبلی توڑنی تھی تو پہلے توڑ دیتے، قوم کے سامنے کہہ رہا ہوں،جس دن ووٹ دوں گا اس کے 2 دن بعداستعفیٰ دوں گا۔
علیم خان نے مزید کہا کہ جہانگیرترین کی بیٹیوں کے خلاف آپ نے پرچے کٹوادیے، آپ کو کوئی شرم نہیں آئی کہ اپنےمخلص ساتھی کوجیل میں ڈال دیا،عثمان بزدار کی ایک ایک کرپشن آپ کو بتائی گئی، جوآپ کےساتھ ہے وہ محب وطن، دوسرےغدار ہیں، آپ کیا ملک کے مامے ہیں۔
علیم خان نے کہا کہ فرح بی بی نےبہت رشوت لی، میرےذرائع نے بتایا ہے وہ بھاگ گئی ہیں، خان صاحب کی فیملی کے بارے میں کچھ نہیں کہوں گا، فرح بی بی نے یہاں بہت رشوت لی ہے، فرح بی بی ہر ٹرانسفر پوسٹنگ میں ملوث ہیں، فرح بی بی پاکستان سے بھاگ چکی ہیں، ان کے شوہر بھی بھاگ چکے ہیں، فرح بی بی پیسے کِسے پہنچاتی تھیں، بیوروکریٹ پکڑے جائیں گے تو سب سامنے آجائے گا۔
انہوں نے مزید کہا کہ ’خان صاحب اگر بزدار کو وزیراعلیٰ بنانا تھا تو مجھے نیب کے پاس بھیجنے کی کیا ضرورت تھی، میں نے تو کبھی نیب کا دفتر بھی نہیں دیکھا تھا، چوتھی مرتبہ نیب کےدفترگیا تو ٹی وی پردیکھا کہ بزدارکو وزیراعلیٰ بنادیا۔

پنجاب اسمبلی میں کل رات گئے تک اپوزیشن کا احتجاج جاری رہا اور اس دوران اسمبلی کی لابی اور ایوان میں توڑ پھوڑ کی وڈیو سامنےآگئی۔
وڈیومیں لابی میں میز کے شیشے ٹوٹے، کرسیاں اور صوفے بکھرے ہوئے دیکھے جاسکتے ہیں۔
اسمبلی سیکرٹریٹ کو ایوان اور لابی کے نقصان کا تخمینہ لگانےکا حکم دے دیا گیا ہے۔ ذرائع کا کہنا ہے کہ اپوزیشن کےاحتجاج میں ہونیوالےنقصان سےمتعلق رپورٹ مرتب کرنےکافیصلہ کیا گیا ہے۔
ذرائع کے مطابق اسمبلی سیکرٹریٹ نقصان پر قانونی کارروائی کی سفارش کرے گا۔
خیال رہے کہ گزشتہ روز پنجاب اسمبلی میں وزیراعلیٰ کے انتخاب کے لیے ووٹنگ نہ ہوسکی تھی اور ڈپٹی اسپیکر نے ہنگامہ آرائی کو جواز بناتے ہوئے اجلاس 6 اپریل تک ملتوی کر دیا تاہم اپوزیشن اور اتحادی جماعتوں کے ارکان نے اسمبلی ہال سے باہر جانے سے انکارکردیا تھا۔
اپوزیشن اور حکومتی اراکین کی ہنگامہ آرائی کے باعث اجلاس صرف 6 منٹ ہی چل سکا، خواتین ارکان آپس میں گتھم گتھا ہوگئیں، نامناسب الفاظ کا استعمال کیا گیا، ڈپٹی اسپیکر کی جانب سے اجلاس ملتوی کیے جانے پر اپوزیشن اور اتحادی جماعتوں کے ارکان نے اسمبلی ہال سے باہر جانے سے انکار کردیا، ارکان نے دو روز تک پنجاب اسمبلی میں رہنے ہی کا فیصلہ کیا ہے۔

پنجگور اور نوشکی میں ایف سی کی چیک پوسٹوں پر دھماکے سے متعلق ہونے والی تفتیش میں اہم پیش رفت سامنے آئی اور 2 سہولت کاروں کو گرفتار کر لیا گیا ہے۔
ایس ایس پی انوسٹی گیشن سینٹرل کے مطابق پولیس اور حساس ادارے نے مشترکہ کارروائی پر بلال کالونی سے 2 سہولت کاروں کو گرفتار کرلیا، گرفتار سہولت کاروں سے دستی بم، پستول، لیپ ٹاپ اور موبائل فونز برآمد کر لئے گئے ہیں۔
ایس ایس پی شہلا قریشی کے مطابق گرفتار سہولت کاروں سے 2700 ایکٹو سمز، بایئو میٹرک اور الیکٹرانک ڈیوائسز بھی برآمد کی گئی ہیں، گرفتار سہولت کار کراچی میں بائیو میڑک کر کے پنجاب میں سمز فروخت کرتے ہیں، سہولت کاروں نے ہی سمز منظم تخریب کاری گروپ تک پہنچائیں۔
شہلا قریشی کا مزید کہنا تھا کہ سہولت کاروں نے تخریب کاری میں رابطے کے لئے استعمال ہونے والی سمز کو ایکٹو کیا تھا، تخریب کاری میں 5 جوان شہید ہوئے تھے، دہشتگردی کی واردات کی ذمہ داری کالعدم تنظیم نے قبول کی تھی، گرفتار سہولت کاروں کے نیٹ ورک کے مزید ساتھیوں کی تلاش جاری ہے۔