کراچی: (ویب ڈیسک) پاکستان پیپلزپارٹی کے شریک چیئر مین اور سابق صدر آصف علی زرداری نے کہا ہے کہ سیاسی جماعتوں اور اسٹبلیشمنٹ کے تعلقات میں وقت کے ساتھ بہت بہتری آئی ہے اور وقت کے ساتھ اور بہتری آئے گی۔
ان خیالات کا اظہار سابق صدر نے کراچی میں صوبائی وراء سے ملاقات کے دوران کیا۔
ان کا کہنا تھا کہ کاش عمران خان کو صحافیوں کے حقوق کا خیال اپنے دور حکومت میں بھی آجاتا، پپیلزپارٹی کے دور حکومت میں ہمیشہ صحافیوں کو آزادی ملی ہے اور ملتی رہے گی۔ عمران خان کا دور آزادی صحافت کے لحاظ سے سیاہ دور رہا ہے۔
اپنی بات کو جاری رکھتے ہوئے آصف علی زرداری نے کہا کہ سیاسی جماعتوں اور اسٹبلیشمنٹ کے تعلقات میں وقت کے ساتھ بہت بہتری آئی ہے اور وقت کے ساتھ اور بہتری آئے گی کیونکہ سب کا مقصد ملک کی ترقی اور جمہوریت کی مضبوطی ہے۔
ان کا کہنا تھا کہ ہم سب نے وقت سے بہت کچھ سیکھا ہے، اس ملک کو اتحادی حکومت، اسٹبلیشمنٹ اور عدلیہ ، سب نے ملکر اور آئین کی پاسداری کرتے ہوئے اس بحران سے نکالنا ہے جس میں عمران خان ہمیں چھوڑ کر گیا ہے۔

اسلام آباد: (ویب ڈیسک) وزیراعظم شہباز شریف نے مسلم لیگ ن کی نائب صدر مریم نواز اورکیپٹن (ر) صفدر کے کورونا میں مبتلا ہونے پر دونوں کے لیے نیک تمناؤں کا اظہار کیا ہے۔
ٹوئٹر پر ایک بیان میں شہباز شریف کا کہنا تھا کہ یہ سن کر دکھ ہوا کہ مریم بیٹی اورکیپٹن صفدرکا کووڈ ٹیسٹ مثبت آیا ہے، دونوں کی جلد صحت یابی کے لیے میری دلی دعائیں اور نیک تمنائیں ان کے ساتھ ہیں۔
وزیراعظم کا مزید کہنا تھا کہ جس طرح مریم نے مسلم لیگ ن کی سیاسی مہم کی قیادت کی، اس پر ہم سب کو فخر ہے۔
خیال رہےکہ مریم نواز نے ٹوئٹر پر جاری بیان میں بتایا تھا کہ ان کا کووڈ ٹیسٹ مثبت آیا ہے۔
واضح رہےکہ مریم نواز پنجاب کے ضمنی انتخابات میں ن لیگ کی انتخابی مہم چلارہی تھیں اور گزشتہ چند دن میں انہوں نے پنجاب کے مختلف شہروں میں انتخابی جلسےکیے تھے۔
خیال رہےکہ پنجاب کے 20حلقوں میں ضمنی انتخاب کے لیے پولنگ کل بروز 17 جولائی کو ہوگی جس میں پاکستان تحریک انصاف اور مسلم لیگ ن کے درمیان سخت مقابلے کی توقع ہے۔

حیدرآباد: (ویب ڈیسک) صوبائی وزیراطلاعات شرجیل انعام میمن نے کہا ہے کہ حیدرآباد واقعے پر کسی کو سیاست چمکانے کی اجازت نہیں دی جائے گی اور جو شرانگیزی پھیلائے گا اُس کے خلاف بلا تفریق کارروائی کریں گے۔
حیدرآباد میں میڈیا سے گفتگو کرتے ہوئے شرجیل میمن نے کہا کہ حیدرآباد میں بلال نامی نوجوان کے قتل کے بعد سندھ حکومت نے تمام جماعتوں سے رابطے کیے اور سب نے ہی امن و امان برقرار رکھنے پر اتفاق کیا۔
انہوں نے کہا کہ لسانی فساد کی کوشش کو ناکام بنایا جائے گا اور کسی کو سیاست چمکانے کی اجازت نہیں دی جائے گی، حکومت کسی کو یہ اختیار بھی نہیں دے گی کہ وہ اس معاملے پر شرانگیزی پھیلائے۔
شرجیل میمن نے عوامی نیشنل پارٹی سندھ کے صدر اور قوم پرست رہنماؤں کی جانب سے امن برقرار رکھنے کے بیانات اور کاوشوں کو سراہتے ہوئے کہا کہ ایسی کاوشوں سے ہم لسانی فساد کی کوشش کو ناکام بنائیں گے۔

لاہور: (ویب ڈیسک) پاکستان مسلم لیگ ن کی نائب صدر مریم نواز نے کہا ہے کہ دھاندلی پاکستان تحریک انصاف (پی ٹی آئی) کے ڈی این اے میں ہے۔
ان خیالات کا اظہار پاکستان مسلم لیگ ن کی نائب صدرنے سماجی رابطے کی ویب سائٹ ٹویٹر پر کیا۔
انہوں نے لکھا کہ دھاندلی پی ٹی آئی کے ڈی این اے میں شامل ہے، اب تھیلے اور الیکشن کمشن کا عملہ چُرا کر نہیں بھاگ سکتے، اب یہ دھاندلی کا دوسرا طریقہ نکال لائے، یہ جانتے ہیں دھاندلی کیے بغیر یہ نا پہلے الیکشن جیتے تھے نا انشاءاللّہ اب جیت سکتے۔
مریم نواز نے کہا کہ یہ سیلیکشن نہیں،الیکشن ہو رہاہے، مسٹر ایکس وائے زیڈ آخر میں دھاندلی خان خود نکلے گا!

کراچی: (ویب ڈیسک) صوبائی وزیر بلدیات ناصر حسین شاہ نے کہا ہے کہ سازش کے تحت لسانی فسادات کرانے کی کوشش کی گئی، جس کا مقصد بلدیاتی انتخابات کو متاثر کرنا ہے۔
صوبائی وزیر بلدیات ناصر حسین شاہ نے کراچی سمیت سندھ کے مختلف اضلاع میں ہونے والے فسادات پر ردعمل کا اظہار کرتے ہوئے کہا ہے کہ سازش کے تحت لسانی فسادات کرانے کی کوشش کی گئی، جس کا مقصد بلدیاتی انتخابات کو متاثر کرنا ہے۔
ان کا کہنا تھا کہ کچھ سیاسی لوگ مفادات کے لیے جرائم پیشہ لوگوں کو استعمال کر رہے ہیں، یہ فسادات کرانے کی سازش کہاں ہوئی؟ سندھ حکومت اس کی تحقیقات کرائے گی اور کسی قاتل کو معاف نہیں کیا جائے گا۔
واضح رہے کہ سندھ میں بلدیاتی انتخابات کے دوسرے مرحلے میں کراچی، حیدرآباد اور ٹھٹھہ ڈویژن میں آئندہ اتوار 24 جولائی کو پولنگ ہوگی۔
سندھ میں بلدیاتی انتخابات کے پہلے مرحلے میں پیپلز پارٹی نے نمایاں کامیابی حاصل کی تھی۔

کراچی: (ویب ڈیسک) کراچی میں ’سندھی پٹھان بھائی بھائی‘ کے عنوان سے مختلف سیاسی جماعتوں اور قومیتوں کی جانب سے امن ریلیاں نکالی گئیں۔
سندھ خصوصاً کراچی میں بعض شرپسند عناصر کی جانب سے لسانی تنازعات کو بڑھاوا دینے کی کوشش کی جارہی ہے لیکن دوسری طرف یہاں کے مختلف سیاسی اور قومیتوں کے سرکردہ افراد اتحاد اور یکجہتی کو فروغ دے رہے ہیں۔
اس سلسلے میں ملیر کینٹ کے قریب بٹھائی آباد میں مختلف سیاسی جماعتوں اور سماجی تنظیموں نے ’سندھی پٹھان بھائی بھائی‘ کے عنوان سے پرامن ریلی نکالی۔
ریلی کا آغاز بھٹائی آباد کے مرکزی بازار سے ہوا جو مختلف مقامات سے گزرتے ہوئے اختتام پذیر ہوئی۔
اس ریلی کی دلچسپ بات یہ دیکھنے میں آئی کہ ملکی، صوبائی اور مقامی سطح پر سیاسی طور پر حریف پاکستان پیپلز پارٹی، تحریک انصاف، پاکستان مسلم لیگ ن، تحریک لبیک سمیت مختلف سیاسی جماعتوں کے مقامی رہنما بھی شریک تھے۔
ریلی کے شرکا نے بینرز اور پلے کارڈز اٹھا رکھے تھے جن پر امن اور یکجہتی کے نعرے درج تھے۔ ریلی کے موقع پر ملیر کینٹ پولیس کی جانب سے سکیورٹی کے انتظامات بھی کیے گئے تھے۔
دوسری جانب سندھی پٹھان بھائی بھائی کے عنوان سے ملیر میں بھی مختلف قومیتوں کی جانب امن ریلی نکالی گئی۔ ریلی کے شرکا پیپری بن قاسم روڈ اور نیشنل ہائی وے سے ملیر پریس کلب تک پہنچے۔
ریلی کے شرکا نے قومی یکجہتی کے نعرے لگا ئے۔

اسلام آباد: (ویب ڈیسک) سابق وزیراعظم اور پاکستان تحریک انصاف (پی ٹی آئی) کے چیئر مین عمران خان نے کہا ہے کہ ہم اپنےملک میں کمزور فوج افورڈ نہیں کرسکتے۔ امپورٹڈ ٹولے نے آتے ہی این آر او ٹُو لے لیا، اب پوری ریاستی مشینری ان کو ضمنی الیکشن جتوانے میں لگی ہے۔بحیثیت وزیراعظم مجھے 3 سال عدالت سے ریلیف نہیں ملا۔
اسلام آباد میں سیمینار سے خطاب کرتے ہوئے پاکستان تحریک انصاف (پی ٹی آئی) کے چیئر مین کا کہنا تھا کہ میں ایوب خان کے دور میں بڑا ہوا، ہم نے کبھی جمہوریت نہیں دیکھی تھی، اگر عدالتیں انصاف دے رہی ہیں تو ہم کبھی تباہ نہیں ہوں گے، میں 18سال کی عمر میں برطانیہ گیا وہاں جمہوریت دیکھی، مغربی ممالک میں جمہوریت مستحکم ہے، پاکستان میں طاقتور شخص قانون سے اوپر ہے، برطانیہ میں قانون کی بالادستی ہے جس کی وجہ سے جمہوریت مضبوط ہے۔
انہوں نے کہا کہ اللہ نے انسان کو زمین پر انصاف کے لیے بھیجا ہے، برطانیہ میں کسی کی کردار کشی کرنے پر سخت قوانین ہیں، قانون کی حکمرانی نہ ہونے کی وجہ سے ملک تباہ ہوا، یورپ میں آزادی اظہار رائے کی اجازت ہے، یورپ میں کسی کی کردار کشی نہیں کی جا سکتی، خوشحال اور غریب معاشرے میں صرف قانون کا فرق ہے، جس معاشرے میں انصاف ہو وہ کامیاب ہوتا ہے، میں نے کبھی بھی جمہوریت نہیں دیکھی تھی، میں 18 سال کی عمر میں برطانیہ گیا تو جمہوریت دیکھی ، سارے آمروں نے خود کو قانون کے اوپر رکھ دیا اداروں کو کمزور کیا، آمروں نے ملکی اداروں کو کمزور دیا، جب آمر جمہوری بننے کی کوشش کرتا ہے تو میڈیا کو کنٹرول کرتا ہے، عدلیہ بحالی تحریک چلی تو پرویز مشرف نے میڈیا کو کنٹرول کیا۔
سابق وزیراعظم نے کہا کہ یہ دونوں خاندان کرپشن میں پکڑے گئے، جس معاشرے میں قانون اور انصاف ہے وہ خاموش ہے، پرویز مشرف نے اقدتار سنھبالا تو لوگ خوش تھے۔ دو خاندانوں کے دورمیں رول آف لاء کیوں نہیں آیا، ان دو خاندانوں نے میڈیا کو کنٹرول کیا۔
ان کا کہنا تھا کہ وزیراعظم کی حیثیت سے جتنی مجھ پر تنقید کی گئی کسی اور پر نیں کی گئی۔ بحیثیت وزیراعظم مجھے تین سال عدالت سے ریلیف نہیں ملا۔ میڈیا کو پیسے کھلانے کی کبھی کوشش نہیں کی۔ میں وزیراعظم بنا تو مجھے میڈیا سے کوئی خطرہ نہیں تھا۔ میرے وزیروں کے خلاف ٹیکس چوری کی فیک نیوز چلائی گئیں، بطورِ وزیراعظم میری ہدایت تھی کسی صحافی کو نہیں اٹھانا۔
پاکستان تحریک انصاف کے سربراہ نے کہا کہ آج عوام اور فوج میں فاصلے بڑھ رہے ہیں، ہم اپنی فوج کو کمزور نہیں کر سکتے، مضبوط فوج ملک کے لیے بہت ضروری ہے، ہم اپنے ملک میں کمزور فوج افورڈ نہیں کرسکتے کیونکہ جن ممالک کی فوج کمزور تھی ان کا حال سب نے دیکھا۔ جنہوں نے بھی امریکی سازش نہ روکنے کا فیصلہ کیا بتائیں یہ ملک کے مفاد میں ہے؟ صدر مملکت نے سائفر چیف جسٹس کو بھیجا لیکن سائفر کے معاملے کو دبانے کی کوشش کی گئی اور یہ بھی کہا گیا کہ ایسے سائفر تو آتے رہتے ہیں۔ سپریم کورٹ اس سائفر کی انکوائری نہیں کرتا الٹا دھمکی دیتا ہے۔
ان کا کہنا تھا کہ ایسے سائفر تو بنانا ری پبلک کو بھی نہیں آتے، سوال ہے کیا اس طرح کسی بڑے ملک کے منتخب وزیراعظم کو ہٹایا جاسکتا ہے؟ اگر آج ایسا ہوا تو آگے کوئی کسی کی دھمکی کے سامنے کھڑا ہوسکے گا؟ ملک فیصلہ کن موڑ پر کھڑا ہے، یہ سازش تھی یا مداخلت تھی، ہم نے تمام فورمز پر یہ معاملہ اٹھایا، ان لوگوں نے یہ معاملہ دبا دیا۔
عمران خان نے کہا کہ جمہوریت اخلاقیات کی بنیاد پر چلتی ہے، برطانیہ میں اخلاقیات ہیں اسی لیے وہاں جمہوریت ہے، وہاں اظہار رائے کی آزادی ہے، کسی کی کردار کشی نہیں کی جاتی اس لیے کہ ان کا اخلاقی معیار بہتر ہے، لیکن یہ رویہ میں نے پاکستان میں کبھی نہیں دیکھا۔ برطانیہ میں بھاری اکثریت سے جیتنے والے بورس جانسن کو صرف جھوٹ بولنے پر فارغ کردیا گیا، لیکن یہاں شہباز شریف اور بیٹے پر فرد جرم لگنے والی تھی تو انہیں وزیراعظم اور وزیراعلیٰ بنادیا گیا۔ حمزہ شہباز پنجاب میں غیر آئینی وزیراعلیٰ بنا ہوا ہے اور وہاں ضمنی الیکشن جیتنے کے لیے انہوں نے پوری ریاستی مشینری لگائی ہوئی ہے۔
ان کا کہنا تھا کہ قوم اس وقت اسٹیبلشمنٹ کی طرف دیکھ رہی ہے کیونکہ طاقت انکے پاس ہے، معاملات درست کرنے کیلئے تعمیری تنقید ضروری ہے، تعمیری تنقید سے اسٹیبلشمنٹ کو نقصان نہیں فائدہ ہوگا، صحافیوں کو تعمیری تنقید کرنے کا موقع دینا چاہیے کیونکہ تنقید ہی بند کردینگے تو کیا درست ہے کیا غلط ہے؟ فیصلہ ہی مشکل ہوجائے گا۔سوشل میڈیا پر گند اور غلیظ چیزیں آرہی ہیں، اس وقت پوری دنیا میں بحث چل رہی ہے کہ سوشل میڈیا کو کیسے سنبھالا جائے۔
عمران خان نے کہا کہ ہماری معیشت برباد ہوتی جا رہی ہے پاکستان اس وقت دنیا میں ڈیفالٹر کے طور پر چوتھے نمبر پر ہے، تمام فیصلے بند کمروں میں ہو رہے ہیں، ایک ہی راستہ بچا ہے اور وہ ہے شفاف الیکشن ہیں، آج بھی کہتا ہوں شفاف الیکشن کے بغیر مسائل کا حل ممکن نہیں۔ مارشل لا کا وقت نکل چکا ہے بس ہمیں اپنی جمہوریت مضبوط کرنا ہے اور جمہوریت کی مضبوطی کیلئے میڈیا کا آزاد ہونا ناگزیر ہے، کوئی نیا قانون بنانے کی ضرورت نہیں جو قانون ہے اس پرعمل کرنا چاہیے کیونکہ معاشرے کو بچانے کیلئے سوشل میڈیا کو ریگولیٹ کرنا ضروری ہے۔ 2 خاندان کرپشن میں پکڑے گئے جس کے بعد انہوں نے عدلیہ اور میڈیا کو کنٹرول کیا۔ ان 2 خاندانوں کے دور میں کیوں رول آف لا نہیں آیا، انہیں جب تک قانون کے نیچے نہیں لائیں گے مسائل حل نہیں ہونگے۔
ان کا کہنا تھا کہ اظہار رائے کی آزادی کے بغیر کوئی معاشرہ ترقی نہیں کرسکتا۔ جتنی تنقید مجھ پر ساڑھے 3 سال میں میڈیا نے کی کسی اور وزیراعظم پر نہیں ہوئی، میرے وزیروں کے خلاف ٹیکس چوری کی فیک نیوز چلی لیکن میں نے تو میڈیا کو کبھی پیسا نہیں کھلایا اور نہ کبھی کبھی میڈیا کو کنٹرول کرنے کی کوشش کی۔ ہم نے اپنے دور میں عدالت پر اثر انداز ہونے کی کوشش نہیں کی، عدالتی فیصلوں کے لیے کبھی کال نہیں کی۔

لاہور: (ویب ڈیسک) لاہور ہائیکورٹ نے بڑا فیصلہ سناتے ہوئے ضمنی الیکشن میں الیکشن کمیشن آف پاکستان (ای سی پی) کا متعلقہ حلقے سے پولنگ ایجنٹس مقرر کرنے کا نوٹیفکیشن معطل کر دیا۔
واضح رہے کہ پاکستان تحریک انصاف کی رہنما ڈاکٹر یاسمین راشد نے الیکشن کمیشن کی جانب سے ضمنی انتخابات کے لئے پولنگ ایجنٹس کی تعیناتی کا فیصلہ چیلنج کیا تھا۔
لاہور ہائیکورٹ نے پنجاب کے ضمنی انتخابات میں متعلقہ حلقے سے ہی پولنگ ایجنٹس مقرر کرنے کے الیکشن کمیشن کے فیصلے کے خلاف درخواست کی سماعت کی۔
دوران سماعت جسٹس شاہد جمیل نے کہا کہ پولنگ ایجنٹس کی چند ذمہ داریاں ہیں، پولنگ ایجنٹ ووٹ ڈالنے والے بندے کی نشاندہی کر سکتا ہے۔
پاکستان تحریک انصاف کے وکیل کا کہنا تھا کہ پولنگ ایجنٹس کہیں سے بھی لیے جا سکتے ہیں، ضروری نہیں ہے پولنگ ایجنٹس متعلقہ حلقے کا ہی ہو، پہلے بھی یہی ہوتا تھا لیکن اب تو الیکشن کمیشن نے باقاعدہ نوٹیفکیشن جاری کر دیا ہے۔
سماعت کے دوران عدالت نے استفسار کیا کہ آج سے پہلے کبھی الیکشن کمیشن نے پولنگ ایجنٹس کے حوالے سے کوئی نوٹیفیکیشن کیا؟۔ وکیل نے جواب دیا کہ آج سے پہلے کبھی نہیں کیا۔
جس پر عدالت نے کہا کہ زبانی کیسے ایسا حکم جاری کیا جاسکتا ہے۔ اس پر وکیل الیکشن کمیشن نے کہا کہ حلقہ کے باہر سے لوگ آئے تو لڑائی جھگڑا اور پولنگ کا عمل متاثر ہو سکتا ہے۔
عدالت نے کہا کہ باہر سے کوئی خلائی مخلق تو نہیں آنی، الیکشن کمیشن کو صاف شفاف طریقے سے الیکشن کرانے چاہئیں۔ لاہور ہائیکورٹ نے الیکشن کمیشن کا متعلقہ حلقے سے پولنگ ایجنٹس مقرر کرنے کا نوٹیفکیشن معطل کر دیا۔ صرف ضمنی انتخابات کے لیے یہ نوٹیفیکیشن معطل کیا گیا۔ ضمنی انتخابات کے بعد الیکشن کمیشن رولز میں ترمیم کرکے پولنگ ایجنٹس کی تقرری متعلقہ حلقے سے کرنے کا حکم دیا جاسکتا ہے۔