اسلام آباد: (ویب ڈیسک) شہباز شریف نے کہا ہے کہ اگر کوئی بیرونی خط تھا تو 24 مارچ کو تحریک عدم اعتماد پر ووٹنگ کیوں منظور کی گئی، عمران نیازی نے آئین شکنی کر کے سول مارشل لاء نافذ کیا، جلد بازی میں رولنگ دی گئی، تحریک عدم اعتماد پر شکست کے خوف سے جمہوریت کو مسخ کیا گیا۔
شہباز شریف نے متحدہ اپوزیشن رہنماؤں کے ہمراہ پریس کانفرنس کرتے ہوئے کہا کہ عمران نیازی نے کل سویلین مارشل لا نافذ کیا، 3 نومبر 2007 کو مشرف نے بھی یہی غیر آئینی حرکت کی تھی، عمران خان اور ان کے حواریوں نے آئین کی واضح خلاف ورزی کی، گزشتہ دن ملکی سیاست میں سیاہ دن کے طور پر یاد رکھا جائے گا، تحریک کو ہر صورت کل ووٹنگ کیلئے پیش کیا جانا تھا، عمران نیازی نے ڈپٹی اسپیکر کو اپنا آلہ کار بنایا، انہوں نے جمہوریت کو مسخ کیا، آئین شکنی کی۔
لیگی رہنما کا کہنا تھا کہ سپریم کورٹ نے کہا کوئی ماورائے آئین اقدام نہ کیا جائے، ماورائے آئین اقدام تو عمران نیازی اٹھا چکا ہے، اٹارنی جنرل نے کہا تھا ووٹنگ ہر صورت ہوگی، اگر مراسلہ آچکا تھا تو 24 مارچ کو اعتراض کیوں نہیں اٹھایا گیا، عمران نیازی اپنی سیاسی شکست کا سامنا نہیں کر سکتے تھے۔
بلاول بھٹو کا کہنا تھا کہ کل قومی اسمبلی میں آئین کو توڑا گیا، تحریک عدم اعتماد وزیراعظم کو ہٹانے کا جمہوری طریقہ تھا، وزیراعظم کو اندازہ نہیں کہ ہوا کیا ہے، جمہوری عمل کو سبوتاژ کیا گیا، آئین کا دفاع ہر پاکستانی کی ذمہ داری ہے، کارکن جشن منا رہے ہیں کہ عمران خان کی حکومت ختم ہوگئی، ہمیں آئین کو توڑے جانے پر زیادہ تشویش ہے۔
چیئرمین پیپلزپارٹی نے کہا کہ ہم نے عدم اعتماد کے ذریعے حکومت کا جینا حرام کیا، یہ اپنی حکومت ختم ہونے پر جشن منا رہے ہیں، ہم جمہوریت اور آئین کا تحفظ کرنیوالے ہیں، اپنی انا کی وجہ سے عمران نیازی نے یہ سب کیا، عدم اعتماد سے پہلے مستعفی ہو کر جمہوری عمل مکمل کیا جاسکتا تھا، عوام فیصلہ کریں عمران خان کی انا اہم یا آئین۔ بلاول بھٹو نے معاملے پر فل کورٹ بنچ تشکیل دینے کا مطالبہ کر دیا۔

لاہور: (ویب ڈیسک) منی لانڈرنگ کیس میں عدالت نے شہباز شریف کی ضمانت منسوخی کی درخواست پر فیصلہ محفوظ کرلیا۔
منی لانڈرنگ کیس میں شہباز شریف کی ضمانت منسوخ کرانے کی ایف آئی اے کی درخواست پر سماعت ہوئی۔ وکیل ایف آئی اے نے موقف اپنایا کہ شہباز شریف عبوری ضمانت پر ہیں، شہباز شریف کا ہر صورت عدالت میں پیش ہونا ضروری ہے۔
جج سپیشل کورٹ نے استفسار کیا کہ عدالت اپنے حکم پر کیسے نظر ثانی کر سکتی ہے۔ جس پر وکیل ایف آئی اے نے کہا کہ اعلی عدالتوں کی دو نظیریں پیش کی ہیں جس کے مطابق عدالت کے پاس اختیار ہے۔

لاہور: (ویب ڈیسک) وزیراعلیٰ پنجاب عثمان بزدار کے اعزاز میں الوداعی تقریب منعقد ہوئی۔ سی ایم آفس، پولیس اور انتظامی افسروں نے شرکت کی۔ اعلی حکام نے وزیراعلیٰ عثمان بزدار کی خدمات کو بھرپور خراج تحسین پیش کیا۔ سرکاری امور میں میرٹ کے فروغ کے لئے وزیراعلیٰ عثمان بزدار کے ویژن کو سراہا گیا۔
اس موقع پر وزیراعلیٰ عثمان بزدار کا کہنا تھا کہ ہمیشہ جائز کام کئے، میرٹ کو مد نظر رکھ کر مشاورت سے فیصلے کئے، کسی کو کبھی بھی غلط کام کا نہیں کہا، ضمیر مطمئن ہے، لوگوں کو عزت دی، کسی کی عزت نفس کو مجروح نہیں کیا، میرے دور میں کسی کو سیاسی انتقام کا نشانہ نہیں بنایا گیا، ذاتی تشہیر کا قائل ہوں نہ کبھی کی، خاموشی سے کام کرنے کا عادی ہوں۔
عثمان بزدار کا کہنا تھا کہ انسان ہوں، غلطی ہو سکتی ہے، مشکل فیصلے کرنے سے کبھی نہیں گھبرایا، نیک نیتی سے عوام کی خدمت کرنے کی بھرپور کوشش کی، عوام کے بہترین مفاد میں ازخود وزیر اعظم عمران خان کو استعفیٰ دیا، وزیر اعظم عمران خان نے جو بھی فیصلہ کیا اس کی تائید اور حمایت کرتے ہیں، بھرپور تعاون اور معاونت کرنے پر حکومت پنجاب کے ہر افسر اور اہلکار کا ممنون ہوں، بیوروکریسی عوام کی خدمت کا مشن جاری رکھے، عوام کی فلاح و بہبود کیلئے ہمیشہ کوشاں رہوں گا۔

لاہور: (ویب ڈیسک) بلاول بھٹو نے کہا ہے کہ طاقت کا سرچشمہ عوام ہیں، قائد عوام جوہری پروگرام کی بنیاد رکھی، ،ملک کو ناقابل تسخیر بنایا۔
چیئرمین پیپلزپارٹی بلاول بھٹو زرداری نے ذوالفقار علی بھٹو شہید کے 43 ویں یومِ شہادت پر اپنے پیغام میں کہا کہ پاکستان پیپلز پارٹی قائد عوام ذوالفقار علی بھٹو شہید کے فلسفے اور افکار پر سختی سے پابند ہے، پیپلز پارٹی آئین کی حفاظت اور حقیقی جمہوریت کے قیام کی جدوجہد میں ہمیشہ کی طرح قائدانہ کردار ادا کرتی رہے گی، اس اصول کہ طاقت کا سرچشمہ عوام ہے پر کوئی سمجھوتہ نہیں کیا جائے گا۔
بلاول بھٹو کا کہنا تھا کہ ذوالفقار علی بھٹو شہید نے عوام کو شعور دیا اور متفقہ آئین دے کر ریاست کو مضبوط بنایا، قائدِ عوام نے جوہری پروگرام کی بنیاد رکھ کر ملک کو ناقابلِ تسخیر بنایا، یہ قائدِ عوام تھے، جنہوں نے تختہ دار پر چڑھ کر دنیا کو ایک پیغام دیا۔

اسلام آباد: (ویب ڈیسک) پنجاب کے سیاسی محاذ اور آپشنز پر غور کرنے کے لئے وزیر اعظم عمران خان نے وزیر اعلی پنجاب عثمان بزدار کو اسلام آباد بلالیا۔
وزیراعظم نے گورنر پنجاب عمر سرفراز چیمہ کو بھی اسلام آباد بلالیا۔ تحریک انصاف کے سینئر رہنما میاں محمود الرشید کو بھی اسلام آباد پہنچنے کی ہدایت کر دی۔ پنجاب کے سیاسی بحران میں ممکنہ آپشنز ہر مشاورت ہوگی۔ پنجاب کی نمبر گیمز بارے وزیر اعلی اور میاں محمود الرشید وزیر اعظم کو بریف کریں گے۔
گورنر پنجاب بھی آئندہ لائحہ بارے اپنی تجاویز دیں گے۔ پنجاب کے حوالے سے سیاسی پلان کو حتمی شکل دی جائے گی۔